.jpeg)
امرأة فى ثوب رجل الفصل الثاني والاخير بقلم امل عبدالرازق
الفصل الثاني
- إسلام: واخيرًا يا بابا قلعت الباروكة ورجعت لأنوثتي، متعرفش بتعمل في شعري ايه، أنا وحشني حجابي وفستاني ، نفس ارجع احس بإنوثتي منهم لله سلبوا مننا السعادة وراحة البال وشقلبوا حياتنا، لو ماما الله يرحمها كانت موجوده مكنتش هتستحمل اللي عملوه فينا
- منير: حقك عليا يا إسلام بسبب تعبي وإني بوصل للحمام نفسه بالعافية انتِ متبهدلة ، أنا بقيت عبء عليكِ
إسلام: ايه يا بابا الكلام دا، عبء إيه دا انا افديك بروحي ، انت اللي باقيلي في الدنيا دي ومن غيرك ولا اسوى أي حاجه، ربنا ما يحرمني منك ابدا وأمانة عليك ما تقول كدا تاني ، يلا عشان هناكل كباب وكفته إنما إيه عسسسل
منير: انتِ نور عيني وفرحة قلبي يا بنتي، استني كنت عايزك في موضوع ومستغرب انك مقولتليش عليه
- إسلام: موضوع إيه دا يا بابا، ثواني هلبس طرحتي واشوف مين اللي بيخبط وارجعلك
راحت إسلام تفتح الباب وشافت سيف واقف قدامها ووقفت مكانها مصدومة
سيف: ما شاء الله تبارك الخالق.. احم احم من فضلك يا آنسة هو دا بيت إسلام منير
إسلام: لأ لأ مش هو العنوان غلط
منير: مين اللي كان بيخبط وعايز إيه يا إسلام
سيف: غلط ازاي والحاج بنفسه هو اللي قايلي عليه، صحيح معرفتنيش بنفسك
إسلام: أنا اخت إسلام
سيف: قولتيلي بقى وهو الحاج مسميكم كلكم إسلام هي الأسامي خلصت ولا ايه
إسلام:...........
سيف: ينفع نكمل كلامنا على الباب والحاج بينادي جوا
إسلام: اقوله مين ما أنا معرفش انت مين عشان ادخلك بيتنا
سيف: ايه دا بجد، انتِ لسه عايشه الدور ومكملة، طب أنا هعيش معاكِ الدور قوليله سيف مدير اخوكي اللي هو ابنه في الشغل يا آنسة إسلام
إسلام: بس إسلام مش موجود دلوقتي
سيف: أنا ماسك نفسي واحترمي عقلي على الأقل، انا اكتر حاجه بكرهها الكذب، دا جزائي عشان وقفت جنبك ورأفت بحالِك وصدقتك ومطلبتش منك أي إثبات هوية، خلاص لعبتك اتكشفت وارجوك اقصد ارجوكِ كفايه لحد كدا وعيب أوي
إسلام: اتفضل انا هشرح لحضرتك كل حاجه بالتفصيل
_______
منير: نورتنا يا إبني، إسلام قالتلي عنك كل خير واللي زيك مش كتير ، تسلم يا ابني ، مكنتش عارف ان اسلام قالتلك الحقيقة حتى كنت لسه هسألها بس انت جيت
سيف: أنا كان نفسي اتعرف على حضرتك بشكل أفضل من كدا، اسلام لا صارحتني ولا قالتلي حاجه أنا اتفاجئت انك بتقول يا بنتي ويا حبيبتي مبقتش مستوعب يعني انا عملت ليها إيه عشان تكذب عليا، بتعاملني على إني ساذج، إيه المبرر اللي يخلي بنت تعمل ولد وتلبس لبس ولد وتمثل عليا الدور ، ليه تكذبي وأنا فتحتلك شركتي ومطلبتش منك دليل واحد يثبت هويتك وصدقتك، انا كنت حاسس ان وراكي لغز بس مش لدرجة انك تطلعي بنت، كان ليكي تصرفات بستغربها بس كنت بعديها واقول لسه عيل طري وأهو بيتعلم، عرفت بتعب والدك مكذبتش خبر وقولتلك تعالى واشتغل، اكيد بردو مرض والدك كذبة عشان تلعبوا بيها على الناس ، وإزاي اب زيك يساند بنته في الغلط وقلة القيمة دِ ما تقوم وتشتغل وتحافظ على بنتك وتربيها مش تستعطفونا و
قاطعته إسلام وقالتله بصوت في حده ومهزوز وعيونها مليانه دموع: أنا كذبت عليك بس مسرقتكش ولا ضربتك على إيدك عشان تشغلني عندك، أنا بشتغل وباخد حقي يعني خد وهات مش بشحت منك يا مستر سيف، أنا كنت هصارحك من الأول بس انت اللي قولتلي مش بتقبل غير ذكور أنا وقتها مقدرتش انطق والمرتب كان بالنسبة ليا مهم عشان والدي، ومين قالك ان ابويا محاولش يشتغل لحد ما اغمى عليه وتعب من كنيس الشوارع والاتربة وصحته في النازل بينضف الناس وهما لا بيرحموا ولا بيسيبونا في حالنا، بابا قلبه تعبه ولو مش مصدق دي كل ادويته والأشعة اللي عملناها ، وبخصوص التربية ابويا رباني احسن تربية كان ممكن استسهل الحرام واكسب واعالج أبويا، بس دي دنيا جايين نعبد ربنا فيها ومهما كان الابتلاء ربنا بيقوينا طالما إحنا عايزين رضاه ليس إلا، وأنا لا عرضت نفسي للناس ولا عايزه اتعامل معاهم لأن أقرب الناس ليا هما اللي جم عليا، أهلي رموني في الشارع ما بالك بالغريب بقى هيعمل فيا إيه، عايز تعرف اتنكرت في لبس وعملت ولد ليه عشان اعرف اعيش أنا وابويا ومحدش يتعرضلي في منطقة شعبية زي دي، بحاول احمي نفسي واشتغل واسعى وواحد زي حضرتك مش بيشغل إلا الولاد أعمل أنا وقتها إيه، عارفه إنه حرام وكل يوم وانا بلبس وبطلع للشارع وأنا عامله ولد ببقى بعاني وأنا شايفه البنات ماشيين براحتهم وعايشين، عارفه إنه مش صح بس أنا مضطرة عشان أعرف اعيش وسطكم اصل إللي زينا ملهمش ضهر يحميهم فمن فضلك بلاش تتكلم عن تربية والدي ليا لأنه رباني وأحسن ليا وجه الوقت اللي ارد ليه الجميل اللي لو قدمت ليه عمري مش كفايه، أنا آسفة إني عملت معاك كدا كنت مضطرة وغصب عني محتاجه اعالج والدي أنا من غيره هضيع ماليش إلا هو ، وأنا من الصبح هقدم استقالتي بس ارجوك متقولش لحد إني بنت
- سيف: أنا آسف لو كلامي كان صعب بس حطي نفسك مكاني، ضحكتي عليا وأنا صدقتك وصدفة غريبة تكشفلي الموضوع، أنا وثقت فيكي وفتحتلك قلبي لما حسيت إنك جدعة ومحترمة، كله وأنا مفكرك ولد
منير: معلش يا إبني إحنا غلطنا معاك، كل يوم وبنتي طالعة أنا في نار بتكويني عشان لا قادر اوفرلها حياة تستاهلها ولا احافظ عليها، بقيت عاجز وعبء وخلاص في آخر أيامي، بنتي تعبت ومعاشتش سنها ولا عرفت تفرح زي باقي البنات
- سيف: أنا كنت عايز اقابلك يا عمي عشان كنت بخلص اجراءات العملية بتاعتك عشان هتعملها يوم ١٥ في الشهر، كنت عايز افرح اسلام ويكون من إدخال السرور على قلب مسلم، كنت واثق في ابنك وشايفه راجل جدع يستاهل انه يشتغل ويكون نفسه وميشلش هم عمليتك
- إسلام: انت بتتكلم جد، يعني بابا خلاص هيعمل العملية ويرتاح من التعب، يعني خلاص بابا مش هيستنى اكتر من كدا ويعاني بسبب قلبه، يعني بابا هيكون كويس ان شاء الله
سيف: الكلام دا و أنا عارف انك راجل
اسلام: يعني إيه مش فاهمه
- سيف: يعني الوضع اختلف دلوقتي
- اسلام: يعني مش هتعمل العملية لبابا
- سيف: لأ هتتعمل بإذن الله وتنجح
- منير: أومال في إيه يا إبني حيرتنا
- اسلام: لو على الفلوس وعد هشتغل واسددها ليك بس ارجوك انقذ بابا
- سيف: انا طالب إيد بنتك يا عمي
- منير: بس يا ابني أنا حتى مش معايا اجهزها
سيف: مش هلاقي زيها في الزمن دا يا عمي، لا في في اخلاقها ولا ذكائها، غيرها كان عرض نفسه على السوشيال ميديا وطلب من الناس تبعت أسد ووردة وكبس كبس يا لؤي ويا ابو نواف وتحدي اللي تشيل من لبسها اكتر واللي تكشف شعرها واللي تقول كلام ميتقالش، بنتك جوهرة يا عمي تتستاهل تتصان وتتشال جوا القلب والعين
- منير: انا مش ضامن عمري يا ابني ومش هلاقي راجل زيك لبنتي بس المهم رأيها
سيف: الأول قبل ما تقولي رأيك أنا مش هعمل فرح كتب الكتاب آخر الأسبوع وهاخدلك بيت جنب بيتنا ووالدك معانا عشان يبقى في ممرض يرعاه، حالة والدك متأخرة ومينفعش يتأخر أكتر من كدا ، يعني نكتب الكتاب وتيجي البيت معايا وخلاص، والجهاز كله عليا و انتِ ليكي كل حقوقك الجهاز المفروض بيكون على العريس بس اللي بيحصل في بلدنا بيكون تيسير لأن الظروف بقت صعبه شويه وبصراحة إحنا بنصعبها على نفسنا المفروض نجيب احتياجتنا واللي هنعيش بيه فقط
إسلام: أنا موافقة لو دا مقابل ان والدي يرتاح
منير: وأنا راحتي في إني اشوفك مرتاحة وسعيده
سيف: خلاص هكلم أهلي ونكتب الكتاب
_______
إيمان: أيوه عايزاك تتجوز بس مش بالطريقة دي
سيف: ماما أنا وافقت اتجوز عشان ارضيكي فبالله عليكي ما تزودي همي أكتر من كدا، اهو هتجوز وهحققلك حلم حياتك
إيمان: طب نعمل فرح صغير في الجنينة
سيف: لأ ولا هنعزم اي حد، كتب كتاب في الجامع وابويا وابوها والشهود وخلصت.
عماد: خلاص يا إيمان سبيه براحته
إيمان: طب بنت مين دي ولا مش من حقي اعرف كمان
سيف: بنت راجل بسيط اوعدك لو شوفتيها هتحبيها دي مرة لعبت لعبة كبيرة على حد والمفروض ما يعرفش يسامحها لكنه أول لما لمحها داب وشافها ملاك مش العكس، دي عليها براءة مشوفتش زيها غير تسنيم، رقيقة وهادية وحضورها جميل زيها وعيونها بحر هادي بس شافت كتير في حياتها بس سلام الدنيا في إسلام
إيمان: ابنك بيحب على نفسه يا عماد
سيف: حب إيه يا ماما انا بقولك هي مين بس، بس هو في حب من أول نظرة
إيمان: دا انت مغرم يا حبيبي، والله عشان حالتك دي انا مسامحة في الفرح وواثقة في اختيارك
_______
إسلام: اتجوزتني ليه
سيف: مقولتيش رأيك في البيت عجبك
إسلام: اتجوزتني ليه
سيف: شوفتي اتجوزنا ولا عملنا فرح واغاني ورقص ولا ذنوب واهو فرحة العريس عروسته
إسلام: تمام انت صح ، اتجوزتني ليه بردو
سيف: عشان اعرف اخد حقي ما هو انتِ اللي عملتيه مش سهل
إسلام: بس أنا شرحتلك ظروفي وانت وقتها مدحت فيا
سيف: كنتي عايزاني اقولك إيه غير كدا قدام والدك المريض، بقولك أنا مصدع دلوقتي هدخل انام في الأوضة دي وانتي في الأوضة التانية يا استاذ إسلام.
________
اليوم التاني
إسلام: انت لابس ورايح فين
سيف: و انتِ مالِك
إسلام: أنا مراتك من حقي اعرف
سيف: مراتي قدام الناس وعلى الورق بس فمتعشيش الدور وتمثلي عليا مبقتش هصدقك
إسلام: أنا مستعدة اعيش معاك بما يرضي الله ونفتح صفحة جديدة
سيف: مش بمزاجك وأنا مش مستعد افتح اي صفح معاكي
إسلام: طب طالما كدا اتجوزتني ليه ما كنت تتجوز واحدة بتحبها وأنا معتقدش انك ممكن تحب بعد مراتك، كنت كمل جميلك وعالج والدي وانا هردلك فلوسك وسيبني في حالي
سيف: معلش نصيبك كدا بقى
إسلام: تمام وأنا عملت اللي عليا كدا انا بريئة قدام ربنا
سيف: فاهم دماغك عارف الشوتين دول مش عايزه تشيلي ذنب وتجبيها فيا أنا، انتِ مش ساهلة بردو
إسلام: احطلك تفطر
سيف: لأ مش هاكل من إيدك اخاف على نفسي هاكل في الشغل
إسلام: تمام، أنا كمان هلبس وانزل الشغل
سيف: تنزلي فين لا مؤاخذة
إسلام: الشغل أومال أنا هسدد فلوس العملية ليك منين
سيف: اه قولتيلي وهتنزلي الشغل على أساس انك سيد ولا اميرة
اسلام: مين سيد وأميرة
سيف: ولاد خالتي
إسلام: وأنا مالي بولاد خالتي
سيف: فاهمه كل حاجه وبردو بتمثلي عليا
إسلام: أنا بجد مش فاهمه يا سيف ليه بتعاملني كدا، انت مش مجبر عليا طلقني وكمل حياتك انا عارفه إني غلطت في حقك بس غصب عني
سيف: طب من فضلك متعيطيش لأني بضعف قدام دموعك وممكن اتهور فخلي بالك
إسلام: تتهور إزاي مش فاهمه
سيف: يا بت عليا بردو، اقصد بسيد وأميرة هتنزلي كراجل ولا بنت
إسلام: اكيد راجل عشان هما عارفين إني راجل والشركة كلها ذكور
سيف: ذكور قولتيلي، طب بما ان واجب على الزوجة تطيع زوجها انا مش هقولك لأ على الشغل أنا هقولك أنا نفسي في محشي كرنب وعنب وبصل وخيار وبتنجان وفلفل وحمام وكبدة وممبار ولحمة وفراخ وبط ومكرونه بشاميل وكفته وفراخ مشويه وجمبري وكوارع
إسلام: كوارع إيه
سيف: يعني اللي فات كله تمام ومستغربه الكوارع
اسلام: هتاكل كل دا ، ممكن اعملك كل أكله في يوم
سيف: لأ أنا عايز كله ومافيش واحدة تنقص أنا عريس جديد ونفسي مفتوحة ، ولو حسيت إني نفسي في حاجه كمان هرنلك
إسلام: بتعجزني عشان منزلش الشغل
سيف: لأ أنا مقولتش كدا، واحد ونفسه ياكل من إيد مراته، يلا معاكي التلاجة عيشي فيها
إسلام: لما اخلص اجي الشغل عادي؟
سيف: طبعا ومتنسيش الكوارع والرز البسمتي
إسلام: الا بسمتك أنا معرفش غير المكرونة البشاميل
سيف: لأ مينفعش دا قلب الراجل معدته حتى، معاكي اليوتيوب عايز مائدة سخية كدا
إسلام: بس دا تبذير وحرام
سيف: اوعدك مش هيترمى فتفوته، اعملي انتِ بس، وصحيح متتأخريش على الشغل عشان الغياب هيتخصملك عليه يومين
________
في الشركة
سيف قال بصدمة: انتِ بتعملي ايه هنا
إسلام: آسفة اتأخرت خمس دقايق بس وصلت قبل حضرتك أهو
سيف: ردي انتِ بتعملي ايه هنا
إسلام: جايه شغلي يا بيبي
سيف: دا مين اللي بيبي
إسلام: انت يا بيبي هو في بيبي غيرك
سيف: بت ما تدلعيش كدا بشنبك دا وقوليلي بتعملي إيه هنا، عملتي الأكل اللي قولتلك عليه
إسلام: كله كله محشي وومبار وكوارع وهيصه وليلة كبيرة أوي
سيف: بطل خارق حضرتِك
إسلام: تقدر تقول كدا
سيف: يا إسلام اتظبط الموظفين هيسمعوا بينا، معملتش الأكل ليه
إسلام: واحد ومراته وبعدين إسمها يا اسلام اتظبطي أنا انثى
سيف: لأ يا ابو الصحاب انت ذكر والذكور قليلُ بدليل لبسك دا، انطقي معملتيش الأكل ليه
إسلام: كل الأكل اللي طلبته اتعمل
سيف: حلو إزاي بقى
إسلام: طلبت اوردر يا بيبي
سيف: طلبتي كل الأكل اللي قولتلك عليه أوردر!
إسلام: اه وجاي على الشركة عشان تحاسب عليه، كل اللي نفسك فيه يا قلبي
سيف: يومك مش فايت، أوردر إيه دا اللي طلبتيه
إسلام: ما أنا مش خارقه عشان اعمل كل دا، الطبيعي إني افهم انك تقصد إني اطلب اوردر لانك حابب راحتي وبعدين أنا عروسة ينفع ادخل المطبخ أول يوم لينا مع بعض
سيف: انتِ عِرسة مش عروسة ، أنا كنت بهزر وهاكل اللي تعمليه والمفروض تفهمي قصدي إني مش عايزك تنزلي الشغل
إسلام: كنت قولها واضحة وصريحة وأنا كنت هقول حاضر مش تلف وتدور
سيف: الاوردر عامل كام
إسلام: لما يوصل هتعرف
سيف: انطقي عامل كام
إسلام: طالما مصمم هقولك الاوردر عامل ٥
سيف: ٥٠٠ جنيه، جت سليمة فداكي
إسلام: ٥٠٠٠ جنيه
سيف: نعممممممممممممممممم كام يا اختي
إسلام: ٥٠٠٠ آلاف جنيه يا سوفه
سيف: بقى أنا أتغدى ب ٥٠٠٠ جنيه انتِ جايه تخربي بيتي
إسلام: مش دي طلباتك واطبخي يا جاريه كلف يا سيدي
سيف: طب يلا امشي قدامي على البيت
إسلام: طب متزوقش طا
سيف: أنا بليت نفسي بيكي انا عارف
إسلام: كان مالها المكرونة البشاميل
سيف: حلوة أنا راضي بيها
إسلام: ولا فتفوته هتترمى شهرين على ما نخلص الوليمة اللي جايه وبعدها أفكر اعملك مكرونه
سيف: أنا عملت إيه في حياتي عشان تظهريلي
إسلام: عملك طيب وزي العسل
________
يوم العملية
- سيف: اهدي يا إسلام ان شاء الله خير والعملية هتنجح
إسلام: أنا قلقانه أوي وخايفه على بابا بقالهم كتير اوي جوا
سيف: ادعيله و ان شاء الله هيكون كويس اطمني، تعالي الدكتور طلع ، طمنا يا دكتور اي الأخبار
الدكتور: الحمد لله العملية نجحت و ان شاء الله هيكون كويس، كان في مرحلة متأخرة وصعبه جدًا ولكن دا كرم وتوفيق ورحمة ربنا، ألف سلامة عليه
إسلام: الحمد والشكر لله ربنا يطمن قلبك يا دكتور جزاك الله خيرا
________
بعد مرور شهر
إسلام: شكرًا يا سيف بابا رجع يعيش حياة طبيعيه بسبب ان ربنا سخرك في حياتنا عشان تساعدنا
سيف: لا شكر على واجب أنا معملتش غير الواجب
منير: مش عارف هنرد جمايلك ازاي يا ابني
سيف: متقولش كدا يا عمي، انا زي ابنك ومافيش بنا جمايل، صحيح يا عمي فاكر ميراثك اللي كنت كلمتني عليه والتفاصيل اللي حكيتها ليا
منير: أيوه يا ابني خير
سيف: أنا كنت كلمت محامي شاطر والنهارده رن عليا وقالي ان حقكم رجع واخوك تعب جامد وفاق لنفسه ودور عليك كتير عشان تاخد حقك ومش عارف يوصلك، وكل حاجه خلصت وِدي وعليها بوسه
- منير: يا فرج الله، أنا لما سيبت حقي زمان كنت عايز ابعد ببنتي بعيد عنهم لأنهم كانوا مش في وعيهم والفلوس عمت قلوبهم، وكنت خايف على إسلام، والحمد لله ربنا اراد ان حق اسلام يرجعلها
إسلام: الحمد لله يا بابا فعلا ما ضاقت الا لما فرجت وآخر الصبر جبر، شكرًا من قلبي يا سيف مهما أشكرك مش كفايه
سيف: بعد اذنك يا عمي عايز إسلام في مشوار كدا
منير: طبعا يا إبني دي مراتك يا حبيبي
______
إسلام: هو إحنا رايحين فين يا سيف
سيف: دلوقتي تعرفي
إسلام: طب انت ليه بتعمل معايا كل دا
سيف: هو اي سؤال وخلاص، نفسي تسكتي خمس دقايق
إسلام: مش سكوتي دا كان مضايقك الأول، سبحان الله كائن الإنسان دا ميعجبوش العجب
سيف: يا بنتي بطللللي زننن
إسلام: طب بجد بتعمل معايا كدا ليه و انت يبان انك مش طايقني بس تصرفاتك كلها بتدل على العكس و انك عايز تسعدني
سيف: يمشي معاكِ إني بحبك
إسلام: بت إيه
سيف: بسم الله حد يكبر في ودنك مالك فاتحة بؤقك كدا ليه
إسلام: انت قُلت بت إيه
سيف: بحبك يا محيراني
إسلام: أنا كنت واثقة، تعرف أنا حبيتك وأنا عايشه دور الراجل
سيف: أوبس، انا عارف إني قمر بردو
إسلام: كنت كل ما اشوفك قلبي يدق واتوتر
سيف: كنت بشوفك لما وشك بيحمر واقول هو ماله الواد دا مسخسخ وطري كدا، كنت مفكرك بتتكسف مني، لكن طلعتي أنثى وواقعة لأ وقمر بقى، خطفتني من أول لحظة عرفت فيها حقيقتها مبقتش عارف ازعل ولا اخدك ليا لوحدي وبعد كدا أزعل براحتي
إسلام: بحبك يا سيف
سيف: يا ربي على عيونها واللي بتعمله فيا، أنا عايز اركز واعرف اسوق ، وبعدين اثبتي شويه بلاش تتهوري
إسلام: بحبَك
سيف: بموت فيكي وهنخبط في عمود دلوقتي، ومش هنعرف نسافر
إسلام: اي دا هو إحنا مسافرين
سيف: دي بقى المفاجأة
إسلام: هتاخدني تركيا
سيف: شاطرة يا مضروبة ، قفشاني علطول كدا
إسلام: بحببببببك، استني طب وبابا
سيف: عمي عارف كل حاجه، في الفترة اللي قعدتي فيها مع عمي في الشقة اللي جنبنا يعني أنا كنت بجهز كل حاجه
إسلام: طب والشنط واللبس
سيف: كله تمام التمام وجاهز
إسلام: استنى هي دي التذاكر، إلحق مكتوب فيها جزر المالديف
سيف: أيوه عشان تبلبطي براحتك
إسلام: بحبَك بكَ ازهر قلبي من جديد يا حصني المنيع
سيف: بحبِك بكِ وجدتني بعدما كنت تائه وحدي في دروب الحياة جميلة أنتِ گ وردة لا تذُبل أبدًا مهما أغرقتها متاعب الحياة
إسلام: بحبك بقى
سيف: يا بنتي اصبري لما نوصل بالسلامة
إسلام: بحببببببببببببببك
سيف: نورتي أيام يا سلامي وسعادتي، بحبِك 💜
انتهت احداث الروايه نتمني أن تكون قد نالت اعجابكم شكرا لزيارتكم عالم عشاق الروايات
