رواية كبرياء ابنة الخادمة الفصل السادس عشر 16 بقلم سحر السحرتي

 رواية كبرياء ابنة الخادمة الفصل السادس عشر 16 بقلم سحر السحرتي

كبرياء ابنة الخادمة 

حلقة ١٦

*دمعت غصب عني وقلت له

: لا كده احسن يا يوسف انا نفسيا مجهده معاهم

: انا حاسس ان في حاجه ثانيه انت مخبياها ممكن اعرفها عشان ما اتكلمش معاكي في الموضوع ده ثاني 

:لو قلت لك بابا وسامح ما حدش يعرف

: اكيد اي كلام بيني وبينك سر 

:مره جابوا لي تسمم فخفت ومشيت

 :جابوا لك تسمم ازاي و متاكده قوي قالوا لك 

:يوم كنا بناكل وبابا جه ياخد من طبقي اللي اتحط قدامي وقالوا انه معمول مخصوص عشاني ... فشاهنده زعقت لبابا وقالت له طبقك من غير ملح عشان الضغط مش بتشتكي اننا مهملين في صحتك ... بعدها جالي ترجيع و اسهال فهمت الاعراض وجريت على المستشفى عملت غسيل معده والتحليل اثبت اني اكلت اكل فاسد 

:ما يمكن اكلتي باره

: يوسف انا يومها كان الاكل ده اول حاجه دخلت معدتي  لاني كنت سهرانه و صحيت متاخر رفضت اكل و استنيت الغداء عشان اكل مع بابا

 :وصلت بيهم للدرجه دي 

:شفت بيحبوني قد ايه وبعدين اسيب اهتمام واكل خالتي واروح اقعد معاهم واكلهم اللي من غير طعم

 :الحقيقه اكل خالتك فعلا حكايه يا ترى بتعرفي تطبخي زيها

بقلمي سحر السحرتي 

: نعم هو الطبيخ مش على العريس 

:نعم ليه هقعد في البيت اربي العيال

 :اختلفنا كده انا مش هقعد في البيت 

:ما تقعديش بس في مسؤوليات عليك لازم تقومي بيها

 :اللي منها الطبيخ 

:اهمهم الطبيخ وانا

 :انت ايه

: انت فاهمه بقى تدلعيني وكدة

*وغمزلي بعينه

: اكيد فاهمه انك عايزني المره دي انط من العربيه

: لا انا مش ناقص خلاص هنوصل .....  تريحي واروح الشغل كام ساعه و نتقابل 

:لا انا هاخد علاء نستغل الوقت ونشوف كام شقه بابا قال عليهم 

:هو انت بتشوفي الشقه دي مفكره ان اننا ممكن نتجوز فيها

: ايه المشكله يعني

 :بتتكلمي بجد ولا بتهزري 

:بهزر طبعا عارفه انك رافض الفكره 

:كويس انك فهماني امال عايزه تشتري شقه ليه

 :لان وجودك هنا مؤقت وخالتي واولادها وانا بنحب نصيف هنا هتبقى فرصه نقعد زي ما احنا عايزين بس ما يمنعش ان انا وانت نقضي يوم اجازتك فيها بما انها بتطل على البحر ولا عندك مانع

: اذا كان على يوم اجازتي موافق عشان ما تزعليش بس لكن من جوايا متضايق 

:خلاص ما تزعلش مش هيبقى كل اجازه يعني لازم نغير وممكن نروح نزور بابا عند خالتي

بقلمي سحر السحرتي 

*مسك ايدي و باسها 

:اكيد مش هيبقى في زعل بينا بس حاولي تبعدي فلوسك وفلوس باباك عن حياتنا انا مسؤول عن بيتي و هتعيشي في مستوى كويس بس مش نفس مستوى الفيلا

: فهماك وانا اصلا مش بحب مستوى الفيلا وانت عارف كده بس بلاش تحبكها لو جبت حاجه لبيتي من فلوسي لان ممكن حاجه تعجبني وفي النهايه ده بيتي

 :في حدود المعقول يا حلا بلاش احس اني مقصر معاكي انا راجل بيحب يعتمد على نفسه مش اهله وده كان من اسباب فشل خطوبتي الاولى .... كانت عايزه اهلي يساعدوني بما انهم عايشين و بيشتغلوا في دبي

: يوسف هو  ممكن ما اسمعش ذكرياتك اللطيفه عن خطوبتك اللي فاتت

: اسف كنت عايز اوصل لك الفكره

: وصلت الا قولي هو انت كان ممكن تتجوزها وانت مش بتحبها ولة حبيتها

:الله انت مش قلتي مش عايزه تسمعي عن ذكرياتها

:لا بس سؤال عدى على مخيلتي قلت استفسر 

: الحقيقه انا كنت معاها بقدم رجل واخر الثانيه ما قدرتش تشدني ليها أو تحببني فيها عشان كده لما حصلت مشكله الشقه ما قدرتش اكمل 

: افهم من كده انك اتلككت

: بالظبط كده 

:وما صارحتهاش من الاول ليه انك مش عايز تكمل 

: كان لازم يبقى في سبب قوي عشان انا اللي اسيب لانها بنت وكلام الناس كثير 

:طب ممكن لو حسيت انك مش قادر تكمل معايا تصارحني على طول لاني بحب المواجهة وما تشغلش بالك بكلام الناس لانهم في جميع الاحوال بيتكلموا عليا

: انت مفيش مجال اني اسيبك أو انت تسيبيني انت ليا مهما حصل وعمرك ما هتكوني لحد تاني 

: للدرجه دي متمسك بيا

:اسمها للدرجه دي بحبك 

بقلمي سحر السحرتي 

 *مرت الايام بسرعه بابا عمل لي حفله خطوبه حلوه قوي صافي كانت واقفه معايا اكثر من اختي

*بدات الدراسه يوسف كل اسبوعين بياخد اجازه يومين بيجي يقضيهم معايا من اول اليوم لاخره 

*مؤيد اتقدم لهنا عشان يتجوزها لكن بابا وسامح رفضوا من سمعته الجميلة والمشرفة

 *هنا اتكلمت معايا وطلبت مني اقنعهم يوافقوا 

:اسفه يا هنا لو كنت شايفاه عريس لقطه كنت اقنعتهم لكن انا خايفه عليك

 :انت بتغيري مني مش خايفه عليا ....  وانت اللي قلت لهم يرفضوا لكن انا هعرف اخليهم يوافقوا ازاي 

*كلمت مؤيد و بلغته ان انا اللي واقفه في سكتهم

 :خلاص يا هنا لازم نحطهم امام الامر الواقع 

:ازاي هنعمل ايه

 :نتجوز وهم غصب عنهم وعشان شكلهم قدام الناس هيوافقوا 

*الفكره عجبت هنا و اتجوزته عرفي ....  وبقوا يتقابلوا في شقه ماجرها مفروش 

*وفي يوم  :مؤيد احنا لازم ناخذ خطوه في جوازنا

: ما احنا متجوزين .... وكده احنا كويسين قوي مع بعض

: انا حامل ودي مصيبه

 :لا مصيبه ولا حاجه نزليه وعادي 

:هو ايه اللي عادي احنا اتجوزنا عرفي مؤقتا عشان يوافقوا نتجوز رسمي وانت كل شويه تأجل انك تكلمهم ثاني زي ما تكون بتقول لنفسك انك عملت اللي عليك

 :ما انا فعلا عملت اللي عليا ودخلت البيت من بابه وهم اللي رفضوا اعمل ايه ثاني 

:ده ما كانش كلامك اللي انت قلته ليا 

*انتهى النقاش بينهم انه مش هيعمل حاجه وهنا فعلا دورت على دواء تنزل بيه الحمل لانها خافت تعمل عمليه 

*واحده صاحبتها نصحتها باسم الدواء وقالت انه شويه مغص ونزيف وبس 

*نفذت زي الهبله والمغص بقى سكاكين بتقطع في بطنها وراحت المستشفى واكتشفوا المصيبه اللي هي عملتها

*هنا مثلت في المستشفى انها تعبانه و اتحايلت على الدكتور يقول كده عشان ما تخرجش بسرعه وانهم يبعدوا عنها اي انفعال 

*الدكتور نفذ لانه حس انها مش متجوزه وان اهلها ممكن يؤذوها ومنع عنها الزياره زي ما طلبت 

*القصه مختلفه طبعا هي مش تعبانه ولا شيء هي كانت بتخطط ازاي تخرج من المازق ده وكانت محتاجه الوقت تفكر وتنفذ 

*القصه دي كلها حصلت وكنت خلصت الترم الاول وفاضل ترم و اتخرج 

*اتصلت هنا على صاحبتها صاحبه فكره الدواء

 :انت السبب في اللي حصل  

:وانا اعرف منين ان جسمك ضعيف ومش هتستحملي يعني كان عندك حل ثاني 

:لازم تساعديني اخلص من الورطه اللي دخلت فيها دي 

:عايزاني اعمل ايه لو في ايدي هساعد

: لا تقولي في ايدك ولا في رجلك اتصرفي يا اما هعرف الناس كلها انك السبب وان انت اللي اشتريتي الدواء ودي جريمه 

:من غير تهديد قولي عايزه ايه 

*يوم ما خرجت من المستشفى رحت انا ويوسف عشان نطمن عليها يومها بابا حس انها بقت كويسه مسكها و زعق لها 

:انا عايز اعرف مين الكلب اللي عملت معاه كده ويا ترى عملتيه في  الحرام ولا اتجوزتيه  

*هنا تظاهرت بالانهيار

 :لو سمحت اسمعني انا ما ليش ذنب اللي حصل ده غصب عني 

:غصب عنك ازاي انطقي احسن هقتلك اسمه ايه

: مؤيد اللي كانت اتقدم وانت رفضته

: هو عشان رفضت تسلمي نفسك له بكل سهوله

 :انا ما سلمتش نفسي هو فضل يتحايل عليا اتجوزه من وراكم  وطبعا عارفه ان دي غلطه كبيره فرفضت 

*كنت داخله انا ويوسف و سامعين بابا بيزعق ولما يوسف عرف الموضوع حب يستاذن لانه موضوع عائلي و شخصي جدا 

:خليك يا يوسف انت بقيت من العيله عشان تحاول تحل معانا المصيبه دي 

:هنا زعقت اه عشان كمان يعرف هو خاطب مين 

يوسف : اظن موضوعك مش هياثر على خطوبتي من حلا لاني متاكد من اخلاقها

 :واذا عرفت ان هي السبب في اللي حصل لي 

:انا السبب ازاي انا نصحتك كذا مره تبعدي عنه

: انا هحكي الحكايه و اسمعوا و هتعرفوا ان البريئه الغلبانه دي خبيثه و حربايه

 *سامح زعق: هنا اخلصي انا ماسك نفسي عنك بالعافيه و سايب بابا هو اللي يتكلم

: بعد ما رفضت اتجوزه في السر ضحك عليا و شربني حاجه في العربيه نيمني فوقت لقيت نفسي في شقه وهو واخذ اللي كان عايزه مني زعقت معاه و مسكت في خناقه وقلت له انا هوديك في داهيه وخطيب اختي ظابط و هيسجنك رد عليا وقال

: اذا كان اختك نفسها هي اللي زقاني عليك و ادتني المخدر اللي نيمتك بيه 

*كلهم في نفس واحد :انت كذابه

شاهنده هانم :استنوا اسمعوا للاخر كلكم عليها ...ليه رافضين تصدقوا ان حلا حربايه و بتضرب من تحت لتحت مش كانت بتمثل انها اتجوزت سامح

بقلمي سحر السحرتي 

*مسح سامح على وشه بكف ايده كملي يا هنا هنسمعك للاخر والحساب يجمع 

*كملت وطبعا دموعها سابقاها عشان تتقمص الدور اكتر

: قلت له انا هبلغ عنك وعنها والطب الشرعي هيثبت انه اغتصاب ومش هسيب حقي 

*حط سكينه على رقبتي وقال لي 

:لا ما احنا عاملين حسابنا 

:وطلع ورقتين عرفي مضاني عليها بالعافيه خفت بصراحه ومضيت وده كل اللي حصل 

*سامح بحده :وانت عايزانا نصدق كدبك ده وان حلا هي اللي زقته 

:وليه لا اسالها تنكري انه ساكن معاك في نفس الحاره 

*بص لي بغضب رديت 

:ايوه ساكن معانا ايه علاقته بكذبك و البلا بتاعك اللي بترميه عليا

: وما قلتيش ليه

 :لان هو اللي طلب مني مش عايز حد في النادي يستقل بيه و احترمت طلبه وده حقه ....  ايه بقى دليلك على الفيلم الفاشل اللي بتعمليه ده 

:معايا الدليل ولا انت قلقانه 

:هقلق من ايه طلعي اللي عندك 

*وفعلا طلعته

# يا ترى الدليل اللي هتطلعه هنا هيورط حلا

#الحلقة الجاية أحداثها مشوقة

            الفصل السابع عشر من هنا 

تعديل المقال