رواية بت هندسه الفصل الثالث
بعد شهر و نص
==============
( العروف ) راقد فى البيت ياكل فى القصب زهجاااان.. بعد شوية تلفونه دق.. شال الموبايل عاين للشاشة لقى المتصل ( بت هندسة ).. بقى يطنطن.. خشمه ملاااان قصب وفتح خط:
- ألو
- ويييين الناس من ديك وعيك
- كيفك يا ( بت هندسة ) أخباركم شنو؟
- أخبار شنو؟!! إنت جادى؟!!
- مالك إنتى هسة بتكوركى كدا مالك فى شنو؟
- يعنى ماعارف فى شنو؟
- اى ماعارف،فى شنو؟
- إنت موش جيت البيت ورقدت عندنا تلاتة يوم وضبحنا ليك ولاقيت أبوى ولاااا سألك إنت منو ولا عرفتنى كيف ولا إنت معرس ولا مامعرس ولا ق.....
( عروف ) قاطعا زهجان:
- اااى دا كلو حصل أها فى شنو؟
- كيف فى شنو؟ إنت موش جبت معاك فتيلين ريحة و 8 صابونات وأبوى قال ليك خلاص مامشكلة أمشى جيب أهلك وتعال؟!!!
- اااى، أها فى شنو؟
- ؟؟؟؟؟؟؟
- مالك سكتى؟!
- كيف فى شنو إنت ماجادى ولا شنو؟ وينم أهلك لا جيت تانى لا إتصلت
- والله يا ( بت هندسة ) بالواااضح كدا أهلى ماراضيين
- شنو؟؟؟؟!!!!! 😳
- والله دا الحاصل
( عروف ) طبعا" كان راقد بياكل فى القصب ويتكلم مع ( بت هندسة ).. بس فجأة سمع ليك صوت تخييييين:
- مالوم أهلك ماراضين؟
( العروف) تقول طقتو كهرباء.. نط ليك فوووق.. من الصوت عرف ليك دا عمك أب شنب ( أبو بت هندسة ).. ويادوب عرف إنه ( بت هندسة ) كانت مشغلة الإسبيكر وأبوها سامع كل حاجة.. ( العروف ) وتف القصب من خشمه وبقى يتنحنح :
- أهلا" ياحاج، أخبارك شنو؟
( أب شنب) بى زعل:
- زي الزفت، دا كلام شنو السمعتو دا؟
( عروف ) دا ركبيهو بقن يطقطقن:
- والله ياحاج بصراحة أهلى ماراضيين أعرس
- ليى ماراضيين إنت عامل حاجة غلط؟
- لا ماكدا بس هم ماعاوزنى أعرس فى مرتى
- ؟؟؟؟؟؟؟؟؟؟!!!!!!!!!!! يازوووووول، إنت يعنى معرس وعندك مرا؟؟؟؟؟!!!!! 😳😳
- اى يا عمو هى ( بت هندسة ) ماكلمتكم ولا شنو؟😳
- وعندك أولاد؟
- الحمد لله عندى منها 4 بنات
- طيب ياولدى ومالو، الراجل محلل ليهو أربعة
- والله ياحاج عارف الكلام دا بس تقول شنو
- تقول شنو يعنى شنو، مافهمتك؟ ياولدى كون واضح معانا إنت عاوز بتنا دى ولا ماعاوزا
عمك ( أب شنب ) وااااضح كان الكلام ماعاجبو وزعلان شدييييد وبتكلم من تحت سنونو 😡.. لكن يعمل شنو؟.. مجبور يسايس ( العروف ) لحدى ما السنارة تشبك.. ( العروف ) قال:
- والله ياحاج النية فى
- ياولدى دا كلام شنو، هو صيام عشان تقول لينا نية وما نية!!
هنا ( العروف ) حس إنه عمك أب شنب دا راااااقد القش.. والكلام بقى أشبه بالرجاء والتوسل 🙏.. عشان كدا عرف الناس ديل عاوزين ( يخارجو ) بتهم دى بأى طريقة.. عشان كدا حس بى ( نغمة ) الإنبراش فى صوت عمك أب شنب.. وقال فى نفسه [ مابعيد عمك الحاج دا يكون مدير قروب ( المنبرشين ) 🤔 ].. عشان كدا ( العروف ) حس بالأمان وعرف إنه مهممممممممم لدرجة ( قف ) بالنسبة للناس ديل والناس ديل عاوزنو بأى طريقة.. عشان كدا ( العروف ) إتطمن ورقد تانى ياكل فى القصب تاني وقال لى عمك:
- قلت لى شنو يااا ( عمنا )!!
- إنت ياولدى مرة ( حاج ) ومرة ( عمنا )؟!
( العروف ) بقى يكورك:
- ياخى إنتو أصلو مابتتطورو؟ أصلو الواحد ما يدلعكم؟
عمك ( أب شنب ) ضحك ضحكة تمشية ساى:
- ههههههه 😁 ظريف ياولدى ودمك سكر، كدى خلينا فى المهم، إنت موش جيت هنا ورقدت عندنا تلاتة يوم وجبت فتيلين الريحة وال 8 صابونات وقلنا ليك موافقين بس أمش جيب أهلك وتعال؟!!
( عروف ) تف القصب من خشمه زهجان:
- ياخى الأسطوانة دى كرهتونا بيها وعدتوها لينا ألف مرة، إنعل أبو الريحة لأبو الصابون 😠😠😠 اااااى جبنا الريحة و الصابون وقلتو جيب أهلك و أهلى أبو عدييييل كدا ، لا أمى لا أخواتى ولا خيلانى ولا أعمامى زول راضى يجى معاى ساى مافى، دا شنو دا، هو العرس بالرجالة؟!!!!
- أهلك الماراضيين ولا مرتك ياولدى، ياولدى كان ماقادر تفتح بيتين نحن متنازلين عن حقنا، بس تعال أدخل عليها وسوقا معاك ومادايرين منك أى حاجة، تعال بى ( لباسك ) ساى والله ماعندنا مشكلة
( العروف ) عيونو بقن جمر.. وبقى يعضعض فى سنونه بدل القصب 😠😠:
- ياحاج دا كلام شنو؟ كيف يعنى أجى بى ( لباسى )؟؟!!!! إنت قايلنى زول بتاع ليمون ساى؟!! أنا شغال فى (الجمارك) يازول
- ياولدى ماتفهمنى غلط نحن الناس الكبار لما نقول تعال ( بى لباسك ) قاصدين تعال لو ماعندك حاجة قبلانين عشان نحن مشترين راجل
( العروف ) من سمع الكلام دا رقد القش وإنبسط شوية 😊:
- أيوا ياحاج ماتقول كدا من أول ، أها ياحاج إنت رأيك شنو فى الموقف دا؟
- والله ياولدى أنا زمان كنت مستعد أحارب الدنيا دى كلها عشان أعرس حاجة ( بخيتة) حتى لو أهلى كانو ماراضيين كنت بمشى براى أصلو مافى مشكلة
✋[ أيوا دردق ياحاج.. حريف لكن 😜 ]
( العروف) قال:
- طيب إن جيتكم براي بدون أهلى بتوافقو؟!
عمك أب شنب مااااصدق ( العروف ) سأل سؤال زى دا.. طوالى جاوب:
- كيييييييف ياولدى، إنت بس أصلنا هنا وتانى ماعاوزين منك أى حاجة
( العروف ) إنبسط:
- لا كان كدا ياحاج خلاص بجيكم تب
أب شنب إنبسط شدييييد :
- خلاص ياولدى نقطع يوم الأحد الجاى الدخلة طوالى؟
- لكن الليلة الإتنين ياحاج، يعنى كلها 6 أيام بس وأنا عاوز أحلق وأعمل كم ( ساونا ) كدا وأعزم صاحبي ( كديس) وأرتب أمورى، خليها بعد أسبوعين
عمك أب شنب أقنع ليك ( العروف ) بعد تعب إنه ( الدُخلة ) تكون الأحد الجاى طوالى.. وقفل الخط على كدا.. ( بت هندسة ) بهناك من الفرحة ماقادرة تقعد.. و ( العروف ) بى جاى قام على المرايا يعاين وياكل فى القصب ويكلم فى روحه.. وشدت مافرحان لامن ضروسو ظاهرات:
- مااااااك هين يا ( عروف )، جاري و جاريين ورا 😍
إلى اللقاء فى الزواج..
