رواية دار الايتام الفصل الخامس والثلاثون

 

 

دار الايتام 

الفصل الخامس والثلاثون...

بعد مرور حوالي ساعه

مسك ليل موبايله..

ليل... الووووو

.........ايوه ياليل.

ليل... انا وصلت فينك.

....... مستنياك في المكان زي ما قولتلك..

....... انا داخل عليكي.

عشق... كانت حاسه ان في حاجه والميتنج ده بالنسبالها غريب...لكن فضلت تستنى وتعرف لما توصل...

وصل ليل..اخيرا ركن عربيته ورا عربيه كان في ناس في المكان شغالين...

نزل ليل من عربيته ونزلت عشق...

واتفاجأت بواحدة بتقرب منهم بابتسامه وكل تركيزها على ليل وهو مبتسم وشكله مبسوط..

وقفت..ادامه...وهي مبتسمه عمرك ما اتأخرت عن مواعيدك..وقربت منه باسته

قرب منها ليل سلم عليها وباسها...

ليل... مقدرش اتأخر عليكي ياريما.❣️

عشق...💔💔💔

ريما... كنت فكراك مش هتيجي وتشوف المكان زي ما قولتلي

ليل....من امته وليل مبينفذش كلامه

صحيح... دي عشق ياريما اتعرفتو على بعض قبل كده في الشركة.

ريما...اه بس ملحقتش اتعرف...هاي ياعشق..

عشق..بابتسامه بسيطه...هاي.

ريما....ايه رأيك في المكان..

ليل... حلو زي صاحبته..

ابتسمت..ريما بإحراج..

اما عشق...فكانت حاسه انها في مكان صغير والدنيا بتضيق عليها..كانت حاسه ان في وجع في قلبها مش قادرة تحدده 

ابتدا ليل وريما يلفو في المكان وعشق ماشيه معاهم حاسه انها بتسحب في رجلها.. شايفه ليل ماشي ولا كأنه في الدنيا شيفاه مبسوط وبيضحك وكأنها مش موجوده..

ليل....عشق ايه رأيك في المكان..

عشق...كويس..

ليل... ريما تحبي تبدأي امته

ريما...الوقت اللي يناسبك 

ليل... الوقت اللي يناسبك انتي ياريما هنفذ فيه على طول

ريما ..والله انا فاضيه اي وقت ان شاءلله من بكره...بس انا الاسبوع الجاي مسافرة هأعد كام يوم بره مصر  ايه رأيك لما ارجع احسن...بس لو طبعا حابب تبدأ في اي وقت ومش هيفرق وجودي عادي ابتدي.

ليل... لا خليها لما تيجي عشان انا كمان مسافر الاسبوع الجاي..ومن ناحية وجودك يفرق فا اكيد هيفرق لازم تكوني موجودة...

ريما...ايه الصدفه دي رايح فين..

ليل...عندي صفقة في المانيا.. مسافر الخميس

ريما... مش معقول انا كمان مسافره المانيا وبردو يوم الخميس

ليل..ايه ده بجد

ريما...اه والله

ليل... طب ما تقولي مسافره امته يمكن نطلع على نفس الطيارة 

ريما...لا مش للدرجادي انا مسافره على طيارة 9 الصبح..

ليل... بابتسامه خساره انا طيارتي على 10بليل.

ريما... كده هوصل قبلك...مسافر لوحدك..

ليل... لا عشق مسافرة معايا..

ريما...اااه وبصت لعشق... يابختك ياعشق هتسافري مع ليل..

عشق... بسخرية... لو تحبي نبدل المواعيد واسافر انا الاول واستناكم هناك.

ليل...😡

ريما..... مع اني حساكي بتتريقي بس ياريت ينفع 

عشق...على فكرة انا حقيقي مش بتريق

ريما...لا ياستي شكرا انا هوصل قبلكم وبصت لليل.. بس ياريت تكون فاضي عشان اشوفك هناك.

ليل...اكيد هشوفك...طبعا بس حاولي ترجعي معانا بقى

ريما... هظبطها متقلقش..

ليل... ان شاء الله عموما احنا كده متفقين اول ما نرجع هنبتدي شغل على طول..

ريما... تمام.

ليل... انتي وراكي ايه الوقت.

ريما... ورايا حاجات كتير بخصوص المكان هنا هخلصها وبعد كده مش ورايا..

ليل... لو فاضيه بليل اشوفك.

ريما... طبعا فاضيه ياريت.

ليل... خلاص لو يناسبك الساعه 10هعدي عليكي..

ريما... يناسبني جدا..

ليل... خلاص 10بالدقيقة هكون عندك.

ريما... هستناك..

ليل... انا مضطر امشي الوقت عشان ورايا شغل

ريما... تمام وانا كمان هروح اخلص اللي ورايا

ليل.....قرب منها وباسها.  اشوفك بليل..

ريما... ان شاء الله... وكملت بابتسامه هستنى بليل يجي بسرعه

ابتسم. ليل لريما...سلام

ريما... سلام..

وكل واحد فيهم راح على عربيته واتحركوا...

اعدت عشق جمبه وهي من جواها هتنفجر ونفسها بس تيجي فرصه تأعد فيها لوحدها عشان تخرج فيها الشحنه اللي جواها والوجع اللي هي حاسه بيه...

اما ليل.  فاكان حاسس باللي هي بتمر بيه بس مكنش مديها اهميه ...

ليل...بعمليه... عشق عايزك تشرفي عالمشروع بتاع ريما ده بنفسك..

عشق...حاسه بكل كلمه بتطلع منه كأنها سكينه بتغرز في قلبها....عشق لنفسها تستاهلي ياعشق..سمحتي لنفسك تحبي حد مش ليكي سمحتي لنفسك ان حبك ليه يظهر واللي حواليكي يحسو بيه سمحتي لنفسك تتعري ادامو وتباني ضعيفه ويعرف انك بتحبيه. مقدرتيش تكذبيه حتى لما قالك مرتين انك بتحبيه مقدرتيش تقوليله لا مبحبكش مقدرتيش تنطقي وخلتيه يستقل بيكي...تستاهلي ياعشق كنتي بعيد عن الحب ووجع القلب كنتي بتنصحي البنات فالاول انهم ميعملوش كده وانتي نفسك وقعتي فالحب. والحب مش ليكي ياعشق...انتي جيتي الدنيا دي عشان تشقي وتتعبي فيها مش عشان تحبي وتتحبي ..

ليل... عشششششق.

عشق...هاا

ليل... بكلمك على فكرة

عشق... اسفه مخدتش بالي في حاجه

ليل... كنت بقولك عايزك تشرفي على مشروع ريما بنفسك..

عشق...انا

ليل...اه انتي في حاجة غريبة..

عشق...لا خالص  تمام...

رجعت عشق بصت عالطريق تاني...

اما ليل..  فكمل سواقه

وبعد فتره بسيطه... وصلو الشغل...

وطلعو عالمكتب... وكان الكل مشغول وكأن محدش حس بوجودهم من كتر الشغل اللي كان عندهم 

دخلت عشق على مكتبها.  وفضل ليل دافن نفسه فالشغل طول اليوم ومتلاشي تماما عشق..

..........................................

سهام...وقفت على باب الاوضه تخبط على باب اوضة نور قلقت لما لقتها مصحيتش كل ده..لما ملاقتهاش بترد فتحت الباب...مكنتش فالاوضه...

حست سهام بالقلق... لكن اطمنت لما لمحت خيالها عالكرسي في البلكونه..

دخلت سهام البلكونه...لقت نور نايمه...نومه متعبه جدا...

سهام...ايه ده نور انتي نايمه.. نور نور نور

نور...فتحت عينها براحه..

سهام...انتي نايمه هنا من امته..

نور... بتقوم براحه من الكرسي وهي جسمها مكسر...حضرتك هنا من امته

سهام... انا لسه داخله يا حبيبتي خبطت كتير بس انتي مردتيش فا قلقت وفتحت عليكي...والصبح بردو خبطت عليكي عشان تفطري معانا مردتيش 

نور... اسفه يا طنط مسمعتش وواضح اني نمت من امبارح هنا

سهام...انتي من امبارح نايمه كده يانور. وده ينفع يابنتي تتعبي من النومه دي كده

نور... محستش بنفسي والله... وكملت بحزن... نوح رجع

سهام... اشفقت عليها... لا يانور مرجعش لسه وموبايله مقفول. بس ليل قاللي انه هيعرف هو مختفي فين ويطمنا عليه...

نور....مش هيرجع طول ما انا موجودة ياطنط...انا لازم امشي عشان  نوح يظهر ويرجع.

سهام... تمشي تروحي فين ايه العبط اللي انتي بتقوليه ده ده بيت جوزك يانور.. وبعدين مين قال انه مختفي عشان انتي موجودة هو تلاقيه بس حابب يهدي ويفكر بالعقل مع نفسه...

نور... جوزي!!!   مؤقتا ياطنط نوح حسم الأمر خلاص وهو قالها بنفسه ادامكم انه هيضغط على نفسه انه يفضل معايا لحد ما يمر كام شهر ويسبني.

سهام... كلام كلام يا نور قاله وقت غضب وعصبيه. بس نوح بيحبك وهيرجع نوح ميقدرش يستغني عنك ياحبيبتي..انتي مشوفتيش كان عامل ازاي لما كنتي بتعامليه وحش...

نور...وهو الوقت حابب يردهالي. يمكن هو مجروح بس انا كمان كنت مجروحه وكان غصب عني. هو حضرتك شايفه اني كنت غلط او بالغت في رد فعلي.

سهام...لا يا نور ورد فعلك طبيعي جدا واي حد في مكانك كان عمل كده..بس هي دي دماغه وتفكيره بقى هنموته ولا نستحمله زي ما استحملنا..

نور...بس هو مش هيسامحني 

سهام... لا هيسامحك يانور لازم يسامحك وعلى فكره بقى على اد ما انا قلقانه عليه ومش مطمنه وهو بعيد كده

على اد ما انا واثقه ان اعدته لوحده دي هتديه فرصه يفكر ويعيد التفكير. في اللي قاله ويعرف انه كان غصب عنك وان الموضوع مش موضوع ثقه ويعرف ان رد فعلك وصدمتك دي كانت غصب عنك...

نور.... بارتياح من كلام سهام... يعني حضرتك شايفه انه ممكن يسامحني..

سهام... انا متأكده يانور....يلا بقى تعالي قومي خدي شاور عشان تفطري وتأعدي تذاكري.

نور... حاضر.

سهام...يلا ياحبيبتي انا هنزل ابلغهم يحضرولك احلى فطار ..

نور... ربنا يخليكي ليا ياطنط.

سهام... ويخليكي ليا يا احلى نور....

نزلت سهام..وخدت نور غيار ودخلت تاخد شاور بعد ما حست بالارتياح من كلام سهام..

.......................................

جاسر.... هو الاسبوع ده فاضي ولا انا متهيألي..

تمارا... فاضي ايه بس يا جاسر...ما الجدول ادامك اهو مليان مواعيد ولا انت غاوي تعب.

جاسر..لا والله مش حكاية غاوي تعب بس حاسس ان الجدول فاضي فعلا

تمارا..انهرده في ميتنج بليل وبكرة في اتنين وبعده اتنين وباقي الايام ما بين اتنين وواحد اهو 

جاسر... ماشي.. الميتنج الساعه 8

تمارا....لا الساعه 9 انت مالك مش مركز كده ليه..

جاسر... لا والله مركز بس يمكن المواعيد كلها دخله عندي في بعضها... المهم طمنيني بدأتي مذاكره ولا لا

تمارا ...لسه والله ياجاسر وحاسه اني قلقانه مش عارفه حاسه اني نست كل اللي كنت مذكراه.

جاسر.... متقلقيش ياحبيبي ده بس عشان بقالك كتير 

مذاكرتيش... لو محتاجه اي حاجه عرفيني لو في ماده مش قادره تخلصيها عرفيني واجبلك حد كويس يساعدك.

تمارا... لا مش مستاهله 

جاسر... تمارا لو محتاجه... تاخدي اجازه من الاسبوع ده معنديش مشكله. ولو على تظبيط المواعيد احنا مظبطين الاسبوع ده والاسبوع الجاي ظبطيه بس وبردو سيبيهولي

وبلاش الاسبوع ده تيجي الشركة ولا تحضري معايا اي ميتنج.

تمارا... لا طبعا كفايه عليا الاسبوعين بتوع الامتحانات...وبعدين انت عايز تخلص مني ولا ايه

جاسر... طب انا لو عليا مسبكيش حتى في البيت...اكيد لا طبعا بس عايزك تلمي الترم وتاخدي وقتك.

تمارا... لا متقلقش انا هقدر اظبط الدنيا.

جاسر...ان شاء الله ياحبيبي تعدي السنه دي بتقدير حلو كمان

تمارا... يارب ياجاسر..

جاسر...ان شاء الله يا قلب جاسر.. بقول ايه.

تمارا... هااا

جاسر.... مفيش..

قاطعته تمارا... اتلم ياجاسر.🤨

جاسر... وهو بيضحك على فكرة بقى انتي بقيتي قليلة الادب ودماغك دي شمال

تمارا...😳انا بردو

جاسر...ايوه انتي انا اقصد يعني مفيش فنجان قهوة

تمارا.... ماشي ياحبيبي هعملك حاضر.  لو اني عارفه انك مكنتش تقصد كده..

جاسر... بابتسامه.  بحبك يا رخمه

تمارا... بضحك...وانا بموت فيك ياقلب الرخمه😍

....................................

زهره...ادم...ادم..

ادم. ..........

زهره...اددددم

ادم...ايه في ايه مالك بتزعأي كده ليه

زهره... بنادي عليك وانت مش بترد🙄

ادم...معلش سرحت شويه ايه في حاجة.

زهره... ادم راجع كده الحساب ده 

ادم...خير في ايه 

زهره... في غلطه في الحساب ده انا راجعته مرتين ونفس الغلطه لقتها..

ادم...ازاي انا مراجع حساب الصفقه دي كويس

زهره... طيب شوفها كده. انا واثقه ان في غلطه في الحساب.

ادم...اد ايه.

زهره... نص مليون🙄

ادم...نعم لا طبعا اكيد حسبتي غلط استحاله اغلط في رقم كبير كده وريني كده

زهره... اتفضل..

مسك ادم الورقه وفضل يعيد الحساب..

اعدت زهره ادامه على مكتبه...مستنياه لحد ما يخلص..

عدى حوالي خمس دقايق.  وادم مركز 

ادم.....حط ايده على وشه..

زهره... ايه 

ادم... فعلا في غلطه...انا ازاي مخدتش بالي

زهره...مش قولتلك انا راجعتها مرتين والله.

ادم...كويس انك خدتي بالك كانت هتبقى مشكله..

زهره... مالك ليه مش مركز 

ادم...مش عارف حاسس اني مش مظبوط فعلا .

زهره... طيب لو حابب تاخد بريك وتفصل شويه سيب وانا اكمل 

ادم... لا مش مستاهله بس عايزك تراجعي ورايا بقيت الورق. عشان شكلي كده عكيت.

زهره... في حاجة مضيقاك..

ادم... لا خالص بس دماغي مشغوله شويه زهره  انا 

زهره... مالك يا ادم.

ادم... محتاج اتكلم معاكي.

...........

زهره... طيب اتكلم انا سمعاك.

ادم... مش هينفع هنا يا زهره.  انا محتاج اشوفك بره ينفع

زهره... سكتت وبتفكر

ادم... لو مش هينفع مش هزعل بس انا حقيقي محتاج اتكلم معاكي

زهره... ماشي يا ادم موافقه..

ادم... ابتسم 

زهره... امته 

ادم... لو فاضيه انهرده... تمام 

زهره... طيب تمام...

ادم.... يلا روحي شوفي اللي وراكي...وانا هراجع عالورق تاني وبردو انتي راجعي اللي معاكي.

زهره... حاضر...

..........................

نور... دافنه نفسها في المذاكره وبتحاول تشغل نفسها وكلام سهام كان مطمنها...

 ليل بيحاول ينشغل في شغله عشان  ميفكرش في عشق...

عشق....بتحاول تشغل نفسها بالشغل لكن مش قادرة توقف تفكير في كل حاجه بتحصل حواليها مش قادرة توقف وجع قلبها اللي حاسه بيه حتى لو دقايق...

جاسر...وتمارا... مشيو عشان الميتنج...

لسه مفيش اخبار عن نوح مختفي من امبارح....

خبط باب مكتب...ليل..

ليل....ادخل.

دخل ادم...

ادم..... ايه الاخبار

ليل... تمام.  خلصت ولا ايه..

ادم... اه خلصت خلاص انت لسه مخلصتش ولا ايه

ليل...لا خلاص خلصت وماشي الوقت عشان عندي مشوار

ادم...مشاويرك كترت😏

ليل...خليك في حالك..

ادم...ماشي ياعم هخليني في حالي انا ماشي وهاخد زهره معايا...

ليل...باستغراب زهره... تاخدها معاك فين..لنور.

ادم...لا هخرج انا وهي 

ليل... والله تخرج فين بقى ان شاء الله

ادم...والله هو حلو ليك متقولش اللي عندك وعايزني اقولك

ليل... لا ياادم خلاص براحتك بس مستغرب يعني

ادم.... عادي محتاج اتكلم معاها في حاجه 

ليل... مش مرتاحلك.

ادم....ومن امته وانت بترتاح لحد انت بتشك في صوابع ايدك

ليل... انت شايف كده

ادم...اه شايف كده... عموما هحكيلك كل حاجه بس مش الوقت عشان امشي ومأخرهاش.

ليل... ايه ده بس عشق كده هتروح لوحدها..

ادم...هي تمارا مع جاسر صح

ليل... اه مشيو من شويه

ادم...طيب عادي هي على ماتخلص وتروح مع السواق هتكون تمارا رجعت وزهره هروحها..

ليل... ماشي ياعم...

ادم...مفيش اخبار عن نوح...

ليل... لا مختفي لسه..بس مستني اخبار عنه لسه محدش كلمني

ادم...خير ان شاء الله

ليل...ان شاء الله

ادم...هقوم انا بى عشان منتأخرش..

ليل... تمام.

ادم...سلام.

ليل...سلام.

...........

خرج ادم... وليل كان بيستعد عشان يخرج هو كمان...

ليل....عشق..

عشق....قامت من مكانها وراحتله...ايوه

ليل... خلصتي شغلك

عشق....ايوه تقريبا خلصت خلاص

ليل... طيب انا كمان خلصت ولازم امشي عشان عندي مشوار...

عشق....وهي بتبلع ريقها بصعوبه...تمام..

ليل... زهره مش هتروح معاكي على فكرة هتروحي مع السواق لوحدك..

عشق.... عارفه هي كلمتني وقالتلي.

ليل....طيب تمام يلا عشان تنزلي معايا وتركبي مع السواق..

عشق...تقدر تنزل انت عشان متتأخرش انا لسه هلم حاجتي واشيل الورق...

ليل... هستناكي 

عشق... مفيش لزوم... انا قولتلك مش هتأخر...وكمان انا مش هروح للبيت

ليل... نعممم رايحه فين

عشق...انا رايحه لنور

ليل... فجأه كده

عشق... مش محتاجه اني ارتبلها عشان اروح اشوف نور بس لو حضرتك عندك مانع عادي مش هروح.

ليل... باصصلها بغضب...لا يا عشق معنديش مانع يارب تروحيلها كل يوم...عموما انا مستنيكي  هدخل اغسل وشي واظبط نفسي لحد ما تخلصي.... ومشي من ادامها دخل الحمام وقفل هي باصه عليه بحزن.... ولسه هتروح 

على مكتبها تلم حاجتها... رن موبايل ليل... فضولها خلاها تبص...عاللي بيتصل...

لكن حست بصدمه.  اول ما شافت المتصل😳😳😳😳😳😳

فصل الموبايل راحت عشق بسرعه على مكتبها خرج ليل من الحمام...بعد وقت بسيط.

عشق... رجعت.. انا خلصت..

ليل...تمام يلا بينا..

نزلو... ركبت عشق مع السواق من غير ولا كلمه وكانت حاسه بصدمه ..

ليل.... لما توصلي طمنيني.

عشق..........

ليل... عشق. سمعاني

عشق...اه طيب.

مشي ليل على عربيته وراح...عشان معاده مع ريما..

بعد وقت مش طويل اوي...

وصلت عشق.  الڤيلا...

سهام...ايه المفاجأه الحلوه دي

عشق... بابتسامه ميرسي ياطنط عامله ايه

سهام...انا بخير يا حبيبتي تعالي 

دخلت عشق معاها واعدت..

عشق...نور عامله ايه انهرده...

سهام...احسن كتير من امبارح.. مقضيه اليوم مذاكره انهرده

عشق...الحمد لله...مفيش اخبار عن نوح..

سهام...بحزن لا يا عشق لسه مظهرش ليل قاللي انه هيعرف مكانه ويطمني.

عشق...اطمني يا طنط... ان شاء الله هيرجع. هو اكيد محتاج يأعد مع نفسه شويه هو مضايق 

سهام...عارفه بس غصب عني. قلقانه عليه... خصوصا ان نوح عمره ما وصل للحاله دي قبل كده الفتره دي ومن ساعة اللي

 حصل شخصية نوح اتغيرت كتير نوح مكنش بيبطل ضحك وهزار وحركه ومالي البيت فرحه حساه انطفى خالص مبقاش هو..

عشق...بحزن... الوجع بيغير ياطنط بيبدل  بيحولك من شخص لشخص تاني اوقات بتبقي حاسه ان انتي غريبه على نفسك كمان..انتي مش انتي... يمكن اللي حصل كان يوجع نور

 اكتر لانها هي اللي اتأذت ومهما حصل الراجل في المواقف دي غير البنت وهو لازم يقدر شعورها بس يمكن نوح عشان طيب اوي محسبهاش كده

سهام...حقيقي نوح طيب كده قلبه عامل زي الاطفال

عشق... اهو الشخصيه اللي زي نوح دي بالذات اللي الوجع فيها بيسيب علامه...وبيبقى صعب انه يرجع بسرعه بياخد وقت..

سهام... ياخد الوقت اللي ياخده بس يرجع ويطمن قلبي 

عشق... هو اكيد محتاج يكون لوحده عشان محدش فيكم يفتح معاه الموضوع كل شويه..

سهام... يرجع وانا مش هتكلم خالص..

عشق... هيرجع متقلقيش .

وفضلو يتكلمو مع بعض كتيرررررررر

.............

ادم... المكان عاجبك

زهره... بتوتر... ااا ايوه جميل

ادم... مالك متوترة كده ليه..

زهره... انا لا خالص بس يمكن عشان اول مره اخرج لوحدي من غير البنات...

ادم...عمرك ماخرجتي مع اي حد ولا حتى صحاب مدرسة جامعة كده يعني.

زهره..لا خالص... اولا صحاب المدرسة مكنش لبا غير تمارا وعشق... انا كنت شخصيه خوافه جدا. بخاف اصاحب او اختلط مكنش في فحياتي غيرهم هما بس.. ولما دخلت جامعة...انا مدخلتش حاجه انا عيزاها او بحبها انا دخلت مع تمارا عشان مجموعنا كان قريب من بعض.. طبعا عشق دخلت

 طب فا كان صعب وبما اني خوافه ومش بعرف اتعامل لوحدي من غيرهم فا دخلت مع تمارا..عشان ابقى معاها مش عشان الجامعة نفسها ..وطبعا مكنتش بردو بعرف اصاحب يادوب اروح احضر حاجه انا وهي ونرجع سوا 

ادم...للدرجادي.

زهره...واكتر

ادم...طب وايه السبب انك تكوني بتخافي بالشكل ده يعني وانتي صغيرة هنقول يمكن زي اطفال كتير بتخاف لكن المفروض لما كبرتي كان العكس..

زهره... بالعكس ده يمكن كل ما كنت بكبر كنت بخاف اكتر..

ادم.... من غير سبب كده..يعني شايف ان تمارا جريئه وعشق جريئه المفروض عشرتك ليهم كنتي تبقي زيهم..

زهره.... بحزن... يمكن الظروف اللي مريت بيها او عشتها هي اللي خلتني بقيت كده... اوقات كتير كنت ببقى نفسي اروح لدكتور نفسي بس كنت برجع كلامي في اخر لحظه...

ادم... بس عشق وتمارا مروو بنفس ظروفك ومع ذلك شايفهم اتأقلمو وبيتعاملو .

زهره... بيتهيألك..يا ادم... يمكن عشق وتمارا يبانو جامدين او بيحاولو يكونو جامدين عشان يقدرو يعيشو وسط الناس بس هما كمان من جواهم بايظين زيي وكل واحد فينا رد فعله غير التاني...

ادم...اكيد طبعا ومش معنى كلامي ان اللي حصلهم مش مأثر عليهم بس اقصد بيحاولو.

زهره... هما بيحاولو وفي الحقيقه هما قدرو انا يمكن بقيت شويه زيهم لحد ما خرجنا من الدار وعشنا مع نور وبابا محمد كنت زي مانا بس مع الوقت كنت حاسه اني قادرة اتحسن... بس الحقيقه اني اتغيرت اكتر من اخر يوم كنا فيه في الشقه.

ادم... تقصدي اللي حصل 

زهره... بوجع ايوه... طول عمر عشق وتمارا هما اللي بيدافعو عني ويقفو جمبي ويحموني ويسندوني تخيل بقى لما نتحط في موقف زي ده ويبقى انا الوحيده اللي في ايدي انقذهم يمكن يبان الموقف عادي وكان لازم اتصرف كده بس صدقني الموقف ده غير شخصيتي 360 درجه مقدرتش اشوف عشق

 ونور بيصرخو وقتها مكنتش بفكر في اي حاجه غير اني انقذهم وانقذ نفسي وحسيت وقتها اني مش خايفه او بمعنى اصح مفكرتش اصلا في الخوف بالنسبالي كانت ياقاتل يامقتول... قبل ما ندخل الشقه انا ونور... كنت مرعوبه بس 

لما صريخ عشق زاد ساعتها مكنتش انا.. دخلت خدت سكينه من شقه جارت نور. وبعدتهم ونزلت على تحت من غير ما افكر...في مواقف يا ادم الخوف بيهرب عندها وقتها بس حسيت ان الخوف ده حاجه ملهاش وجود احنا اللي بنوهم

 نفسنا بيه.. الخوف لما بيتحكم فينا بيدمرنا مع اننا لو فكرنا لثواني بس هنهزم الخوف اللي جوانا ده...انت عارف يا ادم انا ندمت على الوقت اللي ضاع من عمري وانا خايفه.  وانا بعمل

 حساب لكل حاجه... بخاف اتحرك بخاف اتكلم بخاف اتنفس بخاف اتعاقب. بخاف. اتهان. بخاف اسمع كلمه بنت حرام بخاف امشي. لوحدي انا تقريبا يا ادم مكنش في حاجه في حياتي مبخفش منها..

مع الوقت لما كبرت وفهمت وضعي في الدار والطريقه اللي دخلت الدار بيها.  لما عرفت يعني ايه ام واب واخوات وعيله... كنت بخاف يظهرلي اهل كان في معانا ولاد فالدار اهاليهم بيظهرو دول اللي كانو مخطوفين او تايهيين وفي اللي كان امهم وابوهم يرموهم لانهم سبب غلطه ومع الوقت قدرو

 يحلو مشاكلهم ورجعو خدو ولادهم....انا الفكره نفسها كانت بتخوفني مع انها كانت ممكن تفرح اي حد هيرجع لاهله لحضن امه وابوه انا كنت العكس يا ادم....لما كان بيحصل حاجه كنت بجري على عشق وتمارا اتحامى فيهم...

اوقات كتير عشق وتمارا.  كانو يدارو عني ويقولو انهم هما اللي عملو كده عشان عارفين اني ممكن اموت فيها...من كتر مانا خايفه..

ادم... باصصلها بحزن وسايبها تتكلم كان حاسس انها ماصدقت حد فتحها سابها تقول كل حاجه جواها..

زهره.....انا يمكن الوقت يا ادم مبقتش اخاف من اي حاجه في الدنيا يمكن اخر احساس خوف جربته وده اللي ملازمني لحد الوقت..خوف الفراق موت بابا محمد أثر فيا اوي يمكن دي المره الاولى في حياتي اللي افقد شخص غالي عندي او اجرب

 احساس الموت دايما خايفه اني افقد حد من اخواتي دي الحاجه اللي ممكن تدمرني بجد وتقضي عليا عارفه ان كلنا هنموت بس انك تفقد حد غالي عندك ده وجعه مميت

 اوي...عشان كده دايما ادعي ربنا ان لو في حد ممكن يحصله حاجه يبقى انا عشان انا مش هقدر اشوف حد منهم فيه حاجه وحشه...لكن اني اخاف من اي حاجه تاني زي زمان خلاص استحاله.....

انا اتوجعت كتير اوي يا ادم مش قادرة اتوجع تاني امي وابويا رموني من عشرين سنه معرفش. شافوني وشافو ملامحي قبل ما يرموني ولا لا فاكرني وفاكرين ان كان ليهم بنت رموها من

 عشرين سنه ولا كل واحد فيهم شاف حياته واتجوز وخلف ونسيوني... انت عارف يا ادم عمري ما فكرت اني ارتبط باي

 حد عمري ما فكرت اني احب عمري ما فكرت في فكرة الجواز دي حتى دايما عندي شعور بالخوف.  خايفه اورث جحود قلب اهلي واعمل في ولادي زي ما عملو فيا خايفه يبقى قلبي جامد ميعرفش يحب ويربي خايفه معرفش ادي حب...

هما وجعوني اوي يا ادم...ووجعهم معلم فيا وصعب يتشال من قلبي....خدت تمارا نفسها.  ومسحت دمعه نزلت من عينها غصب عنها...ابتسمت اسفه صدعتك وكأبتك وبدل ما كنت انت اللي عايز تتكلم انا مفصلتش من ساعة ما اعدنا...

ادم....ابتسم....وفضل باصصلها كتير..

ادم....تتجوزيني يا زهره..

زهره...😧

...................

جاسر.....اخيرا خلصنا انا مصدع جداا

تمارا... وانا كمان مصدعه اوي.

جاسر... بقولك ايه انتي مش جعانه انا جعان اوي

تمارا... يعني بس كنت عايزة اروح عشان عشق متبقاش لوحدها .

جاسر.... زهره مع ادم وليل قالي ان عشق راحت لنور اكيد مش هتروحي تأعدي لوحدك.

تمارا... ماشي خلاص هاعد معاك..

جاسر... طب يلا قولي تاكلي ايه.

تمارا.... هاكل زيك😍

جاسر...وانا بفكر اكلك.

تمارا...🤨🤨هقوم اروح

جاسر...خلاص يا ساتر بحب الشاويش عطيه

ضحكت... تمارا بصوت من كلمته.

جاسر...😡😡😡وطي صوتك عشان متغباش عليكي.

تمارا...خلاص يا ساتر انت هتتحول وبعدين انت اللي بتضحكني..

جاسر... ابتسم وانا بكدب..

تمارا.... ايوه بتكدب انت بس اللي مش شايف انك قليل الادب.

جاسر...انا ده انا غلبان

تمارا...اووووي

جاسر...والله🤨ماشي 

ونادي جاسر عالويتر وطلبو الاكل...

..........

بعد كلام ورغي كتير مع سهام.. طلعت عشق.. خبطت على باب اوضة نور...

نور....من الداخل.  .... ادخل

فتحت عشق...الباب...

نور....بفرحه.. قامت بسرعه من عالسرير... عشششششق.

جريت عليها وحضنتها...

عشق...حبيبتي وحشتيني.

نور... انتي جايه لوحدك.

عشق... ايوه يا ستي جيت اشوفك

نور..جيتي امته..

عشق... انا بقالي ساعه تحت مع طنط..

نور... ايه ده ومنادتوش عليا ليه..

عشق... اعدنا نرغي شويه وقولت اسيبك تركزي عشان عرفت انك بتذاكري...

نور... يعني بقالك ساعه تحت وانا معرفش وتقوليلي سيباني اذاكر انتي بتهرجي..

عشق... يعني الست اعده تكلمني اسيبها 

المهم. طمنيني عليكي عامله ايه انهرده

نور.. خدتها في ايدها ودخلت اعدت معاها انا بخير الحمد لله..احسن

عشق... وايه اللي انتي عملاه فالاوضه ده مالك فارشه الورق كده ليه عالسرير.

نور...بذاكر...

عشق... بزمتك حد يذاكر كده...

نور... وهي مبتسمه.  خلينالك النظام يا ست عشق

عشق... بابتسامه... ادام طولتي لسانك يبقى انتي احسن انهرده..

نور... انا مبسوطه عشان شوفتك..

عشق.... وانا كمان يا قلبي.

نور... فين تمارا وزهره مجوش معاكي ليه..

تمارا.. مع جاسر في ميتنج وزهره خرجت مع ادم

نور ..باستغراب.  زهره وخرجت مع ادم ولوحدها طب ازاي🤔

عشق... زي الناس كلمتني وقالتلي ان هو قالها عايز يخرج معاها 

نور... خير في حاجه بينهم ولا ايه

عشق... شكلها كده يلا خلينا نفرح بيهم واهي تيجي تاعد معاكي هنا وتسليكي..

نور... بفرحه ياريت... ورجعت زعلت تاني  بس ياريت ايه انا مش مطوله هنا يا عشق.

عشق... بت انتي فكي كده وبلاش جو الكآبه ده انتي بتحبيه وعارفه انه بيحبك...شويه وهينسى

نور... امال هو سايب البيت ليه.. مش عايز يشوفني وهو قال انا هيسبني.

عشق... كلام كلام يانور.  وقت عصبيه وغضب هيهدى ويرجع تاني بس شطارتك بقى لما يرجع.  انك تعرفي تحتوي الموقف وتخليه ينسي.

نور... يرجع بس الاول عشان عالاقل اطمن عليه..

عشق... هيرجع وهتتصالحو وهينسى وهتعيشو مع بعض انا قولت على حاجه قبل كده ومحصلتش.

نور... لا

عشق.. يبقى تسمعي كلامي ومفيش حاجه الوقت تشغلك غير مذاكرتك مفهوم 

نور.. حاضر... قوليلي بقى انتي عامله ايه مع ليل

عشق... بابتسامه بتحاول تداري حزنها تمام مفيش جديد ولا في اي حاجه بس تمام..

نور... طيب وبخصوص حبيبته اللي ظهرت دي انا سمعت الكلام من طنط واحنا عالسفره بس مرضتش اتدخل.

عشق... معرفش يانور وبعدين متشغليش بالك انا زي ما قولتلك اصلا احنا مفيش بينا حاجه وده كان مجرد شعور مني مش اكتر وعادي يعني هحاول اتجاهل الشعور ده

نور... بس ده مش منك انتي بس يا عشق ليل كمان بيبادلك نفس الشعور صدقيني.

عشق... يمكن الاول لما قولتولي كده كنت مصدقه بس الوقت لا وعموما متشغليش بالك انتي عارفه يا بت ان عشق جامده صح ولا لا...

نور... بابتسامه وشفقه على عشق اللي بتحاول تخبي وجعها صح...

عشق.. بقولك ايه انا هقوم  بقى عشان الوقت ميتأخرش اكتر من كده

نور.. خليكي شويه

عشق.. مش هينفع عشان الشغل بكره

نور... هتجيلي تاني.

عشق... طبعا كل ما اكون فاضيه هجيلك زي ما جتلك انهرده كده من غير ما اقولك

نور...ماشي وانا هستناكي

عشق.. وهي بتبوسها ماشي ياروحي اي وقت تحتاجي حاجه كلميني

نور...حاضر يلا تعالي اوصلك تحت واشوف طنط من الصبح مشوفتهاش ومشغوله عنها

عشق...يلا

نزلت عشق ونور..سلمت عشق على سهام... ووصلتها هي ونور ركبت عشق مع السواق ومشيت

.......... 

ادم....هتفضلي ساكته كده.

زهره... اقول ايه

ادم... قولي رأيك قولي هفكر قولي اي حاجة. 

زهره.... طيب هو انا ممكن اسالك سؤال تاني

ادم...طبعا

زهره...ليه انا يا ادم وانت عارف كل حاجه عني

ادم... اولا مفيش حاجه  اسمها ليه ثانيا يمكن عشان عارف كل حاجه عنك انتي بالنسبالي كتاب مفتوح..  مفيش سر في حياتك وانا كمان معنديش اي سر ولو مفكره ان عشان اعرف

 ظروفك يا زهره المفروض مكنتش فكرت كده يبقى انتي لسه متعرفنيش... انا ليا انتي وبس وحتى ياستي لو ليكي عيله كبيره واهل في الاخر هاخدك انتي وبس انتي بس اللي هتبقي ام ولادي مش هما..

زهره... مش يمكن اطلع مش زي ما انت عايز

ادم... استحاله وعايز اقولك كمان انك هتبقي احن ام يا زهره.

ابتسمت زهره. وعنيها فيها لمعه دموع من الفرحه..

ادم....مش عايزك تفكري بالطريقه دي يا زهره انتي بالنسبالي هتبقي عالمي الخاص انتي تشرفي اي حد يا زهره اقولك على حاجه اهلك ربنا مبيحبهمش عشان حرمهم من احن انسانه في الدنيا...

نزلت... دموع زهره من كلام ادم...

ادم... بلاش الدموع دي لو انا غالي عندك...

ومش عايز ردك الوقت لو حابه تاخدي وقتك انا تحت امرك ومستنيكي اي وقت بس عايزك تعرفي اني بحبك يا زهره

زهره.....

ادم... يلا بقى نقوم عشان متتأخريش وتقدري تصحي الصبح وهستني ردك مع اني حاسس اني عارفه 

زهره... هزت راسها بابتسامه

ابتسم ادم... وحاسب وخد زهره وخرجو. عشان يوصلها...

وصلت عشق... ووصلت بعدها زهره..وتمارا 

حكتلهم زهره عاللي حصل كانو مبسوطين اوي

وزهره كانت طايره من الفرحه...

وبعد رغي كتير مع بعض...

دخلت كل واحده فيهم على اوضتها..

رغم فرحة عشق... بزهره إلا ان كان حزنها مش راضي يسبها .....ومصدقت انها اخيرا بقت لوحدها من اول اليوم وهي بتحاول تختلي بنفسها...

...........

ليل... يمكن اكون مضايق بس صدقيني لما شوفتك من تاني حاسس اني نسيت كل حاجه...مستغرب نفسي جدا بس

 مشيت ورا قلبي يا ريما ومسمعتش كلام عقلي... من يوم ما شوفتك وانا حاسس الكلام هرب مني حاسس ان الغضب اللي كان عاميني طول ال3 سنين اتبخر ورجع مكانه ذكرياتنا سوا ..رجع حبي ليكي .

ريما....يعني ممكن ادخل حياتك تاني يا ليل وقبل ما ترد مش شرط ادخل حياتك زي زمان حتى لو مجرد اصحاب بس عالاقل اكون موجودة معاك باي طريقه انا راضيه

ليل... مين قال انك خرجتي من حياتي اصلا يا ريما من يوم اللي حصل وانا محرم على قلبي تدخله اي بنت بعدك تفتكري بعد ده كله ينفع تسألي سؤال زي ده...مش هكدب عليكي يا

 ريما يمكن اكون حاولت خصوصا من زن امي عشان عايزه تفرح بيا وتطمن عليا زي اي ام بس انا مقدرتش معرفتش الاقي نفسي مع اي حد غيرك..

نزلت دموع ريما... بحبك يا ليل

ليل... بابتسامه مسك كف ايدها وباسها....وانا معرفتش معنى الحب غير معاكي.....

مر الوقت.. بسرعه.. وصل ليل ريما للڤيلا بتاعتها

ومشي في الطريق  قاصد مكان معين...

.....

عدي...وقت طويل وابتدا النهار يطلع..

صلت عشق الفجر... مكنتش عارفه تنام ولا جايلها نوم... حاسه انها بتتخنق محتاجه تنزل تشم هوا محتاجه تختلي بنفسها من غير اي ازعاج... كانت شايفه النيل من اوضتها وقررت انها تنزل تشوفه من قريب

لبست... وفتحت الباب براحه ونزلت.....

...........

ليل.. خلص مشواره اللي راحوا بعد ما وصل ريما... وكان راجع عالڤيلا يغير وده كان تاني يوم ليه مطبق..

فجأه سمع موبايله بيرن... بص عالتليفون باستغراب.. سعيد الامن...

ليل... الوووو

سعيد...الامن اللي شغال في البرج اللي ساكنه في عشق والبنات

سعيد...ايوه ياليل باشا

ليل... خير يا سعيد

سعيد....ليل باشا انسه عشق شوفتها من شويه خارجه من المدخل بس ملحقتهاش.

ليل...بفزع... نعمممم انت غبي مش قولتلك محدش يخرج او يدخل غير لما تعرفني كنت فين ياغبي

سعيد...والله يا ليل باشا انا انا كنت بصلي الفجر انا ومحمود ولمحتها وانا بصلي خارجه  على ما خلصت جريت بسرعه وراها كانت عدت الشارع  كملت شويه وراها من غير ما تحس لقتها عدت وواقفه عالنيل... ولحد الوقت هي واقفه قولت ابلغ حضرتك بسرعه...

ليل... طيب انا قريب منك وجاي حالا عينك عليها. متغبش عن عينك لحظه مفهوم...

سعيد...حاضر ياليل باشا

قفل ليل وداس بنزين....في طريقه ليها...

.........

وقفت عشق ادام النيل... 

ومن اول ما وقفت مقدرتش تمسك دموعها اللي حبساها من  الصبح..

كل حاجه مرت ادامها... من اول ما دخلت ريما المكتب لاول مره... تغيير ليل فرحته ابتسامته لحد ما سمعت حكاية ليل مع ريما...من جاسر وادم... ازاي قادر يسامحها ازاي قادر يشوفها من تاني ازاي احساسي بانه حبني او اتعلق بيا خاني.. ازاي

 حبيته واتعلقت بيه وانا مش في بالو طب لما انا مش في باله ليه حسسني بده خوفه عليا غيرته كلامه ليا انه انا الوحيدة اللي وقفت ادامه..وانا الوحيده اللي مش بيقدر يعترض ادامها ليه حسسني اني عنده حاجه كبيره ليه بيغير عليا من ادم ازاي

 بيحبني وسمح لنفسه انه يمد ايده عليا وعشان مين عشان حبيبته اللي خانته ازاي قدر يوجعني وياخدني معاه اشوفها تاني ازاي قدر يسلمني انا المشروع اشرف عليه واحتك بيها 

ازاي قدر يسلم عليها ويلمسها ادامي طب كلامه ليها ازاي قدر يوجعني بكل ده عشق لنفسها..

عشان انا غبيه وهمت نفسي بحاجه وصدقتها وهي عمرها ماهتحصل ليل استحاله يفكر فيا انا ازاي ضعفت وحبيته ازاي استسلمت للحب..ازاي يوم ما احب ابقى اسأت الاختيار

انا ليه بيحصل فيا كده لحد امته هفضل اتوجع لحد امته هفضل ادور على نور موجود في حياتي واول ما اقرب منه يتقفل في وشي الباب...

ياااااارب... انا تعبت اوي.  تعبت من الوجع انا مش عايزة اتغير وقلبي يقوي من كتر الوجع مش عايزة كل اللي حصلي يعلمني اكون قاسية...انا مش كده يارب... يارب ريح قلبي شويه يارب متخلينيش اعيش الوقت اللي اشوف فيه نفسي ضعيفه ومكسوره..... يارب شيل حبه من قلبي ...

مسحت عشق دموعها بوجع...بعد انهيار كانت محتاجاه عشان ترتاح... لفت ضهرها عشان ترجع واول ما لفت. 

حست.. بقلبها هيخرج من مكانها...لما شافته واقف وراها من غير ولا كلمه ولا هي كانت حاسه بيه...من صدمتها فقدت النطق...

ليل... بابتسامة حب... ولما يشيل حبي من قلبك ياعشق..

اعمل انا ايه في حبك اللي في قلبي...

شدها ليل من ايده‍ا وسط الشارع... وكأنه في العالم لوحده ولا هامه اي حد...وخباها جوه حضنه...وانهارت عشق.....💔

           الفصل السادس من هنا

تعديل المقال