رواية بت هندسة الفصل الثانى
( أب شنب) ضاغط على سنونو من الزعل لامن عاوزات يتكسرن :
- نعم يا روح أمك؟!
طبعا" ( أب شنب) ما شاء الله كان 4 في 28.. جُهامة جُهامة جُهاااامة.. وكانن عيونو الجمر بس.. ( أب شنب) قال :
- عاوز منو
أيواااااا.. دا السؤال الكان ( العروف) خايف منو زااااتو.. و بقى يفكر.. أكضب ولا أقول الصدق.. بعدين قال هوي.. كان ما نجاك الصدق ما بنجيك الكضب.. ( العروف) إتنحنح و قال:
- أنا ( أمير الظلام)
( أب شنب) قال:
- أمير منو؟ 😳
( عروف) :
- الظلام 😁
( أب شنب) تاني عاد السؤال:
- منو؟
( العروف) بقى يرجف:
- الظلام، ( أمير الظلام) ياحاج 😬
عمك ( أب شنب) قال في نفسه واحد من إتنين.. يا إما الزول دا شايت غلط 🐸.. ولا جاي سكران 🥴.. وفي الحالتين وجب ( العكاز) 💪
( العروف) لما شاف ( أب شنب) لسة ساكت.. قال:
- إنت كدى خوش ليهم جوا قول ليهم ( أمير الظلام) واقف في الباب، هم ح يفهموا
( أب شنب) كان خاتي يديهو في الباب رافعين فوق.. نزل يديهو وبقى يكفكف في جلابيتو :
- أيواااا، قلت لي ( ظلام)
( عروف) جسمو كلو جرا موية من الخوف.. ( أب شنب) بقى يكورك بدون ما يرفع عيونو من ( العروف) :
- يا ( عِتمان)، ولد يا ( عِتمان)
صوت ( عِتمان) من جوا البيت:
- أيوا يا ابوي
( أب شنب) لسة ما رفع عيونو من ( العروف) :
- عكازي دا تحت السرير جيبو سريع
( العروف) من سمع عكاز وما عكاز.. قرررب يفتح يكب الزوغة.. بقى يرجف 🙏:
- يا حاج، ياحاج عليك ماااا تتهور، إنت زول كبير وواعي، تقوم تتهور تضربنا يدخلوك سجن وجرجرة و مشنقة و.....
قبل ما يكمل كلامو ( عِتمان) جا جاري بالعكاز.
( بِت هندسة) كانت بتتصنت لى كلام أبوها مع ( العروف).. ولما حست الكلام ماشي في طريق ما ياهو.. جرت كلمت أمها.. ( أب شنب) مسك العكاز بي جاي.. الأم جات طايرة بي جاي.. وزي ما بقول المثل [ كل شنب وليهو قاصيهو ].. الأم وسوست لي عمك ( أب شنب) في أضانو.. وسبحان مغير الأحوال.. ( أب شنب) بقى ألطف من الحمل الوديع 🐑.. قال لي ( العروف) بكلللل لطف وحنية:
- نان آ ولدي، ما تقولي ( أمير الظلام) بتاع الفيس
الزغاريد دي ضربت 💃💃 و ( أب شنب) بقى يعرِض بالعكاز في نص الحوش.. وضبحوا للعروف تلات خرفان.. بيِّت معاهم تلاتة أيام.. كل يوم بي خروف.. ( العروف) شالو منو فتيلين الريحة و الشِبشِب و رجعوا ليهو صابون الفنيك.. ( يعني هم ناس نضاف ما بحتاج صابون و كدا).
( العروف) رقد معاهم تلاتة أيام زوووول سأله مافي.. لا قالو ليهو إنت منو.. ولّا أبوك منو.. ولّا شغال ولا ما شغال.. ولاااا حتى ساكن وين.. كأنه بس ماصدقو جاهم عريس لي بِتهم ( تغريد = بِت هندسة).. ( تغريد) في البيت.. و ( بِت هندسة) في الفيس.
( العروف) تلاتة أيام حارسو ( أب شنب) في الصالون ما بغفل منه كلو كلو.. كان داخل الحمام يمشي يحرسو برا.. ينتهي يسوقوا يجيبو الصالون.. دا كللله عشان قال داير يشوف ( بِت هندسة).. ( أب شنب) قال ليه:
- تشوف ( النبي الخدِر) يا يابا، نحن ماعندنا شوف، بتيخة مقفولة تجي تسوقها يوم الدخلة بس
المهم.. ( العروف) أكلا في حنانو و قال يعتمد على الصور ال بترسلن ليهو ( بِت هندسة) مع إنه مافي علاقة نهاااائي بين شكلها في الصور و شكل
أبوها.. بس يلا.. قالو البِت بتطلع لى أمها وإتوكككل على الله وعدهم يمشي يجيب أهلو ويجي يتقدم لي ( بِت هندسة).. وهو عااارف كويييس أهلو ما جايين ما جايين.. ( أب شنب) إنبسط من الكلام دا و قدم ( العروف) بالبوكسي حقو لحدي ما ركبو الباص.. وركب ( العروف) مزهوا" بنفسه.. وكان أسعد رجل في العالم.
