رواية بت هندسة الفصل الرابع
( العروف ) بتكلم مع ( كديس) صاحبه فى الموبايل:
- والله والله يامعلم يعدم أولادى الكلام دا صاح
( كديس) بإندهاش:
- طيب هسة دى مااااا شحدة عديل كدا
- والله حيرونا زاتو، ياخى ديل مافضل ليهم إلا يخشو لى بالسماعة يمسكونى، عاوزنى بى أى طريقة
- بالله يا ( العروف ) عمك أب شنب زاااااتو رقد القش؟ 😳
- والله دا رقد أى حاجة يحنس فينى تحنيس
- طيب إنت قلبك ما أكلك؟
- قصدك شنو؟🤔
- يعنى يا ( العروف ) ما خفت قلت الناس ديل لى عاوزنى بى أى طريقة؟ حتى لو ما أجيب أهلى؟ حتى لو تجى بى لباسك زى ماقال أبوها؟؟ ماحسيت الموضوع فيهو (إنّ )؟!
- والله النصيحة كدا أنا إستغربت شوية 😁
- لاهااااا، إنت لازم تستغرب و تستغرب كتير كمان، أسألك سؤال يا ( العروف )؟
- أسأل يامعلم
- إنت ( بت هندسة ) دى بتعرفها غير فى الفيس؟
- لأ
- بتعرف إسمها الحقيقى؟
- والله أول مرة أعرف إسمها من أبوها أمس لما كان معاى فى التلفون
- ؟؟؟؟؟؟؟؟؟
- هههههههه والله بالجد يامعلم، ماتستغرب
- دقيقة يا ( العروف )، يعنى إنت لما مشيت ليهم البيت ورقدت معاهم 3 يوم ماكنت عارف إسمها؟؟؟؟؟ 😳
- لا والله
- وأبوها وأمها وأهلا ديل خلوك دخلت البيت كيف زاتو من أول؟! وتبيت كمان!! قلت ليهم شنو لما دقيت الباب، قلت ليهم عاوز منو؟
- أنا البيت زاتى مابعرفو، وصفتو لى هي ( صيدلية محمد سعيد جمب الشجرة البيت ناصية )، مشيت بالوصف عديييييل دقيت الباب جانى أبوها، قلت لى عاوز ( بت هندسة ) قال لى منو؟؟؟؟؟ من قال لى كدا وشفت سنونو الصفر ظاهرات عرفت إنى ضعت
- ههههههههههههههههههه أها وحصل شنو
- قال لى إنت منو وجيت هنا كيف، وكورك لى ولدو قال لى جيب لى عكازى من تحت السرير وتعال سريع
- هههههههههه وإنت عملت شنو
- قررربت أفتح بس ربك ستر، جات واحدة كدا وسوست لى عمك الحاج دا فى أضانو إنقلب 180 درجة وشبكنى ليك ياولدى ماتقول لى إنت ( أمير الظلام ) بتاع الفيس و ( عِتمان ) الحاقد طقو ليك فى راسه بالعكاز
- ( عِتمان ) منو؟
- ولدو المعفن ال جاب العكاز 😠
- ههههههههههههههههههه، أها وحصل شنو
- يازوووول ضبحو لى أخوك ورقدت
عندهم 3 يوم
- طبعا" ال 3 يوم دى حنك تقيل مع ( بت هندسة )😍
- ولااااااا شفتها بعينى
- يازوووول دا كلام شنو دا؟؟؟؟؟؟؟
- الناس ديل قالو ( متحفظين ) ومابخلو
البت تقعد مع الولد إلا لما يجى يخش عليها
- ياسلام، ( متحفظين )؟!!!!!!!! 😅
تجى البيت تقول عاوز بتكم ال مابعرف إسمها ال قابلتها فى الفيس بس، يقومو يدخلوك البيت ولا يعرفو إنت منو وجاى من وين وماشى وين ويضبحو ليك وتبيت 3 يوم وتقول لى متحفظين؟؟!!، متحفظين بتاعت فنيلتك !!!
- إتخيل يامعلم تلااااتة يوم ماشفتها بعينى، بنتكلم بالواتس بس
- يازول إنت جادى؟؟؟ يعنى هسة إنت عرسك يوم الأحد على واحدة إنت ماشفتها بعينك؟! معقول؟!!
- لأ أنا شفتها آخر يوم بس لما كنت ماشى، قالو لى ياها ديييييك
- ياها ديييييك؟!!!!!!! 😂😂😂😂😂😂 يا ( عروف ) إنت ماجادى ولا شنو؟
- والله جادى معاك
- يازول أعمل حسابك الناس ديل مايركبوك ( ماسورة )
- لالا أنا شفتها من بعيد إستايلا فرنسى وحليوونة 😘
- حليوونة؟؟!! يعنى صغيرة؟
- شديد🥰
- والله يا ( العروف ) شكلك بالجد ح تركب ماسورة، مافى بت فى الفيس صغيرة أسألنى أنا 🤭
- ياخى إنت ماشفت صورتا الرسلتا لى ووريتك ليها؟، صغيرة ولا ماصغيرة ؟
- ومنو القال ليك دى صورتا، يمكن صورة واحدة تانية
- يامعلم مالك عاوز تخوفنا
- ماعاوز أخوفك يا ( العروف ) بس خايفك تدخل فى فيلم طوييييل ماتعرف تمرق منو، المهم يازول ربنا يتمم ليك على خير
( العروف) الفأر بدا يلعب في عِبه ☹️
( العروف ) قفل الخط من ( كديس ) كدا.. باب الشارع دق بى جاى.. ( العروف ) مشى فتح الباب شاف ليك إتنين عساكر بى سلاحهم معاهم واحد لابس ملكى.. قال لى ( العروف ):
- إنت ( عارف شرف الدين )؟
- أيوا
- معانا أمر قبض
قال كدا وأداهو الورقة.. ( العروف ) شال الورقة قراها بعد شوية قال:
- لكن أنا أخدت إجازة قبل وصول البضاعة دى بى يوم، كيف أكون إستلمتها ومررتها أنا؟!!
الزول طلع ليهو ورقة تانى.. قال ليهو:
- دى إمضتك ولا ماياها
- ياها إمضتى
- بس خلاص تعال معانا بالتى هى أحسن عشان مانجرجرك قدام ناس الحِلة ونعمل ليك فضايح
- طيب دقيقة أنلبس لى حاجة وأجيكم
- لا معليش ح تجى معانا كدا
- يازول إنت ( طنقاحة )، كيف أمشى لي بى سروال وفنيلة داخلية!!!
بس العساكر من سمعو كلمة ( طنقاحة ) ولا سمعو باقى الكلام، طوالى جرو ليك ( العروف ) ركبوهو البوكسى بتاعهم بالقوة وفاتو.
الكلام دا كان يوم الأربع.. ووااااااضح ( العروف ) فى مشكلة كبيييييرة ومحاكم وبرنامج.. والعرس كان يوم الأحد.. وبى هناك العروس ( بت هندسة ) تتمايل طربا" على أنغام ( الدلوكة ) 💃 وبى جاى ( العريس ) يتمايل مع البوكسى فى طريقه إلى ( السجن ) 🔗🚔
