رواية موضوع عائلي الفصل السادس والثلاثون 36 الجزء الثالث بقلم رحاب القاضي

 رواية موضوع عائلي الفصل السادس والثلاثون 36 الجزء الثالث بقلم رحاب القاضي

#موضوع_عائلي 

"بيت الهنا" 

_الحلقه الـ36

ــــــــــــــــــــــــــــــــــــــــــــــــــــــــــــــــــــــــــــــ

‏ما خانك الأمين..

ولكنك ائتمنت الخائن!

ـــــــــــــــــــــــــــــــــــــــــــ

_خرجت ريناد من شقة عزالدين واتفاجئت لما شافت يزن طالع علي السلم وهو ماسك الفون وقالها.. 

يزن 

انتي فين بقالي ساعه واقف تحت وبكلمك ما بترديش.. 

ريناد بتوتر

الفوه جوه.. 

يزن

هو عمك رجع من الصعيد؟ 

ريناد 

لا ده زين جوه 

يزن 

وانتي بتعملي ايه جوه عند زين؟ 

ريناد 

ايه طريقة كلامك دي الباب مفتوح اصلا

يزن 

مالها طريقة كلامي انا بسألك عادي كنتي عند زين بتعملي ايه؟ 

ريناد بتوتر وقلق

اكل... كك كنت بوديله اكل عشان قااعد لوحده، يلا نمشي طيب عشان انا عايزه اروح معاك.. 

يزن 

طيب مش هناخد تيا معانا؟.. 

ريناد 

هخلي زين يجيبها ورايا عشان عمتي لمياء جوه وهي قاعده معاها يلا بينا.. 

يزن بجمود

في ايه يا ريناد اهدي وبعدين هنمشي كده من غير ما تجيبي حاجتك ولا حتي الموبيل بتاعك.. 

وقبل ما ترد عليه قال سيف من جوه 

ريناد لو لسه واقفه عندك تعالي ثواني عايزك.. 

غمضت عينيها بخوف ويزن قال بغيظ 

ايه ده بقي؟ 

ريناد 

هو مش قاعد عندنا قاعد اهو في شقة عمي مع زين.. 

يزن بنبره غاضبه 

وانتي كنتي عنده جوه وكسرتي كلامي.. 

طلع سيف في الوقت ده وهو شايل بنته وقال

انت بتزعق كده ليه، صوتك ما يعلاش هنا يا استاذ انت، وانتي انا مش بنده عليكي مش سامعه يعني

_بصت ريناد ليزن بخووف وقبل ما ترد عليه كان ذقها علي جنب لعنف وقرب من سيف وقاله بنبره غاضبه... 

يزن 

انت بتكلمها كده ازاي؟ 

سيف

دي ام بنتي وبنت خالي اتكلم معاها بالطريقه اللي تعجبني انت مالك.. 

مسكه يزن من هدومه وقال بحده 

وقبل كل ده هي مراتي ولو وجهت ليها اي كلام تاني هدفنك يالاااا... 

ـ بدأت تيا تعيط وهي ماسكه في سيف وبتبص ليزن بخووف وقربت منهم ريناد واخدت بنتها وقالت بقلق.. 

ريناد

خلاص يا يزن عشاان خاطري بلاش فضاايح.. 

سيف 

هو مين اللي بيعمل الفضايح مش جوزك.. 

ضربه يزن علي كتفه جامد وقال

قولتلك ما تتكلمش معاها عينك ما تترفعش فيها اصلا.. 

طلع زين من جوه وقال بقلق

في ايه يا جمااعه واقفين كده ليه؟ 

ريناد 

معلش يا زين خد سيف جوه واحنا ماشيين دلوقتي.. 

سيف 

تمشي لوحدك تسيبي بنتي، انا بنتي مش هتقعد مع راجل غريب.. 

يزن 

ريناد سيبي تيا مع اخواتك ويلا بينا.. 

ريناد 

اسيبها ازاي في الحاله دي يا يزن وهي خايفه.. 

زين 

تعالي يا سيف نقعد جوه.. 

سيف

انا هبات هنا النهارده في شقة خالي عز وبنتي معايا تمام.. 

قال كلامه ودخل مع زين ويزن قال بنفااذ صبر 

هتيجي معايا ولا لا؟ 

ريناد بدموع 

طيب هي بتعيط دلوقتي وو.. 

يزن 

ابوها معاها واخواتك كمان انا عايز بقي اشوف دلوقتي هتسمعي كلامي ولا لا؟ 

ريناد بضيق

اخليها تبطل عيااط وهمشي معاك، تعالي استناني جوه.. 

يزن

قااعد في عربيتي تحت ما تتأخريش.. 

_قال كلامه ونزل وهي اخدت بنتها ودخلت جوه علي طول وقالت لـ لمياء بحده.. 

ريناد 

هو ابنك عايز مني ايه ما يسيبني انا وبنتي في حالنا... 

لمياء

حصل ايه بس ماله سيف عمل ايه؟ 

رضوي

في ايه يا رضوي هو انتو اللي كنتو بتزعقو بره؟ 

ريناد 

لا ده سيف ويزن وسبحان اللي خلي الموضوع يتلم من غير ما تحصل مشكله كبيره، انا هدخل انيم تيا جوه يا رضوي عندك خليها معاكي النهارده.. 

رضوي 

مااشي حااضر... 

_ودخلت ريناد ونيمت تيا علي السرير وخلتها تبطل عيااط وبصتلها بحزن وندم وقالت... 

ريناد 

يحصل اللي يحصل يا قلب ماما انا بعد كده مش هبعد عنك تاني.. 

دخلت هنا وقالت بهدوء

خدي يا ريناد زين عايزك؟ 

ريناد 

ماشي.. وهتعبك يا هنا معلش شوفيلي موبيلي فين عشان نازله علي طول.. 

هنا 

حاضر هو كان مع روز بتلعب بيه هجيبهولك منها.. 

وخرجت هنا وريناد ردت علي زين وقالت

ايوه يا زين في حاجه؟ 

زين 

لا ما تقلقيش بس سيف ماشي مش هيبات هنا عشان ماما جايه تقعد معايا، بس اول ما يمشي انا هجيبلك تيا لحد عندك ما تخافيش.. 

ريناد 

معلش يا زين هتعبك.. 

زين 

لا تعب ولا حاجه ولما يرجع بابا هنتكلم مع سيف عشان بعد كده يسيبها تقعد معاكي في بيت جوزك.. 

ريناد

ان شاء الله... 

_وقفلت معاه ونزلت لقيت يزن واقف جنب عربيته مستنيها وملامحه كلها غضب وعصبيه، ما اتكلمتش معاه وركبت العربيه علي طول وهو رااح ركب جنبيها وقال بجمود.. 

يزن 

كمان انتي اللي زعلانه، لينا بيت نتكلم فيه يا ريناد.. 

_واخد عربيته ومشي وكل واحد فيهم بقي شايل من التاني كتير... 

ــــــــــ #بقلم_الكاتبه_رحاب_القاضي ــــــــ

_ وبعد شويه في بيت الاستااذ حسن كان طارق ناايم في اوضته وزين قااعد جنبيه وقاله.. 

زين 

يعني اتضربت انت وكمال بالناار وكان ممكن تموتو فيها وخطفو أسرار يا عيني وبرضو ما حدش قبض علي الراجل ده هو وزير الدخليه.. 

طارق

عارف احنا لو فيران تجارب ما كانوش هيتساهلو في حقنا كده، بس في راجل كبير في الصعيد ليه كلمه مسموعه اهل البلد كلهم بيخافو منه وعاملين ليه الف حسااب خلف بقي شغال معاه وفي حمايته فكل الشهود علي الحادثه قالو ان واحد. من الحرااس هو اللي عمل كده وهرب.. 

زين

والحكومه صدقت؟!.. 

طارق

الحكومه ليها الادله والشهود، بس يطلع عبدالله هو هيجيبلي حقي 

ابتسم زين وقال

طيب وكمال ايه حالته وصلت لايه؟ 

طارق

ربنا ينجيه منها علي خير.. 

زين 

يارب ان شاء الله يقوم بالسلامه، هسيبك ترتاح واجيلك بكره.. 

طارق

ماشي واقفل النور ده وانت خارج.. 

_سمع زين كلامه وخرج من عنده وكان حسن قااعد مداايق وليلي شايله تيا بتنيم فيها وقالتله.. 

ليلي

هو طارق نام ولا ايه؟ 

زين

ايوه بكره هجيله بعد الجامعه اقعد معاه.. 

ليلي

طيب كان ياكل حاجه قبل ما ينام

حسن بغيظ

اكلتيه نص فرخه وشرب علبة عصير بحالها هيااكل ايه تاني يا ليلي 

ليلي

جرا ايه يا حسن الواد متصاااب.. 

زين 

طيب تصبحو علي خير بقي انا هرووح انام.. 

ليلي

ماااشي يا حبيبي وانت من اهل الخير.. 

مشي زين وليلي قالت لحسن بحده 

مالك ومال طارق.. 

حسن

يا ليلي انتي ما بتسمعيش كلامي ليه ما كان قعد. في شقة عمه 

ليلي

هو ده اللي مزعلك يعني، علي العموم خلاص طارق مش هينفع يقعد هنااك تاني عشان فيروز هتيجي تعيش مع جوزها وابنها هنا.. 

حسن 

هي فيروز هنا؟ 

ليلي

ايوه يا حسن نعمل ايه بقي نرمي الواد في الشارع.. 

حسن 

اخليه يجهز في شقته ويقعد فيها من لما يخف شويه

ليلي بجمود

هو ومراته انا ابني ما يقعدش لوحده.. 

حسن 

البت لسه بتدرس يا ليلي.. 

ليلي

وفيها ايه تكمل دراستها وهي متجوزه واهو نفرح بدل الغم ده اللي احنا فيه ده

حسن بغيظ

طيب نخلص الاول من الغم ده وبعدين نشووف هنجوزهم ولا لا، انا داخل انااام.. 

ليلي

خد تيا معاك وبالراحه لتصحي.. 

حسن

انتي مش هتنامي ولا ايه؟ 

ليلي

اما اروح انضف المطبخ اللي يضرب يقلب جوه ده، عارف بناتك دول اللي يعتمد عليهم يبقي اعتمد علي حيطه مايله.. 

حسن شال تيا وقال

بناتي ما فيش منهم احسن بنات في الدنيا عشان طالعين لامهم.. 

_ضحكت ليلي بهكوء  وهو اخد تيا ودخل ناام، وراحت هي تروق المطبخ.. 

ــــــــــ #بقلم_الكاتبه_رحاب_القاضي ــــــــ

_وفي بيت يونس الصااوي كانت شهد قااعده هي ويوسف مع بعض في الجنينه وقالها بضيق.. 

يوسف 

مش عارف اركز في حاجه فكرة ان رضوي دلوقتي موجوعه ومني انا مخليااني في حاله زي الزفت وهاين عليا اروح اكلمها واقولها كل حاجه انا ما سيبتهاش بمزاجي ومتأكد انها هتسامحني وتقف جنبي اخلص من الحوار ده وهقولها الحقيقه

شهد 

اللي بيغلط بيدفع نتيجة غلطه يا يوسف، وبعدين هو انت ازاي كنت ناوي تتجوز رضوي وانت منيل الدنيا مع نيللي مش المفروض تشوف البنت وصلت لايه حصلها ايه بعد اللي حصل بينكم ده 

يوسف 

انا لو كنت في وعيي ما كنتش هقربلها والله، هي غلطه وانا مش بسبب الغلطه دي هدمر حياتي واسيب رضوي.. 

شهد بحده 

هي دي غلطه عاديه دي مصيبه وذنب كبير، عارف انا يا ريت ما اتدخلت في عقاب ابووك ليك لما كنت بتغلط هو كان هيعرف يربيك انا السبب كنت بشوفك بتغلط واسكت واداري عليك قدام ابوك، والنتيجه اهي غلطت في حق نفسك وفي حق خطيبتك وفي حق البنت اللي مالهاش ذنب في حاجه غير انها كانت واثقه فيك ودخلتك بيتها وقبل كل ده انت عملت ذنب كبير ربنا هيعاقبك عليه دنيا واخره لو ما اتلمتش وتوبت.. 

يوسف بدموع 

انا مستعد اعمل اي حاجه بس الموضوع يخلص وارجع لرضوي انا مش عارف اعيش من غيرها بفكر فيها ديما وكل شويه اسرح وامسك الفون عشان اكلمها وارجع افتكر انه خلاص مش من حقي اكلمها ببقي هموت، رضوي هي اكبر حلم انا حلمت بيه وكنت خلاص قربت احققه وكل حاجه ماشيه تمام فجأه كل حاجه باظت وانتو كمان بتخربوها عليا اكتر.. 

شهد 

ما حدش خربها عليك انت اللي خربتها علي نفسك

يوسف بحده 

لا انتو السبب انتي وجوزك السبب في كل حاجه وحشه بتحصلي.. 

_قال كلامه بكل غضب وقسوه وسابها ومشي وراح اوضته، وشهد فضلت قااعده لوحدها مدايقه لحد ما شاافت يزن وريناد داخلين وهما متعصبين جدا فقالت بصوت عالي.. 

شهد 

يزن تعالي يا حبيبي عايزااك انت وريناد.. 

يزن بهدوء

تعالي نشووف ماما عايزه ايه 

ريناد بضيق

طيب.. 

وراحو هما الاتنين قعدو مع شهد اللي قالت

في ايه قالبين وشكم كده ليه انتو الاتنين؟.. 

يزن 

ما فيش حاجه يا ماما بس ريناد زعلانه عشان جوز اختها اللي مقبوض عليه. 

شهد 

ان شاء الله هيخرج منها علي خير وعمك يونس هيتصرف والموضوع هيتحل ما تقلقيش.. 

ريناد 

ان شاء الله يا طنط 

يزن 

خير يا ماما كنتي عايزانا في ايه؟ 

شهد 

بصو بقي انا مش عجبااني قعدة ريناد كده في البيت وقبل كده هي قالتلي نفسها تشتغل بس عايزه شغل كويس ومناسب مش كده يا ريناد؟.. 

ريناد 

ايوه يا طنط بس انا هلاقي فين شغل زي كده فقدت الامل خلاص.. 

شهد 

معايا انا هتدربي علي شغل العلاقات العامه وانا عايزاكي تبقي معروفه وتتعاملي مع النااس برضو اكتر من كده، الشغل ده مش هيبقي شغل وبس هيبقي كمان تجربه كويسه اووي هتستفاادي منها.. 

ريناد ابتسمت وقالت

بجد يا طنط انا مش عارفه اقولك ايه دي فرصه كويسه جدا وو.. 

يزن بجديه 

شغل ايه اللي عايزه تشتغاليه طيب كنتي اهتمي ببيتك وجوزك الاول بدل ما انتي بتيجي هنا زي الضيفه وبتحايل عليكي تيجي اصلا.. 

بصت ريناد للارض بأحراج وضيق وشهد قالت

يا ابني ما هو عشان الظرووف دلوقتي وانتو متفقين من الاول ولا ايه.. 

قامت ريناد وقالت بنبره غاضبه

قوليلو يا طنط بس واضح كده انه كان بيقول كلام وبس بيثبتني بيه ولما بقيت معاه خلاص امشي علي مزاجه واعمله اللي يريحه وطظ في اي حاجه تانيه مش ده اللي انت عايزه يا يزن.. 

قالت كلامها ومشيت وهو بصلها بحده وقال لمامته بضيق

انا اسف يا ماما معلش نكدنا عليكي بالمشاكل الهايفه بتاعتنا دي.. 

شهد 

لا ما فيش حاجه حصلت، بس رووح صالح مراتك وبعدين انت عارف وضعها من الاول وكنت موافق عليه ليه دلوقتي زعلان؟ 

يزن بهدوء

معاكي حق يا ماما وهرووح اصالحها دلوقتي ما تشتغليش بالك انتي تصبحي علي خير.. 

قام مشي وشهد قالت بحزن 

وانت من اهل الخير يا يزن، شكله كان معاك حق يا يونس في تفكيرك في كل حاجه.. 

_واول ما طلع يزن شقته كانت ريناد غيرت هدومها وقااعده ماسكه موبيلها فقالها هو بحده.. 

يزن 

بتكلمي مين؟ 

ريناد 

رضوي بطمن علي بنتي في مشكله كمان اني اطمن عليها؟ 

يزن بحده 

صوتك ما يعلاش تاني يا ريناد وقومي جهزيلي عشا لحد ما اخد شاور وافردي خلقتك دي.. 

ريناد 

انت ليك نفس تهزر.. 

قرب منها يزن وقال

ومين قالك اني بهزر انا عايز اتعشي وعايز مراتي تسمع كلامي وتبسطني مش تنكد عليا مش يبقي طلعان عيني في الشغل واجي كمان الاقي نكد ومشاكل هنا.. 

ريناد 

يعني قصدك اني انا نكديه، شكرا يا يزن هقوم اجهزلك تاكل.. 

_وسابته وقاامت دخلت المطبخ وهو بص لموبيلها اللي حطته علي الترابيزه ومسكه وفتحه ولقاها كانت فعلا بتكلم رضوي وفي الوقت ده هي جات ووقفت ورااه وقالت.. 

ريناد بصدمه

انت بتشك فيا يا يزن بتفتش موبيلي من ورايا؟! 

يزن بضيق

من عمايلك انا قولتلك ما تقابليش طليقك ده وما تتكلميش معاه ولو رااح عند اهلك وانتي هناك تيجي هنا بس ولا كأني قولت حاجه وما فيش كلمه قولتها اتسمعت.. 

ريناد بدموع 

فانت بقيت فااكر اني بكلمه من ورااك وبقابله، مع ان لو ده حصل عادي ده ابو بنتي وطبيعي يبقي في بيني وبينه كلام... 

يزن بحده 

وانا مش هسمحلك تتكلمي معاه ولو مش هتفهمي كلامي بالذووق هتفهميه غصب عنك، هبقي انا رقم واحد في حياتك يا ريناد ومن النهارده ما فيش حاجه اسمها هتروحي عند اهلك غير واحنا مع بعض.. 

ريناد 

ازاي بقي وتيا احنا متفقين من الاول.. 

يزن 

انا عيل وبرجع في كلامي، تيا اهلا وسهلا بيها تيجي تقعد معاكي هنا في بيت جوزك قدامي.. 

ريناد 

ما هو سيف مش ااه.. 

قبل ما تخلص كلامها مسكها جامد من دراعها وقال 

ما تنطفيش اسمه قداامي، ما تستفزنيش يا ريناد.. 

اتملت عيونها دموع وقالت 

هو مش هيسكت لو هي جات وقعدت معايا هنا.. 

يزن 

يروح ياخدها من المحكمه وسيبي الموضوع ده انا هتصرف فيه وبنتك مش هتبعد عنك تمام كده.. 

قال كلامه وبعد عنها وهي ردت عليه وقالت

لا يا يزن انا مش هسمع كلامك في الموضوع ده، كله الا بنتي ومش هخاطر واخلي احتمال انها تتاخد مني يبقي اكيد.. 

يزن 

هتسمعي كلامي غصب عنك، بكره هجيبلك بنتك عندك وانا هتصرف في الباقي واعقلي يا ريناد احنا ما كملناااش كام شهر متجوزين والمشاكل ما بقتش تخلص بينا دي.. 

ريناد بحزن 

هروح اجهزلك العشا.. 

جات تمشي بس هو مسك ايها وقرب منها وقال

مش بتحمل اشووفك زعلانه بس انا بغير عليكي ودي حاجه مش هقدر اتحكم فيها وعمري ما هكون سبب ان بنتك تبعد عنك يا ريناد 

ريناد ببكاء

ابعد عني يا يزن لو سمحت دلوقتي.. 

يزن بخبث

لا مش هبعد غير لما تهدي وتبطلي عيااط.. 

ريناد 

ما انت السبب فيها.. 

يزن 

انا برضو السبب هو مين اللي ما سمعش الكلام خليني ساكت بدل ما اخبط دماغك دي في الحيطه... 

ريناد 

وهيهون عليك تعمل كده يا رخمم؟.. 

يزن 

لا طبعا.. بصي هدخل اغير هدومي واجي نجيب فيلم حلو ونتعشي سوا واحنا بنتفرج عليه ايه رئيك.. 

ريناد. 

انت عندك شغل الصبح باباك لو اتأخرت عشر دقايق هيعملها مشكله.. 

يزن

مالكيش دعوه بالحوار ده انا هتصرف مع ابويا والعيله كلها، وبعدين شغل ايه اللي اسيبك عشانه وانام بدري عبيط انا ولا ايه.. 

ابتسمت بهدوء وقالت 

طيب غير هدومك لحد ما اجهزلك العشا يا حبيبي.. 

ــــــــــ #بقلم_الكاتبه_رحاب_القاضي ــــــــ

_وعدي كام وفي الصعيد بالاخص في بيت القاضي كانت قااعده روان بتسرح لرضوي بنت كمال شعرها ودخلت عندها علياء وقالت بدموع وسعاده.. 

علياء

روااان كمال فااق عز كلمني وقالي انه فااق وحالته بقيت مستقره.. 

روان 

الحمد لله طيب نروحله.. 

علياء

هيجي عمك ياخدنا الاول، غيري هدومك انتي ورضوي وانا هرووح اغير هدومي عقبال ما ربنا يفك الكرب عن عبدالله هو كمان.. 

روان 

ان شاء الله يا عمتو المحامي طمنا وقال ان الموضوع ممكن يتحل.. 

علياء بدموع 

سمعتي عن اللي بيعملو خلف وابنه ورجالتهم، بيدخلو بيوت النااس الغلابه وظلم وافتري كأنهم بينتقمو من النااس عشان بيحبو عبدالله وزعلانين عليه 

روان بحزن 

ان شاء الله هيخرج وهيصلح كل حاجه وهترجع البلد احسن من الاول كمان.. 

رضوي بخوف 

وأسرار هترجع امتي يا تيته من عند الراجل الشرير؟!.. 

علياء

يقوم ابوكي بالسلامه وعمك يرجع وهيجبوها من عنده وهنرجع نعيش مرتاحين زي الاول، احسن خلاص الحزن تعبنا اووي وتعب قلوبنا.. 

_وفي بيت خلف كانت أسرار قااعده في اوضتها ودموعها علي وشها وقاعده قدامها فتحيه مرات خلف وقدامهم صنية اكل وقالت.... 

فتحيه 

ما تطفحي يا بت، كلي احسن تموتي وتتحسبي علينا نفر.. 

أسرار بدموع 

مش عايزه منكم حاجه.. 

دخل خلف عندهم وقال

روحي يا فتحيه انتي وانا هعرف اتعامل مع بت اختي.. 

فتحيه

اهي عندك يا اخويا انا مش عارفه لازمته ايه اصلا تجيبوها هنا.. 

قالت فتحيه كلامها وخرجت وخلف قعد قدام أسرار وقال

كلي يا أسرار ما تخافيش ما حطينش سم في الوكل 

أسرار بحده 

اكلكم وشربكم سم بالنسبالي حتي لو مش حاطين فيه سم 

خلف

راسك ناشفه زي ابوكي الله يرحمه واخوكي برضك، بصي يا بتي احنا ما كانش قصدنا نموتو اخوكي اللي كان مقصود عبدالله هو وقف قدام عبدالله وخد الطلقه مكانه يبقي هو اللي موت نفسه احنا مالناااش صالح.. 

أسرار 

عبدالله وعمر ما فيش فرق بينهم بالنسبالي، وبعدين ما انت ولدك ضرب جوزي بالناار قدامي 

خلف 

عشان تعقلي وترجعي الواد شعبان عاشقك من وانتي صغيره وهجوزك ليه وتعيشي في بيت خالك ويانا وانتي هانم بس تعقلي وتحطي عقلك في راسك 

أسرار بحده 

انا مراات كمال القاضي ومش هبقي غير مراته هو يا خلف 

خلف 

وه بقيتي قوويه وبتقولي اسمي حاف اكده، علي العموم الوكل قداامك تاكلي يبقي نجدتي نفسك ما كلتيش خليكي لحد ما تعفني وتموتي وورث امك هيتكتب بأسمي انا فاهمه ولا لاه.. 

أسرار بجمود

انا اسمي أسرار القاضي متربيه من ابويا واهل ابويا اني ما اتنازلش لحد يا خلف... 

خلف بعصبيه 

هنشووف يا بت القاضي.. 

_قال كلامه وسابها وطلع وهي بصت للاكل بضعف ومن شدة جوعها بدأت تاكل وكان شعباان واقف عند الباب وبصلها وابتسم وقال. 

شعبان

ما تخافيش من ابوي يا أسرار مش هيعملك حاجه انا مش هخلي حد يأذيكي يا مرتي المستقبليه... 

_لبست حجابها بسرعه وقامت قفلت الباب في وشه من غير ما ترد عليه، ورجعت كملت اكلها بكل هدوء

ــــــــــ #بقلم_الكاتبه_رحاب_القاضي ــــــــ

_وفي بيت الاستاذ حسن كانت قااعده ليلي في اوضة طااارق وقالتله بحده.. 

ليلي

وانا اعملها ازاي دي، انا كلمت ابوك انكم تتجوزو بسرعه انما في الاجازه الجايه صعب يا طارق ابوك وهنا مش هيوافقو

طارق

لو ابويا وافق هنا هتوافق، وبعدين ما احنا قاعدين في وش بعض فرقت في الجواز.. 

ليلي

يا حبيبي انت لسه قدامك المشروع بتاع الكافي بتاعك 

طارق

انا مظبط كل حاجه الكافي اشتغل وبقي زي الفل وبقي عندي دخل كويس خاص بيا، ولحد ما الاجازه تيجي هكون ظبطت شقتي كلها بالفرش كله ايه بقي اللي هيعطلني اتجوز.. 

خبطت هنا في الوقت ده وقالت 

الشااي يا ماما ليلي.. 

ليلي 

تعالي يا هنا يا حبيبتي.. 

دخلت هنا وطارق قال بسخريه

اهي الهانم من لما اتصابت لحد دلوقتي ما قالتليش حتي سلامتك 

هنا بتوتر

سلامتك يا طارق انا كنت كل ما اجي اطمن عليك الاقيك نايم وما ينفعش اجيلك اوضتك لوحدي.. 

ليلي 

بيهزر معاكي يا حبيبتي تعالي اقعدي عايزه اخد رئيك في حاجه.. 

_حطت هنا الصنيه قدام ليلي ومسكت كوباية عصير وقالت لطارق بهدوء.. 

هنا 

عملتلك عصير اهو عشان تعرف بس اني بهتم.. 

ابتسم بهدوء واخده منها وقال

شكرا تعبتي نفسك والله.. 

هنا بهدوء

تعبك راحه.. 

ليلي 

بصي يا هنا طارق كان بيقول انكم ممكن تتجوزو علي اجازة نص السنه هو هيبقي جهز كل حاجه انتي ايه رئيك؟ 

هنا 

وليه طيب الاستعجال ده ما نخليها في الاجازه الكبيره زي ما كنا متفقين، وبعدين وضع العيله نفسه مش احسن حاجه 

ليلي

ما لكيش دعوه بالعيله مشاااكل وهتتحل انتي موافقه ولا لا؟ 

طارق

اكيد موافقه هنأجل ليه مدام كل حاجه جهزت 

هنا 

يا طارق ما جاتش من كام شهر 

طارق

ما تقولي لنفسك ما جاتش من كام شهر.. 

هنا 

لا بالنسبالي جاات علي الكام شهر دول، اجازة نص السنه صغيره وو وانا بالنسبالي الدرااسه صعبه في صيدله عكس ما كنت فاااكره خالص، ده انا يعني كنت بفكر اتكلم معاك لما تخف عشان نأجل الجواز كله لبعد ما اخلص دراستي 

طارق بحده 

نعمم يا روح امك انتي عايزاني استني كل ده، اتكلمي انتي يا ماما عشاان لو قومت كسرت الاوضه علي دماغها ما حدش يلومني

هنا 

انت بتتعصب ليه احنا بنتكلم، وبعدين انت المفروض تقدر يعني اني في كليه كبيره ومحتاجه وقت ومجهود 

طارق 

مدام مش قدها كنتي دخلتي حاجه علي قدك 

هنا 

لا انا قدها بس مش قد اني اتجوز وابقي مسؤله عنك وعن بيتك وكمان عن المذاكره ويا سلام لو كمان خلفنا بسرعه وقتها انا عارفه اللي هيحصل انت هتقولي ما تكمليش دراسه خالص.. 

طارق 

انا مش هقول كده طبعا بس انتي اللي كلامك اتغير واتفاقك معايا اتغير، طبعا ما انتي شوفتي الجامعه والجو اللي هناك وعجبتك الصرمحه ومش عايزه جاجه تلمك.. 

اتملت عيونها دموع وسابتهم ومشيت وليلي قالتله بحده

حد يقول كده يا جاتك قطع لسااانك، انت لما بتغلط فيها يبقي بتغلط فينا كلنا وفي اخواتك البنات لانها متربيه معاهم.. 

طارق بغيظ

يعني مش شايفه كلامها يا ماما 

ليلي

انا شايفه انها ما قالتش حاجه غلط ده عين العقل اللي هي بتقوله، وبعدين هنا ظروفها مختلفه هي مش شايفه غير مستقبلها وبس عشان مالهااش حد غير شهادتها بعد كده هي اللي هتتسند عليها

طارق

وانا روحت فين مش هبقي جوزها وابو عيالها.. 

ليلي

ولما تتخانق معاها تزلها بقي انك بتصرف عليها وان مالهاش حد وتكسر عينها بأنها ما تقدرش تسيبك 

طارق

بقي انتي شايفه ان انا اعمل كده؟ 

ليلي

ما انت لسه متعصب عليها وقولتلها كلام ما يتقالش الله واعلم بعد كده ممكن تقولها ايه ولا تعمل فيها ايه، وانا وابوووك مش هنعيشلكم العمر كله يعني.. 

طارق

يعني مش هتقفي في صفي يا ماما.. 

ليلي

احنا مش في منافسه يا طارق ده جواز يعني يبقي بالاتفاق، ولو كنت الاول غصبتها توافق عليك لحد ما تصالحها دلوقتي بقي مش هغصب عليها تتجوزك وانا اول واحده هدعمها انها تكمل تعليمها الاول وبعدين تتجوز زي ما كنت بعمل مع اخواتك.البنات.. 

طارق بحده 

وانا مش هصبر وهتجوزها وهتشوفو وفي اقرب وقت كمان.. 

ليلي

لو بتحبها بجد سيبها براحتها حسسها انك ديما في ضهرها وبتدعمها وبطل تبص لنفسك يا طارق فكر فيها شويه شوف هي عايزه ايه طمنها حسسها انك خايف عليها وعايز مصلحتها مش عايز تتجوز وخلاص، اشرب العصير وارتاح وانا هروح اتكلم معاها واخليها تهدي قبل ما يجي ابوك ويشوفها زعلانه ويجي يكسر دماغك.. 

ــــــــــ #بقلم_الكاتبه_رحاب_القاضي ــــــــ

ـ وبعد كام يوم في بيت فتحي الجريري كان قعد يوسف جنب المأذون ومن الناحيه التانيه قاااعد فتحي وجنبيه نيللي اللي كانت لابسه فستان ابيض رقيق وهادي جداً، وعيلة الصاوي كلها موجوده وعيلة الجرجيري وبعض من المعازيم، وفتحي كانت ايده في ايد يووسف وبعد ما خلص كتب الكتااب والمأذون مشي وقف يوسف ونيللي جنب بعض وبدأت الناااس تباركلهم والاتنين كانت ملامحهم حزينه جداً، وعند ريناد ويزن قالتله ريناد بحزن. 

ريناد 

عارف الاول ما كانش يووسف صعبان عليا بس دلوقتي هو صعبان عليا اووي زي رضوي بالظبط.. 

يزن 

ريناد انا قولتلك الحقيقه بس هزعل لو اي حد حتي لو رضوي عرفت حاجه،نيللي بقيت مرات اخويا وسمعتها من سمعة العيله.. 

ريناد 

ما تقلقش اصلا موضوع يووسف ورضوي اتقفل خالص النهارده.. 

قربت منهم يارا وقالت 

انا كنت حاسه بابا هو اللي غصب يووسف انه يتجوز البنت دي، بصو زعلان ازاي.. 

يزن 

ما فيش الكلام ده يا يارا وبعدين البنت دي اسمها نيللي وبقيت مرات اخوكي يعني تتكلمي معاها كويس ويلا هنروح كلنا نتصور معاهم.. 

ريناد 

اعذرني يا يزن انا جيت ايوه عشان خاطرك بس انا مش هتصور عشان برضو اقدر مشااعر اختي، ومش هعرف امثل اني مبسووطه لاخوك اكتر من كده وانا عارفه ان دلوقتي اختي حالتها حاله.. 

يارا

وانا كمان مش هتصور مع حد انا قااعده مع ريناد.. 

ريناد 

تعالي نشوف حاجه ناكلها يا يارا.. 

يزن 

والله ده بدل ما تعقليها.. 

ريناد بخبث

يعني اختك مش عاقله

يارا

بقي يا يزن انا مش عاقله.. 

يزن 

بااس انتي وهي روحو شوفو هتعملو ايه.. 

ريناد 

تعالي يا يارا قوليلي ايه الحاجات اللي عاملينها دي، دول عاملين حشرات ولا ايه.. 

_ضحكت يارا بهدووء ورااحت هي وريناد وراحو ناحية البوفيه ويزن بصلهم وابتسم وهو مبسووط من علاقة ريناد مع اهله وان كلهم بقيو بيحبوها حتي يونس اللي كان رافض الجوازه اصلا، ورااح وقف جنب يووسف وقاله.. 

يزن 

افرد وشك شويه مش كده.. 

يوسف 

انا عايز اليوم ده يخلص بأي شكل، وكمان لو تقدر تخليهم ما ينزلوش اي صور علي السوشيال ميديا اعمل كده مش عايز رضوي تشوف حاجه من اليوم ده خالص.. 

يزن 

حماااك نشر كل حاجه اول بأول وحماتك كمان دي كانت طالعه لايف اثنااء كتب الكتتاااب مش عارف ايه النسب العره ده اصلا سوري يا يوسف بس هو عره فعلا شايف قرايبهم ولبسهم عامل ازاي دول كلهم لابسين بدل رقص مراتك الوحيده اللي محترمه فيهم.. 

يوسف 

يلعن مراتي علي اهلها انا مش طايق حد. فيهم ولا حتي انت غور من جنبي.. 

يزن 

اهدي طيب كلها عشر دقايق والنااس هتتعشي وهتمشي واليوم هيتلم، ابووك. حاجزلك في الاوتيل بتاعنا في القاهره عشان تاخد. راحتك.. 

اتنهد. يوسف بضيق وقال

امشي يا يزن من وشي والله ما نااقص.. 

_مشي يزن من جنبيه وهو بص لنيللي اللي كانت واقفه جنبيها ريم صاحبتها ومتجاهلااه تماماً، وبعد شويه اخدها معاه في عربيته وراحو الاوتيل وطول الطريق الاتنين سااكتين وما حدش قال للتاني ولا كلمه واول ما وصلو الاوتيل وطلعو اوضتهم، بصلها بجمود وقال.. 

يوسف 

عملتي اللي في دماغك وخلتيني اتجوزك مبروووك يا نيللي خربتي حياتي كلها حضرتك.. 

نيللي بسخريه 

وانا اللي حياتي بقيت منوره مثلا، لو انت حياتك اتخربت زي ما بتقول فانت دمرتني يا يوسف.. 

يوسف بحده 

انا ما اجبرتكيش علي حاجه عشاان انا بس اللي ادفع التمن.. 

نيللي بجمود 

دفعت التمن في ايه انك ما اتجوزتش البنت اللي بتحبها وبس، انا عارفه ان جوازنا ده مش هيستمر بس انت مجرد ما هنطلق هترجع لحياتك القديمه عادي انما انا بقي هيبقي معايا طفل ابوه مش موجود هرجع اواجه كل حاجه لوحدي من الاول هبقي مطلقه وشغلي اكيد هيتأثر عشان انا مش هقدر اشتغل واخد. بالي من ابني وهواجه كل الدنيا لوحدي عشان اعرف اعيش يبقي مين فينا اللي خسر، انا ايوه اليوم المهبب اللي جيتلي فيه سكت واستسلمت بس عشان كنت خايفه منك وخايفه من كلام الناس عليا وعشان انا اللي غلطت وسمحتلك تدخل عندي بس انا كنت واثقه فيك والله ما كنتش افتكر خالص انك ممكن تعمل فيا حاجه وحشه ما كنتش متخيله انك هتطلع هحيوان وحقير.. 

ـ اول ما خلصت كلامها ضربها بالقلم علي وشها، ومسكها من شعرها بقوه وقال بنبره غاضبه.. 

يوسف 

اقسم بالله لو غلطتي فيا تاني ما تعرفيش انا هعمل فيكي ايه، ومش خلتيني اتجوزك ولويتي دراعي انتي وابوكي والله يا نيللي لطول الفتره اللي احنا متجوزين فيها دي هخليكي تشووفي ايااام سودا وعمري ما هشوفك ولا هعتبرك مراتي انتي واحده رخيصه زي اي واحده قضيت معاها ليله قبل كده وسيبتها، الفرق بينك وبينهم الطفل اللي بينا وده برضو انا مش هسيبهولك ابني مش هيتربي مع واحده زيك.. 

_خلص كلامه وذقها جامد خلاها وقعت علي الارض وساب الاوضه والاوتيل كله ومشب وهي قاامت من علي الارض وقعدت علي الكنبه وحطت ايدها علي وشها وفضلت تعيط بحزن وانهيار ومن اهانته ليها سوااء بضربه او كلامه القاسي... 

ــــــــــ #بقلم_الكاتبه_رحاب_القاضي ــــــــ

_وبعد شويه عند رضوي كانت قااعده في البلكونه بتاعت بيتهم بعد ما اهلها كلهم نامو وهي ماسكه موبيلها وبتتفرج هلي صور فرح يوووسف وعيونها كلها دموع، وفجأه لقيت موبيلها بيرن برقم يوووسف، اتعدلت في قعدتها واستغربت انه بيكلمها في الوقت ده وما ردتش عليه بس هو فضل يرن عليها كتير وبعتلها رسالها كاتبلها فيها.. 

يوسف

"انا تحت بيتكم يا رضوي ردي عليا والا هطلعلك".. 

_قامت وقفت وشافته فعلا واقف بعربيته تحت بيتهم وبدأ يرن عليها تاني، فأتنهدت بضيق وتوتر وردت عليه وقالت.. 

رضوي

عايز ايه وايه اللي جابك عندي دلوقتي؟ 

يوسف بحزن

والله العظيم ما خونتك ولا حبيت واحده غيرك.. 

رضوي 

انت ايه اللي بتقوله ده.، انت كان فرحك النهارده اليوم ده كان متحدد لفرحي انا وانت عايز تفهمني ان كل ده مش ترتيبك انت عشان تكسرني.. 

يوسف 

صدفه والله اكيد. مش هعمل كده يا رضوي.. 

رضوي ببكاء

اومال سيبتني ليه من غير ما اعملك اي حاجه، وبعدين ايه اللي مخليك تيجي لحد هنا وتكلمني انت عايز تجنني مش كفايه اللي عملته فيا، منك لله بجد حسبي الله ونعم الوكيل فيك يا يوسف علي كل احساس وحش حسيت بيه بسببك... 

يوسف بدموع 

انا اسف بس والله مع الوقت كل حاجه هتتصلح انا مش هسيبك انتي ليوسف وبس يا رضةي والله ما هسيبك 

رضوي بحده 

بطل كدب بقي ولو عايز تعمل معايا حاجه كويسه ما تخلنيش لا اشوفك ولا اسمع صوتك تاني انت انتهيت بالنسبالي يا يوسف ولو انت اخر راجل علي وش الدنيا انا لا هسامحك ولا هرجعلك عشان انا صدقتك ووثقت فيك وحبيتك بجد وانت لعبت بيا وبمشاعري وعرفت تدمرني وتعيشني اصعب وجع في حياتي، ما تكلمنيش تاني والا مش هيحصل كويس وهفضحك قدام مراتك واهلك كلهم.. 

_قالت كلامها وقفلت في وشه ولسه هتطلع من البلكونه شافت حسن واقف قدامها وبيلصلها بحزن فقربت منه وهي بتعيط وحضنته وقالتله.. 

رضوي 

انا تعبت اووي يا بابا ومش قادره والله اتحمل كل اللي بيحصل ده.. 

حسن بدموع 

هتعدي ما فيش حاجه بتدوم يا بنتي، انتي قويه وهتقدري تعدي الفتره دي وترجعي احسن من الاول وانا معاكي ومش هسيبك ابدا.. 

وبعد عنها شويه وقال

تعالي اقعدي ومش عايز اعرف هو بيكلمك ليه عشان انتي قولتي كل حاجه انا كنت هقولها ليه لما اعرف انه كلمك بعد اللي عمله فيكي ده.. 

رضوي بدموع 

انا مش فاهمه هو ليه سابني مدام لسه بيحبني وليه ساب عروسته وجالي دلوقتي لحد هنا وبيكلمني.. 

حسن 

الله اعلم بس خلاص الولد ده صفحته تتقفل ونبدأ من جديد.. 

رضوي 

وانا لحد امتي هفضل اقفل في صفحات وابدأ من جديد، ما يمكن كلام النااس صح وانا اللي نحس وماليش جواز، عارف يا بابا اليوم اللي سابني فيه كنت مجهزه الفلوس اللي هشتري بيها فستان فرحي وكنت ناويه انا اللي اشتريه عشاان انا من زمان نفسي اشتري فستان فرح وبرغم اني دلوقتي اقدر اشتري عشر فساتين فرح بس ما اقدرش اشتريه وصعب اووي ان الواحد يشتري حاجه هو عارف انها مش مناسبه ليه ومش هيقدر يلبسها ولا يستخدمها الاحساس ده انا مش عارفه اتخطااه والمشكله الاكبر اني حبيته اكتر من اي حد. المره دي الوجع فوق طاقتي انا مش عارفه حتي اصبر نفسي 

حسن بهدء

تعالي احكيلك. حكايه لما بتضيق بيا الدنيا ديما بفتكرها، بعد وفاة السيدة خديجة وسيدنا أبو طالب، النبي ﷺ اتضايق جدًا من أذى قريش وقرر يروح الطائف يمكن أهلها يسمعوا كلامه ويؤمنوا بالله.

لكن لما وصل، ما لقيش منهم غير القسوة… ولما كلم سادة القوم رفضوا يسمعوا ليه، وسخروا منه، وحرّضوا الأولاد والعبيد يجروا وراه ويرموه بالحجارة، لحد ما رجليه اتجرحت والدم سال منها.

النبي ﷺ خرج حزين وقعد في بستان اسمه "نخلة" مِلك عتبة وشيبة ابني ربيعة، ورفع إيده لربنا وقال دعاءه المشهور:

"اللهم إني أشكو إليك ضعف قوتي، وقلة حيلتي، وهواني على الناس..."

وهنا ربنا عوضه بحاجات عظيمة اوووي يا رضوي وهي ان الجن سمعوا القرآن اللي النبي ﷺ كان بيقرأه، فآمنوا بيه،شوفتي ربنا اوحى  للنبي صلى الله عليه وسلم أن الجن امنوا به لما قرأ القرآن. 

بعدين ربنا عوضه بقصة  عدّاس اللي هي ايه بقي يا حبيبة بابا "عتبة وشيبة" اصحاب البستان اللي كان فيه النبي ﷺ رق قلبهم شوية وبعتوا غلامهم عدّاس بعنقود عنب للنبي ﷺ.

أول ما مسك النبي ﷺ العنب قال: "بسم الله".

استغرب عدّاس وقال

"والله إن هذا الكلام ما يقوله أهل هذه البلاد"

فسأله النبي ﷺ وقال

"ومن أي البلاد أنت يا عدّاس؟"

قال

 "من نينوى"

فقال النبي ﷺ

"من بلد الرجل الصالح يونس بن متى، أخي كان نبيًا وأنا نبي."

_ساعتها عدّاس اتأثر جدًا، وسجد على راس النبي ﷺ وقبّلها وآمن بيه واعلن اسلامه

الخلاصه يا رضوي اللي عايز أقوله ليكي أنه سعات الواحد بيروح مكان عشاان عايز حاجه معينه تروح  الحاجه دي اللي انتي هتموتي عليها تخذلك وتزول منك متلاقيش  الحاجه اللي انتي كنتي عايزاها وبتتمنيها ليل نهار وبتحلمي بيها ونفسك انها تحقق، يروح ربنا يفتحلك بيبان مكنتيش. متخيله أنها تتفتح بس هي اتفتحت عشان مريتي بالعصب وصبرتي عليه وما خلتيش الحزن ينسيكي حكمة وقضاء ربنا، عوض ربنا جميل بس مش شرط يكون زي ما احنا عايزين فهمتي كلامي.. 

ابتسمت رضوي بهدوء ومسحت دموعها وقالت

فهمت يا بابا ربنا يخليك وتهون عليا زي عادتك.. 

حسن 

ان شاء الله بعد كده مش ههون عليكي تاني هنقعد هنا وانتي مبسووطه وتحكيلي وقتها عن عوض ربنا ليكي وهتشوفي ان كلامي ده هيتحقق بس الصبر، يلا ادخلي نامي وما تفكريش في اي حاجه غير الكلام اللي انا قولتهولك ما تخليش الشيطان بتمكن منك ويخليكي حزينه. 

رضوي

حاضر يا بابا تصبح علي خير.. 

وقامت رضوي دخلت اوضتها وحسن بصلها بحزن وقال

ربنا يهون علي قلبك يا رضوي انتي واخواتك ويبعد عنكم ولاد الحرام.. 

ــــــــــ #بقلم_الكاتبه_رحاب_القاضي ــــــــ

_وتاني يوم في بيت القاضي نزلت روان من اوضتها وكان عز نايم علي الكنبه اللي في البيت تحت، فقربت منه بسرعه وقالت.. 

روان 

زيزو... عمي.. يا زيزو. 

عز

في اييه مين قتل مين؟ 

روان 

ما اعرفش.. انت ايه اللي منيمك هنا؟.. 

عز 

اومال بتصحيني ليه مدام ما فيش مصيبه منكم لله يا عيال اخواتي انا مالي بيكم ما تولعو في بعض بعد الشر.. 

ابتسمت روان وقالت

طيب خلاص قووم ناام فووق.. 

عز

لا خلاص خليهم يعملولي قهوه 

روان

انا هعملك حاضر

عز 

انتي من امتي بتعرفي تعملي قهوه، خلي حد من الشغالين؟ 

روان

ما هو ما مبقااش في شغالين يا زيزو خلف بيهدد اهل البلد اللي هيقرب من بيت القاضي هيقتله ده احنا حتي مش عارفين نشتري حاجه.. 

عز 

اومال بتاكلو وعايشين منين؟ 

روان 

الرجاله بتوع عبدالله بيجو هنا من غير ما حد يشوفهم وبيجبولنا كل حاجه.. 

عز بضيق

الراجل ده زودها اوووي.. 

روان 

حصل هو عبدالله هيطلع امتي ولا انت بتضحك علينا وهو مش هيطلع من السجن؟ 

عز 

لا ان شاء الله هيطلع هي الساعه كام دلوقتي؟ 

روان

عشره ونص.. 

عز 

يا نهار مش فايت طيب قووومي يلا اعمليلي قهوه لحد ما اطلع اخد دوش واغير هدومي معاد المحامي مع عبدالله ولازم ابقي موجود. 

روان 

هروح معاك انا عايزه اشووفه 

عز

مش هينفع البيت ليكي احسن والحرااس اللي جايبهم مامنين البيت، بره ما اضمنش خلف ممكن يعمل فيكي ايه وانتي بالنسبالهم مرات عدوهم 

روان 

مش هيعملو حاجه بس والنبي انا عايزه اشووف عبدالله.. 

عز بخبث

اممم مش هو ده اللي كنتي مش عايزااه ولو ما طلقكيش هتخلعيه بقي الحب الحب والعشق العشق دلوقتي.. 

اتكسفت وبصت في الارض وقالت 

طيب هتاخدني معاك ولا لا؟.. 

عز

اعمليلي القهوه واطلعي غيري هدومك وهاخدك معايا انا اقدر اقولك لا برضو.. 

روان بسعاده 

خمس دقايق وهكون جاهزه 

عز 

القهوه يا بت استني.. 

روان 

مش مهم عايزه الحق اجهز.. 

عز

طيب خلي عليااء تنزل تعملها.. 

روان

هي ورضوي ما جوش من عند. كمال من امبارح.. 

_قالت كلامها وطلعت اوضتها بسرعه عشان تغير هدومها وهو ابتسم بهدوء وقال.. 

عز 

كان لازم الواد بتحبس يعني عشان تحني عليه ده انتو صنف عايز الحرق.. 

ــــــــــ #بقلم_الكاتبه_رحاب_القاضي ــــــــ

_وفي المستشفي عند كمال كان نايم علي سريره الطبي ووشه باين عليه التعب والحزن وعلياء قالتله بخوف.. 

علياء

اسمع الكلام خالك هيااخدنا ونروح القااهره تكمل علاجك.. 

كمال بجمود

مش همشي من البلد دي غير وأسرار معايا..

علياء

ان شاء الله يطلع عبدالله ويتصرف

كمال بحده 

وانا هقعد مستني اخويا يرجعلي مراتي، والله لارجعها ولو كان التمن فيها روحي.. 

علياء بدموع

والله حرام عليكم اللي بتعملوه فيا ده، خلف عايز يقتلك هو وابنه ولو عرفو انك بقيت كويس مش هيسكتو وانت تعبان مش هتقدر تقف قدامهم، بص علي بنتك يا كمال دي لا عارفه تروح مدرسه ولا تعمل اي حاجه وعلي طول بقيت خايفه من وقت اللي حصل.. 

كمال

خديها وروحي انتي القاهره انا مش همشي وهرجع مراتي وهتشوفي يا امي وهاخد حقي من ابن خلف اللي كان هيموتني ده.. 

_اتنهدت علياااء بضيق وسكتت لما لقيت الكلام معاه بلا فايده وغضبه وعصبيته مسيطرين عليه، وكانت خايفه تسيبه وتمشي يعملوه فيه حاجه تاني.. 

ــــــــــ #بقلم_الكاتبه_رحاب_القاضي ــــــــ

_وفي  بيت يونس الصاااوي صحيت شهد علي صوت يونس وهو بيتكلم في الفون وبيزعق وبيقول.. 

يونس

اسمع يالا تروح تجيب مراتك وتيجي وتتلم يا يوسف.. 

شهد بقلق

في ايه يا يونس؟.. 

ما ردش عليها وقال ليوسف 

اخرس خالص مش معني اني لحد دلوقتي مش راضي اربيك علي الغلطه اللي عملتها دي وقولت راجل وصلح غلطته اني هسكتلك لو شوفتك بتيجي علي حق مراتك، انا عندي بنت واللي ما ارضهوش لبنتي ما ارضهوش لبنات النااس فتلم نفسك وتروح تصالحها وتجيبها وترجع علي البيت وعندك اجازه اسبوع ما اشوفكش قااعد بره البيت من غيرها فااهم ولا لا، اتنيل اقفل يلا واعمل اللي بقولك عليه.. 

قال كلامه وقفل في وش يوسف وشهد قالت 

في ايه مالو يوسف عمل ايه؟ 

يونس بضيق

البيه سايب مراته لوحدها بالليل وبايت في اليخت والله واعلم بايت لوحده ولا معاه حد. نفس الغلط بيتكرر.. 

شهد بحزن

ربنا يستر.. 

يونس 

ما دافعتيش عنه يعني ما لكيش عين مش كده؟ 

شهد 

انا مش طالبه معايا مشااكل من علي وش الصبح ولادك عندك اهو اعمل فيهم اللي انت عايزه انا مش هتدخل في حاجه تاني، بس بشويش علي يزن مش عشان طيب يعني هتيجي عليه وتطحنه في الشغل حراام عليك

يونس ابتسم وقال

يا وليه ده انتي لسه الكلمه ما نشفتش من علي لسااانك... 

شهد 

ما هما عيالي برضو ومش هقدر ما ادافعش عنهم بس انت سعات بتبقالك وجهة نظر صح.. 

يونس

انا ديما صح يا ماما، انتي رايحه فين؟ 

شهد 

هجهز. عشان. رايحه الشغل.. 

يونس

لا. خليكي النهارده لحد ما ابنك يجي هو ومرااته وانا مش رايح الشغل برضو تطمني علي ابنك ومراااته وترجعي هنا.. 

شهد. بحده 

لم نفسك يا يونس.. 

يونس بخبث 

لا لمي انتي نفسك بقي بدل ما ابص بره وترجعي تزعلي.. 

شهد بغيظ 

يونس كلها كام شهر وهتبقي جدو يا حبيبي.. 

يونس 

ما انا عارف وهيبقي حفيدي اسمه يووونس كمان.. 

شهد 

والله عمرك ما هتكبر ولا هتعقل.. 

غمزلها يونس بطريقته المعتاده وقال

ولا هبطل احبك يا قلب يونس.. 

ابتسمت بهدوء وقالت

هغير هدومي وانزل واخليهم يجهزو الفطار ونفطر كلنا سوا مع يوسف ونيللي واهي تتعرف علينا، قول ليزن ما يروحش الشغل بدري النهارده 

يونس

يزن في شغله من الساعه سبعه.. 

شهد 

اشمعنا يزن اللي بتعمل فيه كده. انت عمرك. روحت الشغل الساعه سبعه ما ترحم الواد شووويه... 

يونس

بعلمه الشغل بخليه يبقي عارف كل حاجه عشان لما اخدك ونطفش من البيت ده ابقي مكمن علي املاكي انها في ايد حد محافظ. عليها

شهد. بعدم فهم 

نطفش ليه هنروح فين؟ 

يونس 

نعيد الروايه من الاول من اول يوم شوفتك فيه للنهارده بس مش هناخد غير المواقف الحلوه وبس.. 

شهد 

ياريت كان ينفع... بس يا يونس هو انا ناااقصه كلامك ده والخيال بتاعك.. 

يونس

وحياة ولادي بس نفضي من الدوشه اللي احنا فيها دي وهنبدأ من جديد... 

ضحكت بسخريه وقالت 

هنبدأ من جديد علي كبر يا يونس؟ 

يونس

ومالو ما فيش مشكله.. 

شهد 

اما نشووف اوعي بقي متعطلنيش.. 

ــــــــــ #بقلم_الكاتبه_رحاب_القاضي ــــــــ

_وفي الصعيد في قسم الشرطه كانت قااعده روان وهي وعز الدين ومعاهم المحامي اللي كان عنده 40 سنه وشكله وسيم جدا وقااعد ماسك موبيله ومشغول فيه، فمالت روان علي عز وقالت... 

روان 

زيزو هو انت متأكد ان ده محامي يعني مش هربان من حواري تركيا اصله شبه بورااك اووي.. 

عز 

لا يا بت بوراك رموشه طويله وتحسيه اسمراني ده اشقر.. 

روان 

بس نفس الملامح وامور اووي.. 

عز 

ما تتلمي يا بت انتي بتجرجريني في الكلام التافه ده معاكي ليه.. 

أسلام

في حاجه يا عز بيه؟ 

عز 

لا لا يا متر مش عندك.. 

كتمت روان ضحكتها وعز قال بصوت واطي

اتلميي بدل ما يجي جوزك واقوله.. 

_دخل الظااابط علاء في الوقت ده واول ما شااف اسلام سلم عليه بحراره وقال.. 

علاء

وانا اقول الصعيد منور ليه، عامل ايه يا اسلام.. 

اسلام

بخير الحمد لله.. 

علاء

اهلا وسهلا يا عز بيه كويس انك وصلت لاسلام البحيري هو محامي شااطر ولو عبدالله هو هيعرف يطلعه منها.. 

أسلام بنبره واثقه 

اعتبره طلع منها اصلا وانا قد كلامي.. 

عز 

انا ما بخاافش غير من الثقه الزياده دي.. 

علاء

ربنا يستر يا عسكري هات عبدالله القاضي، علي فكره يا عز بيه انا برضو عشت في البلد دي وعبدالله كان اكتر واحد واقف جنبي من لما جيت وانا مش مقصر معاه وجوده في الحجز دلوقتي عشان لو جه تفتيش او حاجه انما هو بالليل بيبات هنا في مكتبي.. 

عز بهدء

واحنا اللي بيقدرنا بنقدره يا باشا واجبك فووق راسنا.. 

_وفي الوقت ده جه عبدالله مع العسكري واول ما شاف روان بصلها بضيق وعلاء قال.. 

علاء

هسيبكم لوحدكم شويه.. 

وخرج علاء من عندهم وعز قال بهدوء

صممت تيجي معايا عشان تشوفك وتطمن عليك.. 

عبدالله بضيق

ها يا متر عملت ايه؟ 

وفضل يتكلم مع المحامي وروان قالت لعز بدموع

شايف اتجاهل وجودي ازاي اهو ده اللي انا كنت خايفه منه لما ارجعله يرجع يعاملني زي الاول تاني.. 

عز بضيق

حقك عليا انا بس مش وقته الكلام ده اول ما يطلع من هنا انا ليا كلام تاني معاه.. 

نزلت دموعها وقالت بحزن 

لا تاني ولا تالت انا من النهارده هرجع القاهره واشوف حياتي اللي سيبااها وجايه قااعده جنبه هنا.. 

اتنهد عز بضيق وبين اسلام قال بجديه 

يومين تلاته بالكتير والموضوع هيخلص بس انت تعمل زي ما بقولك واول ما تروح النيااابه تقول زي ما انا قولتلك بالظبط.. 

عبدالله 

تمام بس انت متأكد من الراجل اللي بتقول ده هيعرف ينفذ خطتك 

اسلام

ايوه وقضيتك دي خلصت زيها كتير قبل كده فما تقلقش المهم المبلغ اللي اتفقنا عليه اول ما تطلع من هنا استلمه.. 

عبدالله 

تمام علي خير.. 

اسلام 

همشي انا بقي عشان لسه عندي مشوار علي النيااابه بعد اذنكم.. 

عز 

استني يا متر عايزك في حاجه.. 

اسلام 

ماشي في انتظارك بره.. 

خرج اسلام ولسه عز هيروح ورااه بس عبدالله قال بحده

استني يا خالي طيب هي غبيه وهبله انت تجيبها لحد هنا ليه، اصلا هي بتعمل ايه في البلد وانا متنيل هنا مش عارف ايه اللي بيحصل بره.. 

ابتسم عز وقال لروان 

شوفتي اهو جبتيلي الكلام انتي عايزه تطمني عليه وهو خايف عليكي حلو مشاكلكم دي مع بعض.. 

_قال كلامه وخرج وعبدالله بص للعسكري اللي واقف عند ااباب وقال لروان بصوت واطي.. 

عبدالله 

كمال بقي كويس؟ 

روان

ايوه بس مش راضي يسافر القاهره بيقول لازم أسرار ترجع الاول.. 

عبدالله بضيق

خير هخرج من هنا وكل حاجه هتتحل.. 

قربت منه ومسكت ايده وقالت 

انت كويس بتعرف تاكل وتنام هنا؟ 

عبدالله ابتسم بهدوء وقال

شايله همي وخايفه عليا يعني.. 

روان بجديه 

ان ما خوفتش علي جوزي هخااف علي مين يعني.. 

عبدالله 

اول ما اخرج من هنا هلاقيكي مستناني عشان نرجع بيتنا.. 

روان 

انا اصلا قااعده في البيت مستنيااك وجيت من نفسي ما حدش قالي انا اللي عايزه ابقي جنبك ومعاك في الازمه دي.. 

عبدالله 

طيب ارجعي انتي وامي القاهره وانا لما اخرج هاجي اخدكم.. 

روان 

ممكن ما تخافش علينا وتخليك في نفسك وبس، واحنا عمو عز مش مقصر في حاجه وجاب حراسه من سركة امن كبيره والشرطه كمان مأمنه البيت يعني ما فيش اي مشكله عندنا بس انت اخرج بالسلامه وكل حاجه هتتحل.. 

مسك ايدها وباسها وقال بهدوء

ان شاء الله يا حبيبتي.. 

دخل عز في الوقت ده وقال بخبث

طيب انا هاخدها وامشي عشان لو سيبتهالك شويه كمان هيبقي مقبوض عليك في قضية مخدرات واداب واحنا مش ناقصين.. 

اتكسفت روان وعبدالله قال

طيب خلي بالك منهم.. 

عز 

من غير ما توصيني دول في عينيا وانا مش همشي من هنا غير لما انت ترجع بيتك وتحل المشاكل دي كلها مش بيقولو الخال والد اعتبر بقي ان ابوك عايش وواقف في ضهرك انت واخوك.. 

حضنه عبدالله وقال

ربنا يخليك ليا يا خالي وما يحرمنيش منك ابداً.. 

_وبعد شويه كان عز راجع البلد هو وروان وقبل مدخل البلد بشويه وقفت قدامهم عربية شعباان ومعاه اتنين من رجالته.. 

عز بقلق

اهو ده اللي انا كنت خايف منه.. 

روان بخوف 

ما تنزلش يا زيزو.. 

عز 

بصي انتي لو شوفتيني بتقطع بره ما تطلعيش من العربيه الموضوع اتطور تاخدي العربيه وتجري بتعرفي تسوقي؟.. 

روان بخوف

لا طارق ما رضيش يعلمني.. 

عز بغيظ 

الله يخربيت طارق وسنينه، اتنيلي خليكي قااعده.. 

نزل عز من العربيه وشعبان قاله

خير يا بيه في مشكله ولا ايه مع مرت الكبير الساابق احنا في الخدمه 

عز 

وفر خدماتك لنفسك واوعي من قدامي ومالكش دعوه لا بيا ولا ببنتي.. 

شعبان بخبث

بت اخوك مش بتك انت طلعلك واد اخر فتره والله واعلم ولدك ولا لاه، بس مش موضوعنا خاااف علي ولدك وهملني اعمل اللي عايزه بدل ما تترحم عليه وهو لسه صغير قصدي علي الدكتور زين ولدك يا حج عزالدين.. 

عز بحده 

ده انت يومك اسووود انت واللي جابك، مين ده اللي حج ياااه ده انا شكلي اصغر منك.. 

_تفتكرو بقي ايه اللي هيحصل؟ 🫣

ــــــــــ #بقلم_الكاتبه_رحاب_القاضي ــــــــ

_وفي الا تيل عند نيللي كانت قااعده معاها مامتها االي قالتلها بعصبيه.. 

سوزان 

انا هكلم باباكي يتصرف معاه ازاي يعني يسيبك ويمشي.. 

ردت عليها نيللي وهي بتسرح شعرها قدام المرايا 

لا انتي ولا بابي ليكم دعوه بيا وبحياتي تاني.. 

سوزان

احنا عايزين مصلحتك ليه مش عايزه تفهمي ده 

نيللي بحده 

مصلحتي اللي هي اني اتجوز واحد ما بيكرهش قدي، نصلحتي ان حضرتك تبقي مبسووطه وعازمه صحابك وبتتمنظري قدامهم ان بنتك هتتجوز ابن يونس الصاوي وناسيه ان ان انا مغصوبه علي الجوازه دي، وان اول ما هيتقفل عليا انا وهو باب واحد انا هعيش اسود اياام حياتي، انتي وبابي كل همكم شكلكم وبس لو كنتو بتخافو علي مصلحتي كنتو شوفتو انا رغبتي ايه وعملتولي اللي عايزااه... 

قربت منها سوزان وحطت ايدها علي خدها اللي كان احمر وقالت

هو كمان مد ايده عليكي، انتي عملتي ايه بالظبط اكيد استفزتيه بكلامك السخيف ده.. 

نيللي بحده 

مالكيش دعوه وانتي جايه ليه عندي اصلا، اااه جايه تطمني عليا عشان ما حدش يااخد باله ان بنتك مش اا.. 

سوزان بحده 

اخرسي خالص انتي فعلا بقي لساانك طويل وقليلة الادب.. 

دخل في الوقت ده يوسف وبصلهم بضيق وقال

خير في ايه؟ 

سوزان بحده 

جايه اطمن علي بنتي عندك مشكله؟ 

يوسف 

ايوه اصلي عريس جديد ومش عايز حد يرخمم عليا.. 

سوزان بحده 

ويا عريس يا جديد ينفع تسيب عروستك وتمشي ليلة دخلتك، وكمان تمد ايدك عليها انت كده راجل.. 

يوسف 

انتي شايفه ايه 

سوزان بحده 

انا شايفه عيل قدامي.. 

يوسف ببرود

ميرسي يا حماتي ممكن تتفضلي بقي عشان عايز مرااتي في موضوع خااص.. 

اتنهد سوزان بضيق واخدت شنطتها وقالت

اول واخر مره تمد ايدك عليها، انت مش متجوز واحده من الشاؤع دي بنت ناااس.. 

يوسف بجمود 

واول واخر مره تدخلي بيني وبين مراتي، امها علي عيني وعلي راسي بس مالكيش دعوه بينا تمام يا حماتي.. 

سوزان 

انت مش متربي.. 

يوسف 

عارف ما قولتيش حاجه جديده هو انا لو كنت متربي كان زمان بنتك حامل دلوقتي.. 

اتعصبت سوزان ونيللي قالت بحده 

ممكن تسكتو انتو الاتنين وبو سمحتي يا مامي امشي دلوقتي وانا هبقي اكلمك.. 

_بصتله سوزان بعصبيه وغضب ومشيت وهو رااح قغل وراها الباب وبص لنيللي وقال.. 

يوسف بحده 

بتشتكي لامك فاكره اني كده هخااف منكم.. 

نيللي بهدوء

هي اللي جات وعرفت انك ما كنتش بايت هنا وشافت وشي وعرفت انك مديت ايدك عليا انا ما قولتش حاجه.. 

يوسف 

اسمعي اللي بيني وبينك ما حدش يعرفه امسح بكرامتك الارض بيني وبينك بس بره قدام الناااس نبقي حلوين مع بعض لحد ما الحوار ده يخلص.. 

اول ما خلص كلامه ضربته بالقلم وقالت بحده 

لا عاش ولا كان اللي يفكر يمد ايده عليا او يدوس علي كرامتي يا يوسف.. 

_اتحولت ملامحه للغضب ورمي جاكيت بدلته اللي كان في ايده علي الارض وقرب منها وقال.. 

يوسف 

انا هوريكي ازاي تمدي ايدك عليا يا بنت الجرجيري.. 

_تفتكرو بقي يوسف هيعمل ايه؟ 

"نلتقي البارت القادم 👋🌼" 

ـــــــــــــــــــــــــــــــــــــــــــــــــــــــــــــــــــــــــــــــــــ

#بقلم_الكاتبه_رحاب_القاضي

  الفصل السابع والثلاثون الجزء الثالث من هنا 

لمتابعة باقي الرواية زوروا قناتنا على التليجرام من هنا     

تعديل المقال