رواية قضية خلع الفصل الاول 1 الجزء الثاني بقلم عمرو راشد

رواية قضية خلع الفصل الاول 1 الجزء الثاني بقلم عمرو راشد  

 

هو في حد معاكي في الشقة

= لا طبعا ايه اللي انت بتقوله

امال ايه الصوت اللي جوا دا 

= دا.. دا الراديو

مالك متوترة كدا ليه يا نادية ، هو في ايه جوا مش عايزاني اشوفه

= هيكون في ايه يعني

خلاص انا هعرف بنفسي ايه اللي جوا

= استنا يا فؤاد

" حياتنا مليانة اختبارات وانا اتحطيت في اختبار و ربنا عوضني الحمدلله او الحقيقة يعني اني اتحطيت في اختبار تاني ، اكيد فاكرين اللي حصل اخر مرة ، شكلكو نسيتو ، يبقا لازم تفتكرو معايا 

فلاش باك

"  كلام حسام غير كل حاجة ، انا مش عارفة اتصرف ازاي ، مش هعرف اجرح الاتنين بس الاتنين بيحبوني ، يارب بقا هو انا مش هخلص من التعب دا ، طب انا هعمل ايه حد يقولي ، اكلم حسام واقوله اني بحبه و يخطبني النهاردة بدل وائل ، لا لا حصلت قبل كدا في فيلم دي ، طب اكلم فؤاد واقوله على اللي حسام قاله ، كنت رايحة جاية في الشقة مش عارفة اروح فين ،  الباب خبط ، روحت وفتحت.. 

حسام!! ، انت ايه اللي جابك

= شكلك نسيتي اني صاحب العريس

حسام الكلام اللي انت قولته من شوية دا مينفعش ، مينفعش يحصل ، انا خطوبتي كمان كام ساعة 

انا مش جاي ابوظ حاجة

= امال انت جاي ليه وايه الكلام اللي أنت قولته دا

بالنسبة للكلام اللي انا قولته ، انا فعلا كنت قاصد كل كلمة قولتها ومفيش كلمة خرجت مني مش حقيقية واكيد انا عارف انه مش وقتها بس انا طبعي كدا محبش يبقا جوايا حاجة ومقولهاش..

= ما انت سكت قبل كدا

مكنتش اعرف انك هتروحي مني

= ودلوقتي عرفت 

دلوقتي انا جاي اوصلك عشان فؤاد بيقول انه عاملك مفاجأه

= توصلني فين

فؤاد بعتلي لوكيشن وهنروح نعرف كل حاجة هناك

= بس انا لسة مخلصتش

تقدري تدخلي تكملي عادي وانا هستناكي تحت

" قفلت باب الشقة ، انا مش عارفة أهرب منه فين ، مفيش طريقة للهروب ، انا مبقاش في حد في حياتي غيره هو و فؤاد ، والمشكلة انهم صحاب ، انا مش عارفة اختار مين فيهم ، مليون في المية لو اختارت واحد يبقا اكيد هخسر التاني ، اخسر فؤاد بس لو خسرته احتمال كبير اخسر شغلي كمان وهخسر فؤاد شخصيا وهو معملش معايا أي حاجة وحشة بالعكس هو كويس معايا جدا بس حسام هعمل ايه معاه ، كل دا كان بيدور في دماغي ومفوقتش منه غير على صوت رنة التليفون ، حسام اللي بيتصل ، رديت عليه وطبعا كان بيستعجلني ، البيه عايز يخلص بسرعة مش باين عليه حزن ولا انه متأثر ، جبلة اه والله جبلة ، قومت بسرعة كملت لبس وحطيت ميكب وفي خلال ساعة بالظبط كنت جاهزة ، نزلت كان واقف مستنيني واول ما شافني ، كنت فاكرة انه هيصفر زي اللي بيحصل في الروايات أو الأفلام

ايه القصير اللي أنتي لابساه دا

= ماله وبعدين دا مش قصير أوي ، معدي الركبة اهو

ركبة ايه اللي معديها ، انا عايزه يخفيكي انتي و ركبتك

= هعمل ايه يعني يا حسام ، هو استايل الفستان كدا

يعني انا ابقا واقف كل دا مستني وفي الاخر الاقيكي نازلة ب بدلة الرقص دي

= يا حسام بقولك معدي الركبة

طب انا بقول ان لسة في وقت تطلعي تغيري اللي أنتي لابساه دا

= امممم انا كمان حاسة اني عايزة اكلم فؤاد اقوله على اللي انت بتعمله دا ، تقريبا هيزعل مش اكتر يعني

الفستان حلو ، هايل ، الله ايه الجمال دا ، انا ازاي مخدتش بالي انه معدي الركبة ، اتفضلي اركبي

" للحظة كدا نسيت اني خلاص بقيت مخطوبة ، محتاجة حد كل شوية يفكرني ، ماهو انا لازم افتكر ، مش معقول كل مرة كدا ، بس ايه دا ثواني كدا ، هو بيغير عليا ، ايوا بيغير ، كنت مبتسمة ابتسامة بلهاء جدا ، انا فرحانة أوي انه بيغير عليا ، لا وايه كان عايزني اغير الفستان عشان قصير ، حمش أوي ، ايه اللي أنا بتنيل اقوله دا ، انا مخطوبة دلوقتي ، هو ليه محدش بيفكرني..

شكلك حلو على فكرة

= هاا

بقول شكلك حلو

= بجد

بجد ، أنتي علطول حلوة اصلا

" حاولت اداري ابتسامتي

طب والفستان

= هو مش فؤاد موافق خلاص براحتكو بقا ، عريس و عروسته مينفعش ادخل بينهم

" يا بارد يا ابن... ، انت العالم بيا يارب ، كان من الأفضل اننا نفضل ساكتين بعد كدا وفعلا هو دا اللي حصل لحد ما وصلنا ، المكان كان قاعة كبيرة جدا ، دخلنا بس الدنيا كانت ضلمة ، فجأه النور اشتغل مرة واحدة مع مزيكا عالية ، فؤاد قاعد على ركبته ومقدملي الدبلة ، احساس غريب اوي عمري ما حسيت بيه قبل كدا ، اني اكون شايفة ان فعلا في واحد بيحبني ومستعد يعمل أي حاجة عشاني ومش مخبي حبه ليا بالعكس بيظهر مشاعره قدام اي حد وهو دا الفرق بين فؤاد وحسام ، بصيتله وضحكت ، قام وخدني في حضنه ، قلبي بيدق بسرعة جدا ، غمضت عيني وسرحت ، انا باين عليا بحلم ، مش متخيلة ان كل اللي كنت بحلم بيه فجأه يتحقق ، بس بيتحقق وهو ناقص ، خرجت من حضنه ، قعدنا ولبسني الدبلة ، من ساعة ما وصلت وهو عينه مركزة معايا.  مركزة معايا بشكل مش طبيعي ، شيل عينك بقا انا كدا هقع في حبك وانا اقسم بالله ما ناقصة 

انت مقولتليش انك هتعمل كل دا على فكرة

= كانت مفاجأه بس ايه رأيك فيها

حلوة أوي و حرفيا اتبسطت بيها أوي

= نفسي اعيش عمري كله عشان اشوف الضحكة دي على وشك 

" و بعدين بقااا ، طب اقوم اجري طيب "

بس ايه الفستان دا

= ماله ، وحش؟

دا مين اللي يقدر يقول كدا 

= اصلك محسسني انك اول مرة تشوفه رغم انك مختاره معايا

عشان بقا احلى و هو عليكي ، مكنتش متخيل انه هيبقا حلو أوي كدا

= على فكرة انا بتكسف من الكلام دا ومبعرفش ارد عليه

مش لازم تردي 

" واحنا بنتكلم دخل علينا حسام عشان يباركلنا

الف الف مبروك يا فؤاد

= الله يبارك فيك يا حبيبي 

" بص ليا وابتسم

مبروك يا نادية

= الله يبارك فيك

" لقيت واحدة جاية تقف جنبه وبتحط ايدها على كتفه ، فؤاد اتكلم وهو بيضحك

ايه دا مين دي ، انت لحقت؟

= لا دي لورين صاحبتي 

" اتصدمت وقومت من مكاني 

صاحبة ايه..!!

" بس هي اللي ردت عليا

صاحبته يا نودي

= نودي!! ، أنتي قولتي اسمك ايه

لورين

= يلا ربنا مبيديش كل حاجة 

نعم!

= بهزر معاكي ، مالك في ايه يا صاحبته

#بقلم : #عمرو راشد

" فؤاد شدني من ايدي عشان نرقص وبصراحة كنت مبسوطة ، انا باين عليا بقا عندي انفصام ، مش هنكر ان فؤاد بيخطف قلبي ب اللي بيعمله معايا بس في نفس الوقت برضو جوايا رأي تاني بيميل ل حسام ، بس اكيد انا هعرف اخلص من الإحساس التاني دا ويكون فؤاد هو بس اللي جوايا ، وأخيرا خلصنا و راجعين ، انا و فؤاد راكبين العربية ومعانا حسام و اسمها ايه دي صاحبته ، حسام عرض علينا اننا نكمل سهر ، فؤاد وافق و فعلا روحنا مكان معين عشان نحتفل ، المزيكا كانت عالية جدا جدا تحس انها هي اللي خلتنا نتحرك و دخلنا نرقص ، بدأنا نتعب ، روحنا قعدنا فؤاد و حسام طلبو درينك ، بصتله ب استغراب 

هو انت بتشرب؟

= لا ، بس دا يوم يعني يا نادية 

بس انت مقولتليش قبل كدا يا فؤاد

= عشان دي مش حاجة اقولها ، هو يوم واحد هشرب فيه وخلاص ، بلاش نكد بقا

" سكت و هما بدؤوا يشربو ، درينك والتاني والتالت والرابع والخامس والعاشر

كفاية يا فؤاد ، انت شربت كتير

= سبينا نفرح يا نادية بقا

انا خايفة عليك 

= ايه دا ايه دا ، أنتي خايفة عليا يا روحي

طبعا لازم اخاف عليك ، انت غالي عندي أوي

" لورين قاطعتنا و قربت من حسام شوية

وانا كمان خايفة عليك يا حسام 

= خايفة عليا يا روحي 

طبعا دا انت غالي عندي أوي

" فؤاد وحسام ضحكو بشكل هستيري بعدها فؤاد رجع يبصلي ويبتسم 

يعني لولا حسام هو اللي جابنا هنا انا مكنتش هعرف انك بتخافي عليا كدا

" كنت لسة هرد عليه لكن حسام قاطعني و رد عليه وهو باصص على لورين

وانا لولا ان فؤاد وافق اننا نيجي هنا مكنتش هعرف انك بتخافي عليا أوي كدا 

= وانا لولا انك جبتني هنا مكنتش هعرف اني بحب فؤاد أوي كدا

وانا لولا انك بتحبي فؤاد مكنتش هعرف اني بحب نادية 

" خبطت على الترابيزة 

هو في ايه مالكو 

" اللي اسمها صاحبته دي ردت عليا

ايه يا نادية مالك بنهزر ، ولا انتي ملكيش في الهزار

= لا يا حبيبتي هزري بس خليكي مع اللي يخصك بس

" فؤاد حاول ميكبرش الموضوع و خدني عشان نكمل رقص ، خلاص مبقتش قادرة ، تعبت ، اخيرا وصلت عند البيت ، طبعا نسيت اقولكو اني سيبت شقة حسام لان فؤاد جابلي شقة جديدة ، دخلت الشقة و اترميت على السرير ، بفكر في اللي حصل طول اليوم ، كدا بقا حسام هو اللي اختار وسهلها عليا ، خليه يكمل مع لورين بتاعته دي ، و زي ما دخلت قلبي هطلعك منه ، قومت اغير هدومي ، الساعة كانت 1 بعد نص الليل ، كنت لسة هدخل انام بس الباب خبط ، بصيت من العين السحرية لقيته حسام ، فتحت الباب

في ايه يا حسام ، انت كويس 

= انا كويس متقلقيش

طب فؤاد حصله حاجة

= نادية انا عايز اتكلم معاكي

" اترددت من الكلمة دي وفضلت ساكتة

انتي خايفة تدخليني

= لا طبعا ، اتفضل

" قفلت الباب و روحنا قعدنا

في ايه يا حسام

= لو كنت روحت البيت مكنتش هعرف انام ، كان لازم ااجي واتكلم معاكي 

طب اتكلم

= انا مش عارف اسيطر على نفسي يا نادية ، انا تعبان أوي ، تعبان وانا شايفه بيحضنك ، وهو بيلبسك الدبلة ، وهو بيرقص معاكي ، كنت بموت في كل لحظة وهو قريب منك

انت اللي وصلتنا للمرحلة دي ، وبعدين كنت بتموت ليه ، هي لورين مش مالية عينك ولا ايه

= لورين دي تعتبر ملهاش وجود في حياتي اصلا ، انا مبحبش غيرك يا نادية

بس هي بتحبك

= انا اساسا جايبها عشان اضايقك

اختيارك كان غلط يا حسام ، انت جيبت واحدة بتحبك أصلا

= نادية...

" قرب مني 

انا بحبك يا نادية

" شفايفنا كانت قريبة أوي من بعض ، غمضت عيني وكنت لسة.... ، الباب خبط ، اتفزعت وقومت بسرعة ، بدأنا نبص لبعض بخوف ، حسام دخل بسرعة على الأوضة ، وانا روحت افتح الباب

فؤاد ، انت ايه اللي جابك دلوقتي!!

#بقلم : #عمرو_راشد

#قضية_خلع " حبيت اتنين "  1 

#يتبع 

                الفصل الثاني الجزء الثاني من هنا 

تعديل المقال