رواية من قلب الظلام الفصل الرابع والاخير

 

رواية من قلب الظلام 

بقلم عمرو علي

البارت الرابع والاخير

مين اللي اتقدملي

= المعلم حامد

تاجر المخدرات

= بس راجل معاه فلوس 

دا متجوز تلاتة

= ومالو يا ندى تبقي الرابعة

عايز تجوزني ل واحد عنده 50 سنة

= اهو نستفاد منك بحاجة بدل ما أنتي قاعدة كدا

وايه الاستفادة بقا

= المعلم حامد واعدني انك لو وافقتي ، هيديني بضاعة ببلاش هدية منه وساعتها المكسب كله هيكون في جيبي وحياتنا تكون احسن

يعني انا بالنسبالك صفقة

= متشوفيهاش كدا ، بصي عليها من الجانب الايجابي انك هيكون معاكي فلوس زي الرز

مش عايزة فلوس ، أنت مفيش حاجة في حياتك غير الفلوس ، مش بتفكر فيا ، مليش لازمة عندك

= نفس المحن بتاع امك ، يا غبية افهمي ، انا كدا بضمنلك مستقبلك ، شوفي انتي لما المعلم حامد يموت هيسيبلك ورث قد ايه ، انتي في كل الحالات كسبانة

وأنا مش عايزة

= يعني ايه

يعني مش موافقة يا بابا

" قلم نزل على وشي لدرجة اني اترميت في الأرض

انا خلاص قريت فاتحتك معاه ، وهتتجوزيه غصب عنك يإما هرميكي في الشارع

" مشي و داخل أوضة مراته الجديدة اللي فتحت الباب قبل ما هو يدخل

مالك يا ياسو

= دي عالم مقرفة والله

اهدى يا حبيبي وكله هيتحل

" دخلو مع بعض الأوضة وقفلو ، امي جت بتحاول تقومني 

اعمل ايه يا ماما

= اوعي يا ندى تتجوزيه

و بابا

= معرفش ، عايزين نفكر نشوف هنعمل ايه

مش هنعرف نقف قدامه يا ماما

= انا هتصرف

" أي بنت لما تقع في مشكلة اول واحد بتجري عليه هو أبوها ، حالتي انا مختلفة انا اللي بجري من ابويا عشان ابويا هو اللي بيجيب المشكلة ، مبقتش عارفة ايه اللي عمل فيه كدا ، هل دا عقاب من ربنا لييه ولا دا تأثير المخدرات اللي بيشربها ، قفلت على نفسي باب اوضتي و انعزلت ، عدا يوم والتاني والتالت لقيت ابويا جاي وبيقولي

يلا اجهزي عشان هننزل نشتري حاجة تقابلي بيها الراجل

" مكنتش عارفة ارد ولا حتى اتحرك من مكاني ، لحد ما ماما جت

واخد البت على فين يا ياسر

= هننزل نجيب هدوم

بنتي مش هتتحرك من هنا

= انتي اتجننتي يا ولية ولا ايه

اه اتجننت يا ياسر ، ولحد كدا وكفاية أوي

= ادخلي جوا احسنلك

وأنا مش داخلة

= وانا بقولك ادخلي

" ومع اخر حرف طلع منه كان معاه قلم على وش امي 

على اخر الزمن هتكسري كلامي ، شكلك كبرتي وخرفتي خلاص ، كبرتي وخرفتي وأنا مستحملك لأجل العشرة بس هتتكرر تاني هطردك برا

" جريت على امي بسرعة ، خبيتها ورا ضهري ووقفت قدامه

خلاص هنزل معاك

= كدا تبقي عاقلة و احبك ، انا هستناكي تحت

" خدتها في حضني وهي منهارة من العياط ، دخلت معاها اوضتها

حقك عليا يا ماما ، امسحيها فيا انا

= انا اللي اسفة يا بنتي ، انا اللي معرفتش اختار ليكي اب كويس 

كفاية انتي عندي بالدنيا

= مش عايزاكي تبقي زعلانة مني يا ندى

على ايه

= على اي حاجة

وأنا عمري ازعل من القمر دا

= خلاص يلا انزلي عشان متتأخريش عليه

حاضر

" قومت وبوست راسها ، ولبست ونزلت ، روحنا نشتري اللبس ، خلصنا و رجعت البيت و داخلة اوضتها لقيتها....

لقتيها ايه

" كنت بعيط ومش عارفة اتكلم

= ماتت يا يوسف ، ماتت من القهر على حالها وحالي ، ماتت وسابتني لوحدي من غير سند في الدنيا ، كنت متخيلة ان اول ما بابا يعرف هيزعل ويرجع ل عقله لكن محصلش

لا حول ولا قوة الا بالله ، حيث كدا يبقا نأجل الفرح ، ملناش نصيب نفرح 

دا كان رده على موت شريكة عمره والست اللي استحملت معاه وعمرها ما اشتكت 

= اسف اني اقول كدا بس ابوكي مش بيحس

مش لازم تتأسف لان هي دي الحقيقة

= حصل ايه بعدها

" عملنا العزا ، تحس ان ابويا كان واقف في العزا بالغصب ، حتى عزاها مش عايز يحضره لحد ما خلصو 3 أيام ، بقيت قاعدة لوحدي مش بتكلم مع حد ، مليش علاقة بحد ، مش بنزل من البيت ، انعزلت تماما حتى عن الاكل والشرب ، الحاجة اللي كانت مصبراني خلاص راحت يبقا لازمتها ايه الحياه بقا ، ابويا ومراته زهقو من القعدة والنكد وقررو يخرجو مع بعض بعد موت امي ب شهر واحد ، كنت قاعدة في البيت لوحدي ، لقيت الباب بيخبط ، قومت عشان افتح ، لقيت

ازيك

= الحمدلله ، بابا مش هنا

ما انا عارف 

= عايز ايه يا معلم حامد

جاي اطمن عليكي ، اشوفك او عايزة حاجة كدا ولا كدا

= لا مش عايزة حاجة شكرا

" و لسة هقفل الباب ، منعه ب ايده

استني بس ، دا جزاتي يعني عشان جاي اسأل عليكي

= مش عايزة سؤالك ، اتفضل بقا

بذمتك فيه واحدة تكلم جوزها بالطريقة دي

= اه فيه ويلا امشي بقا

اصل..

= ايه

أنتي حلوة أوي

= بجد والله

وعزة الله حلوة اوي

= هتطلع برا ولا لا

ولو مطلعتش

= هصوت و الم عليك الدنيا

طب ما تصوتي

" بدأ يقرب مني وباصصلي بطريقة مقرفة

ما تصوتي

= ابعد عني

ابعد ، دا انا ما صدقت قربت

" هجم عليا وبدأ يقطع هدومي ، كان بيلمسني وأنا بصرخ وبقاومه لكن كان أقوى مني ، بعد ما كنت خلاص شبه عارية تماما قدامه ، قام وهيمشي

لا بس تستاهلي اني اتجوزك ، انا هطلب من ابوكي ان معاد الفرح يبقا في اسرع وقت ، عايزين نبقا في بيت واحد يا حلوة

" كلمة انهيار كانت قليلة على اللي كنت فيه ، لميت نفسي وفضلت قاعدة في مكاني ، مش عارفة اعيط على ايه ولا ايه ، مش عارفة بيحصل فيا كدا ليه ، مكنتش عارفة عدا قد ايه من الوقت ، لقيت ابويا داخل هو ومراته اللي اتفزعت اول ما شافت منظري ، ابويا قرب مني وقال

ايه اللي عمل فيكي كدا

= انت ، أنت اللي عملت كدا بشغلك مع الحقير دا

اخلصي مين اللي عمل كدا

= المعلم حامد تاجر المخدرات اللي عايز تجوزني لييه

طب قولي كدا من الاول ، انا كنت فاكر حد غريب ساعتها كنت هقتله ، لكن دا هيبقا جوزك عادي مفيش مشكلة ، قومي ادخلي خدي دش وفكي

ويلا احنا نكمل سهرتنا جوا

" دخل هو ومراته الأوضة ، مكنتش مستغربة من رد فعله ، بقا عادي بالنسبالي ، عشان كدا كنت مقررة ان انا اللي هاخد حقي بنفسي ، كنت بحاول من وقت للتاني اتصنت على ابويا ، لحد ما سمعته مع مراته 

يعني العملية دي مهمة

= مهمة جدا

هتكسب فيها قد ايه يعني

= لو مشيت صح هكسب كتير اوي

ربنا معاك يا حبيبي

= هتكون فين العملية

على طريق اسكندرية 

= طب ابقا خلي بالك ، والبس چاكت تقيل عشان البرد

" مكنتش مستنية اسمع حاجة تاني لاني جريت بسرعة ، كلمت البوليس وبلغت بالعنوان ، مكنش فارقلي حتى لو ابويا هيتضر ، عدت ساعة واتنين وتلاتة ، لقيت ابويا داخل جري من برا ، كان وشه مخضوض ، مراته جريت عليه

مالك يا ياسر فيه ايه

= البوليس هجم علينا واحنا بنسلم البضاعة ، والمعلم حامد اتقبض عليه

يا نهار اسود ، وانت عملت ايه

= اول ما سمعت السرينة ، جريت بسرعة قبل ما حد يحس بيا

اوعا يكون حد ماشي وراك

= متقلقيش انا مأمن نفسي

" ولأول مرة السعادة تدخل قلبي من فترة كبيرة ، انتقمت لنفسي وخدت حقي ب ايدي ، بعد كدا هو دا اللي هيحصل ، مش هخلي حد يقرب مني ، عدت الايام وأبويا كان كل يوم حاله بيسوء بسبب المخدرات اللي بيشربها ، لحد ما كنا قاعدين و اتفاجئت بمرات ابويا بتقول

ما تقومي يابت ترقصي شوية ل ابوكي

= نعم!

أنتي لسة هتستغربي ، ابوكي مزاجه مش رايق وعايزينه يروق

=  ارقصيله أنتي يا مرات ابويا

ومالو ارقصله انا 

" الطيور تقع على اشكالها ، وبالفعل دي انسب واحدة ل ابويا ، هي شبهه ولايقة عليه انما امي لا 

هي دي حكايتك

= اه

وعشان كدا قررتي تحولي ل ولد

= عشان محدش يطمع فيا ولا يشوفني بنت وضعيفة

و ابوكي دلوقتي فين

= مات ، مات بسبب اللي بيشربه

ربنا يرحمه ويسامحه على اللي عمله

= من بعده وانا حاسة ان الكل شايفني ضعيفة ، حبيت اني ابدأ في مكان جديد ، محدش يكون عارفني فيه ومن هنا جاتلي فكرة التحويل

بس دا حرام يا ندى

= ومش حرام اللي حصل فيا ، مش حرام اللي انا عيشت فيه ، كل دا حلال واللي انا هعمله هو اللي حرام

سيبك من اللي فات ، تعالي ابدأي معايا صفحة جديدة ، هنبدأ مع بعض في مكان جديد ، هحميكي من اي حد 

= وانت ايه ذنبك يا يوسف ، ذنبك ايه تاخد واحدة زيي

دا انا امي دعيالي اني هاخدك

= صعبانة عليك صح

صعبان عليا كل السنين اللي مكنتش معاكي فيها 

= وانا مش هقبل اني اكون معاك ، مش هرضالك بكدا يا يوسف

انا راضي ملكيش دعوة

= هتندم بعدين

لو ندمت يبقا معاكي كل الحق

= انت زنان أوي

وايه يعني لما ازن عشان اعيش مبسوط معاكي

= هتقبلني بعد كل اللي انت سمعته

وأنا كأني مسمعتش عشان عايز ابدأ معاكي من جديد

" بعد مرور سنتين " 

الله يرحمك يا ماما ، بصي انا جبتلك مين معايا ، دي ريهام ، سمتها على اسمك عشان افضل فاكراكي ، أو الحقيقة يعني يوسف هو اللي سماها ، كدا انا مش هنساكي أبدا ، كمان عايزك تطمني يوسف محافظ عليا وشايلني في عنيه وانا مبسوطة اوي معاه ، هبقا اجيلك كل شوية عشان اطمن عليكي ، يلا مع السلامة ،  بحبك 💛 " 

" كنت فاكرة ان الدنيا انتهت لكن قدر ربنا كان له رأي آخر ، ربنا لما يبتليك وتصبر وتفضل ثابت ، بيجهزلك اجمل عوض يعوضك بيه عن اللي شوفته ، واجمل عوض هو كان يوسف اللي حب الدنيا كله لقيته فيه ، هي دي حياتي وهي دي قصتي ، ياريت تكون اتعلمت منها 💜 " 

" الحمدلله ، راهنت على الرواية انها هتخطف الأنظار والحمدلله نجحت وكله بفضل ربنا ، لكن الموضوع محبط بطريقة غريبة ، كأن حرام ان ولد يكتب ، لو بقدم قصص ف دا بغرض انك تعرفني انا ك عمرو مش بنت بتقولها كملي برغم

 التنبيه والاسم وكأنها عن قصد ، سواء بقصد او لا حابب اقول شكرا للكل ، بالنسبة للي بيشجعني ويدعمني دايما ، تشجعيك فارق معايا بشكل كبير وبجد شكرا ، لو كنت بنزل رواية و اتنين في أسبوع دا عشان كان الشغف كبير إنما حاليا الشغف صفر ، اشوفكو قريب..

                   النهاية

تعديل المقال