رواية لا تتركني (كاملة جميع الفصول) بقلم اسماعيل موسى
#لاتتركنى
1
كنت واقف على الطريق الزراعى فى قريتنا منتظر عربيه تقلنى للمركز، وانا واقف مرت من جنبى عربيه ملاكى حمراء اللون، بعد ما عدتنى وقفت ورجعت بضهرها والباب انفتح، ببص داخل العربيه لقيت راجل وتقريبا مراته قاعده جنبه
الراجل قال اتفضل هناخدك فى طريقنا، الصراحه خفت وشكرته لكن الراجل أصر يخدنى فى طريقه والمسافه كلها يدوبك عشر دقايق
ركبت معاهم العربيه وانا مرتاب لكن الراجل ساق العربيه بطريقه عاديه من غير ما يتكلم معايا، وكنا خلاص وصلنا مدخل المركز وقربت انزل
الراجل قال ناولنى العلبه الى جنبك لوسمحت، بصيت جنبى كان فيه علبه زى بخاخ العطر يدوبك مسكتها وطلعت منها ريحه قويه مفيش لحظات ولقيت نفسى فاقد للوعى
لما فتحت عنيه واستعدت وعى كنت متكتف جوه اوضه وفيه بنت من نفس عمرى متكتفه جنبى
البنت قالت اخيرا فقت؟
سألتها بخوف انا فين؟
وايه إلى حصل معايا؟
البنت قالت حاول تهدى عشان اقدر افهمك، احنا تقريبا مخطوفين!
قالتها بنبره حسيتها عاديه و بلا مبلاه
صرخت فيها انتى بتقولى ايه؟
قالت زى ما بقلك كده احنا مخطوفين ومعرفش احنا فين اصلا
البنت كانت نحيله جدا واضح انها مش بتاكل كويس
قلتلها انت من امتى هنا؟
قالت من اكتر من شهر
حسيت سكينه شقتنى نصين، شهرين؟
قالت شهرين لانى نسيت اعد الايام وكمان مشفتش اى شخص هنا
الاكل بيوصل وانا نايمه، فيه شخص بيسيبه قدام الباب
مسكت دماغى بايدى، طيب محاولتيش تهربى؟
مفيش شخص قالك انتى مخطوفه ليه؟
البنت قالت بقلك مشفتش اى شخص ولا حتى سمعت اى صوت
مفيش صوت ناس ولا عربيات، اعتقد حنا محبوسين فى مكان منعزل
بعيد عن العمران
طيب عايزين مننا ايه؟
البنت قالت معرفش، انا لما وصلت قعدت اصرخ لحد ما صوتى راح ولا حد رد عليه
اتعلمت بعدها اقعد ساكته لحد ما اشوف هيحصل ايه
على فكره انا سعيده انك جيت هنا، انا اسفه انى بقول كده لكن حقيقى ان كنت قربت اتجنن
