رواية موضوع عائلي الفصل الرابع والثلاثون 34 الجزء الثالث بقلم رحاب القاضي
#موضوع_عائلي
"بيت الهنا"
_الحلقه الـ 34
ــــــــــــــــــــــــــــــــــــــــــــــــــــــــــــــــــــــــــــــــــــــ
يحبها وتحبّه..لكنهما عند نهاية الشارع الطويل؛
سيفترقان
- سوزان عليوان.
ـــــــــــــــــــــــــــــــــــــــــــــــــــــــــــــــــــــــــــــــ
_بتبدأ حلقة النهارده برضوي وهي قااعده مع يوسف في المكان المفضل ليها علي الكنبه الخشب قدام النيل، وكانت بتاكل ايسكريم واول ما خلصت اداها يوسف واحده تانيه فأبتسمت وقالتله..
رضوي
ايه ده انت جايبلي اتنين؟
يوسف
ايوه ما انا عارف انك مش هتكفيكي واحده وبتتكسفي تقوليلي هات اتنين فبجيبلك من نفسي..
ضحكت بهدوء واخدتها منه وقالت
انت ازاي بتاخد بالك من الحاجات دي انا ما بقولش..
يوسف
بس انا فاهمك كويس، قوليلي بقي فكرتي في موضوع الاسماء..
رضوي بأهتمام
ايوه بص احنا لو جيبنا بنت في الاول هنسميها اا..
يوسف
شهد طبعا.. لو ولد بقي نسمي يونس وخلاص ابويا برضو..
رضوي بغيظ
ومدام انت ناوي تسمي ولادنا علي اسم ابوك وامك بتقولي افكر ليه واختارلهم اسماء؟!
يوسف
عشان نتشارك الاختيار بس اسم شهد حلو وموضه ويونس كمان..
رضوي
ومالهم ليلي وحسن انا كمان عايزه اسمي ولادي علي اسم بابا وماما..
يوسف
خلاص بلاش نسمي يونس، بس مش هتنازل عن اسم شهد ده حلم حياتي اجيب بنت واسميها علي اسم ماما، هتفرح اووي ماما وقتها وهتهتم بيها وكده..
رضوي
الحمد لله بجد ان طنط شهد بتحبني ومش حما شريره والا كان هيبقي الوضع صعب بطريقة حبك ليها دي، بس برضو مش هنسمي شهد انا عايزه اسمي ولادي اسماء مميزه
يوسف
هو انتي في ايه بجد قارشه ملحة امي ليه، طيب مش هسمي بنتي غير شهد..
رضوي
ان شاء الله مش هنخلف بنات خالص، اسكت بقي ويلا روحني عشاان ما نتأخرش...
يوسف
لسه ما قعدنااش مع بعض علي فكره..
رضوي
من الساعه اربعه لحد دلوقتي خلاص الساعه 11 بالليل واحنا قاعدين مع بعض لفينا مصر كلها وتقولي لسه ما قعدنااش مع بعض
يوسف
هو يوووم يتيم كل اسبوع، بس نتجوز وانا هخليكي تروحي بيت اهلك كل اسبوع ساعه واحده بس علي اللي عامله فيا ابوكي ده..
رضوي
انت تحمد ربنا انك بتشووفني اصلا..
واخدها ووصلها فعلا لبيتهم وقبل ما تنزل مسك ايدها وقال
يلا بووسه حلوه لعمو قبل ما تنزلي..
ضربته علي كتفه جامد وقالت
لم. نفسك عيب كده..
يوسف
فين الرومانسيه بتاعت الخطوبه..
رضوي بسخريه
عند ماما يا روح ماما..
قالت كلامها ونزلت وهو ضحك بهدوء وقال
طيب ما تناميش هروح البيت واكلمك..
رضوي
حاضر.. باااي..
_وفضل واقف مستنيها لحد ما دخلت بيتهم وبعدين مشي بعربيته وهو في طريقه للبيت رن موبيله برقم نيللي، فاتنهد بضيق وما ردش عليها اول مره بس لما رنت تاني وقف العربيه ورد وقال بعصبيه..
يوسف
نعمم عايزه ايه؟
نيللي
ايه الطريقه اللي انت بتكلمني بيها دي، هو انا بكلمك اشحت منك..
يوسف
وتكلميني ليه اصلا يا استاذه نيللي..
نيللي بدموع
موضوع مهم ولازم نتقابل عشان نشووف حل وو..
يوسف
ما فيش اي موضوع يربطني انا وانتي خالص..
نيللي بحده
لا في ولا انت نسيت اللي عملته..
يوسف بنبره غاضبه
وانا ما غصبتكيش علي حاجه كله كان بمزاجك فشيلتك وتشليها ولو في مشكله معاكي تحليها من غير ما تسمعيني صوتك تاني فاهمه..
_قال كلامه وقفل في وشها ورجع سااق عربيته وهو متعصب جدا وراح لبيتهم، وفي الوقت ده كانت نيللي قااعده في اوضتها مصدومه من طريقة كلامه معاها، في الوقت اللي هي خايفه علي حياته وبتدور علي حل عشان مشكلتهم تخلص هو اهانها وجرح كرامتها بطريقة كلامه معاها..
ريم
بقي هو ده اللي انتي خايفه عليه وعلي حياته، ده واحد حيوان وندل ولا عنده ريحة الرجوله..
نزلت دموع نيللي بحزن وما ردتش عليها وريم قالت بهدوء
ممكن تهدي بقي وسيبي اونكل فتحي هو اللي يتصرف عشان يجيبلك حقك منه، يا نيللي هو راجل مهما حصل ما حدش هيجيب الغلط عليه الغلط كله هيبقي عليكي انتي لو الموضوع ده اتعرف للناس، وبعدين انتي لسه عندك مستقبلك شغلك وحياتك مستعده تخسري كل ده عشان هو يعيش مرتاح..
مسحت نيللي دموعها وقالت
لا طبعا انا خلاص حاولت اسااعده وهو حتي رفض يسمعني هقعد بقي واتفرج واشووف بابا هيعمل ايه..
ــــــــــ #بقلم_الكاتبه_رحاب_القاضي ــــــــ
_وفي الوقت ده في بيت يونس الصاوي صحي يزن من نومه وما لقااش ريناد جنبيه فقام وطلع بره اوضتهم ولقاها قااعده في الصاله وبتتكلم في الفون وهي متعصبه جدا وبتقول..
ريناد
لو سمحت يا سيف بدل ما تبقي في مشااكل بينا اكتر من كده خلي تيا تروح عند ماما طارق هيجي ياخدها منك...
سيف
بنتك بايته في حضن جدتها يا ريناد ومع ابوها خليكي بقي في اللي انتي فيه وابقي بكره ارجعها ليكم سلام..
قال كلامه وقفل في وشها وهي قالت بغيظ
ربنا ينتقم منك يا سيف... ربنا ياخدك...
قعد يزن جنبيها وقال
في ايه؟
ريناد
قومت اكلم ماما واطمن علي ريناد لاني فاكره عمو عز لما جه اخدها وداها البيت لماما، طلع بيضحك علية وتيا عند سيف
يزن
طيب وعمك عمل كده ليه؟
ريناد
بيقولي وفيها ايه لما البنت تبات عند باباها يوم كل فتره..
يزن
خلاص يا ريناد وفيها ايه فعلا مش مستاهل يعني الموضوع النكد ده كله..
ريناد
انا ما بكونش مطمنه وبنتي عنده يا يزن..
يزن
طيب ممكن تهدي وخلاص بكره يروح طارق او عمك يجيبها من عنده
ريناد
هو قال هيرجعها عند ماما بكره..
يزن
طيب كويس ولو سمحتي بعد كده لو هتتكلمي معاه تقوليلي الاول ونكلمه احنا الاتنين..
ريناد بقلق
انا كنت بكلمه عشان تيا ما فيش بينا كلام تاني..
يزن
معلش مش هتخسري حاجه لو قولتيلي..
ريناد
حاضر هبقي اقولك ما تزعلش انا ما كنتش اقصد ازعلك..
يزن
مش زعلان يا ريناد ممكن بقي ندخل ننام..
ريناد قربت منه وقالت
انا مش جايلي نوم بقالنا كتير نايمين..
ابتسم يزن بهدوء وقال
لا ما احنا برضو ما كناااش هنام هنقعد جوه شويه الاول...
ــــــــــ #بقلم_الكاتبه_رحاب_القاضي ــــــــ
_وعند يونس في مكتبه ودخلت عنده شهد فجأه فاتخض وقالها..
يونس
في ايه يا حبيبتي خبطي الاول
شهد بشك
لا. مش هخبط وانت كنت بتعمل ايه اصلا؟
يونس
بشتغل في. مشكله. كده واتخضيت لما انتي دخلتي فجأه، المهم. داخله كده عايزه ايه؟
شهد
مشكلة ايه اللي عندك دي.؟
يونس
حاجات كده في الصفقه الجديده حاسس ان في لعب من تحت الترابيزه بيحصل من ورا ضهري مع المستثمر..
شهد
انت حد. يعرف يضحك عليك ده انت تضحك علي بلد المهم انا ويارا رايحين لزيد...
يونس بضيق
هو جه امتي مصر
شهد
من يومين..
يونس
وانتي عرفتي منين ان شاء الله؟
شهد
ياسمين قالت ليارا، بس انا عايزه اروح اطمن عليه واهو جايه اقولك..
يونس
لا ما اللي نااقص انك كنتي تروحي عنده من غير ما تقوليلي وتروحي عنده ليه اصلا مش هتروحي يا شهد يارا عايزه تروح لصاحبتها تروح انتي ايه اللي يوديكي عند راجل غريب كان من باقي اهلك
شهد
بصراحه كده انا بحسه فعلا من اهلي وحد غالي اووي عليا...
يونس
قومي يا شهد من قدامي بدل ما اقوم اخبطك ومش هتروحي هناك
شهد بغيظ
انت الواحد يعمل الحاجه من ورا ضهرك احسن..
يونس
طيب فكري بس تعملي حاجه من ورا ضهري يا شهد وخلاص هو رجع لصحته يشوف شغله انتي مالكيش دعوه غير بشغلك بعد كده وبس،ولو عندك وقت فاضي اهتمي بجوزك يا اختي اولي من الغريب...
شهد
ماشي يا يونس كمل شغلك...
ـ قالت كلامها وطلعت من عنده وهو كمل شغله ودخل عنده بعد شويه يزن وقال..
يزن
اديني جيت اهو يا بابا خير ان شاء الله
يونس
هو انا من امتي باعتلك تيجي..
يزن
يا بابا انا عريس علي فكره ومش واخد اجازه من الشغل عشان اقعد مع حضرتك يعني
يونس
طيب بص انا عايزك معايا في الشغل..
يزن
ما يوسف مع حضرتك وانا ما اقدرش اسيب شغلي
يونس
خليك في الاتنين ما عرفتش يبقي تيجي معايا، اخوك ده متسرع ودماغه مش عليه وانا داخل علي شغل تقيل وعمك يوسف خلاص استقر برا مصر اروح اجيب حد غريب يبقي معايا..
يزن بضيق
يا بابا انت عارف من الاول ان انا عايز يبقالي شغلي لوحدي وحابب المجال اللي شغال فيه
يونس
قولتلك خليك في الاتنين والاهم ابقي انا كمان وبعدين هو كل ده هيبقي لمين بعد كده ما ليك انت ولاخواتك، ويوسف عايزك جنبيه انتو الاتنين تبقي ايدكم في ايد بعض..
يزن بضيق
ولو رفضت وقولت لحضرتك انا مكمل في شغلي
يونس
انا مش عايز اقول كلام يزعلك بس رأس المال سواء في شغلك او شغلي انا يا يزن وانت تعمل اللي انا بقولك عليه ومش باخد رئيك ده امر، بعد ما اجازتك تخلص هترجع مكتبك في شركتي وزي ما علمتك شغل الاداره تكمل معايا وتعلم اخوك وتبقو انتو الاتنين ديما مع بعض..
يزن بنبره حزينه
ان شاء الله يا بابا بعد اذنك..
_قال كلامه وطلع بره مكتب يونس وهو مدايق جدا واول ما شافته شهد قالتله..
شهد
يزن تعالي هنا يا حبيبي في ايه؟
قعد يزن جنبيها وقال
هو ليه مصمم ان كل ما علاقتي بيه تبقي كويسه ارجع اخد منه جنب..
شهد
ايه اللي حصل بس فهمني؟
يزن بحزن
مدام هو عايزني اشتغل معاه ليه خلاني اشتغل لوحدي واتعلق بشغلي..
شهد
مش يمكن الشغل مع باباك احسن، بس انا بختلف معاه كتير وبقف ديما في صفكم بس في حتت الشغل ديما ابوك بيبقي صح جدا
يزن
حتي انتي كمان يا ماما بس عادي انا كده كده هسمع كلامه عشاان هو اللي في ايده كل حاجه فمن حقه يقرر اللي هو عايزه حتي لو علي حسااب رغبتي انا
_قال كلامه وهو متعصب وقاام طلع شقته وكانت ريناد مجهزه الاكل علي السفره وقالتله..
ريناد
اتأخرت ليه هو ده اللي خمس دقايق وطالع، يلا عشان نتعشي..
يزن
انا ما ليش نفس يا ريناد اتعشي انتي..
ريناد بقلق
في حاجه ولا ايه؟
يزن ابتسم بهدوء وقال
ما تشغليش بالك كل حاجه هتبقي تمام..
ريناد
هتبقي تمام ازاي واحنا لسه اهو اول يوم جواز وشكلك مدايق كده..
يزن
مشكله في الشغل خلاص حقك عليا يلا هنتعشي سوا..
ابتسمت بهدوء وقالت
كل حاجه هتتحل بس بلاش تكشر انا متعوده عليك علي طول مبتسم وشكلك بيبقي قمر وانت مبتسم كده...
يزن
والله ما في قمر في حياتي غيرك انتي، ربنا يخليكي ليا العمر كله..
ــــــــــ #بقلم_الكاتبه_رحاب_القاضي ــــــــ
_وعدت فتره وكان فاضل اكتر من اسبوع علي فرح رضوي ويوسف، وفي بيت الاستاذ حسن طلعت ليلي من المطبخ وهي بتتكلم في الموبيل وبتقول..
ليلي
خلاص يا عبدالله انا هتكلم معاها ومش هترجع البلد المره دي غير وهي معاك بس اللي يقدرها بعد كده مش تكرر اللي عملته
عبدالله
غلطه يا مرات خالي خلاص، وبعدين انا عنيا ليها وقولتلها اللي تطلبه راضي بيه بس ترجع اكتر من كده اعمل ايه تاني..
ليلي
اللي فيه الخير يقدمه ربنا وانا هتكلم معاها وهحاول اقنعها وهرد عليك ان شاء، وما تقلقش والله روان دي طيبه بس هي دماغه ناشفها في حقها
عبدالله
ان شاء الله خير يا مرات خالي كلمبها وانا في انتظار ردك عليا..
_ وقفلت معاه ليلي وقالت بحده لهنا ورضوي اللي قاعدين يتفرجو علي التلفزيون..
ليلي
وبعدين معاكي انتي وهي هتفضلو قاعدين كده طول النهار، ايه يا هناما عندكيش مذاكره
هنا
خلصت والله..
ليلي
كنتي هاديه وبتسمعي كلامي بقيتي زيهم دلوقتي..
رضوي
يعني احنا وحشين في ايه يا ماما
ليلي
ضهري اتكسر من وقفة المطبخ وانتو تلاجتين قاعدين ولا في دم عندكم والتالته مخموده جوه بقي ده منظر بنات تفتح بيوت ده
رضوي
انا عرووسه مش هعمل حاجه..
ليلي
وحياة امك طيب علي المطبخ ما حدش هيكمل الاكل غيرك وتعدلي الاكل يتعمل كويس مش العك بتاعك، وانتي ياللي خلصتي مذااكره روحي ساعديها..
رضوي
طيب قوليلي يا ماما هو عبدالله كان عايز ايه؟
ليلي
هيكون عايز ايه يا حبيبي، عايز مراته ترجعله هدخل اتكلم معاها وربنا يهديها
رضوي
مش هتقتنع علي فكره ومعاها حق
ليلي
مالكيش دعوه ولو عندك كلمه تهدي بيها سرها هي وجوزها قوليها ما عندكيش اسكتي، قال تطلق قال هو الطلاق ساهل ما احنا جربنااه كان عاجبك يعني حال ريناد وهي مطلقه..
رضوي
بس ربنا عوضها باللي احسن من طليقها مليووون مره..
ليلي
وعبدالله مش وحش ومش زي سيف، انا هكلمها واقنعها خلاص اعتذر وجالها بدل المره عشره ترجع معاه وما تخربش بيتها..
_قالت ليلي كلامها ودخلت الاوضه عند. روان اللي كانت نايمه وقالتلها بهدوء..
ليلي
رواااان قومي يا حبيبة ماما..
روان بنوم
في ايه يا ماما..
ليلي
قومي عايزه اتكلم معاكي شويه؟
روان بقلق
في ايه والله ما عملت حاجه
ليلي
هو انا كنت قولتلك عملتي حاجه، انا عايزه اتكلم معاكي شويه في الموضوع بتاع عبدالله
روان بضيق
اممم ماله سي عبدالله ما خلاص انا قولت قراري الاخير
ليلي
هو لسه قافل معايا ومتمسك. بيكي ومش عايز يطلقك
روان
هو حر فقي هروح هخلعه
ليلي
استغفر الله العظيم يارب، هو عمل ايه يعمي عشان تعملي كده
روان
ما انا قولتلك يا ماما وانتي عارفه كويس هو عمل ايه
ليلي
مشكله وعدت وهو مش ملاك كلنا بنغلط.
روان
وانا حره بقي اقبل الغلط ده ولا لا، وانا مش هقبله ومش هرجعله يا ماما وهيطلقني ورجله فووق رقبته..
ليلي بغيظ
جرا ايه يا بت انتي ما تتلمي بقي وبطلي عقل العيال الصغيره ده، ومن الاخر كده ما فيش طلاق يا روان هيجي ونحطله شرووط وترجعي لجوزك ولبيتك
روان
هو بالعافيه يعني
ليلي
ايوه بالعافيه مدام مش عارفه مصلحتك فين، وانت ليا كلام مع ابوكي لما يرجع هو اللي مقووكي في الموضوع ده
روان
ماما هو انتي ام مين فينا انا ولا هو؟
ليلي بخبث
هو ده سؤال برضو اكيد امه هو، كملي نووم يا مرات عبدالله بيه..
_قالت ليلي كلامها وطلعت وهي بتضحك وروان بصتلها بغيظ وقالت..
روان
والله حتي لو عملتو ايه برضو مش راجعه..
ــــــــــ #بقلم_الكاتبه_رحاب_القاضي ــــــــ
_وفي الجامعه بتاعت زين دخلت يارا هي وياسمين هناك، وكانت ياسمين مبسووطه جدا وقالت..
ياسمين
احنا كلها سنه وهنبقي بندرس هنا..
يارا
اكيد مش هندخل جامعه حكومي يعني، وبعدين انتي مش قولتي مش هتدخلي طب..
ياسمين
يارا سؤال بس هو انتي هتدخلي طب عشان باباكي عايزك تبقي دكتوره ولا عشان زين اللي احنا جايين عشاانه بيدرس طب..
يارا
اكيد طبعا عشاان زين، وبعدين بابا اصلا مش هيخليني اشتغل هو عايزني دكتوره بالاسم وبس انما انا هشتغل مع زين...
ياسمين
استني هو مش ده زين اللي هنااك ده، مين دي اللي واقفه معاه؟...
_بصت يارا للمكان اللي شاورتلها عليه ياسمين وشاافته واقف علي جنب مع بنت حلوه جدا وهما الاتنين بيضحكو، فاتملت عيونها دموع وقالت..
يارا
يلا نمشي..
ياسمين
يا بنتي استني يمكن واحده من قرايبه اللي قولتيلي عليهم
يارا
لا دي مش من قرايبه..
ياسمين
ما تبقيش عبيطه وتعالي نشووف هي مين دي، وبعدين احنا جايين لـ اسمهم ايه دول اللي قولتي انهم صحاابك
يارا
هنا وأسرار..
ياسمين
ايوه احنا جايين عندهم عشان تعرفيني عليهم..
يارا
طيب استني هكلم هنا تجيب اسرار ويجو هنا..
_وكلمت يارا هنا وكانت عيونها علي زين اللي مش واخد. باله منها وواقف بيتكلم بحماااس وابتسامه واسعه مع البنت اللي واقفه معاه، وبعدين اخدت ياسمين وعدت من قدامه وهو اول ما شافها استغرب وجودها في الجامعه وقال..
زين
ياراااا... يارااا استني..
ياسمين
بينادي عليكي انتي مش سامعه
يارا بغيظ
ايوه مش سامعه وانتي كمان مش سامعه
كتمت ياسمين ضحكتها وقالت
اللي تشوفيه..
وفجأه وقف زين قدامهم وقال
في ايه ده انا بجري وراكي معقوله مش سمعاني يعني
يارا
ايوه مش سمعاك في حاجه..
زين
ايه الطريقه دي يا يارا وبعدين ما قولتيش يعني انك جايه هنا عشان استنااكي
يارا بنبره غاضبه
واقولك ليه وتستناني ليه انا مش جايه عشاانك
زين
والله؟! اومال جايه عشان مين؟..
ياسمين بقلق
جايين لـ...
قاطعتها يارا وقالت بحده
ما يخصكش يا زين وما لكش حق تسألني اصلا..
زين بغيظ
لا ليا وبعدين مالك في ايه جايه متعصبه علية ليه، مالها يا ياسمين؟
يارا بعصبيه
في ايه مالي انا كويسه بس انت اللي بتدخل في اللي مالكش فيه مش فاهمه ليه..
بان علي ملامحه الحزن ورد عليها بجمود وقال
اولا انا ما تتكلميش معايا بالطريقه دي لاي سبب، وهو فعلا ماليش فيه انتي حره..
_قال كلامه وسابها ومشي وهي وقفت مدايقه، وقالت ياسيمين بحزن..
ياسمين
حرام عليكي زعلتيه وبعدين احنا ما نعرفش مين دي اللي هو واقف معاها..
يارا بدموع
باين اووي انهم صحاب، فاكرني عيله صغيره ومش فاهمه حاجه..
_وفجأه وقفت قدامهم البنت اللي كانت واقفه مع زين وقالت بهدوء...
_هاي يا حلوين انتو قرايب زين؟
بصتلها يارا بغيظ وياسمين قالت
ااا اايوه احنا قرايبه انا ياسمين ودي يارا..
ابتسمت البنت وقالت
اهلا وسهلا شكلكم مش من الجامعه مش كده؟
ياسمين
ايوه احنا لسه الثانويه وجايين لصحابنا هنا..
_ربنا معاكم وكويس وعرفتو تدخلو الامن اوقاو كتير بيبقي مصعب الدخول..
يارا بحده
ومين حضرتك. بقي وايه علاقتك بزين؟..
ابتسمت البنت وقالت
انا دكتوره نهي بدرس لزين هنا وابقي مرات خاله علي فكره..
_برقت يارا بصدمه وياسمين كتمت ضحكتها ونهي قالت بخبث وهي بتقرب من يارا..
نهي
طنطك فيروز ورتني صورك علي فكره وزين كان جاي يندهلك عشان نتعرف علي بعض، بس شكل الغيره بوظت الموضوع...
يارا بتوتر
ااا لا مش غيره خالص يعني اا انا بس مم بابا قالي ما اتكلمش معاه عشان ما فيش بينا حاجه رسمي لسه..
ضحكت نهي بهدوء وقالت
ههههههه ولا يهمك يا حبيبتي، علي العموم انا مكتبي هناااك لو احتاجتو حاجه وانتو هنا تعالو عندي علي طول..
ياسمين
ميرسي جدا لحضرتك...
مشيت نهي وياسمين فضلت تضحك ويارا قالت باحراج
شكلي كان وحش قدامها صح، وزين ياااربي اصالحه ازاي دلوقتي
ياسمين
هههههههههه مش قادره بس تعرفي كنتي شبه باباكي اووي وانتي بتتكلمي معاه حسيتك يونس الصاوي النسخه المصغره نفس غيرة باباكي..
يارا
بس يا رخمه وتعالي البنات هناااك اهمممم..
ــــــــــ #بقلم_الكاتبه_رحاب_القاضي ــــــــ
_وفي شركة يونس الصااااوي كان قااعد يونس وقداامه فتحي الجرجيري اللي كان حاطط رجل علي رجل وملامحه كلها غضب...
يونس
منور يا فتحي بيه..
فتحي بجمود
ابنك فين؟
يونس
ابني مين بالظبط هي ايه الحكايه؟...
فتحي
لا ده انا جاي النهارده في حكايات كتير، تحب ابدأ بالمصيبه اللي ابنك عملها ولا بنص اسهم شركتك اللي هتبقي بأسمي والا في خلال يومين تلاته الشركه دي هتعلن افلاسها..
يونس بعصبيه
انت ايه اللي بتقوله ده ما تتكلم دوغري، وايه علاقة ابني بالشغل والشركه ومصيبة ايه اللي عملها؟..
فتحي بهدوء
من فتره كده ابنك اتعرف علي بنتي بحجة انه عايز يخطبها مش كده؟
يونس
ايوه وما حصلش نصيب هو ده بقي اللي مزعلك؟
فتحي
انا اول واحد كنت رافض ان نيللي بنتي المتعلمه المثقفه بنت النااس تتجوز عيل صايع زي ابنك..
يونس بعصبيه
لا بقولك هتجيب سيرة ولادي بحاجه ما تعجبنيش مش هيفرق معايا برستيج ولا اي حد وانت عارفني كويس، اتكلم من غير غلط ماله ابني مزعلك في ايه؟
فتحي بحده
ابنك اعتدي علي بنتي يا يونس يا صاوي، وبنتي دلوقتي حامل وهو ولا كأنه عمل حاجه لا وكمان بيجهز عشااان يتجوز..
يونس بصدمه
يوسف ابني عمل كده انت متأكد من كلامك ده؟
فتحي
انا مش جاي ابلغك بالخبر ده واستني اشوف رد فعلك انت وهو، بس هي كلمه واحده ابنك يجي يصلح غلطته ويتجوز بنتي قدام النااس كلها من غير ما حد ياخد باله من حاجه، والا اقسم بالله احزنك عليه وعلي كل حاجه ملكك يا يونس يا صاااوي، انا اللي يجي علي بنتي امحيه من علي وش الدنيا..
يونس بجمود
اتكلم علي قدك ولو ليك حق هتاخده..
فتحي
ما انا بتكلم علي قدي، وعلي فكره الصفقه بتاعتك اللي انت كنت داخلها برأس مال شركتك كله انا اللي بقيت مستثمر معاك فيها....
اتصدم يونس من كلامه وفتحي قال بنبره واثقه
شوفت بقي اني بتكلم علي قدي..
_اتنهد يونس بنفاااذ صبر وكلم السكرتيره زطلب منها تبعتله يوسف، وفضل قااعد مصدوم من كل اللي سمعه من فتحي وبعد شويه دخل يوسف عندهم وقال..
يوسف
خير يا بابا في ايه؟
بصله فتحي بغضب وقال
انت بقي يووسف..
يوسف
تقريباً.. مين حضرتك؟
يونس
فتحي بيه الجرجيري..
فتحي
ابو نيللي اكيد عارفها..
يوسف بقلق
مش فااكر بصراحه نيللي مين..
قاام فتحي وقال بحده
انت هتستهبل يالا ده انا ادفنك هنا..
يونس
استني يا فتحي بيه يمكن في سوووء تفاااهم في الموضوع..
قعد فتحي ويونس قال بجديه
هو سؤال واحد وترد بصراحه، في حاجه حصلت بينك وبين نيللي ولا لا؟
يوسف بضيق
ايوه بس انا ما غصبتهاش علي حاجه..
فتحي
كداااب في اصل وشك..
يوسف
لا مش كداااب بنتك هي اللي فتحتلي بيتها ودخلتني عندها يبقي ده معناااه ايه..
فتحي بحده
انت كداااب انت اللي ضحكت عليها...
يونس
طيب اقعد يا يوسف عشان نشوووف حل يرضي الكل ونصلح بيه المشكله دي..
فتحي
الحل الوحيد اللي انا قولته وما فيش حل تاني غيره، الواد ده هيتجوزها ورجله فوق رقبته..
يوسف بسخريه
انت بتحلم لو بنتك اخر بنت علي وش الارض مش هتجوزها..
قام فتحي ومسكه من هدومه وقال
اتكلم كويس يا ولد انت وبلاش تخليني اقلب عليك ابوووك ده نفسه مش هيقدر يحميك مني..
قام يوونس وقال
اقعد يا فتحي بيه واللي انت عايزه احنا هنعمله..
_ساابه فتحي وقعد مكاانه تاني وحط رجل علي رجل، وقال بنبره واثقه..
فتحي
المفروض ان فرحك كمان اسبوع يتلغي تسيب البنت اللي انت هتتجوزها دي وفي خلال الاسبوع ده هيبقي فرحك علي بنتي..
وقاام وقف وقال
وانا بكره في انتظار مكالمه من ابووك يقولي فيها عايزين نيجي نتفق علي التفاصيل يا فتحي بيه وبلاش تكسبو عداوتي اكتر من كده..
_قال كلامه وما استنااااش يسمع ردهم ومشي، ويووسف قال بقلق..
يوسف
اكيد طبعا مش هنسمع كلامه..
يونس
بنته حامل يا روح امك..
اتصدم يوسف وقال
لا لا دي اكيد لعبه منهم عشان يدبس بنته فيا..
يونس
ليه ما كنتش اول واحد يقرب منها..
اتنهد يوسف وسكت ويونس قاله بحده
ييقي تخرس وتعمل زي ما هو قال، خطوبتك مع رضوي تفسخها بأي طريقه..
يوسف
انت بتقول ايه يا بابا ده انا ما صدقت اني هتجوز البنت اللي بحبها، انت كده بتدمرني يا بابا حل الموضوع بأي طريقه..
يونس
اللي هي ايه الطريقه في طفل في الموضوع، وفوووق كل ده ابوها ماسكني من ايدي اللي بتوجعني الصفقه اللي كنا داخلينها مع المستثمر الاجنبي بقي فتحي الجرجيري هو اللي شريكنا فيها وطبعا لو الصفقه دي اتلغت هخسر خساره كبيره عمري ما خسرتها في حياتي..
دخل عندهم يزن وقال
في ايه يا جماعه مالكم؟
يونس
مصيبه جديده من مصايب البيه اللي ما بتخلصش..
يوسف
انا مش هسيب رضوي يا بابا لو هنخسركل حاحه انا مش هسيبهة..
يونس
لا هتسيبها الا انا اللي هروح ابوووظلك الجوازه دي، وحاجه كمان موضوع نيللي ما يتقالش لحد انا هقول لامك وانا وانت واخوك وبس دي سمعة البنت اللي هتبقي مراتك وام ابنك ما حدش يعرف حاجه يا يوسف..
يوسف بعصبيه
انا مش هسيب رضوي يا بابا ما اقدرش اسيبها والله انت ازاي بتقول كده..
يزن
يسيبها ليه يا بابا ده فاضل علي فرحهم ايااام؟
يونس
عشاان البيه غلط مع بنت فتحي الجرجيري والبنت حامل منه وابوه قلب علينا وطبعا واحد زي فتحي الجرجيري انا في غني عن عداوته..
يزن
بس رضوي ذنبها ايه وبعدين احنا بينا نسب كبير انا وريناد ويزن ويارا في المستقبل..
يونس
انتو ايه البرود اللي انتو فيه ده، ما تبصو للموضوع اللي اكبر من كده، بقولك حامل منه بينهم طفل ذنبه ايه ده في غلطة ابوه وامه، اخوك غلط ويتحمل المسؤليه والكلام خلص تروح تقابل رضوي وتنهي الموضوع بتاعكم وتيجي تقولي عشااان نكلم فتحي ونشووف هنعمل ايه، واياااك يا يوسف حد يعرف بالموضوا بتاع نيللي ده خالص حتي رضوي ولا مراتك.يا يزن فاهمين..
يزن
هو ما فيش حل غير كده يا يوسف؟..
_اتملت عيووونه دموع وسابهم ومشي وهو متعصب جدا، واول ما ركب عربيته كلم نيللي بس ما ردتش عليه وقال لنفسه بعصبيه..
يوسف
مااشي يا نيللي وحياااة امك ماااشي..
ــــــــــ #بقلم_الكاتبه_رحاب_القاضي ــــــــ
_ وفي الوقت ده في بيت الاستاذ حسن كانو البنات كلهم قااعدين في اوضة رضوي اللي طلعت وهي لابسه فستان احمر طويل للاض من غير اكمام وكله بيلمع بشكل حلو جدا وقالت بحماس...
رضوي
ايه رئيكم..
ريناد
فظيع يا رضوي ولايق عليكي جدا...
هنا
هو حلو جدا عليكي بس مش مكشووف شويه من فوق..
روان
لا لا ده كده مقفول اصلا..
رضوي
لا هنا معاها حق وهيتظبط اصلا قبل ما البسه يوم الحنه بس كشكل حلو واللون..
روان
استنو ده صوت طارق بره غيريه بسرعه عشان لو شاافك بيه مش هخلينا نعمل حنه اصلا..
هنا
هي مش الحنه دي للستات وبس..
رضوي
لا طبعا هي هتبقي في الاول ستات وبس، ويوسف هيجي بعدين يقعد معايا شويه ونحتفل سوا..
ريناد
اطلعي يا هنا عند طارق شوفيه عايز ايه..
هنا
وانا مالي انتو اخواته واحده منكم تطلع
روان بخبث
بس انتي اللي هتبقي مراته ولازم تتعودي عليه عليه وعلي طلبااته
هنا
لما ابقي بقي وبلاش تتفقو عليا من دلوقتي..
رضوي
استنو انا هغير هدومي واطلع اشووفه
ريناد
يا بنتي هو اصلا جااي عشان هنا وكلنا عارفين كده
هنا اتوترت وقالت
بس يا ريناد ومش طالعه..
دخلت في الوقت ده روفان وقالت
هنا تعالي كلمي طارق عايزك..
ضحكو كلهم وهنا قالت
انا رايحه انام وبطلو رخامه بقي
روان
انتي عايزانا بقي تطلع واحده مننا عشان يسمعها كلمتين ما لهمش لازمه...
ريناد
خلاص يا هنا اطلعي شوفيه عايز ايه، وبعدين انا يزن شويه وجاي ياخدني انا وتيا وعايزه اقعد. معاكم شويه من غير مشاكل..
_قامت هنا ولبست حجابها وطلعت عند. طارق اللي كان بيتفرج علي التلفزيون وجنبيه روفان..
هنا
في ايه يا طارق...
طارق
طيب قولي تشرب ايه الاول اجيبلك حاجه تاكلها..
هنا
ما تقول طيب عايز ايه وانا اجيبلك..
طارق
مش عايز حاجه كنت بس جاي اقولك اني هاخد اذن من بابا وننزل انا وانتي نشتري الفستان بتاعك اللي هتحضري بيه فرح رضوي..
هنا
انا هشتري مع صحابي شكرا..
طارق
صحابك مين؟
هنا
أسرار ويارا وياسمين..
طارق
اممم طيب هاخدك معايا نشتري البدله بتاعتي
هنا بقلق
انت مصمم ليه تاخدني معاك
طارق
بلاش دماغك تروح في حته وحشه، عايز ننزل مع بعض شويه يا هنا لوحدنا انا مش عارف اتكلم معاكي اصلا ولا اشووفك كويس والاسم ساكنين في نفس البيت..
طلعت ليلي من اوضتها وقالت
مين البغل اللي بيزعق هنا ده..
ضحكت هنا هي وروفان وطارق قال بغيظ
انااا يا ستي البغل اللي بزعق...
قعدت ليلي جنبيه وقالت
لا يا حبيبي بعد الشر عليك، بتزعق ليه وهنا يتزعق فيها برضو..
هنا قعدت قدامهم وقالت
قوليلو هو اصلا مش. معاه حاجه غير انه يزعق فيا
طارق
عشان انتي بتستفزيني..
ليلي
ما تفهموني في ايه طيب..
طارق
عايز اخدها ونخرج شويه مع بعض، الهانم مش واثقه فيا وديما بتتهرب ده انا ما صدقت اني هقنع بابا خلاص..
هنا
مش مسألة ثقه وما تقولش كده انا مش عايزه اخرج..
طلعت ريناد من جوه وقالت
في ايه مالكم..
طارق بضيق
مافيش حاجه وبراحتك يا هنا اللي عايزااه اعمليه..
مشي طارق وقال
ولسه انتو شوفتو حاجه مش فرح رضوي البومه قرب..
ليلي بحده
عارفه لو قولتي علي اختك كده تاني انا هاكلك يا قليلة الادب..
ريناد
خلاص يا ماما ما تقصدش..
هنا
انا داخله انام..
ودخلت هنا اوضتها وليلي قالت بضيق
نكدت عليه وداخله تنام
روفان
طارق يستاهل هنا مش غلطانه
ليلي بحده
يا بت اسكتي ما حدش طلب رئيك اصلا..
ريناد
في ايه ماما هتعملي عليها شغل الحموات من دلوقتي...
ليلي
جرا ايه يا ريناد ما انا اهو بعاملها زيكم واحسن، بس صعبان عليا اخوكي مش خاطب هو ومن حقه يتدلع ويفرح في اياام خطوبته وهي علي طول مصدراله الوش الخشب وابوكي واخد صفها..
ريناد
فاهمه قصدك يا ماما بس سبيهم براحتهم، طارق غلط في حقها كتير وهي وافقت بيه عشاان خاطرك انتي لو تفتكري، فسبيهم يتعاملو مع بعض براحتهم من غير ما حد فينا يتدخل بينهم لان دي حياتهم هما الاتنين بس، وفترة الخطوبه دي هتخليهم يشوفو هنا هيقدرو يتفاهمو مع بعض ولا لا فهماني..
ليلي
فهماكي انا اصلا ما بحبش اتدخل بينهم، بس ما تنكدش علي ابني ده الحيله..
ريناد بسخريه
الله يعينك يا هنا يا حبيبتي..
وطلعت في الوقت ده رضوي من اوضتها وقالت
ماما انا رايحه ليوووسف هختار فستان الفرح كمان..
ليلي
لا فاال وحش العريس يشووفك بيه قبل الفرح..
ريناد
بس والنبي يا ماما، الكلام ده حرام اصلا..
ليلي
طيب ما تتأخريش يا رضوي مش ناقصه انا كلام من ابوكي واخوكي..
رضوي
حااااضر يلا باااي..
_مشيت رضوي وريناد راحت جهزت حاجتها وهي مستنيه يزن يجي، والباب خبط بعد شويه وهي افتكرته يزن فراحت فتحته وهي مبتسمه، بس فجأه ابتسامتها اختفت اول ما شافت قدامها سيف اللي قال..
سيف
في ايه يا ريناد شوفتي عفريت..
ريناد
لا طبعا بس خير في حاجه؟
سيف
كلمت خالي عز عشان يجيبلي تيا ما ردش عليا قولت اجي اخد بنتي بنفسي..
ريناد
لو عايز تاخدها من اول اليوم تقعد معاك كام ساعه ما فيش مشكله، لكن بنتي مش هتباات بعيد عني يا سيف..
سيف
يا سلام علي اساس انك مش متجوزه وسيباها عند امك؟
ريناد بتوتر
انا حره وبعدين يا سيف خلي الامور بينا تبقي كويسه بدل ما اقولك ارفع قضية رؤيه وشوفها عن طريق المحكمه..
سيف بنبره غاضبه
هدخل اطمن عليها وامشي ممكن...
ريناد. بضيق
اتفضل..
_دخل سيف وجه طارق قعد. معاه والاتنين ما بيتكلموش مع بعض، وبعد شويه جه يزن واول ما فتحتله ريناد الباب قالتله..
ريناد
مش هينفع اجي معاك النهارده معلش
يزن
ليه في حاجه ولا ايه؟
ريناد
سيف جوه جه يشووف تيا ومش هينفع اخدها قداامه وامشي..
يزن
يا سلام فانا امشي واسيبك قااعده معاه..
ريناد
ايه قااعده معاه دي طارق جوه قااعد. معاه وانا قااعده مع روان وهنا جوه..
يزن
ادخلي هاتي حاجتك وتعالي وتيا تبات مع جدتها النهارده
ريناد
بكره يا يزن خلاص..
يزن بضيق
اصلا المفروض ما كانش يدخل هنا ولو دخل انتي تمشي عشان انتي عارفه اني بداايق لو كلمك. مش يشوفك ويقعد. معاكي...
ريناد
طيب وطي صوتك وتعالي نقعد في شقة عمي لحد ما هو يمشي ونااخد تيا معانا..
يزن
والله... ادخلي يا ريناد هاتي حاجتك يلا مش هقول تاني..
ريناد بضيق
ماااشي يا يزن دقيقه واحده، هتدخل ولا هتستناني تحت؟..
يزن بجمود
هستنااكي هنا اخلصي يلاااا...
_ ودخلت فعلا ريناد اخدت حاجتها ومشيت من غير ما تيا تشوفها عشان ما تعيطش عليها، وهي في العربيه جنبه فضلت تعيط...
يزن
ما حصلش حاجه يا ريناد عشان تعيطي علي فكره..
ريناد
انت مش هتفهم احساسي يا يزن.، تيا اول ما سيف هيمشي ومش هتلاقيني موجوده هتفضل تعيط لحد. ما تنام انا هبقي مبسووطه كده يعني ازاي؟..
يزن
بكره الصبح هجيبهالك بنفسي، بس وجودك. لو لدقيقه واحده مع الشخص ده. مش هيكون مريحني وهيزعلني يا ريناد..
ريناد
ريناد تعبت بجد الموضوع بيتعقد مش بيتحل..
_بصلها يزن بضيق وسكت ما ردش عليها...
ــــــــــ #بقلم_الكاتبه_رحاب_القاضي ــــــــ
_وفي بيت كمال كان قااعد. بيفرج علي التلفزيون وقاعدين قداامه أسرار ورضوي بنته بيذاااكرو، وهو كل شويه يبص لأسرار بضيق وهي متجهلااه جدا، وبعدين مسكت موبيلها وفضلت تقلب فيه وهي بتبتسم فقاام قرب منها وقال..
كمال
بتكلمي مين؟
أسرار
بكلم. صحابي هكون بكلم مين؟
كمال
صحابك دول اللي هما مين يعني؟
أسرار
صحابي يا كمال مش لازم تعرفهم هو انا يعني اعرف صحاابك ولا بتخرج مع مين وبتقابل مين؟
كمال بخبث
ما انتي ما بتسأليش وما بتهتميش بيا اصلا عشان احكيلك..
أسرار ببرود
وانت كمان ما تهتمش وما تسألش بسيطه اهي..
كمال بحده
بتتنيلي تكلمي مين؟
أسرار
هنا ويارا وياسمين حاجه تاني تحب تاخد الموبيل عشان تتأكد..
كمال
رضوي خلصتي مذااكره؟
رضوي
ايوه..
كمال
طيب يلا ياحبيبتي ادخلي ناامي..
بصت رضوي لاسرار وكمال قال
هتنامي لوحدك. يا حبيبتي أسرار هتنام في اوضتها النهارده..
رضوي
حاضر تصبحو علي خير....
دخلت رضوي اوضتها وكمال قال
يلا بقي احنا كمان ننام..
أسرار بضيق
بص انا ما رضيتش اتكلم قدام بنتك بس احنا اتكلمنا وقفلنا الموضوع ده..
كمال بحده
موضوع ايه اللي اتقفل، اقسم بالله يا أسرار هي كلمه واحده يا تسمعي الكلام ونتصالح دلوقتي يا هكلم امي واقولها ان الهانم بتحرمني من حقوقي الزوجيه واتحملي بقي اللي هتقولو ليكي..
أسرار بضيق
هو بالعافيه انا مش عايزااك..
كمال
متأكده؟
أسرار
ايوه...
كمال
يبقي ما تزعليش لما اعمل اللي عايزه بره وشيلي انتي الذنب..
_ما ردتش عليه وراااحت دخلت اوضة رضوي وقفلت الباب في وشه...
ــــــــــ #بقلم_الكاتبه_رحاب_القاضي ــــــــ
ـ وقدام اتيليه كبير لفساتين الافرااح كانت واقفه رضوي قدام عربيتها ووصل يوسف في الوقت ده، واول ما شافته راحتله بسرعه واخدته من ايده ودخلو الاتيليه.. وقالت بسعاده وحماس وهي ماسكه ايده بأديها الاتنين..
رضوي
كل التصميمات اللي هنا بتاعت مامتك، انا انبهرت بموهبتها بجد ومحتاره اختار ايه شايف ده لسه جديد ما فيش ولا واحده لبسته بس دايق شويه ومش هبقي مرتاحه فيه..
بصلها يوسف بحزن وقال
كنت عايز اتكلم معاكي في حاجه مهمه..
رضوي
ما فيش اهم من فستان فرحي لو سمحت بقالي تلاتين سنه بحلم باللحظه دي، اختار الفستان الاول وبعدين نبقي نتكلم..
يوسف بجمود
ما فيش فرح يا رضوي..
رضوي بقلق
ازاي يعني ما فيش فرح حد مات ولا ايه؟
اتنهد بحزن ورد عليها وقال
ما فيش فرح عشان انا مش عايز اتجوزك
ضربته علي كتفه وقالت بسخريه
العب غيرها يا شاااطر قال مش عايز اتجوزك قال، وبطل هزار بقي وخلينا نختار سوا بيقولو فال وحش العريس يشوف العروسه بفستان الفرح بس انا هلبسه واخليك تشووفه عليا الاول قبل اي حد..
يوسف بضيق
يا رضوي انا بهزرش انا مش هتجوزك..
رضوي بتوتر ابتسمت وقالت
هو ايه اللي انت بتقوله ده يا يوسف، والله بجد هزعل منك بلاش هزار في الموضوع ده وحاي تقول كده وانا بختار فستان فرحي.
يوسف بدموع
انا اسف بس دي الحقيقه انا طلبت اقابلك عشان اقولك ان انا مش عايز اتجوزك
رضوي بحده
هو ايه اللي مش عايز تتجوز ده احنا رتبنا كل حاحه فاضل اياام علي فرحنا، بلاش انا وانت اهلي يا يوسف اخواتي وماما وانا برضو انا ازاي هتسيبني يعني مش هينفع..
يوسف
عادي هينفع انا فكرت كويس ولقيت ان الجواز ده مسؤليه كبيره عليا وانا مش جاهز ليها دلوقتي
رضوي
طيب ناجل شويه مع انه صعب انا اخواتي اختارو الفساتين وجهزنا كل حاجه واشتريت فستان الحنه واديني اهو بختار فستان الفرح والعفش كله بكره هيبقي في بيتك، احنا كده هنبووظ كل حاجه..
يوسف
يا رضوي افهمي مش هناجل حاجه انا بقتش عايز الموضوع كله، ما بقتش عايزك خلاص في واحده تاني في حياتي هتجوزها علي اخر الاسبوع، انا اسف اني بقولك كده بس... بس دي الحقيقه
نزلت دموعها وقالت بصدمه
ليه كيب مدام هتتجوز واحده غيري ليه خكبتني انا ووصلنا لحد هنا، عشمتني وعشمت اهلي بيك ليه وانت مش قد كلامك وبتحب واحده تانيه، اااه نسيت ما انت متعود تعمل كده بس انا اللي غبيه عشان فكرت انك بتحبني بجد..
يوسف بدموع
معاكي حق في اي حاجه هتقوليها..
جه يمشي بس هي مسكت ايده وقالت
هتمشي ازاي يعني مش هتصالحني وتقول انك مش هتسيبني، يا يوسف انا عملتلك ايه عشان تعمل فيا كده انت فاهم يعني ايه هتسيبني دلوقتي فاهم الناااس هتقول عليا ايه هيرجعو يقولو عليا بايره ونحس حرام عليك بجد. والله حرام عليك..
_ سحب ايده من ايدها وسابها ومشي واول ما طلع من المحل دموعه نزلت بحزن وركب عربيته ومشي بسرعه من المكان كله
ــــــــــ #بقلم_الكاتبه_رحاب_القاضي ــــــــ
_وفي الوقت ده كان عبدالله راااجع من القاهره وقبل ما يدخل بلدهم وقف في كمين واتفاجئ ان شعبان ابن خلف واقف جنب الظابط واول ما وقف بعربيته قدامهم قال للظابط بهدوء..
عبدالله
خير يا علاء باشا في حاجه في البلد ولا ايه؟
علاء
ما فيش حاجه يا عبدالله بيه بس جالنا بلاغ ان في حد بيدخل مخد*رات البلد وعندنا اوامر نفتش اللي داخل واللي طالع..
عبدالله نزل من العربيه وقال
حقكم طبعا بس اكيد ده بلاغ كاذب انا هنا الكبير بتاع البلد والحاجات دي بطلت من زمان وانا كنت متعاون معاكم في الموضوع ده
علاء
طبعا يا عبدالله بيه، بس للاسف الاوامر جاييه ان الكل لازم يتفتش...
شعبان بخبث
وانت خايف من ايه يا عبدالله ما كلنا اتفتشنا
عبدالله بضيق
هو الواد ده بيعمل ايه هنا يا علاء باشا
قبل ما يرد. علاء شعبان قال بخبث
الله ما احنا برضو كبار البلد وقولت لازم نعملو الواجب مع الباشا ورجالة الشرطه اللي جايه تنضف بلدنا من الفسااد
علاء
اسكت يا شعبان وواجبك وصل يا سيدي، بعد اذنك يو عبدالله بيه بس احنا لازم نفتش العربيه..
عبدالله
ولا يهمك اتفضل..
_ووقف عبدالله علي جنب وكان قلقاان من نظرات شعبان الشمتانه فيه، وفجأه طلع العسكري من شنطة العربيه كيس كبير فيه هروين وحطه قداام الظابط اللي بص لعبدالله بحزن وعبدالله قال بعدم تصديق..
عبدالله
الحاجات دي مش بتاعتي والله..
شعبان
اومال بتاعت مين بتستغل معارفك ونفوءك ان ما حدش بيفتشك في الطريق عشان تدمر البلد بالقرف ده وعامل فيها كبير، بس ربنا وقعك في شر اعمالك الكمين دي توصلك لحبل المشنقه علي طول الله يرحمك يا كبير..
علاء بحده
اخرس يالا بدل ما اقبض عليك..
وبص للعساكر وشاور علي عبدالله وقال
اقبضو عليه وحطوه في البوكس يلا...
_تفتكرو بقي ايه اللي هيحصل لعبدالله؟
ــــــــــــــــــــــــــــــــــــــــــــــــــــــــــــــــــــــ
#بقلم_الكاتبه_رحاب_القاضي
