رواية نادرة قلبي الفصل التاسع والعشرون 29 بقلم دعاء احمد
#نادرة_قلبي... الحلقة التاسعة و العشرون
تاني يوم الساعة اتنين الضهر
نادرة كانت قاعدة على كرسي السفرة و ادامها كيك و كريمة و شكولاته
كانت بتزين الكيك بتركيز و احترافية بتشكلها بمنتهى الحب و هي بتفكر أنها تعمله مفاجأة بمناسبة عيد ميلاده و بحر جانبها بتساعدها و هما بيهزروا و يضحكوا
بحر :حسن هيفرح اوي بالمفاجاة دي يا نادرة مش كدا
نادرة بحب و سعادة:
=اكيد هيفرح لما يعرف ان ست بحر بنفسها قاعدة بتجهز له تورتة عيد ميلاده... ايه رايك شكلها حلو؟
بحر بابتسامه :
=حلو اوي انتي شاطرة اوي يا نادرة في تزيين الكيك مين علمك؟
نادرة :جليلة و كمان كنت بشوف فيديوهات علي اليوتيوب هعلمك بس لما تكبري شوية اتفقنا.
بحر :اتفقنا.... هو انتي عيد ميلادك امتى؟
نادرة بحزن :لا انا عيد ميلادي مش بيجي غير مرة واحدة كل اربع سنين يوم تسعه و عشرين اتنين في السنة الكبيسة بعيد عنك...
بحر :هو انتي زعلانة انه مش بيجي غير مرة واحدة كل اربع سنين
نادرة :اه الصراحه زعلانة كان نفسي كل سنة زي باقي الناس عادي بس اعمل ايه بقا ماليش نصيب
بحر :و ليه كان نفسك يبقى كل سنة...
نادرة :علشان احتفل بيه و يجيبوا هدايا ليا كل سنة
بحر :يا خسارة انا مش عارفه يوم عيد ميلادي بس لو بيجي كل اربع سنين هتبقى حاجة تزعل اوي....
نادرة حست ان بحر زعلانة انها مش عارفه امتى يوم ميلادها، ابتسمت بود و هي بتديها قطعة من الجاتوة :
=خالص يا ستي متزعليش ايه رايك نحتفل بعيد ميلادك في نفس اليوم اللي جيتي فيه هنا يوم العيد و السنة الجايه في نفس اليوم نعمل عيد ميلاد ليكي موافقة
بحر بابتسامه و حماس؛ اه موافقة
صحيح يا ابلة نادرة أنا النهاردة لما كنت في الحضانه الابلة قالتلي اني شاطرة و خطي حلو اوي و كانت فاكرة انك انتي اللي كتبتي ليا الواجب بس انا قولتلها انك كنتي بتمسكي ايدي في ورقه تانية و علمتيني ازاي اكتب الحروف و انا قلدتها تاني في الكراسة قالتلي شاطرة و ادتني شكولاته
نادرة بسعادة و حماس غريب:
=شطورة... عارفة يا بحر و انا صغيرة مكنتش بعرف اكتب و كنت بعيط علشان مكنتش بعرف اعمل الواجب بتاعي بس انتي هتكوني شاطرة مش كدة
بحر بابتسامه :
=لو انتي فضلتي تعلميني هبقي اشطر واحدة في الفصل.
نادرة ابتسمت بود و هي بتبص لها لحد ما خلصت و حطت التورته في التلاجة بعد ما زينتها
نضفت المطبخ و خرجت مع بحر اللي طلعت بسرعة تتفرج على التلفزيون، نادرة كانت بتتفرج عليها و هي بتفتكر نفسها و هي صغيرة و أنها كانت شقية اوي يمكن مش شبه بحر في هدوئها لكن جواهم الاتنين احساس واحد بالفقد
انهم فقدوا شي مهم جداً عليهم...
اتنهدت و دخلت اوضتها و بعد دقايق ندت لبحر
نادرة بصوت عالي :اطفي التلفزيون يا بحر و تعالي عايزاكي
بحر :حاضر
نادرة كانت فاتحة باب اوضتها و بتظبط الدولاب، بحر خبطت على الباب و دخلت.
نادرة بصتلها بحب و ابتسمت
=تعالي يا بحر...
بحر و هي بتقعد على الكرسي
:هو في حاجة؟
نادرة طلعت علبة من الدولاب و راحت ناحيتها قعدت ادامها على الأرض و مدت ايدها تديها العلبه
بحر :ايه دا؟
نادرة:هدية ليكي
بحر :ليا انا؟!
نادرة :افتحيه
بحر عضت على شفايفها بتوتر و فتحت العلبة.... بقيت بصلها و هي مستغرب و مبسوطة
=الفستان الحلو دا علشان انا
نادرة بابتسامه و هي بتمسك ايدها:
عجبك؟ ...
بحر بسعادة كبيرة :
=دا حلو اوي يا نادرة حلو اوي ينفع البسه النهاردة.
نادرة :زي ما تحبي و هعملك تسريحه جميلة
بحر قامت وقفت قصدها و تلقائية طبعت بوسه على خد نادرة
=أنا بحبك اوي يا نادرة على فكرة... بس مش علشان الفستان و لا علشان التسريحة اقولك الحقيقة
أنا كنت بخاف اوي و انا نايمة في الشارع
و كنت بزعل لما حد يزعقلي و يقول اني شحاته و كنت بشوف العيال مع اهلهم و يقولوا ان عندهم ماما و بابا
بس انا كمان بقا عندي ماما حلوة زيك و بابا طيب زي حسن.
و بقا عندي أوضة جميلة و سرير حلو و بقا عندي حاجات كتير حلوة.... انا بفرح لما تفرحوا و لما بسمع حسن بيدعي انه ربنا يحفظنا
و يحفظ النونو بدعي ربنا أنا كمان انه يحفظكم علشان انتم نفسكم فيه و هتكونوا فرحنين لما يجي و انا نفسي دايما تكونوا فرحنين...
نادرة عيونها كانت بتلمع بالدموع، بحر حضنتها و فضلت قاعدة جانبها
بحر :خلاص متعيطيش بقا و الله هزعل منك اني مش بحب الدموع
نادرة مسحت دموعها و باست راسها بحب
=خالص مش هعيط و انتي كمان توعديني تبطلي تفكري في اللي فات و في الشارع و الناس الوحشه دا بيتك و انا و حسن معاكي طول ما فينا النفس ماشي يا ست بحر
بحر :ماشي...
نادرة :تعالي بقا نتوضي و نصلي العصر سوا
نادرة اخدتها و علمتها ازاي تتوضي و صلوا سوا و نادرة بتعلمها كل خطوة
بعد ساعة تقريباً
نادرة و بحر كانوا بيزينوا البيت ب شي كل هادي و متناسق و بسيط جدا
الساعة تمانية بليل
بحر كانت نايمة بعمق، نادرة بصتلها باستغراب انها نامت لكن اخدتها اوضتها تنام... خرجت و راحت اوضتها تاخد شاور
****************
حسن وصل تحت البيت ركن الموتسكل بتاعه و طلع لكن استغرب الهدوء، شغل نور الشقة و بص للمكان باستغراب الزينة و كل حاجه و هو مش فاكر ان دا يوم عيد ميلاده اصلا لان عمره ما احتفل بيه
حسن بصوت عالي :نادرة.... يا بحر... نادرة
راح لاوضة بحر لقاها نايمة سابها و راح اوضته... فتح الباب و ابتسم بتعجب و هو شايف التورتة اللي محطوطة على التربيزة و النور الهادي...
نادرة. ابتسمت بحب و هي بتبص له
حسن كان واقف منبهر من جمالها و كأنه اول مرة يشوفها لكن يمكن لأنها مختلفة المرة دي
كانت لابسه فستان اسود طويل شيك جدا و شعرها الناعم منسدل باناقه علي ضهرها، عيونها و لمعتها كل حاجة فيها مميزة
نادرة بدلال و هي بتلف ايدها حوالين رقبته :
=كل سنة و انت طيب يا ابو علي....
حسن بابتسامه و سعادة :
=ايه الجمال دا كله هو أنا دخلت شقة غلط و انا مش واخد بالي...
نادرة بزعل :هو انت جيت قبل كدا و كان شكلي وحش لا سمح الله و لا انا معجبش
حسن :دا انتي تعجبي الباشا يا مربي حياتي انتي.... بس بمناسبة ايه دا كله؟
نادرة :عيد ميلادك يا حسن في ايه؟!
حسن :هو النهاردة! دا انا كنت ناسي اصلا
نادرة بتغنج
:بس انا بقا مش نسيت كل سنه وانت حبيب قلبي يا حسن
حسن :و الله انا هيجرالي حاجه منك في يوم من الايام....
بس مقبولة منك
نادرة :ايه مقبولة منك دي يا حسن قولي كلام حلو متحسسنيش اني عامر صاحبك في ايه يا جدع
حسن :خالص خالص في ايه دا انتي بتقلبي في ثانية
نادرة بدلال طفولي :عايزاه اسمع كلام حلو
حسن :مش عارف ليه بحس اني مع بنتي مش مراتي يا نادرة...
نادرة :يووووه بقا يا حسن انت بتبوظ اللحظة و انا اشتغلت كتير عليها
حسن :طب خالص متزعليش يا ستي حقك عليا.... كل سنة وانتي طيبة
نادرة :و انت بالصحة والسلامة... و كملت لنفسها بغيظ
=دا فكرني امه دا و لا ايه....
حسن :طب وطي صوتك بس الاول علشان عالي و بعدين انتي مش عجبك كلامي
نادرة :امشي يا حسن ادخل خد دش و انا هنام تصبح على خير انا غلطت لما فكرت نحتفل سوا كنت متخيلة حاجة تانية بس انت نزلت بسقف توقفاتي خالص
حسن دخل ياخد دش و هو حاسس بوجع في ضهره و دماغه و انه مش شايف ادامه لكن كان بيحاول يتعامل معها عادي علشان متلحظش
نادرة :اومال ليه الزفت الرواية البطل كان سعيد و فرحان لا و انبسط هو معقول متبسطش
حسن اخد دش سخن يريح بيه اعصابه و خرج لقاها قاعدة و كان عارف انها متضايقه من ردة فعله لكن غصب عنه لانه نام امبارح متأخر بعد ما جيه من طنطا و صحي بدري علشان يروح الورشة لان كان عنده شغل كتير لازم يخلصه.
أبتسم بحب و قعد جانبها على السرير
=نادرة
نادرة :عايز ايه؟
حسن :انا اول مرة حد يعملي عيد ميلاد حقيقي فرحت اوي و مكنتش متخيلها الصراحة....
نادرة :ما هو واضح انك فرحان يا حسن باين عليك انك فرحان
حسن باس رأسها و فضل حضنها لدقايق و هو بيحاول ميفكرش في حاجة
نادرة بقلق :
=مالك يا حسن؟ انت كويس
حسن :
=انا كويس بس محتاج افضل في حضنك يا نادرة مش عايزك تبعدي خليكي كدا شوية
نادرة بتوتر :حسن انت متأكد انك كو....
حسن بمقاطعة :
=ششش اسكتي يا نادرة انا عايز أفضل كدا مش عايز حاجة تانية يا نادرة
نادرة حضنته و هي بتبطبط عليه و حاسه انه مش كويس لكن سكتت
بعد وقت
كان نايم و ساند رأسه على فخذها و هي بتملس على شعره بحنان لحد ما فتح عنيه
حسن :حقك عليا انا بس كنت تعبان شوية و كان عندي شغل كتير و انا مكنتش عارف اتصرف ازاي لان عمر ما حد عملي عيد ميلاد
نادرة ميلت عليه و باسته
=و انا مش زعلانة بالعكس انا فرحانة و مبسوطة اوي انها عجبتك....
حسن ابتسم و قام
=طب ايه مش هنطفي الشمع دا بقا
نادرة بسرعة :
=اتمنى أمنية
حسن بصلها و سكت للحظات
=اتمنيت
نادرة :طب اطفي الشمع بقا
طفوا الشمع و هي قطعت التورتة و اديته طبق
=حلو اوي... لا بجد حلوة تسلم ايدك
نادرة :
=بحر ساعدتني فيها و كانت عايزة تشوفك بس نامت و انا دخلتها اوضتها.. استنى اجيبلك هديتك
نادرة قامت بسرعة و جابت صندوق هدايا صغير
حسن بابتسامه :انا مش واخد على الدلع دا كله
نادرة بابتسامة:يا حبيبي انت متجوز نادرة موسي يعني ادلعك براحتي مش جوزي
حسن فتح الصندوق و لقى قميص اسود و بنطلون جينز و ساعة و محفظة و هدايا صغيره
نادرة بابتسامه :عجبك
حسن :حلوين اوي
نادرة ضحكت بسعادة و بخبث
=ارقصلك يا حسن
حسن بلع ريقه بتوتر :
=افندم؟ لامؤاخذه مش سمعت
نادرة بدلال :
=هرقصلك بلدي
حسن :
=انتي مش قبل الجواز قولتي ازاي تتجوز واحدة مش بتعرف ترقص مش هتلقي حد يدلعك
نادرة بضحك :انت قلبك اسود اوي يا سونه
و بعدين دا كان قبل الجواز يا حبيبي الموضوع اختلف دلوقتي....
حسن :ايه اللي اختلف بالظبط؟
نادرة ابتسمت بخبث و قامت شغلت الاغاني بصوت واطي
=اللي اختلف اني بقيت بحبك يا حسن...
حسن ابتسم و هو مصدوم من كلامها عارف انها بتلعب على أوتار قلبه بمنتهى الدلال اللي هيجننه في يوم من الأيام
******************
بعد يومين
في بيت ماجيك
حسن و عامر وصلوا البيت كانت شقة صغيره لكن عبارة عن مكان مكركب و في اوضة خاصة باجهزة الحاسوب اللي بيستخدمهم في الاختراق و التهكير....
ماجيك :منور يا عامر.... اهلا يا حسن اتفضلوا اتفضلوا معليش البيت مكركب شوية بس دا بقا فيه كل حاجة مهمة بالنسبة ليا
حسن :المهم عرفت تعمل اللي طلبته منك
ماجيك :ايوة طبعا عرفت هو انت فاكرني تلميذ يا باشا
و موبيل صاحبنا دا انا دلوقتي مسيطر على كل حاجة فيه بدون حتى ما هو يعرف او يشك
عامر :و لقيت أي حاجة مش تمام عليه
ماجيك :
=حاجة واحدة دا انت متعدش وراء الراجل دا
دا عامل بلاوي... اختلاس في شغل.. نسوان و حريم يعرفهم على مراته بعلاقات مشبوهة حاجة ز"باله
حسن :
=يعني في حاجة نمسكها عليه
ماجيك :
=هبعتلك فيديوهات و تسجيلات صوت ليه
بص يا سيدي اللي عرفته ان عرفة دا مراته بتمشيه على العجين ميلغبطوش دا ادامها بس لكن اتجوز عليها كذا مرة عرفي و على علاقة بكم واحدة كدا بيروح لهم في ليالي الأنس بتوعه
حسن ابتسم بمكر و هو بيبص لعامر
=تصدق يا ماجيك انا قلبي ارتاح لك اوي حلال عليك الفلوس دي...
ماجيك :
=و انا و الله ارتاحت لك يا ابن الصياد
حسن اداله الفلوس و اخد اللي هو عاوزه و مشي
عامر :هنعمل ايه دلوقتي
حسن :لازم دلوقتي نقابل اللي اسمه عرفه.... هكلمه
حسن طلع موبايله و كلم رقم عرفة الوسيط المالي اللي رد بعد لحظات
عرفة بحدة :الوا مين؟!
حسن ابتسم بخبث و بجدية:
=فاعل خير مش عايز لك الخراب بس لو مجتش على هوايا ههد الدنيا على دماغك يا عرفة بيه
عرفة بحدة و غضب :
=انت مين يالا؟ و ايه العبط اللي بتقوله دا انت عارف انا مين؟
حسن بسخرية:
=هتكون مين يعني واحد مرتشي و ن"جس على العموم لو مش عايز فضي"حتك تبقى بجلجل و سميرة هانم مراتك تعرف و"سختك و لا مثالا الرشاوي اللي بتاخدوها تتكشف
عرفة بتوتر:
=انت مين و عايز ايه؟
حسن :
=نتقابل النهاردة الساعة اربعة اقولك اللي عندي... يا عرفة بيه
عرفة جز على سنانه بغضب
=هستناك في......
حسن :و هو كذلك.....
حسن قفل الموبيل و بص لعامر
عامر :انا مش مرتاح للراجل دا يا حسن كلامه مش مبشر....
حسن : هيخاف و هيجي....
بعد كم ساعة
حسن و عامر وصلوا الكافتيريا كان عرفة قاعد مستنيهم و هو بيدخن
حسن شد كرسي و قعد ادامه و عامر جانبه
عرفة بصلهم بحدة:
=انتم مين؟
عامر :
=عملك الأسود يا بعيد بس دا انتي شقى اوي فيديوهاتك دي لو طلعت على النت هتبقى تريند ياراجل يا ز"بالة بتصور الحر"يم اللي بتكون معاهم جاتك القرف
عرفة بحدة :اتلم يالا مش على اخر الزمن يجي واحد زيك و يكلمني كدا
حسن ببرود:
=لا يا عم عرفة انك على الصبر و شد بلاستر احسن انا بضغطة رز واحد هيتعمل منك بطاطس مهروسة و هتتفرم يا باشا من الكل
عرفة :انتم بتهلفط بتقول ايه
حسن اتنهد بضيق و طلع موبايله فتح فيديو لعرفة و حطه ادامه على التربيزة
عرفة بلع ريقه بصعوبة و هو بيتفرج على الفيديو
حسن اخد الموبيل بتقزز
=عندي منه مية نسخة بس اعتبرهم تسعة و تسعين بس اصلا انا الصراحه اقرف اسيب القرف دا على موبيل فهمسحه و لو انت نفذت اللي احنا عايزينه النسخ كله هتتحذف هي و تسجيلتك للرشاوي اللي بتاخدها و حاجات كتير اوي
عرفة :انت عايز ايه؟
حسن :اللواء كمال... عايز اوصله و توصله العرض بتاعنا و تحدد لينا معاد معاه
عرفة :بس دا خالص البيعه تمت
عامر :هنبتديها كذب من اولها ... البيعه انت و اللي معاك موقفنها علشان تدوها لطه الأسيوطي بتلت التمن
عرفة:بس طة الأسيوطي ممكن يوديني في داهية لو البيعه راحت لحد تاني
حسن :ما انت كدا كدا رايح في داهية...
بس داهية بفضيحة و مصيبة بجلجل و سجن و خسارة مش هتيجي على هواك...
عرفة سكت و هو بيفكر
=و انا موافق بس ايه اللي يثبتلي ان مفيش نسخ تانية من الحاجات دي و انك هتمسحهم كلهم
عامر :من الاخر كدا مفيش ضمانات كلمتنا ضمان... العرض بتاعنا من الخواجة نيكولاس تشارلي ... هيدفع مية و تمانين مليون يعني حق المراكب الحقيقي مش اللي انتم عايزين تاكلوه في كرشكم
عرفة:طب اديني اسبوع ارتب الموضوع و ادي اللواء كمال علم و كمان هو اللي هيقرر
حسن :ماشي يا عرفة معاك اسبوع بس صدقني لو حاولت بس تاذي اي حد فينا او تفكر تلعب بديلك هتبقى حديث الصحافة و الأخبار.... انا حذرتك و حسن الصياد مش بيقول كلمته مرتين
عرفة بتوتر :
=اسبوع بالكتير و هظبط كل الدنيا و هحدد لكم معاد معه
عامر :تمام كدا و انا هبعتلك تفاصيل أكتر عن العرض علشان لما تقعد مع البايع يكون عندك كل التفاصيل
عرفة :و انا موافق بس الفيديوهات دي لو خرجت انا هروح في داهية انا موافق بس بشرط تتحذف
حسن :كله بوقته يا عرفة بيه بالاذن
********************
في بيت حسن
نادرة كانت بتعمل محشي ورق عنب و هي بتتفرج على التلفزيون، بحر كانت عند دعاء
سمعت صوت الباب بيخبط قامت حطت حجاب على شعرها و خرجت لكن وقفت مستغربة و هي شايفه نوال ادامها
نادرة :نوال... اتفضلي
نوال بخبث؛ جيتلك في وقت مش مناسب
نادرة :لا ابدا اتفضلي دا انا كنت بجهز الغداء
نوال دخلت وقعدت مع نادرة
نوال :نادرة انا عارفة أن انا و انتي مفيش كلام بينا كتير و عارفة ان كان في مشاكل كتير بينا بس صدقيني انا مش قصدي
انا مفهمتش الا لما سقطت و ابني مات للأسف دلوقتي انا و جوزي في بينا مشاكل بدأت اراجع نفسي و افكر و اعرف مين اللي ممكن يكونوا زعلانين مني و انتي اول حد جيه على بالي
و عرفت من جليلة انك حامل فقلت اجي اباركلك
نادرة استغربت ان جليلة قالت لها و هي بنفسها اللي كانت طلبت من نادرة متقولش دلوقتي لحد ما يبان عليها لوحدها
لكن اتكلمت بود
=انتي بتقولي ايه يا نوال انا مش زعلانة من حاجة و بعدين احنا اخوات... الله يبارك فيكي و ربنا يعوض عليك يا نوال
نوال:ان شاء الله خير...
نادرة: قوليلي بقا تشربي ايه؟
نوال :لا مش عايزاه اتعبك...
نادرة :لا تعب و لا حاجة... هعملك عصير
سابتها و قامت دخلت المطبخ تحضر لها عصير.. نوال بصت لها بحقد و غل و هي بتمسك شنطتها طلعت ازازة صغيرة من شنطتها..
قامت و فتحت الازازة و بدأت ترش منها في البيت تحت الكنب و الانترية و في الزوايا
نادرة خرجت من المطبخ و هي مبتسمة متعرفش اللي هيحصلها بسبب طيبتها
نهاية الفصل... دعاء احمد
هل حد هيتاذي و لا لاء