اسكريبت اصلح مالم يتلفه (كامل) بقلم ايمان شلبي
اسكريبت 🖤 بقلمي إيمان شلبي 🖤
-ايه الجن*ان ده بتحبي واحد م*جنون و عايش في الشارع!
شربت بوق من فنجاني وبصتلها بهدوء:
-اسمها مريض نفسي مش مجن*ون
ردت بعفوية وهي بتبهد علي سور البلكونة:
-مريض نفسي ،مج*نون ،مخه مهوي ،مش هتفرق المهم انه مش عاقل بتحبي فيه ايه ده مش قادره افهمك؟؟
اخدت نفس عميق وانا بوجه عيوني نحيته،كان نايم علي كُرسي طويل في حارتنا،ضامم كفوفه في بعض وساند دماغه عليهم،بيتنفس بهدوء ،شعره واقع علي عيونه،لابس لبس مبهدل،في رجله شبشب يكاد يكون متمزق
يبان للناس شخص مُريب،مرعب،مقزز
لكن بالنسبالي مكانش كدة نهائياً،مكنتش قادرة اشوفه بعيوني علي قدر ما شوفته بقلبي وكأني شايفه طفل برئ ملاك قصاد عيوني مش قادرة ازحزح عيونه من علي ملامحه لحظة!
-لارا قولي أن ده مقلب
هزيت راسي بنفي وانا مثبته عيوني نحيته:
-لا يا بسمة ده مش مقلب انا بحبه وبفكر اعالجه
-نعمممم لا ده أنتِ شكل قعدتك قدامه في البلكونه جننت*ك رسمي!!!
غمضت عيوني ورديت بهمس:
-ممكن تسيبيني لوحدي شوية لو سمحتي
-لارا ارجعي لعقلك وبلاش العبط *اللي في دماغك ده ، لو حسين عرف ممكن يقت*له قصاد عيونك ولا يرفله جفن
رديت بعصبية وقلبي بيدق بخوف:
-وهو ماله انا حرة
-لا يا لارا أنتِ مش حرة حسين هيبقي خطيبك
الدموع لمعت في عيوني :
-ايوه بس انا مبحبهوش
هزت راسها بيأس وقله حيله:
-بس ده امر واقع وابوكي وافق خلاص،ارضي بالأمر الواقع وبلاش تفتحي علي نفسك ابواب الجحيم انا هدخل انام تصبحي علي خير
خرجت وقفلت الباب وراها ،اما عني رجعت بصيت نحيته مرة تانيه كان صحي وقاعد علي الكُرسي بيفرك عيونه ،وقتها رفع رأسه وكأنه حس بوجودي
اتقابلت عيوني مع عيونه فبصيتله وبدأت اعيط
قام وقف بفزع وهو بيهز رأسه بنفي وبيشاورلي معيطش
حطيت وشي بين كفوفي وعيطت اكتر وهو واقف يدبدب في الأرض زي الاطفال ،حسيته عايز يطير ويجي لحد عندي يضمني يمكن ابطل عياط
مقدرتش استحمل ودخلت اوضتي
اترميت علي السرير وانهارت من العياط وانا بصرخ بصوت مكتوم ،شوية ونمت في مكاني من التعب
صحيت علي صوت المنبه وقت اذان الفجر
روحت اتوضيت ولبست إسدال وصليت
بعدها روحت نحية البلكونة فتحتها
كان قاعد علي الكُرسي،رافع رأسه وعيونه متثبته نحية باب البلكونة!
اول ما لمحني وقف
كان باين علي ملامحه القلق ،الخوف،الحُب
ابتسمتله ابتسامة باهته وانا بهمس بخفوت قدر يفهمه:
-متقلقش انا كويسة
هز رأسه بهدوء وقعد في مكانه ،ضم ذراعاته وانكمش في نفسه ،الجو كان برد ،الحارة خاليه من البشر،مفيش غيره ملهوش مأوي!
دخلت اوضتي بسرعه ،طلعت بطانية من الدولاب وخرجت حدفتهاله
ابتسم ابتسامه جميله زي قلبه تماماً بعدها فرد نفسه علي الكُرسي وفرد البطانيه وغمض عيونه
اخدت نفس عميق وانا برفع راسي وببص للسما اللي كانت كلها غيوم وجوا قلبي امنيه واحده اتمني لو تتحول لواقع
اعالجه،نتجوز،نجيب اطفال حلوين زيه،نعيش في بيت كله ونس ودفا وابعد عن حياة القلق والخوف والتوتر اللي بعيشها كل يوم وكل ثانيه في البيت ده وسط اهلي تُجار المخ*درات!
حاولت كتير أهرب،حاولت كتير اقنع بابا يبطل ويعيشنا بالحلال،حاولت كتير ادعيله ،وحاولت كتير انتحر يمكن لما يحس اني هروح منه يتوب ويتعظ لكن للاسف متعظش!
*****************************
تاني يوم
صحيت من النوم،اتوضيت وصليت الضهر بعدها لبست وخرجت من اوضتي لاقيت بابا قاعد في وشي ومعاه اكتر بني آدم بك*رهه في حياتي "حسين" الصبي بتاعه ودراعه اليمين وكاتم أسراره
-لارا تعالي عايزك
غمضت عيوني وضغطت فوق شفايفي بعدها اخدت نفس بكل بُطئ وهدوء وانا بروح نحية بابا وبقف قدامه:
-نعم يابابا اتفضل
رفع رأسه ورد بنبرة حادة:
-هنتكلم علي الواقف؟!
رد "حسين" وهو بيبصلي ببسمة مستفزة:
-شكلها مستعجلة عشان تروح شغلها اللي بتكسب منه ملاليم
قعدت علي كُرسي قدامه وانا بهبد الشنطه فوق رجلي وببصله بغيظ وبستغفر بصوت مسموع
-اعملي حسابك مفيش شغل تاني من النهارده
رديت بصدمة:
-نعم ليه ؟!
بص لحسين وقال بهدوء:
-كتب كتابك أنتِ وحسين يوم الخميس وحسين مش عايزك تشتغلي هو كفيل يلبي كل طلباتك من غير ما تتمرمطي
قلبي اتنفض بخوف،عيوني زاغت في كل مكان،حسيت نفسي تايهة،بغرق،روحي بتتسحب بالبطئ
-مالك يا عروسة دي دموع الفرحة مش كدة!
قالها "حسين" فبصيت نحيته وانا مش شايفه من الدموع اللي اتجمعت في عيوني ورديت بعصبية:
-انا مش هتجوز البني آدم ده مهما حصل
رد بابا بنبرة خشنة وتحذيرية دبت الرعب في قلبي:
-مش بمزاجك هتتجوزي حسين ورجلك فوق رقبتك
-لا لا لا مش هتجوز و.....
وقفت كلام اول ما نزل قلم علي وشي من بابا،حطيت ايدي فوق خدي وانا ببصله بقهرة ووجع...
جريت علي اوضتي ،هبدت الباب وانا بصرخ بصوت مكتوم،رميت شنطتي وقعدت علي الارض وانا بحط وشي بين ايديا وبعيط بحرقة
-لارا افتحي الباب لو سمحتي خلينا نتكلم والله انا بحبك صدقيني هعملك كل اللي أنتِ عايزاه ولو عايزه تنزلي شغل مش همنعك وهجبلك خدامة تخدمك مش هخليكي تشيلي قشايه وكل يوم هجبلك اكل دليفري مش هخليكي تدخلي المطبخ وهجبلك دهب كتير اوي والله لو عايزه محل دهب هجبلك وهجبلك لبس كتير وهعمل كل اللي يريحك بس علشان خاطري وافقي كفايه تتعبي قلبي يابنت الناس انا تعبت والله وكرامتي اتهانت بسببك لو بأيدي كنت شيلت قلبي ودوست عليه يمكن يبطل بحبك بس والله ما بأيدي!
حطيت ايدي فوق وداني وانا بصرخ بنبرة مبحوحة:
-امشي امشيييي مش عايزاك مش بحبك ولا بطيق اشوف وشك خلي عندك كرامه وامشي بقي
رد بهمس ونبرة أوشكت علي البكاء:
-لو بأيدي كنت مشيت من زمان بس للاسف مش هقدر انا لو بعدت عنك ثانيه اموت
رديت بهمس وانا بغمض عيوني وبرفع راسي للسقف:
-يارب
كنت عارفة من زمان أنه بيحبني
كنت عارفه أنه مستعد يعمل اي حاجة علشان ارضي عنه وأبادله نفس شعوره
احياناً كان بيصعب عليا لدرجة كان قلبي يميل!
لكن عقلي علي اخر لحظه يفوقني بدرس في فن اختيار شريك الحياة
عمري ما شوفت "حسين" شخص مثالي
كل تفصيله فيه عكس احلامي
عكس توقعاتي في الانتظار والصبر
دايما بصبر نفسي أن ربنا عنده قصه حلوه ومختلفه ليا
قصه فيها عوض لقلبي عن كل لحظه خوف عيشتها جوا البيت ده
اخدت نفس عميق وقومت من مكاني
مسحت دموعي
وكالعاده وقت خوفي وحزني وقله حيلتي
هربت وجريت علي ربنا
فردت المصلية ووقفت اصلي بخشوع وانا بدعي من قلبي ان الموازيين تتغير للأفضل
#اصلح #ـما #لم #يتلفه
#إيمان #شلبي
