سكريبت اثر الحب والحنان (كامل) بقلم هاجر نورالدين
_ الشاي يافادي.
حطيت الشاي بالنعناع قدامهُ على الطربيزة في البلكونة وقعدت قدامهُ بكل هدوء.
بصلي بجنب عينهُ وساب الموبايل من إيدهُ وقال بعد ما ربع إيديه:
=مش عايز اللي حصل دا يتكرر مرة تانية مهما كان مين أو إي اللي حاصل، مفهوم؟
بصيتلهُ بندم وإحراج وقولت:
_والله ما كنت أقصد حاجة زي دي يا فادي، أنا بس كنت متضايقة منك وإنت مكنتش حالل حاجة وبتتجنبني وبقيت حقيقي مش قادرة أستحمل أو أخبي جوايا أكتر من كدا، فـ روحت حكيت لـ ماما من باب إني أهون عليا شوية وأفضفض مع حد.
إتكلم بهدوء وهو باصصلي نظرة أب خاب أملهُ في بنتهُ وقال:
=المشاكل اللي بيننا في البيت دا تفضل جوا حدود الحيط بتاعت البيت دا يا فاطمة، لإن غير كدا البيت اللي إنتِ شايفاه دا هيخرب، حتى لو كانت والدتك أو حتى والدتي، أسرار البيوت لو تخطت حدود العتبة بتاعت البيت بتتحول لوسيلة لخراب البيت دا وإحنا مش حاسين.
إتنهدت وقولت بدموع:
_ما إنت يا فادي كنت متجنبني ومتضايق مِني، وكنت مضايقني أكتر بكتير من ما أنا مضيقاك بتجاهلك ليا، ومكنتش عارفة أعمل إي، بعملك الأكل اللي بتحبهُ وبحاول ألفت إنتباهك بآي حاجة عشان تكلمني ومكنتش بتكلمني برضوا، كنت عايزني أعمل إي طيب.
قرب مِني ومسك إيدي بحنية وقال:
=طب حقك عليا، بس متتكررش تاني، وغير كدا اللي إنتِ عملتيه مكنش قليل عشان أسامحك فيه بسهولة يا فاطمة، كان لازم أشد في العقاب بتاعك شوية عشان متعمليش نفس العملة تاني.
إتكلمت بعد ما هديت شوية من كلامهُ وقولت وأنا بصالهُ بعيون مدمعة:
_وأنا خلاص إتعلمت الدرس يا فادي، متعملش فيا كدا تاني بقى، مهما حصل عاقبني بآي حاجة إلا إنك تبعد عني وتتجنبني، أنا ماليش غيرك يا فادي.
بصلي بحب وإبتسم وقال:
=وأنا كمان يا فاطمة، بس أفعالك الطفولية دي هي اللي هودينا في داهية.
مسحت دموعي وضحكت وقولت:
_حقك عليا، أنا والله بحبك.
إتكلم بإبتسامة جميلة تشبهلهُ وقال:
=وأنا كمان بحبك، وبصراحة الأكل بتاع وإنتِ بتحاولي تصالحيني دا كان طعمهُ حلو فـَ ياريت تفضلي على نفس المستوى دا وإلا هفضل زعلان منك عشان تفضلي على نفس المستوى دا.
إتكلمت بسرعة ولهفة وقولت:
_لأ لأ عشان خاطري دا أنا ما صدقت، دا أنا هعملك أحلى أكل.
إبتسم وقال بعد ما باس إيدي:
=دا كدا كدا، الإيد دي متعملش حاجة وحشة أبدًا.
إبتسمت بإحراج وحُب وقولت:
_بطل تعاكسني لو سمحت، وبعدين إشرب الشاي بالنعناع عشان برد خلاص.
مسك كوباية الشاي وقال بعد ما شرب شوية منهُ:
=تسلم إيدك، جميل يشبه لعيونك.
إبتسمت بإحراج وفضلت سرحانة في عيونهُ شوية بحُب، علاقتي بـ فادي علاقة صحية ومثالية جدًا، علاقتنا هادية ومليانة دفى وأمان، إتكلم وهو باصصلي نفس النظرة ومُبتسم وبيقول:
_أنا حلو أه بس متجوز ومراتي بتغير عليا، فـ مسمحلكيش.
ضحكت وقولت بحماس مُفاجيء:
=تعالى ننزل نتمشى.
قام وقف وقال:
_يلا بينا.
بصيتلهُ بعدم إستيعاب وقولت بعد تصديق وفرحة:
=بتهزر صح، بالسهولة دي؟
بصلي برفعة حاجب وقال:
_عايزاني أقعد يعني، خلاص هقعد تاني.
مسكتهُ من إيدهُ قبل ما يقعد وقولت بسرعة وسعادة كبيرة:
=لأ لأ قوم، في ثانية إلا ثانية هلبس وننزل على طول.
ضحك عليا وقعد برا مستنيني عقبال ما أخلص وفي دقايق كنت خلصت بسرعة عشان ميزهقش من الإنتظار ويلغي النزولة أصلًا، طلعت وعمل نفسهُ مصدوم من جمالي وقال وهو بيصفر:
_إي دا الحلاوة دي كلها دي، لأ لأ مقدرش خالص أنا على كل دا هيجيلي السكر من كتر الحلاوة.
بعد ما كنت بضحك من الكسوف ومن اللي بيقولهُ كشمت وقولت بجدية:
=بعد الشر عليك، متقولش كدا تاني حتى لو بهزار.
مسك إيدي وقال بحُب:
_حاضر، يلا بينا.
نزلنا بعدها إتمشينا وكلنا دُرة وآيس كريم وبعد ساعة تقريبًا جبنا كبدة من العربية وحاجة ساقعة وسندناها على العربية وكلنا، وعلى الفجر روحنا البيت، النزولة كانت بسيطة ودافية ومليانة ضحك وحب وأمان ودفى، حقيقي أنا كل يوم بشكر ربنا على إنهُ عوضني بفادي عن أيام كتير كانت وحشة أوي بالنسبالي، مش بيهون عليه حتى دمعي وبيراضيني بكل الطرق، وكل مرة بغلط فيها بيعلمني بطريقتهُ إزاي نتخطى المشكلة دي مع بعض، ولكن عمرهُ في يوم ما زعلني ولا نزلت دمعة مِني وكان هو سببها، علاقتنا اللي مخليها مُستمرة هو حب وحنان فادي، إختاروا الشخص الحنين اللي يحبكم بجد من قلبهُ بجد وميهونش عليه زعلكم.
#هاجر_نورالدين
#أثر_الحب_والحنان
#تمت
