اسكريبت المسحراتي (كامل) بقلم عزيز السيسي
المسحراتي
في ليلة أتصلت عليا بنت اسمها سعاد ، وطبعا كانت النمرة غلط ، ورغم كدا تواصلنا مع بعض وبقينا نكلم بعضنا كل ليلة لحد ما حصل إعجاب بيني وبينها ، ولقيتني
بقولها : أنا خلاص لازم أقابلك ، لأني خلاص بفكر أخطبك .
وردت عليا بتوتر
وقالت : أهو دا إل كنت خايفة منه ، إحنا على قد حالنا يازيزو فقراء أوي وغلابة أوي علشان كدا شايفة إني مش هابقى مناسبة ليك ..
وطبعا أنا صممت عليها ، وماهمنيش أي فقر ، وطلبت أقابلها في عز الضهر في كازينو أدحرج وأجري ، لكن قولت لنفسي أرتاح شوية على ما الميعاد يقرب ، لكن راحت عليا نومة ، وف عز النوم حسيت بحد بيطبل جنبي ، ولما فتحت عنيا ، شوفت مخلوق مرعب بيطبل وبيقول : أصحى يا زيزو هاتتأخر على سعاد ، يلا بسرعة علشان تلحق الميعاد .
يدوب عرفت أمسك الموبايل وأطير برا الشقة خالص ، ورنيت على سعاد
وقلت : سعاد فيه مخلوق مرعب ظهر عندي في أوضة نومي .
وردت سعاد
وقالت : المخلوق دا أبويا ، كان جاي يستعجلك ، وعلى فكرة هو خادم من خدام الجن ، يعني لا ملك ولا أمير ، وكمان أحنا 20 جن وجنية، وكلنا ساكنين في حمام واحد ، وزي ما قولتلك فقرا أوووي..
ساعتها حسيت إني ارتعشت ، وشعر راسي وقف ، وعلى طول قفلت الخط ، وما عداش ثواني ، ولقيت مخلوقة بشعة ظهرت قدامي ، وظهر معاها نفس الجن المطبلاتي ، ولقيت المخلوقة قربت عليا
وقالت : كنت عارفة إن الفقر هو ال هايخليك تبعد عني ، لكن أنا مش زعلانة ، أنت تستاهل واحدة أجمل وأغنى مني ، ومن قلبي بدعيلك إن ملكة الجان تبقى من نصيبك .
تمت ..
