رواية الشيخ مرجان الفصل الثالث 3 بقلم محمد يوسف
#البارت3 🖊️ Mohamed Youssef Sultan
الهواء والبرد كان جامد وشديد قولت يمكن علشان
الشباك مفتوح مع الباب عاملين طيار هواء خوفت الباب
يتقفل وافضل في الشارع دخلت جبت مفتاح الشقة
وطلعت قعدت ع عتبة الباب استني امي 🥹
قعدت ابكي غصب عني وصعبان عليا نفسي اووي من
امي واقول لنفسي ازاي وليه متخدنيش معاكي دا انتي
عمرك ما سبتيني لوحدي 🥹
فضلت قاعد وانا أيدي ع خدي وغلبني النوم وغفلت
حوالي ساعة حلمت في الساعة دي بسرب من الطيور
بيلف حوالين كهف بين جبلين وصوتهم مزعج وعالي جدا
مش صوت زقزقة ولا صفارات دا كان صوت أشبه
بالصراخ وكان بين الطيور دي طائر شكله غريب غيرهم
خالص كان أكبر من العصفور واصغر من الحمام اسود
وفوق رأسه عرف اكبر من عرف الديك لونه احمر لون
الدم السرب فضل يطوف ويلف حوالين الكهف دا الا
الطير المختلف عنهم دا نزل وقعد يلف حواليا وبرغم
حجمه الصغير الا اني كنت خايف منه بعد لحظات السرب
كله نزل في الكهف بين الجبلين ومشيت ناحية الكهف
علشان اشوف هما راحو فين وليه صوت الصراخ زاد كده زي اللي بيتخانقوا مع بعض
وفضلت ماشي ماشي واول ما دخلت بين الجبلين شفتهم
متجمعين حوالين حاجه وبياكلوا فيها بس مش باين هي
ايه
..صحيت وفوقت واول حاجه لساني نطقها ..رابحة 🥹
انتي فين ياامي 🥹هو دا اللي هتيجي ع طول ..
ومتخفش..طب انا خايف 🥹ااااه يا امي 🥹
بعد شوية شفت قطة نفس لون الطائر اللي شوفته في
الحلم ولما ركزت فيها لقيت لون عينها نفس لون عين
الطائر دا ونازل منها كام نقطه دم من عينيها عددت من
قدامي وكانت في حارة جنب البيت دخلت فيها ..أنا
استغربت لاني الشارع بتعنا دا مفيهوش قطط خالص نادر
اوي لما اشوف قطة بسبب الكلاب الكتير اللي في الشارع
وحمدت ربنا انها دخلت الحارة وبعدت عني
بس مفيش دقيقية ورجعت تاني عددت من قدامي برضو
ورجعت تاني وقعدت ع العتبة الي قدام البيت اللي
قدامي وكل ما تغمض عنيها تنزل من عينيها نقط دم
أنا خوفت وبصيت الناحية التانية ولما رجعت بصيت
عليها لقيتها بترجع اكل من بطنها ودم وبترجع تأكله تاني
وتلحس الدم اللي كان في بطنها واللي بينزل من عنيها
أنا قرفت اوووي منها ومن اللي بتعمله
بعد ما اكلت كل الاكل ولحست كل الدم رجعت عملت
اللي عملته دا تاني ..مسكت طوبة من الأرض وقولت
اهوشها بس بيها علشان تخاف وتجري بس بصتلي
بعدوانية وفتحت بوقها وطلعت صوت نفس صوت
الصراخ بتاع سرب الطيور اللي سمعته من شوية
خوفت ورميت الطوبة وفتحت الباب ودخلت سبت النور
والع من الخوف وفضلت قاعد ع السرير استني امي
وبعد أقل من ساعة دخل الطائر دا من الشباك اتنفضت
من الخوف وقمت مسكت عصاية المقشة علشان يخاف
ويطلع من البيت واقفل الشباك بس مخفش وفضل يطير
فوق مني واول ما قعدت ع الأرض رجع وقف ع الشباك
اول ما قمت علشان اقفل الشباك دخل تاني وقعد يطير
حواليا رجعت قعدت مكاني رجع وقف ع الشباك
شغلت التليفزيون وجبت محطة القران اللي كانت ديما
امي تشغلها قبل ما ننام واول ما القران اشتغل الطائر
خرج واختفي جريت قفلت الشباك وقعدت اصرخ بدون
وعي وانا منهار واقول يااربحة 🥹انتي فين 🥹ليبيه
كده يا امي لييييه ..تعملي فيا كدا ليه ..
فتحت باب البيت واول ما شفت القطة لسه موجودة
رجعت قفلت الباب تاني وفضلت قاعد ع السرير وانا
ميت من الخوف ونمت من غير ما احس 🥹
حلمت ب رابحة امي وهي بتصحيني وبتقولي يامرجان
ياحبيبي ..انت ياواد .. يامرجان.. يامرجان
قمت وصحيت وافتكرتها أنها كانت بتخبط ع الباب
وبتنده عليا بجد ..جريت ناحية الباب علشان افتحلها وانا
بقولها حاضر ياامي أنا جاي اهو وكنت متاكد جدا انها برا
بس لما فتحت الباب ملقتهاش 🥹😥 قعدت الف
حوالين البيت اقول يمكن مستخبية وانا ببكي بس برضو
ملقتهاش الفجر إذن جريت رحت لبيت عم عمر
قعدت اخبط ب ايدي الاتنين فتحتلي خالتي نعمات
مرات عم عمر وقالتلي وهي مفزوعة خير ياواد في ايه
امك جرالها حاجه
قولتلها وانا منهار من البكاء امي خرجت من امبارح
وقالتلي انها نسيت حاجه عندك وراحت تجبها وهترجع ع
طول بس مرجعتش 🥹🥹
من خضتها فضلت وقفة مصدومة ومقلتلش ادخل
عم عمر جيه مخضوض والبيت كله صحي وقالي خير
يامرجان في ايه ياحبيبي
نعمات قالتله الواد بيقول أن امه خرجت من امبارح بليل ولحد دلوقتي مرجعتش
قالها خرجت بليل ولحد دلوقتي مرجعتش ازاي وبصلي
وقالي مقلتش رايحة فين
نعمات قالتله قالت انها نسيت حاجه عندي ورايحة تجبها
وسالت بنتها وعلاء ابنها قالتلهم انتو شوفتوا خالتكم
رابحة ياعيال بعد ما مشيت هي ومرجان
كلهم قالوا لا
سبوني واقف قدام الباب وكلهم وقفين مصدومين
ومحدش منهم قالي ادخل ..أصلها حاجه غريبة جدا في
الأرياف أن وحده ست تخرج لوحدها بليل والأغرب انها مرجعتش لحد دلوقتي
قعدت قدام عتبة بيتهم وفضلت ابكي مش عارف اعمل اي ولا ادور عليها فين 🥹🥹
عم عمر جيه وطبطب عليا ..انهارت اكتر في البكاء
وقولتله أنا عايز امي .. رجعلي امي ياعم عمر والنبي
انا تعبت اوووي
حضني وقالي ياحبيبي اطمن ومتقلقش أنا هدخل اللبس
عبايتي واطلع اشوفها وباذن الله مش هرجع من غيرها
خش ياحبيبي اقعد مع خالتك نعمات وأخواتك جو
قولتله لا انا هاجي معاك
ورحنا أنا وهو وسأل البيوت اللي حوالينا وواحد قاله أنه
شافها ماشية فعلا وسألها محتاجه حاجه ياأم مرجان
وأنها مبصتش عليها ولا رددت ووحده تانية قالت إنها
شافتها ماشية وزي اللي كان ضايعه منها حاجه وبتدور عليها
رحنا أنا وهو السوق ملقنهاش سال كذا حد عليها وكلهم
قالوا منعرفش عنها اي حاجه وأنها كانت في حالها ومش بتكلم حد
عم عمر قالي خير يا ابني باذن الله وهترجع وقعد يطمني
وخدني وروحنا البيت عنده وقعدت مع علاء ابنه في
اوضته ولما فتحت الشباك بتاع الأوضه لقيت الطائر دا
واقف علي عمود نور قدامي وزي اللي بيبصلي من خوفي
أنه يدخل الأوضه زي امبارح بليل قفلت الشباك تاني
فات يوم وامي لسه مرجعتش وتاني يوم سمعت صوت
ابويا وهو بينده بصوت عالي من تحت .. ياصحاب البيت
انتو ياناس يالي هنا ..أنا اتخضيت وكنت عايز اقول ل
عم عمر ميفتحش ليه أو يطرده ..قلبي اتقبض وخوفت يخدني معاه 🥹
