رواية منقذي اللطيف الفصل العاشر 10 والاخير بقلم ندي محمود
البارت العاشر والأخير
بإبتسامة+ وهكرهك ليه؟ اكيد مش هفضل اكرهك لمده سنتين، انا خلاص اصلا نسيتك، انتِ بالنسبالي دلوقتي متدربه عندي وياريت تتعاملي علي الاساس دا
وبعدها خرج من الاوضه، الحقيقة اني اتضايقت جامد من رده، دا معناه اني مش فارقه معاه فعلا، كان عندي امل انه ممكن يرجع يحبني تاني لما يشوفني، ليه انا بس الي حسيت اني لسا بحبه لما شوفته؟
اشتغلت معاه شهرين، كان طول الشهرين دول بيعاملني كشخص عادي، وكإنه فعلا مش بيحبني ولا بيكن ليا اي مشاعر لدرجة اني فقدت الامل في انه يرجع يحبني تاني، حسيت اني بس بعذب نفسي بتواجدي في نفس المستشفي مع شخص بحبه بس هو عمره ما هيحبني
اشتغلت بعدها وانا مركزة بس علي مستقبلي، مش هكون خسرت عمر وكمان اخسر شغلي ومستقبلي، لازم اشتغل علي نفسي واتطور اكتر واكتر ويكون الشغل بس هو كل اهتمامي وهو دا الي حصل
فظرف سنتين كنت دكتورة شاطرة جدًا لدرجة انهم كانوا بيقولوا اني في نفس مستوي شطارة عمر
اتفاجئت بعدها في يوم من الايام بدعوي كانت علي مكتبي، فتحتها وكان باين عليها انها دعوه لفرح او خطوبة، ولما فتحت الدعوة اتصدمت لما شوفت انها دعوه خطوبة عمر مع واحدة من الدكاتره في المستشفي، بنت جميلة وهادية وكنت دايما بكون مستغربه انها لسا متخطبتش لغايه دلوقتي
بمجرد لما شوفت الدعوه حسيت ان قلبي اتقبض واني مش قادره اتنفس، قعدت علي الكرسي وانا بحاول اتنفس، كانت عيوني بتدمع وانا مش حاسة، هو انا ليه زعلت اوي كدا؟ هو مكنش معبرني طول الوقت الي اشتغلت فيه هنا وانا كمان كنت فاكره اني نسيته لما ركزت في شغلي، ازاي السنتين الي كنت مركزة فيهم علي الشغل بس مكنوش كافيين اني انساه؟
كانوا بيقولوا ان الوقت علاج لأي حاجة وانه بينسي بس اهو انا منستش عمر وموجوعة وكإني مقدرتش انساه ولو بنسبه ١ فالميه
وقتها دخلت عروسة عمر عندي الاوضة، كان اسمها سلمي، بصت عليا وهي قلقانه لما شافت دموعي~ انتِ كويسة يا نارا؟ ايه الي ضايقك بالشكل دا؟
مسحت دموعي وبصتلها بإبتسامة-ولا حاجة يا سلمي، انا شوفت الدعوه بتاعت خطوبتك انتِ وعمر، الف مبروك
كنت بباركلها من ورا قلبي، بس مكنتش عايزه اي حد يسوفني وانا ضعيفه، مكنتش حتي عايزه عمر يعرف اني لسا بحبه وبفكر فيه
سلمي حضنتني~ الله يبارك فيكِ يا نارا، عقبالك يارب
وبعدها غمزتلي~ وبطلي بقا ترفضي العرسان الي بتجيلك دي، كل يومين يجيلك حد وانتِ ترفضيه، اديلهم فرصه
بصيتلها بحزن، رغم ان فعلا بيتقدملي ناس كتير وفيهم ناس كويسه جدا لكن انا كنت برفض، مكنتش عايزه اي حد يعرف اني مطلقه واصلا لو الي بيتقدمولي دول عرفوا اني مطلقه هتختفي رغبتهم في انهم يتقدمولي فكنت برفض
بعدها سلمي خرجت من اوضتي لما شافت عمر، شوفتها وهي بتبصله بكل حب ومبسوطة، وشوفته وهو كمان باصصلها بكل حب، دي النظره الي كانت في عيونه لما كنا متجوزين
معقول خلاص مبقاش بيحبني ومبقتش فارقه معاه؟! ازاي قدر ينساني ويحب غيري؟ كان فيه جزء مني دايما بيقولي انه مستني اني اثبتله اني اتغيرت، بس شكلي كنت غلطانه، هو مسحني من قلبه وحياته فاللحظة الي طلقني فيها
استأذنت وروحت البيت بدري، دخلت بيتي الي كان زي القصر ولكنه كان كئيب، بيت يخلو من اي حياة، بيت بعمل في كل حاجة لوحدي، بنام وبصحي وباكل لوحدي، صدق الي قال ان الحياة محتاجة مشاركة، انا اهو رغم اني عندي كل حاجة لكني تعيسه ووحيدة
حتي بعد صدمتي في نرمين بطلت اصاحب حد، كنت خايفه اني اصاحب واحدة تانيه وتكون منافقه وكنت مخليه علاقتي عاديه مع كل زميلاتي، حتي خديجة كنت بتجنبها لغايه لما بطلت تقولي اخرج معاها او حتي تتصل بيا
كانت الخطوبة في اليوم الي بعده، المفروض كنت اتجنب اني اروح لاني لسا بحب عمر ولو رحت دا هيكون بمثابه تعذيب ليا بس انا قررت اني اروح
لبست احلي فستان عندي وحطيت ميكب هادي وفردت شعري ورا ضهري ونزلت من بيتي، كنت زي الاميرات ولكن اميره منطفيه مكتئبة، بس حاولت ابين اني سعيده وابتسم كتير، انا مش عايزاه يعرف اني زعلانه علشانه ويشمت فيا
والحقيقة التمثيل مكنش صعب عليا، بل بالعكس كل الي فالخطوبة افتكروا اني مبسوطه عشان سلمي، مكنش فيه اي حد يعرف عن جوازي بعمر غير خديجة وجوزها فلما الناس شافوا الفرحة الي ظاهره علي وشي خمنوا اني مبسوطة عشان سلمي، محدش كان يعرف ان قلبي بيتحرق
عمر لما شافني بص عليا للحظات، كنت فاكره انه وقع في حبي مره تانيه وانه ممكن يفشكل خطوبته ويديني فرصه تانيه بس سرعان ما بص لخطيبته، هو انا ليه حضرت الخطوبه؟ كان ممكن اعتذر واصلا مكنش فيه حد هيلاحظ غيابي، انا بحاول اعذب نفسي ولا بعمل ايه؟!
خرجت برا القاعه، واتفاجئت بوجود سليم الي كان رايح يدخل القاعه، كان شكله تعبان وكإنه مش سليم الي اعرفه، بصيت عليه وانا مش مصدقه اني بشوفه بعد كل السنين دي وازاي شكله اتغير بالمنظر دا في سنتين بس؟!
كان بيبص فالارض وهو بيكلمني= ازيك يا نارا، ممكن نتكلم شوية؟ كنت عارف انك هتحضري خطوبة عمر عشان كدا قولت اجيلك، مكنتش حابب اني اجيلك فالمستشفي عشان ملفتش نظر حد لينا من زمايلك
كنت مستغربه من طلبه، عايز يتكلم في ايه؟! هو الي نهي كل حاجة بنفسه من سنتين وكمان اتجوز صاحبتي ولكن فضولي دفعني اني اوافق
قعدنا في مطعم قريب من القاعه، كان بيتجنب طول الوقت انه يبص في وشي
بجدية-نعم يا سليم، فيه حاجة؟
بحزن= انا طلقت نرمين
بجدية-وبتقولي الكلام دا ليه؟
بحزن= انا عندي ورم في المخ، نرمين طلبت الطلاق لما عرفت لانه في مرحلة متأخره
الحقيقة اني زعلت جدا لما سمعت الخبر دا، انا كدكتوره مخ واعصاب بيجيلي حالات زي كدا كتير، للاسف مش بيكون فيه امل في المراحل المتأخره وكان طبيعي اني احس بالحزن لما اسمع ان شخص كنت اعرفه في الماضي هيموت قريب
-فيه حاجة اقدر اعملها طيب؟
+ كنت جاي اطلب منك السماح، انا عارف اني كسرتك يومها واتمني تكوني سامحتيني، انا مش عايز امشي من الدنيا دي وفيه اي حد زعلان مني
بصيتله بحزن-مش متضايقه منك يا سليم، انا اصلا نسيتك من بدري، بس بص تعالا بكرا عندي المستشفي نشوف الاشعات والتحاليل، متيأسش فيه ناس اتعالجوا وهما في المراحل الاخيرة
+هيفيد بإيه اني اعذب نفسي ف اخر ايام حياتي واخد كيمو ثيرابي يا نارا؟ انا قررت اعيش ايامي الاخيره بعيد عن الجلسات والوجع
بحزن-تعالا بس بكرا مش هتخسر حاجة، يمكن لسا فيه امل
ابتسم شويه لما حس ان فيه امل، يبدو ان كل الدكاتره قالوله ان احتمال نجاته ضعيفه وهو كان نفسه يتعلق بأي أمل
شكرني وبعدها مشي، اما انا فقعدت في المطعم شويه، كنت بحاول استوعب ان سليم الي كنت بحبه جدا زمان بيموت، وازاي نرمين تسيبه في محنته؟! كنت كل شويه اتصدم صدمة جديدة في نرمين، وبعدين انا ليه مستغربه من الي هي عملته؟ واحدة خانت صحبتها واتجوزت الي كانت بتحبه، اكيد لما جوزها يحصله مصيبه هتسيبه وتشوف حياتها
روحت علي البيت ورحت المستشفي اليوم الي بعده، كنت طول اليوم مستنيه سليم، انا مبقتش احبه بس كنت بتمني انه يتمسك بالأمل الاخير ويجيلي، عالاقل نحاول يمكن يعيش
وبالفعل جالي في نهايه اليوم، بصلي بكل حزن= متأكدة ان فيه امل يا نارا؟ انا خايف اكون بتعلق بأمل وهمي
ابتسمتله كمحاولة لتخفيف التوتر الي عنده-هقولك بعد الاشعه والتحاليل
بحزن=ممكن طيب تكوني جنبي وانا بعمل الاشعات؟ انا خايف اموت وحيد يا نارا، اهلي كلهم برا مصر ومش هيقدروا ينزلوا حاليا ومفيش اي حد جنبي
الحقيقة اني قررت اكون جنبه بس اعتبارا لكوننا زملاء قدام، اعتبارا لأنه كان شخص مهم في حياتي في فتره من الفترات
وقفت جنبه وهو بيعمل الاشعه المقطعيه وحتي وهو بيعمل الرنين المغناطيسي، ولما شوفت النتايج كان الورم مش صغير ولازم في اقرب وقت يتعمله عمليه بس قررت استعين بسلمي الي كانت جراحة مخ واعصاب عشان تفيدني
~ هو للاسف يا نارا، الدكاتره قالوله ان مفيش امل غير الكيمو ثيرابي لان العمليه هيكون ليها مخاطر كبيره، يعني نسبه انه ينجو منها لا تتجاوز ال ٢٠ فالميه
-يعني لو هو وافق علي العمليه وكتب إقرار بكدا تقدري تعملهالو يا سلمي؟ هو مستعد يتمسك بأي أمل حتي لو بنسبه ٢٠ بس
~ ايوه هعملهاله لو وافق
سيبت سلمي وروحت لاوضه سليم الي كان مستني الي هقوله بفارغ الصبر
-فيه عمليه ممكن تتعمل يا سليم بس فالاول لازم تخضع لجلسات كيمو ثيرابي لمدة شهر عشان يصغر الورم شويه وبعدها هنشيله بالجراحة، بس
=بس ايه يا نارا؟
-العمليه نسبه نجاحها ٢٠ فالميه بس…
بإبتسامة= انا موافق يا نارا، هتمسك بالأمل الاخير دا
كنت ماشيه من الاوضه بس هو وقفني لما نادي عليا
= نارا..
-نعم ياسليم؟
=انا مش عارف اشكرك ازاي، انا خلاص كنت فقدت الامل وكنت هعيش اخر ايام ليا وخلاص، عايزك تعرفي اني حقيقي نادم علي الي عملته فيكي زمان، وشكرًا لوقوفك جنبي انهارده فالاشعات
ابتسمت وخرجت من الاوضه، طول الشهر الي كان سليم بيخضع فيه للعلاج الكيماوي كنت معاه خطوه بخطوه، حتي الجلسات كنت بكون قاعده جنبه فيها وماسكه ايده وبطمنه، كنت مستغربه من اني واقفه جنبه بالمنظر دا، هل انا بشفق عليه؟ ولا بحاول اثير غيره عمر؟
بس الحقيقة ان عمر مكنش مهتم اصلا لا لوجود سليم في المستشفي ولا حتي لقربي منه في الفتره الاخيره، كان سعيد مع خطيبته وكإنه مكنش يعرفني قبل كدا.
~ انا مبسوطة انك واقفه جنب سليم طول الفتره دي يا نارا، حالته النفسيه مهمه جدا في فتره علاجه والحقيقة ان نتيجة جلسات الكيماوي كانت احسن مما تخيلت
-بجد يا سلمي؟! يعني فرصه نجاته من العمليه بقت اكبر؟
~ مش عارفه يا نارا بس انا متفائله انه هيخرج منها بخير ان شاء الله، بس صحيح انتِ مقولتليش هو يقربلك ايه؟
مكنتش عارفه اقولها ايه- صديق قديم يا سلمي
سلمي بصتلي بإبتسامة وهي بتغمزلي~ طيب ايه مش هنحضر خطوبتكم ان شاء الله بعد لما يخف؟
اتوترت لما قالت كدا، انا مش بحب سليم اصلا ومكنتش متوقعه ان اي حد يفكر اننا ممكن نتخطب اصلا
~عموما انتو مناسبين جدا لبعض وكفايه نظرات عيونه ليكي، هو بيحبك يا نارا انا عارفه العيون بتبص ازاي لما بتكون بتحب
بحزن-انا مفيش في حياتي مكان للحب يا سلمي
~متقوليش كدا يا نارا، انا حاسة دايما ان فيه حزن كبير جواكي وانك اتخذلتي من شخص ما بس متخليش تجربه واحدة تأثر علي باقي تجاربك، انتِ لسا صغيره وقدامك فرصه اهو انك تحبي وتتحبي
اومأت راسي بالايجاب ومشيت بعيد عنها، سلمي شخص لطيف اوي وبقينا مقربين اوي في الفتره الاخيره، بس مش عارفه هل هيستمر حبها ليا حتي بعد لما تعرف اني طليقة عمر؟
يوم عمليه سليم كان خايف جدا، طلب انه يقابلني قبل لما يتم تحضيره للعمليه وبص في عيوني وهو بيعيط= انا مش ضامن هخرج من العملية دي ولا لا يا نارا، بس انا كان لازم اعترفلك بحاجة قبل لما ادخل العمليه، انا بحبك يا نارا والحقيقة اني عمري ما حبيت حد غيرك، انا اتجوزت نرمين عشان اقهرك لما قهرتيني وقولتيلي انك متجوزة، انتِ متتخيليش كلامك يومها عمل فيا ايه، اتخيلي ابقا بعشق واحدة وفالاخر تقولي متجوزه؟!
-انت لو كنت سمعتني يومها كنت هتعرف اني اضطريت اتجوزه عشان اهلي، انا كنت بمثل عليكم ايام الجامعة، انا كنت بنت فقيره ابويا حرامي بيتسجن كل شويه وامي مدمنه كحول، مكنش قدامي حل غير اني اتجوزه علي الورق عشان اعيش حياه كويسة، بس انت حتي مدتنيش فرصه ابررلك يا سليم
=انا كنت مغفل يا نارا، انا بس محتاج منك فرصه، لو خرجت من العمليه تقبلي تتجوزيني؟
بصيتله بحزن-لازم تتجهز للعمليه دلوقتي يا سليم
وخرجت من الاوضه، كان سليم حزين جدا لاني رفضته بس الحقيقة اني مكنتش قادره لا احب حد ولا اقرب من حد تاني، وهو اصلا خايف من الموت فعشان كدا عرض عليا الجواز، لانه حاسس انه هيموت لكن لو عاش هيغير رأيه
كنت واقفه جنبه وهو بيدخل اوضه العمليات وحضرت العمليه، مكنتش من هواه العمليات بس كنت حاسة ان واجبي الاخير تجاهه هو اني احضر عمليته.
الحمدلله العمليه عدت علي خير وحتي مكنش فيه اي مضاعفات، كنت مبسوطة انه هيعيش
اول لما فاق طلب انه يشوفني، بص عليا وهو بيعيط وحضني فجأه بدون اي مقدمات= انا مش عارف اوفيلك حقك ازاي يا نارا
خرجت من حضنه- لا مفيش حاجة يا سليم، دا واجبي كدكتوره، مع السلامه
كنت هبعد عن سريره واخرج من الاوضه ولكنه مسك ايدي=نارا انا لسا عند طلبي، ممكن توافقي عليه؟ ممكن توافقي تتجوزيني؟
بصيتله بجدية-انت بس حاسس انك ممتن ليا عشان انقذتك يا سليم لكن انت مش بتحبني، حبنا مات في اليوم الي رفضت تديني فيه فرصه اني ابررلك
وخرجت من الاوضه وانا متضايقه، هو انا ليه متضايقه؟ انا مش بحبه اصلا بس فيه حاجة غريبه انا لاحظتها، اهتمامي بعمر وحزني عليه قلوا من وقت لما سليم بدأ يتعالج عندنا في المستشفي، هل عشان كنت مشغوله بعلاجه وجلساته؟
انا حتي مبقتش عارفه احدد مشاعري، مش عارفه انا لسا بحب سليم ولا بحاول اموڤ اون من عمر بيه، انا مش هستغل اي شخص تاني، مش هعامل اي شخص علي انه احتياطي مره تانيه.
سليم لما استعاد عافيته خرج من المستشفي ولكن كان كل يوم بيجيلي، كل يوم ينطلي فالمستشفي مره يجبلي قهوه ومره غدا ومره عشا ، كان كل الي فالمستشفي عارفين انه بيحبني ومستنيين اليوم الي اوافق فيه عليه
بعدها لما جه يوم عيد ميلادي مفيش حد افتكره، الحقيقه ان رغم اني بقيت مقربه من زمايلي فالمستشفي الا ان مفيش ولا شخص افتكر عيد ميلادي، بيقولوا ان يوم عيد الميلاد والكلام دا بيكون تافه وبتقل اهميته لما بتكبر في السن، بمعني ان اصحابك بينسوا عيد ميلادك مع زحمة الحياة وحتي انك ممكن تنسي عيد ميلادك اصلا
لكن انا متغيرتش فيا النقطه دي، كنت كل سنه بحزن في عيد ميلادي عشان بحتفل بيه لوحدي، هو مش الانسان المفروض يتعود علي الحزن؟ يبقا ليه بزعل في كل عيد ميلاد ليا بحتفل بيه لوحدي وكإنه اول عيد ميلاد مثلا اكون فيه وحيده؟
لكن عيد الميلاد دا كان مختلف، سليم جالي كالعاده ولكن المرادي كان وشه اصفر وكإنه مخضوض= انا حاسس ان الورم رجعلي تاني يا نارا! انا بقيت بحس بصداع جامد زي الاول ولسا امبارح جالي نوبه صرع
قلقت جامد من كلامه لانه بيدل علي ان الورم رجع فعلا-تعالا ورايا هنروح لاوضه الاشعه نعمل الرنين المغناطيسي بس متقلقش ان شاء الله خير
كنت حاسة ان قلبي مقبوض من وقت لما قالي علي الاعراض الي بتحصله مؤخرًا، كنت خايفه اكتر منه من ان يكون الورم رجع تاني، ولكن لما دخلت اوضه الاشعه اتفاجئت بتورته كبيره واتفاجئت بزمايلي وهما واقفين في الاوضه بيسقفوا وبيغنولي اغنيه عيد الميلاد
بصيت لسليم وعيوني كلها دموع، مكنتش مصدقة ان امنيتي اخيرا اتحققت، مكنتش مصدقه اني اخيرا هحتفل بعيد ميلادي، حضنته وهمست في ودانه-موافقه يا سليم
وقتها سليم مكنش مصدق نفسه من الفرحة لدرجة انه كان بيصرخ بصوت عالي= وافقت يجماعه وافقت!!
واهو دلوقتي بكتبلكم من بيتي الجديدة وسليم نايم جنبي، اه نسيت اقولكم اننا خلفنا بنت وولد سميناهم نور ونادر، انا صحيح كنت انانيه في اوقات كتير وظلمت عمر لكن انا كمان مكنتش حياتي سهله وعشت ايام كتير وحشة، انا اتعاقبت علي انانيتي وظلمي لعمر ولكن فالاخر مفيش حد بيفضل طول عمره يدفع تمن غلطه عملها صح؟
#تمت
#منقذي_اللطيف
