رواية جحيم الغيرة الفصل الرابع 4 بقلم اماني سيد
فاقت ابتهال من شرودها على صوت الموبايل كانوا اصدقائها بيرنوا عليها عشان اتاخرت
ردت عليهم ابتهال بسرعه لقتها فرصه تخرج بيها من زكرياتها
ـ الو يا منى انا طالعه اهو خلاص وصلت
ـ تمام بس صاحبه الجيم بتسال عنك
ـ ليه ؟
ـ مش عارفه هى مستنياكى
ـ طيب انا هدخلها الأول وبعدين اطلع أبدا تمرين
وصلت ابتهال الجيم ودخلت على غرفه صاحبه الجيم وسلمت عليها
ـ اقعدى يا ابتهال عايزاكى فى موضوع مهم
ـ اتفضلى
ـ انتى عارفه إن كابتن سماح مشيت صح
ـ اه للاسف
ـ أنا كنت عايزاكى تمسكى الجيم بدالها
ـ أنا
ـ اه انا بشوفك فى التمرين عندك طاقه وحماس كبير اوى من اول يوم جيتى فيه هنا من سنتين
يعنى انتى عارفه التمرين بيمشى ازاى والحركات صح وكمان بشوفك بتساعدى الناس الجديدة انها تعمل التمارين صح وبتشجعيهم فبصراحه مش هلافى احسن منك
ـ بس يا كابتن انا بشتغل
ـ وانا مش هعطلك انا عايزاكى اربعه ايام فى الاسبوع من الساعه ٧ للساعه ٩ ها قولتى ايه وهتاخدى مرتب حلو
واعتقد ده مش هيأثر على شغلك لان منهم يوم الجمعه والسبت ودول انتى اجازه فيهم
سكتت ابتهال تفكر في العرض اللى اتقدم لها ولقته فرصه عشان تقعد فتره اطول بره البيت
ـ تمام يا كابتن انا موافقه
ـ طيب يلا بقى نطلع نفرحهم
طلعت ابتهال مع صاحبه الجيم وعرفت البنات إن ابتهال هى اللى هتكمل معاهم وهما فرحوا أوى بيها وهنوها وبدأت فى تدريبهم وبعدها خلصت ووصلت البيت
دخلت البيت لقت مامتها وفردوس قاعدين بيتفرجوا على التلفزيون تجاهلتهم ودخلت المطبخ لقت مامتها عامله سمك
دخلت اوضتها وطلبت أكل دلفرى
بعد فتره بسيطه وصل الاكل وخرجت ابتهال وحاسبت الدلفرى واخدت الاكل منه
وهى فى طريقها لاوضتها وقفتها امها
ـ هو كل الاكل اللى جوه ده مش مكفيكى وراحه تطلبى دلفرى ، ده بدل ماتحطى فلوس الاكل اللى بتحبيه من بره ده فى البيت
ـ أولا انتى معاشك على معاش بابا كبير ومش محتاجه اساعدك
ثانياً انتى عامله سمك تونه وانا مابكلوش
ـ ليه يا صغننه مش هتبطلى دلع
ـ لأ عندى حساسيه منه وانتى عارفه كده ومش مشكلتى انك بتنسيه
ـ بس اختك بتحبه
ـ طيب المفروض اعمل ايه اكله وانتح"ر عشان ابسطك
ـ انتى ماتعرفيش تتكلمى عدل غورى فى داهيه من قدامى سديتى نفسى
تنهدت ابتهال بملل وسابتها ودخلت اوضتها وهى بتعد الأيام اللى هيعرفوا فيها سبب طلاق اختها ايه
خلصت أكل وخرجت تقعد معاهم عشان تتأكد إذا كانت اختها شافت البوستات بتاعت جوزها ولا لأ
خرجت ابتهال الصاله وراحت قاعدت معاهم وبدأت فى الكلام بشكل عام
ـ ايه يا فردوس مرتاحه فى القاعدة هنا
ـ أه طبعاً ماما حبيبتي مريحانى ومش مخليانى أعمل حاجه حتى الولاد هى بتقعد معاهم
ـ لما القاعده هنا حلوه كده ما اطلقتيش ليه من زمان
اتكلمت أمها بعصبيه
ـ انتى جايه تقعدى معاها تعصبيها روحى اوضتك
ـ أنا اقعد مكان ما احب شقتى
ـ مش بتاعتك لواحدك اختك ليها فيها
ـ أدى بالظبطت
ـ طيب إيه رأيك بقى أنى هكتبلها نصيبى وهيبقى نصيبها اكبر يعنى لو حبت تتصرف فيها تقدر تتصرف فيها بدون ما ترجعلك وفلوسك تبقى ترميهالك فى المحكمه
ابتهال من داخلها كانت عارفه إن أكيد فى يوم من الأيام هيحصل معاها كده عشان كده قررت انها تشترى شقه اول ماخدت نصيبها من ورث باباها وبقت تضغط نفسها بأقساط عشان تضمن أنها تلاقى مكان في المستقبل
ـ وأنتى فاكره كده انك هتضايقينى طيب اتكلمى فى حاجة عدله
انتى اصلك ماشوفنيش شقتى عامله ازاى دى جنبها ولا حاجه
وغير كده ياترى بنتك هتجيل الفلوس اللى هتشترى نصيبى بيها منين
ـ أنا هساعدها
ـ طيب لما تبقى تجمعى بقى تمن نصيبى ابقى هاتيه وانا امشي ومن هنا لحد ما ده يحصل اقعد مكان ما احب واقول اللى انا عايزاه
وبعدين يا فردوس محدش بيسمع صوتك ليه انتى مش بتعرفى تتكلمى
ـ وانا أتعب نفسى واتكلم ليه طالما ماما بتتكلم بالنيابه عنى
ضحكت ابتهال بسخريه وتريقه على أختها
ـ إلا صحيح يا فردوس جوزك قصدى طليقك ماتصلش بيكى ولا منفضلك أصل شوفت كده على الفيس منزل كام بوست رومانسي وانه فى علاقه
شحب وجهه فردوس ومسكت التليفون وبدأت تشوف البوستات وحست بغيره
ليه جوزها عمل معاها كده ليه حب غيرها اكتر منها
بصت لامها بدموع واخدتها امها فى حضنها وطبطبت عليها
فى الجهه الاخرى كانت ابتهال قاعده بتكلم نفسها
جربى الوجع لما تحسى انك اللى بتحبيهم مش بيحبوكى وبيفضلوا غيرك عليكى
زمان مكنش فى حضن بيطبطب عليا على الأقل انتى امك معاكى بتطبطب عليكى لا احلل نقلها او مشاهدتها فى أى مكان تانى غير صفحتى قصص وروايات أمانى سيد
كانت ابتهال بتبصلهم ومن جواها مش عارفه تفرح لانها السبب فى ده ولا تزعل على حالها إن محدش حس بيها انها مجربتش حضن الأهل ولا الاحتواء ده
سابتهم ابتهال وقامت عشان محدش يشوف فى عينيها نظره الضعف او الحنين ولا الدمعه اللى خانتها وظهرت فى جفنها
اثناء مرورها من قدامهم تمتمت والدتها بصوت مسموع
ـ هديتى كده منك لله
تجاهلتها ابتهال ومردتش عليها أهم حاجة دلوقتي انها متظهرش ضعفها ولا تشمتهم فيها
مرت الايام واتصالات ابتهال قلت بياسين وبدأ ياسين يبعت رسايل لابتهال يسهالها عن بعدها عنه
وكان جوابها دايما انها انشغلت فى شغل جديد
بالإضافة انها على وشك الترقيه فى شغلها وهى من ساعه مانقلت فى الفرع ده وهى بتحاول تثبت نفسها بكل الوسائل
مرت الايام وعدى شهر كانت بتتفادى ابتهال أنها تقعد مع اختها او أمها بتضيع وقتها فى الشغل والخروج مع اصدقائها
وبعد مرور شهرين وبعد إلحاح كبير من ياسين قررت تقابله
هى بدأت تحس انها ورطت نفسها معاه لانها مابتحبوش بس ده الشئ الوحيد اللى هيوجعهم عشان كده مستحملاه
فى احد الكافتريات قابلت ابتهال ياسين بابستامه مزيفه
ـ ازيك يا ياسين عامل ايه
ـ انا كويس الحمد لله ، بس حاسس انك بتهربى منى
ـ مش بهرب منك ولا حاجه بس انا دلوقتي مركزه فى شغلى والجيم عشان كده بعدت شويه وبعدين هانت خلاص
ـ طيب انا عايز أتأكد انك لسه عند وعدك
ـ حاضر بكره هكلم عمى واخليك تقابله
ـ متأكدة
ـ متاكده انى هكلمه واظبط معاه الموضوع مش سهل
ـ ماشى يا ابتهال وانا معاكى للآخر بس افتكرى انى عملتلك كل اللى انتى عايزاه
ـ فاكره ماتقلقش
انتهت ابتهال من مقابلتها معاه وروحت البيت لقت مامتها وفردوس بيضحكوا وبيهزروا على غير العادة
ـ السلام عليكم
ـ وعليكم السلام كويس انك جيتى بدرى
ـ خير
ـ عمك عازمنا كلنا بكره ومأكد انك لازم تيجى معانا
ـ طيب انا كده كده كنت هروحله بكره كنت عايزاه فى موضوع مهم
ـ موضوع ايه
ـ بكره لما نروح هتعرفى
ـ ايه يا بايره جايلك عريس ولا ايه وخايفه تقولى لنحسدك
ـ بايره هه انا بايره طيب مش احسن لما اجيلك وانا جاره خبتى معايا
ـ انتى ايه ماتعرفيش تسمعى من غير ماتردى الغيره دايما وكلاكى كده من اختك
ـ وياترى بقى هغير منها ليه وعلى ايه
ها تقدرى تقوليلى ايه بنتك متفوقه عليا فيه او احسن منى فيه
انا بشتغل بدل الشغل اتنين عندى شقه وعربيه ورصيد فى البنك ليه صحاب عندى كل حاجه هغير منها ليه
ـ عشان عندك عقده نقص لاننا بنحبها أكتر منك وانتى مش قادره تنسى ده اننا بنفضلها عليكى
غصب عنها الدموع كانت هتخرج
تصنعت ابتهال الضحك الشديد عشان امها واختها يفتكروا دى دموع من كتر الضحك متاح حاليا رواية قيد من سلاسل دهب pdf للحجز ارسال رساله عبر الصفحه
ـ طيب قولى حاجه عدله اغير منها
اغير من حبكم ده لو كان نفعها انما اغير من فاشله ليه وسبتها ودخلت الحمام وقفلت على نفسها وفضلت تعيط
مهما كانت فاكره انها تخطت الماضى إلا انها كل مره بتتاكد انها لسه مخرجتش منه مع اول مواجهه بيبان الضعف
ياترى رد فعلهم ايه لما يعرفوا بكره ؟؟؟
ياترى عمها عايزهم ليه ضرورى ؟؟؟؟؟
