رواية نادرة قلبي الفصل الثالث عشر 13 بقلم دعاء احمد
#نادرة_قلبي.. #الحلقة_الثالث_عشر...
نادرة اتصدمت و هي شايفه فريد داخل القاعة و هو بيبصلها بخبث.
نغم :
=دا ايه اللي جابه هنا دلوقتي
نادرة بخوف و توتر:
=مش عارفه يا نغم مش عارفة
نغم :طب اهدي مالك اتوترتي كدا ليه اكيد مش هيحصل حاجة
نادرة بصيت لحسن اللي كان بيرقص مع الشباب و باين اد ايه فرحان
نادرة و هي على وشك انها تعيط
: تفتكري هيعمل حاجة تبوظ الفرح
نغم بسرعة:يبوظ ايه و بعدين اهدي هو مش ماسك عليكي ذلة يعني
فريد ابتسم بخبث و هو بيقرب من الكوشة لحد ما وقف ادامها، نادرة كانت قاعدة جانب نغم و هي بتبص له بتوتر
مد ايده يسلم عليها و اتكلم بمكر:
=الف مبروك يا برنسس مكنتش متخيل انك هتكوني بالجمال دا في اليوم دا و عمري ما تخيلت انه يجي و انتي لغيري
نادرة وقفت بمنتهى البرود الخارجي و هي بتبص لايده الممدودة، ابتسمت بحدة :
=بلاش تلف و تدور يا فريد جاي ليه؟ امشي لان مش هسمحاك تبوظلي اليوم دا بالذات
امشي.....
فريد سحب ايده و اتكلم بخداع و هو بيقرب خطوة :
=خايفة؟! خايفة ابوظلك فرحك و سي حسن يعرف ان مراته بتلعب عليه و انه مجرد استبن ليا انا و هترجعيلي
نادرة بصتله بغضب لكن محبتش تبين علشان الضيوف...نغم كانت واقفة معها
و لاحظت ان حسن جاي عليهم و هو متضايق من وجوده
حسن قرب منها و ابتسم بحدة و قسوة و هو بيقف جانب نادرة اللي مسكت في ايده و كأنها بتوصل رساله لفريد انها مبقتش له و لا ليه اي مشاعر في قلبها
حسن بحدة و جدية:
=ايه اللي جابك يا ابن الأسيوطي...
فريد بخبث و هو بيبص لنادرة:
=معقول يبقى فرحك و مجيش دا انت غالي عليا اوي.... و بعدين يا حسن انا بقول ننسى اللي فات، سمارة خالص اللي في بطنها نزل و انت مش ابوها يعني و انا يا عم مسامحك على ضر"بك ليا و يا دار ما دخلك شر
حسن رفع حاجبه باستنكار :
=معقوله فريد بيه الأسيوطي جاي لحد هنا مخصوص علشان يبارك لحسن الميكانيكي غريبة..... امشي يا فريد... امشي احسنلك
انا و انت مفيش بينا حاجة تجمعنا و احمد ربنا ان سمارة اتنازلت عن حقها لان صدقني انا عندي استعداد اضربك تاني دلوقتي لأنك بني آدم رخيص و زبالة
فريد قرب منه بغضب و هو على وشك انه يضربه، حسن بصله بحدة و هو بيقرب خطوة منه و مفيش في عينه ذرة خوف
فريد بخبث:
=لا راجل يا حسن راجل و نصير الغلابة بس خالي بالك بقا على أهل بيتك...
قرب منه و همس له بخبث
=بس خالي بالك عليهم اوي اصل مراتك صاروخ
حسن فجأة مسكه من ياقة قميصه بقوة و هو بيشده و باين في عنيه الغيرة و الغضب، نادرة مسكت دراعه بسرعة و هي بتحاول تبعدهم و حاسه ان دي نهايتها
عامر و موسى كانوا واقفين مش فاهمين اللي بيحصل
حسن بحدة :
=أنت الجاني على نفسك يا فريد انت اللي جاني على نفسك لو حاولت حاولت بس انك تفكر بدماغك الزبالة دي عنها فاهم و اطلع برا احسنلك...
فريد بخبث:
=همشي بس اهد كدا دا انت عريس و لازم ترفع راسنا بدل ما القمر دي....
حسن قاطعه و هو بيضربه باللكمية و عنيه مليانة غضب و حدة، عامر شد فريد و بعده عن حسن
موسى :
=في ايه يا ابني و فريد الأسيوطي مالك و ماله
حسن وقف يظبط بدلته و هو شايف عامر بياخد فريد لبرا القاعة، نادرة غصب عنها دموعها نزلت و هي خايفه يحصل حاجة تبوظ الفرح
حسن بصلها باستغراب و قرب منها و هو مبتسم كأن مفيش حاجة :
=العياط في يوم زي دا قال مش حلو خالص ممكن اعرف بقا بتعيطي ليه؟
نادرة بصتله بخوف.. خوف ان الحنية و الحب اللي دايما في كلامه يتقلب كره في يوم من الايام لما يعرف الحقيقة
نادرة بدموع:
=خايفة الفرح يبوظ او يحصل اي حاجه وحشة.
حسن ابتسم بسعادة و هو بيقرب منها و حاوط وشها بسعادة و هو بيمسح دموعها بحنان
= عمري ما هيحصل اي حاجة و لا هيبوظ صدقيني لان عمري ما هسمح ان اليوم اللي استنيته كل السنين دي يبوظ في لحظة و لا علشان اي حد غيرك.... غير لو انتي اللي قررتي تبعدي ساعتها للأسف مش هقدر اجبرك تفضلي معايا غصب
نادرة بصتله بحب ابتسمت و هي بتحضنه بقوة أدام الكل بدون خوف و جراءة
حسن غمض عنيه و كأنه لامس نجمة من السماء، احساس السعادة اللي حسه كان ميتوصفش بالنسبة له
دعاء بحب و هي بتبصلهم:
=ربنا يحرسهم من العين
جليلة بسعادة :يارب يا ام حسن يارب و الله فرحة نادرة دلوقتي عندي بالدنيا.
دعاء : ربنا يحميهم.
نادرة بعدت عنه و هو ابتسم و طبع بوسة على رأسها بحب
=مش عايز زعل فاهمة....
نادرة ابتسمت و هزت راسها بالموافقة
عامر بخبث:
=عصافير الحب... هنقضيها احضان لا الليلة في اولها، ياله مش هترقصوا الأغنية الجاية مخصوصة ليكم
حسن بضيق:
=انت عارف انا ماليش في الرقصة دي
نادرة بسرعة و تلقائية:على فكرة انا بعرف سهلة اوي، و رقصتها كتير
حسن بغيرة: و رقصتيها مع مين ان شاء الله
نادرة ضحكت و هي بتبص له و بهمس و دلال:
=مع مرجانة يا سونة....
حسن ضحك و هو بيبصلها بمكر:
=سونة!! انتي عارفة لو حد سمع الاسم دا الهيبة هتبقى في ذمة الله
نادرة بتغنج:
=لا الاسم دا بتاعي انا و انا لوحدي اللي هقولك لما نكون سوا متخفش مش هضبع هيبتك خالص خالص....
حسن بحب:
=طب انا بقول نروح بقا
نادرة بحدة:
=لا لسه في حاجات كتير نفسي اعملها و عايزين نتصور كتير ااااوووووي
حسن :طب تعالي نرقص بدل ما احنا واقفين كدا
نادرة مشيت معه و هو ماسك ايدها، أضاءة القاعة بقيت هادية و الموسيقى كذلك
حسن حط ايده على خصرها و هي ايدها على كتفه و هي بتتكلم معه و بتقوله يعمل ايه و هو مش حاسس بوجود الناس حواليه دا يومهم هم
نادرة : عارف انا بحب الصور اوي و كمان احلى حاجة ان بيكون في فيديو متصور للفرح، عارف كل ما ازعل منك هعمل ايه؟
حسن بجدية:
=ان شاء الله مش هيكون في زعل بس هتعملي ايه؟
نادرة بتلقائية و هدوء:
= هحضنك بقوة... حسن أنا بخاف من البعد و بخاف من الفراق و الوجع و بخاف اني اكون لوحدي و بخاف يجي اليوم اللي اعيط فيه... انا بخاف من العياط يا حسن
انا عارفة اني غريبة و مخاوفي غبية زي لكن
انا كل ما افكر ان هيجي يوم و اكون لوحدي و حزينة احس اني خايفة اوي اوي يا حسن
حتى لو انت زعلتني يوم مش هسيبك تمشي و انت مزعلانة هحضنك و اقولك انا زعلانة من كذا و كذا و كذا
مش علشان معنديش كرامة بالعكس انا ممكن اطربا الدنيا فوق دماغ اي حد يجي عليا بس علشان انا بخاف لما بزعل من اللي بيحبوني و انت قلت انك بتحبني
عينك فيها دف بيخليني عايزاه أقرب و دا مخوفني
مخوفني يجي اليوم اللي احس اني غلطانة خايفة يجي اليوم اللي اكون فيه معاك و انا مش حاسة بالأمان
حسن بحنان :
=شوفي يا نادرة وعد و عهد عليا أدام ربنا أني افضل احبك مهما حصل و صدقيني عمري ما هفكر ازعلك طول ما انتي فهماني و مقدرة خوفي و حبي ليكي.....
نادرة بحماس:
=طب شلني....
حسن بحدة:نعم!
نادرة بمكر و سعادة:
=اقصد ارفعني عن الأرض و لف بيا بس بهدوء مش زي كل الأفراح العريس بيستقوي... عايزاه احس ان الوقت بيعدي بهدوء و احس بكل لحظة....
حسن ضحك و بهمس:
=عارفة ايه اكتر حاجة بتشدني ليكي، انك تقريبا هبلة
نادرة بغيظ:
=و الله.... قول انك مش عايز تشلني و بتتهرب علشان الفستان تقيل....
نادرة سكتت لقيته بيغمز ليها بحب و هو بيحاوط خصرها بايده و بيحضنها بقوة و بيتحرك بهدوء خفة
نادرة كانت حاسة بشعور غريب بين التوتر و السعادة و الخجل و الخوف!
كل الضيوف كانوا بيبصلهم بحب و سعادة، كانوا لايقين جدا على بعض
على تربيزة
كان في بنت قاعدة و هي بتبص لنادرة بغيرة واضحة و غضب و باين انها مش حابه وجودها اصلا في الفرح
زبيدة (اخت جليلة) بحدة:
=افردي وشك يا نوال مالك عاملة كدا ليه و لا انتي عايزاه خالتك تزعل منك
نوال بنتها:
=اماه سبيني في حالي انتي عارفة اني مكنتش عايزاه اجي و بعدين من امتى و انا و نادرة بنطيق بعض
زبيدة : نفسي اعرف هي عملتلك ايه علشان تبقى مش طايقها كدا مع ان نادرة دي مفيش واحدة زيها دلوعة و دمها خفيف و الله دا من حظ حسن
نوال بغيرة:
=يعني ما انتش شايفه اللي بيحصل يا أمله ايه المسخرة دي دا انا في فرحي كنتي قاعدة في الكوشة متحركتش و ماهر مكنش بيكلمني بالطريقة دي و لا فرحان كدا،
و بعدين بقا نادرة اللي متجوزة ميكانيكي يتعملها فرح في قاعة و انا يوم فرحي عملتوه في داخله الشارع مع ان متجوزة محامي و متعلم
لا و كمان يوم الشبكة اشتري لها اللي هي عايزاه و هي يا دوب مخلصة صنايع و انا اللي معايا كلية....
زبيدة بسرعة و مقاطعة
:اسكتي يا بت اسكتي حد يسمعك انتي بتقولي ايه.... انتي غيرانه منها و لا ايه اسكتي
اولا الفرح على العريس و هو حر يعمله فين و ماهر هو اللي قال نعمل فرحكم في الشارع دي ظروفه
و الميكانيكي اللي مش عجبك دا مبسوط باللي معها صنايع دي و فرحانين ببعض انتي بقا مش عجبك حياتك دا يرجعلك لكن متخلكيش تهري و تنكتي في نفسك كدا
و بعدين انتي مالك يجبها شبكة حلوة و لا يخصك في ايه
مش انتي اللي قلتي انا لا يمكن اتجوز واحد معه اقل من تعليم عالي.....
و بعدين هو فرحان و مبسوط بيها انتي بقا ماهر لو مكنش فرحان وقتها فدا بسببك و بسبب زنك عليه نعمل كذا و كذا و كذا لحد ما زهق
فهدي على نفسك يا بنت بطني......
نوال بسخرية:
=طب أنا ههدا بس صدقيني نادرة دي هترجع مطلقة اصل دي انسانة لا تطاق
زبيدة بشهقة:
=يلهوي عليكي بتفولي على البت... قومي من هنا قومي روحي قومي
نوال بحدة:
=لا انا بقا قاعدة خلينا نتفرج
زبيدة :ربنا يهديكي يا بنت بطني..
رحاب كانت وصلت القاعة لكن شافتهم بيرقصوا فقعدت على تربيزة لكن بالصدفة سمعت كلام نوال اللي باين فيه اد ايه هي بتغير من نادرة و من جمالها و حظها
رغم ان نادرة تعليمها ابسط منها و كمان عريسها مش شغال في وظيفة مهمة من وجهة نظرها
رحاب لنفسها :حلو..... حلو اوي
بعد شوية اشتغلت اغنية "مبروك عليا"
صحاب نادرة طلعوا على الاستيج و مسكوا ايديها و هما فرحانين
و حسن مسك ايديها و بيرقصوا بطريقة هادية مليانة شغب و ابوها و جليلة و الكل فرحان معها
نادرة بحب و هي ماسكه في ايد دعاء و هي بتردد كلمات الاغنية :
"مبروك عليا كدا مية مية عريس خالص جانبي في عش الزوجية... عيلته بقيت عيلتي.. مامته بقيت مامتي يا اخواتي يا طنطي زرغطولي شوية"
دعاء حضنتها بحب كلهم فرحانين
دعاء بحب:
=و الله انا النهاردة مش مصدقة عيني و قلبي طاير من الفرحة الف مبروك يا حبيبتي، و دلوقتي اقدر اطمن على حسن و عليكي
و بالمناسبة دي لازم اديكي هديتك
نادرة بحب:
=هدية ايه؟
دعاء طلعت علبة صغيرة و حطيتها في ايد حسن
:دي هديتي لمراتك من زمان و انا مستنيه اليوم دا "
حسن بصلها باستغراب و فتح العلبة لكن ابتسم بحب و هو شايف خاتم والدته
دعاء بحب لنادرة:
=الخاتم دا غالي عليا اوي و معنديش أغلى من حبيبة ابو علي علشان تكون هديتها الف مبروك يا نادرة
نادرة بتاثر:بس دا بتاعك يا ماما...
دعاء بحب:
=و انتي دلوقتي بنتي و دي هديتي لبنتي
نادرة ابتسمت و حسن مال على رأس امه باسه و مسك ايديها الاتنين باسهم بحب
=ربنا يحفظك ليا يا ست الكل و تعيشي لينا طول العمر
دعاء : ربنا يحميكم يا حبيبي
حسن مسك ايد نادرة و لابسها الخاتم
نوال اتغاظت اكتر و قامت مشيت بسرعة من القاعة
بعد ساعتين و نص
نادرة وصلت شقتها مع حسن و القرايب باركوا ليهم و مشيوا
نادرة كانت قاعدة مع جليلة في اوضة النوم
جليلة بحب:
=شوفي يا نادرة حسن و أمه شارينك و انا عارفة أنك مقدرة دا و ان رد فعل طبيعي تكون فرحانة بس انا هقولك نصيحة امي الله يرحمها قالتهالي يوم فرحي
حبيه يا نادرة.... اه و الله العظيم حبي حسن
انا عارفة ان القلب مش بضغطه عليه بيحب
لا القلب بيحب لما بيلقي المودة و الرحمة و الطيبة
شوفي كل دا مع حسن و خالي قلبك يترجم الشفرات دي و خليه حنين عليه، الراجل مهما لف بيحب اللي يطبطب على قلبه و يحتويه وقت حزنه صدقيني ابن الحلال هيقدر دا و حسن ابن حلال
نادرة بحب :
=متخافيش عليا و الله ان شاء الله كل حاجه هتكون كويسة و انا واثقة في حسن و واثقة انه شخص كويس
جليلة بحب:
=ربنا يكملك بعقلك... انا لازم امشي دلوقتي ابوكي عمال يرن عليا بيقول اسيب العرسان بقا.... هجيلك بكرا "
نادرة اخدت نفس عميق و هزت راسها بالموافقة
جليلة خرجت من الأوضة و سلمت على حسن و مشيت
نادرة خرجت من الأوضة لقيت حسن قاعد في الصالة ابتسم وهو شايفها جاية عليه
نادرة بمرح : اخيرا قلعت الفستان كان تقيل اوي
حسن :طب انا هدخل اغير و اتوضي.
بعد مدة
كان واقف بيصلي و هي وراه و بصه في الأرض بخشوع و هدوء
بعد وقت خلصوا صلاة و حسن وقف رفع ايده و دعا ربنا و تضرع اليه بالدعاء
نادرة قعدت على الأرض و هي ساندة ايديها على خدها و بتبصله
حسن بصحك:
=مالك يا بنتي بتبصيلي كدا ليه
نادرة:دماغي وجعتني انت بتفضل ساجد وقت طويل.
حسن : مش طويل اوي.... بس انا اصلي اتعود لما اصلي أحيانا بطول في السجود
نادرة :
=انت حافظ القرآن
حسن :بصراحه اكون كداب لو قلت كله بس فاضلي سبع أجزاء مثالا
نادرة :انا كمان كنت بروح عند محفظة ابلة وفاء اللي جيت سلمت علينا في الفرح بس اكمن المشوار ليها بعيد فبابا قرر اني افضل في البيت لانه كان بيخاف عليا فعلشان كدا مكملتش ايه رايك نحفظه تاني سوا
حسن بحماس : فكرة حلوة اوي
نادرة :طب انا جعانة
حسن :تعالي يا ستي الاكل برا خلينا نتعشى
نادرة بتوتر :لا انا هنام خفيف
حسن بجدية و هو ماسك في ايدها كانت هتتكعبل بسبب الايسدال
:تعالي يا نادرة..
نادرة : انت ساحب بنت اختك براحة شوية
قاعدوا يتعشوا و حسن دخل الأوضة و قعد يقرأ في المصحف، نادرة اندست في السرير و هي بتبص للمصحف
=اه يا خاين... عايز تسبقني في الحسنات، اقرا بصوت عالي صوتك هادي و انا هقرا وراك
حسن بود :
=تعالي يا مدوخاني
نادرة ابتسمت و بدأت تقرا معه لدرجة انها عيطت من خشوع صوته
*********************
تاني يوم الساعة عشرة
حسن قام من النوم، ابتسم و هو بيبصلها و هي نايمة، بأس راسها و هو بيدعي ربنا انها تفضل معه طول العمر
حسن :الحمد لله.. الف حمد و الف شكر لك يارب
سابها نايمة و قام اخد دش، دخل المطبخ بعد شوية و جهز لنفسه فنجان قهوة بلبن و قعد يشربها بهدوء و هو بيفكر في كلام فريد لكن مهتمش بيه و هو بيبص لنادرة اللي نايمة براحة
نهاية الفصل..... دعاء احمد