رواية موضوع عائلي الفصل التاسع والثلاثون 39 الجزء الثالث بقلم رحاب القاضي
#موضوع_عائلي
’’بيت الهنا ’’
_ الحلقه الـ 39
ـــــــــــــــــــــــــــــــــــــــــــــــــــــــــــــــــــــــ
أصبحتُ أسيرةَ عشقه، لا مهربَ منه ولا أمانَ في الاقتراب
ـ صحي يوسف علي صوت خبط علي باب شقته ولقي نفسه نايم علي الكنبه في الصاله ، فقاام وهو ماسك راسه بألم ومش فاااكر اي حاجه من اللي حصلت بينه وبين نيللي امبارح ، وفتح الباب وكان يزن واقف قدامه وقاله بضيق
يوسف
في ايه علي الصبح جاااي عندي ليه ؟؟
ذقه يزن ودخل وقفل الباب وقاله بحده
انت ايه البروود ده يا ابني ، وبعدين معاك يعني لا بتساعدني في الشغل ولا مراضي ابوك وامك ولا زوج كويس وعايش كده حياتك بدون هدف واخرتها يا يوسف ؟
-قعد يوسف علي الكنبه وبدأ يفتكر اللي عمله في نيللي واذيته ليها لما كان مش في وعيه ، وبص ليزن بصدمه وقال ...
يوسف
نيللي فين ؟؟
يزن بحزن
في المستشفي خسرت ابنها وابنك بسببك وحالتها وحشه جدا
يوسف بدموع
انا ما كنتش اقصد والله
يزن بسخريه
كالعاده التبرير بتاعك ما كنتش اقصد ما كنتش في وعيي ، انت كنت بتلومها علي ايه وعلي طول معاقبها علي انها حامل منك ليه هي دي غلطت مين انت هتكدب وتصدق ، البنت دي من لما ظهرت في حياتك وانت بتأذيها وبتأذي رضوي حتي احنا اللي اهلك مش مريحنا ، فوووق لنفسك يا يوسف ابوووك شال ايده من الموضوع خلص وسايبك لفتحي الجرجيري اللي مش هيسيب حق بنته
يوسف بضيق
هو ماله اصلا نيللي مراتي وانا وهي حرين ما حدش يتدخل في مشاكلنا ، وهي هتقدر اني ما كنتش في وعيي
يزن بغيظ
انت مستفز والله طيب الاول وخليتها تشيل الغلط لوحدها وعدت وكانت حجتك انه بمزاجها زي ما بتقول ، دلوقتي بقي هي قالتلك اضربني لحد ما ابني يموت وهي تبقي في خطر ؟؟؟
يوسف بنبره غاضبه
سيبني في حالي يا يزن اعمل زي ابووك وانا هحل مشاكلي لوحدي
يزن بحده
طيب اسمع بقي عشان الموضوع ده بقي بايخ اوووي،انت مالكش دعوه برضوي تاني فاهم ولا لا؟
وقف يوسف قداامه وقال
وانت مالك ومال رضوي واللي بيني وبينها
يزن
انت ما فيش بينك وبينها حاجه حياتك اعمل فيها اللي انت عايزه احنا فعلا ما حدش ليه دعوه بيك تاني بعد كده ، انما رضوي تبقي اخت مراتي وحكايتك معاها انتهت والاستاذ حسن كلمني وقالي ابعدك عن حياة بنته وهي مش واقفه عليك وقريب اووي هتتخطب وانا مش عايز مشاااكل مع نسايبي يا يوسف
يوسف بحزن
انت اكتر واحد عارف انا بحب رضوي قد ايه يا يزن
يزن بحده
وهي ما بقتش بتحبك وانت نفسك ما بتحبهاااش يا يوسف بلاش نضحك علي بعض ، لو عايز تعمل حاجه كويسه في حياتك ياريت تصلح علاقتك بنيللي وتعوضها عن اللي عملته فيها واعتبر دي اخر نصيحه مني ليك عايز تعمل بيها براحتك مش عايز انت حر
_قال يزن كلامه وكان لسه هيمشي بس رجع وقف قداامه وطلع موبيله وقال ليوسف بسخريه....
يزن
بص كده دي رضوي بقيت شغاله مع حامد وبقي بينهم صحاب ، عارف ده معنااه ايه مش بتسفزك ولا بتنتقم منك لا ، هي خلاص انت ما بقتش فااارق معاها اصلا فشووف حيااتك وسيبها في حالها
- اتحولت نظراات يووسف للغضب وهو بيشووف رضوي متصوره مع حامد ومنه وبتضحك وباين عليها انها مبسوووطه ، واخد مفاتيح عربيته ومشي بسرعه ويزن اتنهد بضيق وقال....
يزن
عمرك ما هتتغير يا يووووسف
ــــــــــ #بقلم_الكاتبه_رحاب_القاضي ــــــــ
ـ في ساحة الشركه الخاااصه بحامد الصاوي كانت واقفه رضوي وهي بتصور العارضات بالكاميرا اللي معاها وبدأت تحس بالملل فوقفت جنبيها منه وقالت..
منه
وريني كده عملتي ايه؟
اديتها رضوي الكاميرا وقالت
امسكي حاسه اني بعك اصلا...
منه
لا في حاجات حلوه بس ما تخليش حامد يشووفهم هيقول انتو جايين تلعبو وهو في الشغل عصبي جدا
رضوي ضحكت وقالت
وعشان كده انا همشي بكرامتي قبل ما يشوفهم يلا باي..
منه
علي فين رووحي سلمي الكاميرا..
رضوي
سلميها انتي
منه
مش فاضيه وحامد في الشغل عصبي زي ما قولتلك، اديها لعم سيد اللي هناك وهو هيرجعها مكانها وامشي خلاص
رضوي
اوكي مااشي..
_واخدت رضوي الكاميرا ودخلت لقسم البروفا وكان المكان كبير جدا لدرجة انها تاهت وما كانتش عارفه تخرج فقالت لنفسها بغيظ وهي بتطلع موبيلها..
رضوي
منك لله يا منه دخلتيني فين بس..
_وشاافت المساعده بتاعت حامد خارجه من الاوضه اللي قدامها فراحتلها بسرعه وقالتلها..
رضوي
لو سمحتي خدي الكاميرا انا خلصت شغل عليها وعايزه امشي
ردت عليها البنت بتجاهل
حطيها عندك جوه وامشي..
_قالت البنت كلامها وسابتها ومشيت، ورضوي اتنهدت بضيق ودخلت الاوضه عشان تسيب الكاميرا واتفاجئت بفساتين كتير موجوده في الاوضه اللي كانت شبه المخزن بس كل حاجه فيها مترتبه بشكل منظم، فقربت من المكتب اللي كان علي جنب وحطت عليه الكاميرا وجات تخرج، بس لفت نظرها فستان فرح شكله جميل جدا متعلق جنب مرايا كبيره، فراحت قفلت الباب وحطت وراااه كرسي ومسكت الفستان وقالت لنفسها بحماااس..
رضوي
الكل مشغول بره وما فيش مشكله لو جربته وشوفتني وانا عروسه...
_واخدته ودخلت البروفا وبعد شويه كانت واقفه قدام المرايا وهي لابسه فستان الفرح وكان شكلها جميل جداً فيه ومسكت الطرحه بتاعته وحطتها علي شعرها وابتسمت بدموع وفي وسط اندمجها حد حاول يفتح الباب، فأتنفضت بخووف وقالت لنفسها بصوت واطي..
رضوي
يا نهار اسووود اروووح فين دلوقتي، اتخبييي فين؟
_ولسه هتدخل البروفا بس الباب اتفتح بكل قوه ودخل حامد وهو شكله متعصب جدا واول ما شافها هي غمضت عينها ووشها قلب احمر بأحرااج وخجل كبير، وهو بسرعه قفل الباب وبصلها وابتسم وهو بيقرب منها وقال..
حامد
هو انا اللي شايفه ده بجد؟!..
رضوي بتوتر واحراج
ااا انا ووو والله مااا كنتش اا..
حامد بهدوء
اهدي طيب ما حصلش حاجه، بس زي القمر فيه..
ورفع ايديه وظبطلها شكل الطرحه علي شعرها وقال
تعرفي ان ده الفستان اللي هيتختم بيه العرض بتاعب اخر الشهر، وانتي اول واحده تلبسه...
رضوي بتوتر
انا اسفه بجد بس حالا هغيره والله..
جات تمشي فهو مسك ايدها وقال وهو بيقرب منها
وهتبقي اخر واحده لبسته لو وافقتي علي طلبي
سحبت ايدها من ايده وقالت
هو ايه طلبك؟
رجع مسك ايدها وقال
الموضوع تخطي معايا الاعجاب وكل اللي شافونا مع بعض اخدو بالهم الا انتي..
حاولت تسحب ايدها من ايده وقالت
حامد لو سمحت ما ينفعش اللي بتعمله ده وشكلنا كده مش كويس لو سمحت اخرج هغير الفستان ومش هتشوف وشي تاني اصلا..
حامد بجديه
ليه كل ده طيب علي فكره بقي انا بحبك وعايز اتجوزك والفستان ده هتلبسيه تاني يووم فرحنا لو وافقتي وبعدها ما حدش هيلبسه تاني..
اتفاجئت رضوي من كلامه وقالت بتوتر
مم ما ينفعش انا وانت ما ينفعش
حامد
ليه ما ينفعش..
رضوي بدموع
انت عارف كويس ان هتحصلك مشااكل كتير من عمك ويوسف لو في حاجه حصلت بينا
حامد
المهم انتي بالنسبالي انا لا يفرق معايا عمي ولا اي حد اصلا من عيلة الصاوي انا عايش لوحدي "وعايز اعمل عيله ليا لوحدي ما ابقاش غريب فيها💔" يا رضوي..
رضوي بجديه
ربنا يرزقك بالاحسن مني، بس انا مش هنفعك صدقني احنا بينا حواجز كتير..
_اول ما قالت كده سااب ايدها وخرج من الاوضه كلها وهي اتملت عيونها دموع ودخلت غيرت الفستان ورجعته مكانه وهي بتبصله بنظره اخيره وبتفكر شكلها فيه وقد ايه كان لايق عليها، وخرجت من الاوضه واول ما خرجت برا المبني كله كان حااامد واقف مع واحده من العارضات بس اول ما عيونه جات عليها قرب منها وقال..
حامد
عربيتك اتصلحت السواق بتاعي بره هيوصلك لحد المكان اللي هي فيه وهتاخديها علي طول اول ما تقوليلهم انك تبعي
رضوي
قولي المكان وانا هروووح لوحدي ما فيش داعي لاهتمامك ده..
جات تمشي بس هو وقف قدامها وقال
لو سمحتي يا رضوي انا عرضت عليكي حاجه كنت اتمني تحصل وانتي رفضتي خلاص ما تخليش الموضوع ده يأثر علي علاقتنا كأصدقاااء..
رضوي
ان شاء الله بعد اذنك..
حامد
السواق بره مستنيكي ارجوكي اسمعي كلامي..
رضوي
حاضر وشكرا لمساعدتك..
حامد
ومعلش يعني لو هتقل عليكي فكري شويه في طلبي يعني مش هتندمي
ابتسمت بتوتر وقالت
ان شاء الله...
_ومشيت رضوي وهو شاور للمساعده بتاعته اللي قربت منه وقالها بجديه..
حامد
الفستان اللي كنا هنختم بيه العرض يتشال علي جنب ما فيش واحده من العارضات تلبسه يا ملك تمام
ملك
ازاي بس ده كان احلي فستان في المجموعه كلها
حامد بجمود
من امتي بكررلك كلامي يا ملك نفذي علي طول وانا هتصرف
ملك
تحت امر حضرتك..
_وفي الوقت ده اول ما خرجت رضوي وكانت لسه هتركب عربية حامد، وقفها يووسف اللي قال بحده
يوسف
ما لسه بدري
بصتله رضوي بضيق وقالت
انت تاني برضو..
يوسف
عايز اتكلم معاكي ضروري في حاجات كتير انتي ما تعرفيهااش ولازم تعرفيها..
رضوي بحده
يا بني ادم انت افهم خلاص ما بقتش تهمني ما بقتش عايزه اعرف عنك حاجه..
يوسف
مش بالسهوله دي كل حاجه تتنهي اللي بينا كان كبير اووي يا رضوي
رضوي بدموع
ومين قالك انه بسهوله، بالعكس كل حاجه معاك كانت صعبه، واصعب حاجه عملتها هو اني نسيت اللي كان بينا وبقيت اشوووفك عادي بالنسبالي
يوسف
يعني انتي بالنسبالك نسياني راحه ليكي، انا هسيب نيللي وهعملك كل اللي عايزاه بس نرجع
رضوي بحده
والله العظيم يااا يوسف ما هرجهلك، لو جيبتلي الدنيا كلها لحد عندي وقالولي انك هتتغير مش هصدقهم ومش هرجعلك فأبعد عني بقي وسيبني اعيش حياتي وانا مرتاحه بلاش تبقي اناني اكتر من كده عشان ما اكرهكش اكتر من كده برضو....
_قالت كلامها وركبت العربيه بتاعت حامد ومشيت وهو فضل واقف بيبصلها بحزن، ومشي وكان لسه هيركب عربيته بس وقفت قدااامه عربيه تانيه ونزلو منها رجالة فتحي الجرجيري ومسكه واحد منهم من دراعه وقال..
_تعالي معانا
يوسف ذقه جامد وقال
اجي معاك فين اوعي يا عمم
طلع مسدسه وقال
لو ما جيتش معانا بالذووق هنسيبك هنا جثه، يلا قدامي علي العربيه يالااا..
_بصله يوووسف بخووف ومشي معاهم وهو مرعوب من اللي ممكن يحصله...
ــــــــــ #بقلم_الكاتبه_رحاب_القاضي ــــــــ
_وفي الصعيد كان نايم عبدالله جنب روان اول ما موبيله رن وهي قالتله بحده..
روان
يا عبدالله شووف موبيلك ده عايزه انااام..
عبدالله بضيق
طيب..
ورد علي الموبيل وقال
ايوه يا حمدي... طيب اعمل زي ما متفقين وانا جايلك علي طول.
_قفل معاه وقاام وبدأ يغير هدومه بسرعه وروان قاامت هي كمان وبصتله بقلق وقالت..
روان
هو انت رايح فين؟
عبدالله
عارفه قبل ما اصحي كنت بحلم اني اتجوزت عليكي
روان بغيظ
بتهزر صح؟
ابتسم بهدوء وقال
لا بتكلم بجد حلمت اني اتجوزت عليكي
روان بغيظ
طيب تعالي نام مش هتخرج غير لما تنام وتطلقها الاول
ضحك بقوه وقال
ههههههه لما اجي هبقي انام واطلقها، انا اصلا ما اعرفهاااش
قامت روان وقفت قدامه قبل ما يخرج وقالت
احلف الاول قبل ما تخرج انك مش رايح تتجوز عليا والله يا عبدالله اقتلك
عبدالله بهدوء
اطمني انتي كرهتيني في الصنف كله يا حبيبتي
روان
يعني انت بقيت بتكرهني؟
عبدالله
يا روان مش وقت دلعك ده سبيني اخرج
روان
طيب قولي الاول رايح فين؟
عبدالله
حوار في الشغل، استني كنت هنسي..
ورااح اخد السلاح بتاعه وهي قالت بخوف
خد معاك كمال وعمو عز ما تروحش لوحدك
عبدالله بجديه
ده تاري لوحدي عمر مات بسببي انا مش بسبب كمال ولا خالي، فانا يا اخده لوحدي يا ما ابقاش رااجل..
اتملت عيونها دموع وقالت بخوف
وليه كل ده تعرض نفسك للخطر ليه، اسرار اللي هي اخته لما لقيت الموضوع كبر قالتلك مش عايزاك تاخد بتاره، عشان خاطري يا عبدالله كبر دماغك من الموضوع ده وتعالي نمشي من البلد كلها ونعيش في القاهره وو..
عبدالله بحده
رواااان اللي هنعيده هنزيده هنرجع تاني لنفس المشكله اننا نسيب البلد ونعيش في القاهره، مدام الموضوع ده لسه في دماغك رجعتيلي ليه؟
نزلت دموعها وقالت
والله ما في دماغي حاجه انا بس خايفه عليك
عبدالله بجمود
ما تخافيش كل حاجه عامل حسابها، ما تقوليش انتي بس لكمال ولا لخالي حاجه عشان ما ازعلش منك وما تقلقيش كده كده راجعلك وهقعدك معايا في البلد دي غصب عنك كمان..
ابتسمت وهو مسح دموعها وقال
خليكي واثقه فيا.ما فيش حاجه وحشه تاني هتحصل، خلي بالك من نفسك
روان
شوفت بتقولي خلي بالك من نفسك معنااه ايه كلامك ده انك برضو حاسس انك ممكن ما ترجعش صح؟
عبدالله
يا وليه خليني اخلص كلامي، قصدي اقولك خلي بالك من نفسك لحد ما ارجع هو انا اقدر اسيبك يا مطلعه عيني انتي..
روان
مش هعمل حاجه تاني تزعلك بس ترجع
عبدالله بشك
متأكده؟!
هزت راسها بمعني ايوه وهو باس راسها بهدووء وسابها وخرج واول ما شافته طلع من البيت رااحت بسرعه لاوضة كمال وخبطت علي الباب جامد وهو فتح وقاال..
كمال
في ايه ياللي تتشلي في ايدك؟
روان
ان شاء الله انت يااارب، روح بسرعه الحق عبدالله حمدي كلمه وقالي انه رايح يخلص كل حاجه مع خلف
كمال
وما قاليش ليه اومال انا سايب حالي ومالي وجاي اترزع في البلد جنبيه ليه
روان
انت لسه هترغي روووح بسرعه ورااااه..
كمال
الله يخربيتك انتي وجوزك في يووم واحد..
روان
ان شاء الله انت برضو..
ــــــــــ #بقلم_الكاتبه_رحاب_القاضي ــــــــ
_بالليل في شقة عز الدين كان قااعد طارق هو وزين وحسن اللي دخل قعد معاهم وقال..
حسن
بتعملو ايه يا ولاد؟
زين
كنا بنتفرج علي الماتش اتأهلنا لكأس العالم يا عمي..
حسن
ايوه البت روفان قالتلي، قولي يا زين هو انت هتتجوز امتي؟
زين
لسه بدري يا عمي اووي قول اخطبها امتي الاول
حسن
بس يونس الصاوي ده جدع عايز بنته تخلص تعليمها وتشوف مستقبلها وبعدين تتجوز..
زين
ما هو ده الصح وانا عشان بحب يارا هستناها لحد ما تبقي جاهزه
حسن
برافو عليك انت كده راجل يا ابني
طارق بغيظ
من غير ما تلقح عليا لو عندك كلمه قولها علي طول في وشي يا حج حسن
حسن
عندي كلام كتير يا طارق بس مش عايزك تاخده علي اني بعارض قرارك وخلاص، اسمعني لو لمره في الموضوع ده علي اني ابووك وخايف عليك وعايز مصلحتك وعايزك تبقي مبسووط ومرتاح
طارق بهدوء
وانا ساامع حضرتك اتفضل يا بابا اتكلم
حسن
مش وقته يا طارق هنا مش جاهزه تتجوزك
طارق
بس هي قالت انها موافقه
حسن
عشان انت ضغط عليها بطريقه غير مباشره انت وامك، انت فاكر قعدتها في بيت غريب دي ساهله عليها مهما عملنا معاها ديما هتحس انها تقيله علينا ومش هتبقي براحتها، هترفضك ازاي وهتزعلك انت وامك ازاي وهي قااعده في بيتنا
زين
بصراحه يا طارق عمي معاه حق، اصلا من لما موضوع الجواز ده اتفتح وهنا بقيت علي طول مدايقه
حسن
بص انا مش بقولك الغي الفكره، بس اتكلم معاها حسسها ان القرار ده مشاركه بينكم واللي هي عايزااه هتعمله ليها من غير ضغط من غير ما تخوفها منك وتحسسها انها لازم توافق رداً للجميل انها قااعده في بيتنا، انت لو فضلت تتعامل معاها كده لا هي هترتاح معاك ولا انت هتكون مبسووط معاها
طارق
طيب قبل ما اغير رأيي انا هاخدها واروح اتكلم معاها عشان انا ممكن انسي الكلمتين دول وما ابقاش شايف قدامي غير الجواز وبس..
حسن بغيظ
انت بتلكك عشان تاخدها وتخرج، رووح اتكلم معاها جوه..
طارق
والله ما بعرف اتكلم معاها في البيت كلمتين علي بعض، بلاقي روفان قاعده تمشي روفان تيجي رضوي تمشي رضوي تيجي امي او انت محسسني انكم لو سيبتوها معايا لوحدها هخطفها..
ضحك زين وحسن قال بسخريه
ما هو من عمايلك تحب افكرك بعمايلك، وبعدين هتاخدها وتروووح فين؟
طارق
بص انا كده كده كنت عايز اجيب عربيه وواحد صاحب يزن قالي اروحله وهيديني اي عربيه انا عايزها قسط، فهروح انا وهي ونختارها سوا واتكلم معاها...
زين
انت مش قولتلي هتاخدني انا معاك ايه النداله دي؟
طارق
ما المستقبل معاها هي مش معاك انت...
حسن
طيب بس ما تتأخرش قبل الساعه عشره ونص هنا تبقي في البيت..
طارق
حاضر من عينيا..
_وراح طارق فعلا لشقتهم واول ما دخل كانت ليلي وفيروز ورضوي قاعدين مع بعض في الصاله وقالتله ليلي اول ما شافته..
ليلي
عايز حاجه يا طارق؟
طارق
فين هنا؟
رضوي
عايزها في ايه؟
طارق
وانتي مالك البت فين؟
فيروز
في المطبخ راحت تعمل شاي..
طارق
وهي الشغاله بتاعتكم يعني انتو قاعدين وهي بتعملكم شاي..
ليلي
راحت تعمل لنفسها اصلا هي مش قااعده معانا كانت بتذاااكر يا ابو قلب حنين...
_ضحكت رضوي هي وفيروز وهو دخل المطبخ عند هنا اللي كانت بتقلب في موبيلها وهي مبتسمه واول ما شافته اتخضت وقفلت الفون بسرعه وقالتله..
هنا
عايز حاجه؟
طارق
كنتي بتكلمي مين؟
هنا بتوتر
صحااابي هكلم مين يعني..
طارق بجمود
كنتي بتكلمي مين يا هنا؟
هنا بقلق
هقولك بس ما تتعصبش ماشي؟..
ما ردش عليها طارق وهي قالت بتوتر
ده دكتور عندي في الكليه هو شايفني شااطره فكان بيمدح فيا علي جروب الدفعه فانا دخلت عنده خاص وشكرته فرد عليا وقالي في اي وقت احتاج حاجه اكلمه، وهو اصلا راجل كبير انا قد بنته او اكبر من بنته بشويه..
طارق بضيق
هاتي الموبيل
هنا بحزن
والله يا طارق لو كسرته زي قبل كده لازعل منك طول عمري..
طارق بنبره غاضبه
تكلميه ليه خاااص وما فيش غيرك يعني شاطره ومتفوقه في الكليه..
هنا
ده بدل ما تفرح بيا بس ده اللي انت عايزه اصلا ابقي قليله وفاشله عشان تعرف تمشي كلامك عليا..
اتنهد طارق بضيق وقال
بقي انتي شيفاااني كده؟...
ما ردتش عليه وهو قال
هعتبر نفسي ما سمعتش حاجه، وادخلي غيري هدومك عشان هنخرج سوا
هنا بضيق
عندي مذااكره
طارق بحده
معلش اعتبري نفسك بتكلمي دكتور من بتوعك شويه..
دخلت رضوي عندهم وقالت
انت بتزعقلها ليه والله اندهلك بابا..
طارق بنبره غاضبه
اسأليها بزعقلها ليه..
_قال كلامه وسااابها وخرج من عندهم وهو متعصب جدا ورضوي سألتها بقلق وقالت..
رضوي
في ايه تاني اتخانقتو ليه المره دي؟
هنا بعصبيه
عشان هو مستفز بتكلم مع الدكتور بتاعي في الجامعه عادي اتعصب عليا، طيب ما انتي عندك صحااابك في الشغل وفي الجلسه النفسيه بتاعتك دي ما بيتعصبش عليكي ليه..
دخل طارق وقال
عندها مين يا اختي؟..
رضوي بخوف
منك لله يا هنا هي قصدها زمايلي في الشغل..
طارق
وجلسة نفسية ايه دي ان شاء الله؟
رضوي
بص انا اصلا واخده الاذن من بابا وماما...
مسكها من دراعها جامد وقال
بلا ابوكي بلا امك اقسم بالله يا رضوي لو خرجتي بره البيت تاني لاكسرلك رجلك..
زقته رضوي وقالت
مالكش دعوه بيا انا اعمل اللي انا عايزااه..
وخرجت بسرعه بره المطبخ وهو وهنا وراها وليلي قالت
في ايه فضحتوني قدام مرات عمكم وسابتني ومشيت..
رضوي
الزفت ده زعقلي..
طارق
احترمي نفسك يا بت انتي، وانتي يا ماما عارفه انها بتروح جلسة المجانين دي وبتقعد مع رجاله كمان..
ليلي بقلق
ممم ما هو يا ابني عشان نفسيتها..
طارق
تتحرق هي ونفسيتها البت دي مالهاش طلوع تاني من البيت الا لو هتروح شغلها..
رضوي بغيظ
وانت مالكش كلام عليا بابا كان عارف..
دخل في الوقت ده حسن وقال
في ايه ما فيش يوم يعدي غير والشااارع كله ساامع بينا..
دخل ورااه في الوقت ده سيف وقال
مسااء الخير يا جماعه مالكم في ايه
رضوي
استني انت يا عم سيف بابا انا مش قولتلك اني رايحه الجلسه النفسيه..
سيف
وانتي مجنونه عشاان تروحي الجلسات دي؟..
قالو كلهم في صوت واحد
وانت مااالك..
حسن
مالكش دعوه يا سيف واستني اخلص من المشكله دي واشوفك عايز ايه روح اقعد مع زين..
طارق
يا بابا ازاي توافق تخليها تروح عيادة مجانين وتقعد مع رجاله وتحكي علي مشاكلها، بقي دي اخلاقنا احنا، فاكره نفسها عايشه في امريكا ولا صدقت اننا من القاهره ونسيت اصلنا..
رضوي
الله يرحم سندس اللي كنت ساحبها في ايدك ورايح جاااي بيها لحد ما خزوقتك..
طارق
ما بلاش تتكلمي انتي علي الخوازيق خليني ساكت..
حسن
بصو انزلو الشارع وعايرو بعض عشان اللي ما سمعش يسمع، وانتي مش قولتيلي الجلسه دي كلها ستات بس..
رضوي بتوتر
يا بابا ما هو..
حسن بحده
اخرسي خالص مدام بتكدبي عليا يبقي ما فيش زفت جلسااات تاني وما فيش خروج من البيت خالص لحد ما تعرفي غلطتك، غوري علي اوضتك يلا..
ليلي بغيظ
عقدولي البت اكتر ما هي متعقده..
حسن
ما فيش عقد ولا حاجه بكره يجي العريس وتتجوز وهتبقي زي الفل ربنا بس يتمم الموضوع علي خير
سيف
عريس مين ده؟
خرجت رضوي من اوضتها تاني وقالت
لا لا انا مش موافقه خلوه ما يجيش..
طارق
ليه ان شاء الله مش احنا اتفقنا، مش قولت انها وافقت يا بابا
حسن
ما هي لسه قيلالي الصبح انه يجي وهتقابله
رضوي بتوتر
مم ماهو في عريس تاني متقدملي وانا حاسه بقبول ناحيته اكتر
طارق بغيظ
اتفضلو عرفته منين ده بقي وهتختار تاني هتخزوق نفسها تاني
رضوي
احترم نفسك بقي وبعدين هو انتو اصلا تعرفوه..
ليلي بحمااس
مين ده يا رضوي قوليلي؟
رضوي بقلق
حامد... حامد الصاوي..
طارق بسخريه
مش انا قولتلكم مغناطيس خوازيق
ليلي
شوفتي مش انا نفسي تتجوزي بس كله الا العيله دي تاني
رضوي بضيق
يا جماعه اسمعوني حامد غيرهم كلهم، بالعكس لما روحت اشتغل معاه ها يا طارق شغل بس حسيت انه مختلف شخص مسؤل وعاقل وكاريزما ودمااغه نفس دماغي ومش مرتبط اووي بعيلة الصاوي يعني
حسن
خليه يجي يكلمني وما تتكلميش معاه تاني واللي فيه الخير يقدمه ربنا، هاا يا عم سيف عايز ايه بنتك مع امها عايز تشتكينا اتفضل القساام والمحاكم ماليين البلد..
سيف حضنه وقال بحزن
حقك عليا يا خالي انا اسف..
اتصدمو كلهم من تصرف سيف وحسن قاله
مالك يا سيف في ايه..
ليلي
امك كويسه يا واد انت..
بعد سيف عن حسن وقال
امي كويسه وزي الفل بس انا حاسس اني غلطت معاكم كتير وانا عمري ما شوفت منكم حاجه وحشه، وظلمت ريناد اوووي معايا وظلمت بنتي وخربت بيتي بس هي ربنا عوضها انا كنت اتمني اقدر اصلح الوضع بيني وبينها بس ربنا اراد بقي اني افضل طول عمري ندمان عليها..
ليلي
انت لو عايز تعمل خير في بنتي سيبها في حالها بلاش تعمل مشاكل بينها وبين جوزها ولا تحرمها من بنتها
سيف
مش هعمل مشاكل بس انا جاي عايز الاقي حل عشان انا كمان ما اتحرمش من بنتي..
حسن
هكلم ريناد واخليها تيجي هنا وتتكلم انت وهي وتتفقو سوا في موضوع تيا..
سيف
بس انت مش زعلان مني يا خالي صح؟
حسن طبطب علي كتفه وقال
انت ابني يا سيف ومهما حصل انت وولاد اخواتي كلكم عيالي وعمري ما ازعل من حد منكم..
طارق قرب من هنا وقال
لسه واقفه يلا عشان ننزل..
هنا
مش وقته خلاص خليها وقت تاني
طارق
لا وقته يلا بسرعه عشان نلحق نرجع بدري..
ــــــــــ #بقلم_الكاتبه_رحاب_القاضي ــــــــ
_وفي الصعيد كان عز قاااعد هو وروان ودخل عندهم كمال وهو متدايق جدا وقال..
كمال
ما عرفتش اوصله..
عز
هو ايه اللي بيعملو اخوك ده اومال انا سايب اللي ورايا وجاي قااعد معاكم هنا ليه، مش عشان نتشارك في اي حاجه هو ناوي يعملها..
كمال مسك كتفه بألم وقال
وهو من امتي عبدالله بيسمع لحد، هو شايف نفسه الكبير اللي فوق الكل فيقرر وينفذ واحنا نبقي في المركز التاني بعده، ومش مهم بقي انه يعرض حياته للخطر..
روان
هوو خايف عليك علي فكره، وانت فاهم غلط عبدالله اخر حاجه بيفكر فيها نفسه وبيتعامل علي انه الكبير عشان انت ديما سايب المكاانه دي وهو اتحط فيها غصب عنه، كلنا عارفين ان عبدالله كان نفسه يعيش في القاهره ويشتغل هناك بس لما انت سافرت ما كانش قدامه حل غير انه يبقي مكان جوز عمتي الله يرحمه
عز
معاكي حق يا روان بس يقولنا نبقي جنبه وفي ضهره، يبقاله عزوه واهل قدام خلف وابنه ما يقفش في وش الطوفان بطوله كده
روان
طيب بدل ما انتو قاعدين جنبي روحو دورو عليه..
كمال
انا عندي الحل امسك البت دي اديها علقه معتبره عبدالله يعرف فيتعصب ويخاف عليها ويجي ونعرف بقي هو ناوي علي ايه
روان بحده
جاتك كسر ايدك قبل ما تتمد عليا، شايف يا عمو بيقول ايه
عز بغيظ
يقطعكم علي يقطع عمكم في يووم واحد مش واخد منكم غير الهم والغم وانا راجل فرفوش هتكبروني قبل اواني يا ولاد الجزم انتو....
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي كان قااعد يوونس في مكتبه وهو مدايق جدا ودخلت عنده شهد وقالت..
شهد
ما فيش اخبار عن يوسف؟
يونس بجمود
عند فتحي الجرجيري
شهد بخوف
وانت هتقعد كده حاطط ايدك علي خدك وابنك عند الراجل ده، اتصرف يا يونس رووح هاته من عنده قبل ما يعمل فيه حاجه
يونس بجمود
خليه يتحمل نتيحة غلطته ويحل مشااكله لوحده..
شهد بدموع
لا مش دلوقتي الراجل ده انت قولت ايديه طايله هتبقي مبسووط لو عمل حاحه فيه
يونس بحده
وانا حذرته مليون مره يا شهد وحلفت مش هتدخله في حاجه تخصه تاني ، هو اذي البنت دي وكانت هتموت فيها وانا لو حد عمل ربع اللي هو عمله في بنتي هدفنه صااحي فمش هدخل في مشكله مع واحد بيجيب حق بنته..
دخل عندهم يزن في الوقت ده وقال
اللي سمعته بجد يا بابا فتحي واخد يووسف والله اعلم بيعمل فيه ايه
يونس
ايوه ومالنااش دعوه
يزن بحده
هو ايه اللي مالناااش دعوه ده اخويا واللي يفكر يلمسه اوديه في ستين داهيه..
شهد
بلغ الشرطه يا يونس ما فيش حل غير كده
يزن
هتبقي فضيحه يا ماما ما ينفعش نبلغ الشرطه وقتها يوسف ممكن يتحبس باللي عمله في نيللي ده غير وصولاد الامانه اللي ماضي عليها مع فتحي الجرجيري.
يونس بجمود
تعرف ترووح تجيبه من غير مشااكل
يزن
اكيد طبعا
شهد بحده
يا سلام بقي واحد في خطر وانت عايز تبعت التاني عنده
يونس بجديه
سيبك من امك خد الرجاله معاك وروح مصنع الجرجيري اللي في اكتوبر هو هنااااك، وتجيب اخوك من عنده بس تقوله انك روحتله من ورايا واني مش هتدخله في اي حاجه تسيبه في الشارع ما يدخلش البيت..
يزن
حاضر..
شهد
استني عندك بلغ الشرطه يا يزن ما تروحش تعمل اللي ابوك قالك عليه ده، بطلنا شغل البلطجه ده من زمان يا سي يووونس وما تعرضش ولادك للخطر..
يونس بحده
مالكيش دعوه انا عارف انا بعمل ايه، وانتي اخر واحده تتكلم دلعك ليووسف هو اللي وصلنا لحد هنا..
_سكتت شهد وما عرفتش ترد عليه، ويزن طلع شقته وكانت ريناد قااعده بتتفرج علي التلفزيون ولما شافته قامت بسرعه وقالتله..
ريناد
جااي بدري يعني النهارده؟
يزن
ما انا خارج تاني..
_ودخل اوضتهم وهي راحت وراااه لقيته بيطلع سلاح من الخزنه بتاعته، فبصتله بصدمه وقربت منه وقالت..
ريناد
انت معاك سلاح؟
يزن
ايوه زي ما انتي شايفه
ريناد بقلق
وواخده كده ورايح فين؟
يزن
يوسف واقع في مشكله مع نسيبه والراجل بيتصرف بهمجيه ولازم يقف عند حده، فالحل بقي اني اتعامل زيه عشان اعرف احمي اخويا منه
ريناد بحده
ايه اللي انت بتقوله ده، كلم الشرطه تحل الموضوع
يزن
هيبقي فيها فضايح وما تقلقيش مش عصابه هما يعني، ده حوار بسيط هيتحل بكلمتين
ريناد
ومدام هو حوار بسيط وهيتحل بكلمتين واخد المسدس ده معاك ليه
يزن
ريناد مش وقته اعتبري نفسك ما شوفتيش حاجه
ريناد
مش هتخرج بالزفت ده يا يزن ولو نفذت اللي في دماغك والله هترجع البيت مش هتلاقيني
يزن بحده
طيب خليني ارجع وما الاقكيش في البيت عشان تبقي اياامك سودا، ومالكيش دعوه بالموضوع ده خالص طلعي نفسك منه
ريناد بدموع
انا خايفه عليك عشان خاطري بلاش تدخل نفسك في مشااكل كبيره كده
يزن بهدوء
قولتلك ما تخافيش كنت بروح مع ابويا كتير في مواقف زي دي، انا واخد المسدس ده احتياطي عشان لو الموضوع كبر اعرف ادافع عن نفسي، ما تخافيش بقي والله العظيم ما هتحصل حاجه وحشه
ريناد
طيب خلي بالك من نفسك ولما الموضوع يتحل كلمني وطمني عليك..
يزن
من عينيا حاااضر..
_قال كلامه وسااابها وخرج وهي فضل قاعده خايفه ومرعوبه عليه..
ــــــــــ #بقلم_الكاتبه_رحاب_القاضي ــــــــ
_وفي الكافي بتااع طارق كان واقف مع االعمال وهنا قااعده مستنيااه في المكتب الصغير بتاعه، ودخل عندها بعد شويه وقال..
طارق
اتأخرت عليكي
هنا
لا عادي هو في حاجه ولا ايه؟
طارق
بنتنااقش علي عدد سعات العمل والوقت اللي بيبقي فيه شغل كتير وضغط، المهم قوليلي العربيه عجبتك؟..
هنا
ايوه حلوه جدا ولونها حلو بس غاليه شويه
طارق
عادي احنا كده كده هندفع نص تمنها وهقسط الباقي علي سنه، هعلمك السواقه علي فكره وهتبقي عربيتنا احنا الاتنين..
هنا ابتسمت وقالت
ان شاء الله بس هو انت هتجيب الفلوس منين وانت قولتلي قبل كده ان يدووب معاك مبلغ هيكفي بالعافيه مصاريف الفرح وممكن كمان تحتاج وتاخد من بابا حسن....
طارق بهدوء
طيب خليني اسألك انا الاول، انتي عايزه تتجوزيني في المعاد اللي حددنااه ولا لا؟...
سكتت هنا وبان عليها القلق وقالت
انت قررت فخلاص وانا قولتلك موافقه بتسأل ليه تاني؟!..
طارق
وانا بسألك عن رئيك انتي يا هنا، هو انا هبقي مبسووط لما تبقي معايا غصب عنك ومجبوره عليا
هنا
مش مجبوره عليك ولا هبقي معاك غصب عني، بس انت مش عايز تفهم اني محتاجه وقت..
طارق
وقت لايه هو انتي مش متأكده من مشاعرك ناحيتي، انتي بتحبيني ولا لا يا هنا اصلا؟
اتوترت هنا جدا وردت عليه وقالت
احنا بنتكلم في موضوع الجواز يا طارق..
طارق
ده الاساس في الموضوع ده، هو انا مش عايز اتجوزك وفي اسرع وقت عشان بحبك، انتي بقي رافضه الموضوع والكل بقي واخد باله انك مدايقه لما حددنا معاد الفرح مالهاش معني غير انك ما بتحبنيش...
هنا بضيق
اكيد مش زي ما انت فااهم كده.
طارق بجديه
لا انا فهمت صح يا هنا، مش عايزه تتجوزيني براحتك مش عايزاني اصلا برضو براحتك وما تقلقيش ما حدش هيتغير عليكي ولا هيعاملك بطريقه وحشه لما موضوعنا يخلص
بصتله بصدمه وعدم تصديق وهو قال
يلا عشان اوصلك وما نتأخرش...
هنا بحده
علي فكره مش بمزاجك تبدأ الكلام وتنهيه، وقبل ما تسألني بحبك ولا لا شووف نفسك بقيت ازاي انت كنت بتتعامل معايا بطريقه حلوه اووي خليتني اتعلق بيك واحبك من قبل ما انت تحبني اصلا، بس بعد ما ابويا مات انت اتحولت افتكرت نفسك امتلكتني الوحيد اللي ليه الحق يقررلي حياتي تمشي ازاي ومش مسموح ليا اعترض، ده انت حتي موضوع جوازنا اللي المفروض يبقي القرار لينا احنا الاتنين فيه انت قررت لوحدك ولما لقيتني بعترض ومش موافقه خليت امك تضغط عليا عشان هي بتحبك انت اكتر من اي حد ومش هترضي تزعلك، كل تصرفاتك دي حتي لو عملت نفسي مش واخده بالي منها وانك بتعملها بداافع حبك ليا مخليااني خايفه منك، خايفه من حياتنا سوا اللي انت اكيد هتبقي المتحكم الوخيد فيها وماليش اي حق اني اقول رأيي، هبقي عايشه معاك تحت رحمة مزاجك وبس ولو في يوم زعلتني وده وراد جدا لانك عصبي وما بتعرفش تتحكم في عصبيتك انا هعمل ايه وقتها هرووح اشتكي لمين امك واكيد مش هتغلطك قدامي هتحاول تهديني وخلاص كده، ولو قولت لبابا حسن هتحصل بينك وبينه مشكله والكل هيلومني ان انا السبب، انا شايفه حياتي معاك كده مش قادره اشووف فيها حاجه واحده تطمني وانت السبب في كل الحاجات اللي جوايا دي..
طارق
هو للدرجه دي انا وحش اووي، علي العموم ردك وصلني انا خليتك ما تحبنيش وانتي مش عايزاني وموافقتك بيا بس عشاان خايفه من رد فعلي اهلي معاكي، لا علي ايه هي الدنيا واقفه عليكي
هنا بسخريه
ما فيش فايده اتكلمت معاك زي ما اتكلمتش انت دماغك دي مش هتتغير، انا مش عايزه اتجوز يا طارق وده اخر كلام عندي..
طارق بجمود
وايه كمان قولي كل اللي عايزااه ما تبقيش جباانه
اتملت عيونها دموع وقالت
انا مش جباانه ومش خايفه من اهلك ولا منك، انا لو بتحمل وبسكت علي تصرفاتك عشان بحبك والله بحبك بس انت عمرك ما قدرت ده..
طارق ابتسم بقلة حيله وقال
تمام يا هنا ما فيش جواز زي ما انتي عايزه، ولما تبقي جاهزه اننا نتجوز نبقي نحدد وقتها معاد عايزينه احنا الاتنين..
هنا بضيق
مش هتجوز غير بعد ما اخلص الجامعه بتاعتي واشتغل، انا لسه صغيره اصلا علي الجواز..
طارق بنفااذ صبر
انتي عارفه بعد ما تعملي اللي بتقولي عليه ده انا هيبقي عندي كام سنه هبقي كسرت الـ 35 سنه..
هنا
وانا اعملك ايه انا لسه صغيره اتجوز وانا عندي 25 سنه وقتها هيبقي في سن حلو اتجوز فيه....
طارق
كتير يا هنا بجد كتير مش هستني انا سبع سنين عشان اتجوزك..
سكتت هنا وما ردتش عليه وهو قال
طيب نسيبها للوقت يعني يمكن لما احاول اتغير معاكي الفتره الجايه شويه يعني مش كتير ممكن وقتها انتي تغيري رأيك..
هنا بخبث
هتتغير ازاي يعني، انا مش هتجوز غير بعد ما اخلص دراستي..
طارق
طيب كتب كتااب بس عشان اعرف اخد راحتي..
هنا
مستحيل طبعا كتب الكتااب هيبقي يووم الفرح اصلا..
طارق بغيظ
يا هنا ما تستغليش اني عايز اسيبك براحتك وتيجي عليا..
هنا
هو انت حد يقدر يجي عليك ده انت تفتري علي بلد بحالها وتطلع نفسك مظلوم في اللخخر كمان..
قرب منها طارق وقال
والله وحشتني طولة لساانك معايا واننا نبقي حلوين مع بعض من غير مشااكل..
هنا بتوتر
علي اساس ان انا يعني اللي بعمل المشاااكل دي..
مسك ايدها بكل هدوووء وباسها وقال
ما تزعليش حقك عليا وما فيش حاجه هتحصل غصب عنك...
سحبت ايدها من ايده وقالت بخجل
طيب خلاص مش زعلانه يلا نمشي..
طارق قرب منها اكتر وقال
لا ما احنا حلوين..
هنا بحده
طارق لم نفسك يلا نمشي...
طارق بغيظ
ماااشي هانت كلها سبع سنين مش كتير يعني...
_ضحكت هي بهدووء وخرجو مع بعض وكانت فعلا مبسووطه انه سمعها وهيسيبها براحتها ومش هيغصبها علي حاااجه..
ــــــــــ #بقلم_الكاتبه_رحاب_القاضي ــــــــ
_وعند يوووسف كانو ماسكينه رجالة فتحي الجرجيري وبيضربو فيه بكل قوه لدرجة ان وشه كله بقي كدمات وشاورلهم فتحي يسبووه فوقع علي الارض وهو ماسك جسمه بألم كبير، وقااام فتحي من علي الكرسي بتاعه وقرب منه وقال..
فتحي
انت فاكر نفسك ايه يالا عشاان تعمل كده في بنت فتحي الجرجيري ده مش بس كمان هتتربي مني هنا ده وحيااة امك لاخليك تقضي باقي حياتك مسجون..
قعد يوسف قدامه وابتسم بسخريه وقال
ما انا لو كنت شوفتلها اهل من لما عرفتها كنت هحترمها شويه، يا جدع ده انا من لما اتجوزتها ما شوفتكش لا انت ولا مراتك جيتو تسألو عليها او حتي بمكالمة تليفون...
فتحي بحده
دي حاجه ما تخصكش انا حذرتك انت واهلك انك تأذو بنتي وانتو ولا عملتو اي اعتبار لكلامي..
يوسف
بنتك مرااتي وانا حر فيها اعمل اللي عايزه..
_شاور فتحي لرجالته فواحد منهم مسك خشبه كبيره من علي الارض وبكل قوته ضرب بيها يوسف علي ضهره فوقع يوسف تاني علي الارض وهو بيتألم بشكل كبير، وفي الوقت ده دخل الحارس بتاع فتحي وقاله..
ـ فتحي بيه يزن الصاوي ورجالته بره وشكله كده جاي ومش ناوي علي خير..
فتحي
اهلا بيه يجي يقعد جنب اخوووه..
_دخل في الوقت ده يزن وورااه رجالته المسلحين وقال بنبره صارمه..
يزن
لا وحيااتك انا جاي اخد اخويا وامشي بالذوووق بدل ما يبقي بطريقه تانيه وحشه مش هتعجبك..
فتحي
وانت يالا فااكر انك هتقدر تعمل فيا حاجه..
يزن
لا انا متاكد اني اقدر اعمل فيك كتير، قول لرجالتك يسيبو يوووسف وكفايه اوووي اللي حصل لحد كده
فتحي
امم والناااس تقول عليا مش عارف اخد حق بنتي وابن يونس الصاوي لعب بيها، لا ده انتو كلكم هتبقو عبره عشان مش انا اللي يتقل بيه ولا ما يتعملوش حساااب، لا يا حبيبي انت واخوووك مش هتطلعو من هنا علي رجليكم ومش هاخد فيكم يووم واحد انا قااعد في مكاني وانت واخوك جايين تتهجمو عليا..
يزن رفع سلاحه في وش فتحي وقال
يبقي انت اللي جيبته لنفسك وحد مننا هو اللي هيطلع علي رجليه والتاني الله يرحمه..
يوسف بصله بخوف وقال
لا يا يزن طلع نفسك من الموضوع ده انت مالكش دعوه..
فتحي
اسمع كلام اخوووك احسنلك....
يزن بجمود
مش هخرج من هنا غير واخويا معايا..
فتحي بخبث
مااشي بس انا بكسر الشر ومش عايز مشااكل، لكن الموضوع ما خلصش هنا، خلوه يااخد اخوووه ويمشي..
_بعدو رجالة فتحي عن يوووسف، ورااحله يزن بسرعه وسااعده يقف وهو بيبصله بنظره كلها لووم وقاله..
يزن
مبسووط انت باللي بيحصل ده؟
يوسف بضيق
ما قولتلكش تيجي يا عم انت كمان، كنت اعمل زي ابوك وطلع نفسك من الموضوع ده..
يزن
طيب امشي معايا مش وقته كلامك ده..
_اخده يزن وخرجو وفتحي خلي الحارس بتاعه يقرب منه، وقاله بصوووت واطي..
فتحي
يوسف الصاوي ما يخرجش من هنا سليم بس بلاش يموت يتعلم عليه فااهم...
الحارس
تحت امرك يا فتحي بيه..
_وفي الوقت ده كان يزن واقف قدام العربيه وقال ليوووسف بجديه..
يزن
ما تخلص يا يووسف هنروح البيت واعتذر لابوك والموضوع هيخلص
يوسف
مش هروح معاك البيت، انا عايز اروح لنيللي
يزن
ما تسيبها في حالها بقي وما تنسااش ان في وصولات امانه مع حماك توديك في داهيه..
يوسف
ما انا عشاان كده رايح لنيللي، امشي انت بقي وما تدخلش في الموضوع ده تاني
يزن بحده
الحق عليا يعني اني جاي هنا عشاانك..
يوسف
يزن بالله عليك مش ناقص تقطيم ما تدخلوش في حياتي تاني انتو فاهمين..
_قال كلامه وكان لسه هيمشي بس يزن اخد باله من الحارس بتاع فتحي اللي كان مطلع ايده من شبااك العربيه وهو ماااسك مسدسه وموجهه ناحية يوووسف، فبكل تلقائيه وبدون تفكير مسك يزن مسدسه ووقف قدام يوسف وضرب علي الحارس بس الطلقه ما جاتش فيه، وفي الوقت ده رجالة فتحي ضربو يزن بالنار في صدره فوووقع علي الارض ويووسف بيحاول يسنده وفتحتي ورجالته مشيو من المكان بسرعه كبيره..
يوسف
يزن... رد عليا ييييزن..
ــــــــــ #بقلم_الكاتبه_رحاب_القاضي ــــــــ
_وفي الصعيد رجع عبدالله البيت وكان شكله متدايق جدا، وكان عز وكمال وروان مستنينه، وقاامت روان بسرعه وقالتله..
روان
انت كويس عملت ايه؟
بصلها عبدالله بحده وقال
مش قولتلك ما تقوليش لحد انا رايح فين، بس ابقي قابليني لو قولتلك حاجه تاني..
كمال بحده
وما تقولناااش ليه انا لازمتي ايه معاك
عبدالله
انت اهلا وسهلا بيك بس الموضوع ده ما يخصكش في حاجه مشاااكل البلد دي مسؤليتي انا
كمال
لا البلد دي بلدي زي ما هي بلدك ولو هنمشيها بالاصول والعدات والتقاليد يبقي انا كبيرها عشان انا الاكبر منك وكنت المفروص امسك البلد كلها بعد ابويا
روان
نعمم طيب ازاي انت تبقي كبير البلد اتنيل
عبدالله
استني بس يا روان، انت عايز تبقي الكبير بجد؟
عز قاام وقال لكمال
قول انك بتهزر احسنلك وبلاش اسمع مني..
كمال
انا مش صغير يا خالي وايوه يا عبدالله هبقي الكبير وهجيب اسرار وبنتي وهعيش هنا في البلد هعمل الشغل اللي عايزه هنا هنجح في بلدي وسط اهلي
كمال
ريحتني يا حبيبي مبرووك عليك من بكره هقول للناس كلها انك انت العمده والكبير بتاع البلد، وانا هبقي تحت امرك يا اخويا يا كبير بس برضو موضوع تار عمر انت مالكش دعوه بيه فاااهم
كمال
هو عمر ده مش ابن عمي انا كمان واخو مراتي...
عبدالله بحده
بس ماا ماتش بسببك ما ماتش مكانك عشان تدخل في الموضوع ده، ما كانش صاحبك الوحيد واخوك ومن وانت عيل متربي معاه واتقتل ومات قدامك علي ايد خلف وابنه، ما حدش فيكم هيحس بالنار اللي جوايا من يومها ومش هرتاح غير لما اقتل يا خلف يا ابنه..
عز بغيظ
تفكير عقيم لما هتقتل واحد منهم عمر هيرجع ولا هتفتح بحر تار بين العيلتين مش هيخلص
عبدالله
ما تقلقش يا خالي انا عارف انا بعمل ايه كويس..
وبص لكمال وقال بجديه
ويا كبير بكره هقول قدام البلد كلها انك الكبير واتحمل بقي المسؤليه اللي من لما ابوك مات وانا شايلها علي اكتاافي..
_قال كلامه وسابهم وطلع اوضته وفضل كمال واقف متعصب وقاله عز بسخريه..
عز
مدام مش قد الكلام بتقوله ليه وتقرفنا معاك
كمال
ما انا ما كنتش فاكر انه هيمسك في الكلمه يعني، وبعدين يكبرني هو يشاركني همومه
عز
روان روحي اتكلمي معاه وخليه يهدي شويه انا وكمال وانتي والعيله كلها خايفين عليه..
روان
حاضر هقول للشغالين الاول يجهزو العشا وبعدين اروحله..
ومشيت روان وعز قال لكمال بجديه
عايز تبقي جنب اخوك وتشاركه اللي بيعمله اعمل كده من نفسك حسسه انك خايف عليه
كمال
وانا بعمل ايه دلوقتي يا خالي
عز
انت بتقوله والنبي خليني معاك، لا ما تطلبش منه حاجه انت خليك جنبه حسسه انك خايف عليه ما تفرضش عليه انه ياخدك معاه مشوار ولا يحكيلك حاجه، هو اما يتأكد انك قاعد معاه ومش هتسيبه وتمشي زي عادتك من نفسه هيشاركك كل حاجه جواه، كنت انا وخالك حسن كده في الاول لما كنت ديما مسافر وبعيد عنه وعنكم، واول ما جيت كان مستغربني ده كان بيخلي ليلي والبنات ما يقعدوش معايا كتير ولا ياخدو عليا بس واحده واحده عرفت اكسب ثقته فيا اني عمري ما هبعد تاني عنه ولا اسيب اهلي تاني، فهمت يا كمال..
كمال
بصراحه لا اعمل ايه يعني
عز بغيظ
يااخي غور ينعل ابو رخامة اهلك..
_وفي الوقت ده في اوضة عبدالله دخلت لقيته بيتكلم في الموبيل، ففضلت قااعده جنبيه علي السرير لحد ما خلص مكالمته وقالتله..
روان
كنت بتكلم مين؟
عبدالله
شغل..
روان
ما تزعلش مني يا عبدالله انا كنت خايفه عليك
عبدالله
كنت هخلص كل حاجه النهارده، خرووج كمال من البيت عطلني انا مش عايزه يتأذي ولا تحصله حاجه
روان
يبقي الموضوع خطر ومش هيعدي
عبدالله
خلاص انا اصلا مش هعمل حاجه
روان
كدااب بتقولي كده عشان ما اركزش معاك
عبدالله قرب منها وقال
بقولك ايه سألتك قبل كده بتعرفي ترقصي ولا لا وما ردتيش عليا..
روان بصتله بعدم فهم وقالت
ايه علاقة سؤالك ده بالمشكله اللي احنا فيها؟!
عبدالله
لا مشكله ولا حاجه انتي كبري دماغك من الموضوع ده، انا عايز اجي هنا انسي كل القرف اللي بره ها بتعرفي ترقصي؟
قامت روان من جنبيه وقالت
يا عبدالله هو ده وقته...
عبدالله
ايوه وقته متجوزين بقالنا اد كده لا شوفت دلع ولا حاجات حلوه ولا اي حاجه، اومال انا متجوزك ليه..
روان بغيظ
متحوزني عشان الدلع وبس يعني مش عشان بتحبني؟
عبدالله
الاتنين وما تنكديش عليا عشان ما اطلعش عكننة اليوم كله عليكي..
روان
انا نازله اتعشي هتيجي تعالي ما تجيش يبقي احسن..
قام عبدالله وقف قدامها وقال
ما فيش نزول نبقي نتعشي لوحدنا بعدين...
روان بخجل
بس انا قولتلهم اننل نازلين نتعشي مع بعض
عبدالله
فكك منهم بقولك جاي مخنوق يا غبيه خلي عندك دم..
روان ضحكت غصب عنها وقالت
يا عبدالله ما ينفعش كده والله شكلنا هيبقي وحش..
خرج عبدالله من الاوضه وقال بصوت عالي
يا خالي اتعشي انت وكمال وخليهم يجيبولي العشا فوووق انا وروان
كمال بغيظ
شايف يا خالي البرود، بقي انا سايب مراتي وبنتي وامي وجاي ورااه هنا وهو ولا علي باله
عبدالله بحده
ما تقعدش يا حبيبي هو انا قولتلك تيجي اصلا
عز بنفاذ صبر
اتلمم بقي انت وهو عيال صغيره كل سويه تمسكو في بعض، وانت يا عم عبدالله رووح يا اخويا شووف هتعمل ايه وهخليهم يبعتولك الطفح لحد عندك، وانت بكره تساافر لامك يا تبعت تجيبها انا مش قادر عليكم انتو الاتنين ده ايه الغلب ده، ده انا مخلف نسمه والله الواد زين ده يتعمله تمثال يا قليل الربايه منك ليه..
ضحك كمال هو وعبدالله اللي قال
تسلم يا خال قولهم بقي يبعتو العشا بسرعه
قال كلامه ودخل عند روان اللي قالتله باحراج
والله ما عندك دم حد يعمل كده..
قرب منها جدا وقال
ايوه انا هاا هتعرفي ترقصيلي ولا اروح اتجوز التانيه..
روان
عشان كنت اقتلك فيها، بعرف بص اصبر عليا شويه كده اتجرأ الاول..
قعد عبدالله علي السرير وقال
وانا معاكي للصبح اما نشووف اخرتها..
ــــــــــ #بقلم_الكاتبه_رحاب_القاضي ــــــــ
_وفي بيت يوونس الصااوي كان قااعد يونس في مكتبه وبيكلم يزن بس ما كانش بيرد عليه وبدأ يقلق علي ولاده ودخلت عنده شهد وقالت بخوف..
شهد
ها ما فيش اخبار عنهم؟
يونس
بكلم يزن اهو ما بيردش
شهد بدموع
انا حاسه ان حد منهم حصله حاجه، قلبي مش مطمن منك لله يا يونس انت السبب في كل المشاكل اللي في حياتي كان يوم اسوود. يوم ما شوفتك
يونس بغيظ
هخبطك بالموبيل في وشك ما تتلمي يا وليه ده ايه ده، النكد بيجري في دمك ده انا اللي كان يووم اسود يوم ما شوفتك
_قبل ما ترد عليه شهد شافت ريناد واقفه عند الباب فقالتلها بتوتر..
شهد
تعالي يا ريناد في حاجه ولا ايه يزن كلمك؟
ريناد دخلت وقالت بتوتر
لا انا كنت جايه اسألكم عليه عشان بكلمه مش بيرد واتأخر اووي..
شهد
يونس كلم حد من رجالتك اللي معاه..
يونس
بكلمهم اهو ما حدش راضي يرد، يوسف بيرن عليا اهووو..
رد هليه يوونس بسرعه وقال
الو ايوه يا يوسف اخوك وصلك؟
يوسف بنبره مهزوزه مليئه بالخوف
يزن بيموت يا بابا احنا في المستشفي تعالي بسرعه
_انقبض قلبه بخووف واتملت عيونه دموع، وشهد قربت منه وقالت بقلق وخوف..
شهد
في ايه ماله يوسف..
ومسكت الفون من ايده وقالت
يوسف رد عليا يا حبيبي انت كويس
يوسف
ايوه يا ماما انا كويس
شهد
طيب الحمد لله يلا تعالي انت واخوك وقعتي قلبي عليكم، تعالو ونتكلم ونحل كل حاجه سوا يلا..
يوسف بدموع وتوتر
بب بابا هيجيبك معاه المستشفي
شهد بحده
مستشفي ليه انت مش بتقول انكم كويسين؟
يوسف
يزن حالته خطر اووي وو وانا مش عارف اعمل حاجه اصابته خطيره والدكاتره بيحاولو ينقذووه
شهد بانهبار
انت بتقول ايه ازاي يعني تخلي اخوك يحصل في كده
ريناد بخوف
في ايه يا طنط ماله يزن..
اخد يونس منها الموبيل وقال بجمود
ابعتلي عنوان المستشفي بسرعه..
قفل مع بوسف وشهد قالتله بحده
انت السبب قولتلك بلغ الشرطه او روح انت ما تخلهمش لوحدهم ما سمعتش كلامي
يونس بحده
انا مش نااقص كلامك يا شهد نطمن عليه الاول وبعدين قولي اللي عايزااه
ريناد بدموع
هو في ايه طيب يزن في المستشفي ليه؟
قرب منها يونس وقال بجديه
ادي بنتك ليارا وتعالي معانا ان شاء الله هيبقي كويس..
_ورااحو فعلا كلهم المستشفي وكان يووسف قااعد قدام اوضة العنليات ووشه مليان كدمات وقميصه كلهم دم من اصابة يزن، قربت منه شهد وقالت ببكاء وخوف.
شهد
ماله اخووك يا يوسف حصل ايه ؟
يوسف بدموع
انا السبب فتحي الجرجيري كتن قاصدني انا وهو بيداافع عني جات الرصاصه في قلبه وفي منطقه خطر..
ـ نزلت دموع شهد وقعدت علي الكرسي جنبين وهي بتعيط بخووف كبير وبتدعي ان ابنها يقوم ويبقي بخير، وقعدت جنبيها ريناد اللي كانت بتعيط هي كمال ويوسف بص لباباه بقلق وقرب منه وقاله...
يوسف بدموع
انا اسف يا بابا وو..
_قبل ما يخلص كلامه نزل يونس بأيده علي وشه بكل قوته، ومسكه من هدوومه وقال بحده..
يونس
مش عايز اشووف وشك تاني فااهم
شهد بحده
هو ده وقته كفايه بقي يا يونس
يونس بنبره غاضبه
انتي تخرسي خالص دلعك ليه هو اللي وصلنا لـ اللي احنا فيه دلوقتي ده، من النهارده انت لا ابني ولا اعرفك انت عيل فااشل مالكش اي لازمه، انا ماليش غير يزن بتسند بيه هو انما انت هعتبرني ما خلفتكش اصلا واحسنلك ما تخلنيش اشووف وشك تاني عشان ما اخليكش تكره اليوم اللي بقيت فيه ابوك..
وذقه جامد وقال بنبره غاضبه
غووور يلا من وشي..
_بصلهم يوسف بحزن وعيونه ملياانه دموع وسابهم ومشي ولاول مره تقرر شهد ما تروحش ورااه ولا تصالحه، سابته يتحمل نتيجة افعاله لوحده، وفي الوقت ده في اوضة نيللي كانت قااعده معاها ريم صاحبتها اللي ما سبتهاش خالص من لما فاقت ومامتها اللي قالتلها بعصبيه..
سوزان
بقي انتي زعلانه عشان باباكي عملك قيمه وجابلك حقك من الناااس اللي بهدلوكي دول؟
نيللي بضيق
نااس مين انا مشكلتي مع يوسف ما شوفتش حاجه وحشه من اهله، يزن ده اللي حياته في خطر بسبب جوزك لولاه كنت هموت هو اللي انقذني وجابني المستشفي، خايفين اوووي عليا ما كنتوش خلتوني اتجوز واحد انتي وهو عارفين كويس ان اخلاقه بايظه وولد مش كويس...
سوزان
اهو اللي حصل بقي مالكيش دعوه انتي بالموضوع ده وباباكي هيتصرف
نيللي بحده
انتو اللي مالكمش دعوه بحياتي تاني، انا هحل المشاكل دي بنفسي هتطلق ومش عايزه منهم حاجه تاني خلاص كده موضوع وانتهي..
سوزان
انا بجد زهقت منك اللي عايزه تعمليه اعمليه المهم ما تعمليش حاجه تخلي شكلنا وحش قداام الناااس ولا تفضحينا يا نيللي...
قالت سوزان كلامها ومشيت وريم قالت
انتي ناويه تعملي ايه بجد؟
نيللي بضيق
مش عارفه شوفتي برغم اللي حصل ده كله بس يوسف صعبان عليا، هو غلط ايوه بس ما يستاهلش العقاب ده ولا ان اخوه يحصله اللي حصل ده
ريم بسخريه
وترجعي تقولي ما بتحبيهوش كان هيموتك وابنك رااح بسببه وتقوليلي صعبان عليكي، ما يصعبش عليكي غالي يا نيللي
نيللي بدموع
يمكن حبيته لدرجة اني بشيل الذنب انا في كل مره عشان مش عايزه اشووفه وحش، بس والله ما هقرب منه تاني بعد اللي عمله فيا ده هو قفل كل الطرق اللي ممكن تجمعني بيه..
ريم
برضو ناويه تعملي ايه؟
نيللي
هقولك بس بيني وبينك لو قولتي لحد والله يا ريم هيبقي اخر صداقتنا..
_تفتكرو بقي نيللي ناويه علي ايه؟
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كانت رضوي قااعده في اوضتها ودخلت عندها ليلي وقالت..
ليلي
كلمتي هنا؟
رضوي
ايوه قالت جايه في الطريق هي وطارق
ليلي
طيب كان صوتها حلو ولا زعلان؟
رضوي
لا كانت مبسوطه وبتهزر هي وطارق كمان
ليلي
ربنا يصلح ما بينهم ويتمملهم علي خير، انا هرووح انام وانتي استنيها تيجي واتعشو سوا، انتي ما اكلتيش حاجه علي العشا
رضوي
حاااضر يا ماما تصبحي علي خير
ليلي
وانتي من اهل الخير يا حبيبتي.
_ومشيت ليلي ورضوي فضلت تقلب علي موبيلها لحد ما جاتلها رساله من حامد بيقولها فيها..
حامد
في جلسه الاسبوع الجاي هتيجي مش كده؟
ابتسمت رضوي وقالت
ان شاء الله هشوف اهلي ولو قدرت اجي هاجي
حامد
بصي هو انا عارف ان مش وقته، بس انتي فكرتي في الموضوع بتاعنا؟
_رضوي افتكرت شكلها في الفستان الابيض لما لبسته وابتسمت بهدوء وردت عليه وقالت بتوتر
رضوي
ايوه فكرت وكلمت اهلي كمان
حامد
طيب حلو ايه بقي اسمعها معلش عشان اتاكد انتي موافقه بيا ولا لا؟..
_ابتسمت بخجل بس قبل ما ترد عليه لقيت موبيلها بيرن برقم يووسف، فأختفت ابتسامتها واتنهدت بضيق وقالت لنفسها..
رضوي
عايز مني ايه تاني يا يوووسف، مصمم تخليني ابقي تعيسه بس والله ما هسكتلك المره دي برضو..
وردت عليه وقالت بحده
عايز مني ايييه تاني ما تسيبني في حالي بقي
يوسف بنبره كلها حزن
انا محتاجلك اووي يا رضوي انا خسرت كل حاجه، بس مش عايز غيرك انتي ولو ما جتيش هتبقي كده كل حاجه انتهت بالنسبالي وو..
رضوي بقلق
في ايه احنا مش خلاص اتكلمنا كتير عندك مراتك وحياتك انشغل فيهم وسيبني بقي انا كمان اعيش يا يوسف
يوسف بحده
انا مش عارف اعيش من غيرك مش قادر انساكي ودي المشكله، انا خسرت نيللي وخسرت ابني اللي في بطنها وخسرت اهلي ويزن بسببي حالته خطر، ارجوكي تعالي محتاجلك اووي يا رضوي المره دي ما ليش غيرك بجد يبقي جنبي، افتكريلي طيب حاجه واحده بس حلوه كانت بينا، انا للدرجه دي كنت وحش معاكي انتي كمان..
اتملت عيونها دموع وردت عليه وقالت
انت فين انا هجيلك؟..
ابتسم يووسف من وسط دموعه وقال
هبعتلك الوكيشن بتاع المستشفي انا قااعد تحت لوحدي هستناااكي..
_قال كلامه وقفل معاها وهي بصت تاني للرساله بتاعت حامد اللي بيسألها فيها عن رأيها في موضوع جوازهم، وما ردتش عليه وخرجت من المحادثه، وغيرت هدومها وخرجت من البيت بسرعه من غير ما تقول لحد لانهم اكيد كانو هيمنعوها، وكلمت ريناد في الوقت ده وعرفت اللي حصل ليزن وقررت برضو تروح تطمن عليه، واول ما وصلت المستشفي شاافت يووسف قااعد بره المستشفي في الحديقه الخاصه بيها، واول ما شاافها قاام بسرعه وقرب منها وحضنها بكل قوه وقال وهو دموعه بتنزل بحزن كبير..
يوسف
انا تعباان اووي يا رضوي، انا خسرت كل حاجه بجد المره دي..
_اتنفض جسمها بخوف وحزن وتوتر من قربه،بتشفق عليها وعايزه تفضل جنبه وجواها احساس تاني بيقولها تهرب منه وانه هيوحعها وهيأذيها تاني، وبعدت عنه بسرعه وقالت بضيق..
رضوي
انا جيت عشان اطمن علي يزن وعشان ما احسش بالذنب ناحيتك ما اتعودتش اخزل حد عشمان فيا..
مسك يووسف ايدها وخلاها قعدت جنبيه وقال
طيب ممكن تسمعيني انا غلطت فعلا بس والله الوقت اللي غلطت فيه انتي ما كنتيش معايا، وغلطت اكتر لما سيبتك ما كانش ينفع ابعد عنك، انا بعك وبغلط اكتر وانا بعيد عنك..
بصتله رضوي بعدم فهم وهو بدأ يحكيلها اللي حصل بينه وبين نيللي من اول ما راحلها الشقه لحد ما سقطت ابنها بسببه، واللي حصل ليزن علي ايد. حمااه، وقال بنبره كلها حزن وندم..
يوسف
من غير ما تتكلمي عارف اني غلطان وان اللي عملته ده مستحيل حد من اهلي يسامحني عليه ولا حتي نيللي
رضوي
انت ظلمتها اووي يا يوسف انا مش مصدقه انك انت تقدر تعمل كده في حد، طيب غلطخ زي ما بتقول انت السبب الرئيسي فيها تحملها ليه الذنب كله وكمان تضربها لدرجة انها كانت هتموت وتموت ابنك بأديك، انت ازاي كده ولا انت اصلا قاسي ووحش وانا اللي مخدوعه فيك وبصدقك
يوسف
يا رضوي ارجوكي بلاش كلامك ده، انتي لو كنتي سمعتيني ما كنتش اا..
رضوي
انا ايه يا يوسف هتحملني انا الغلط كمان..
يوسف بجديه
لا انا اللي غلطان في كل حاجه، وانا اللي ظلمت نيللي واذيتها طيب والحل ايه دلوقتي؟
رضوي
مش عارفه بس اهم حاجه نطمن علي يزن والباقي يتحل ..
مسك يوسف ايدهت وقال
هقدر احل كل حاجه واقف قدام الدنيا كلها بس وانتي معايا، انا بعشقك يا رضوي لدرجة اني من غيرك ما بعرفش اعيش ببقي تايه..
رضوي سحبت ايدها من ايده وقالت
هبقي جنبك واساعدك بس عشان انا بتطمر فيا العشره ومش معني كده اني هرجعلك، انت ما شوفتش انا عشت ايه ولا اتعذبت ازاي بسببك، مش فاهمه ازاي اصلا هونت عليك تسيبني قبل فرحنا باسبوع من غير ما تحكيلي اي حاجه، كانت معرفه سودا والله..
يوسف
حقك تقولي كده بس والله كل لحظه وانا بعيد عنك وعارف انك موجوعه بسببي انا كنت بتعذب فيها اسوود فتره في حياتي هي اللي عدت دي، انا بحبك انتي لا حبيت ولا هحب اي واحده غيرك
رضوي
بس انت لسه متجوز نيللي يعني علاقتنا ما ينفعش ترجع
يوسف
جوازي منها كان تصليح للغلط اللي قولتلك عليه، لا هي بتحبني ولا انا حتي بقبلها ما بحبهاااش وما اديتهاش فرصه تشوف مني حاجه حلوه تتعلق بيا عشانها، انا بحبك انتي وبس ومش هسيبك يا رضوي لو الدنيا كلها وقفت في وشي مستحيل ابعد عنك وانا ما ببقاش كويس ومرتاح غير معاكي..
_قبل ما ترد عليه رن موبيلها بأسم حامد وهو شااف اسمه علي موبيلها واتحولت ملامحه للغضب وقال..
يوسف
حامد يا رضوي انتي ايه علاقتك بيه،وايه اللي بينك وبينه وازاي عرفتيه وبقي معاه ىقمك وبيكلمك وكان قبل كده بيوصلك للبيت؟
رضوي بتوتر
حوار كبير بس... انا مش عارفه اعمل ايه..
يوسف
ردي عليه وقوليلو ما يكلمكيش تاني
رضوي
لا ما ينفعش حامد شخص كويس جدا علي فكره، انا هبقي اكلمه بعدين هروح اشووف يزن وابقي كلمك اطمنك عليه
يوسف بغيظ
هتكلمي حامد تاني؟
رضوي بحده
علي فكره انت دلوقتي مالكش كلام عليا ولو كنت هفكر ارجعلك في حاجات كتير في علاقتنا اتغيرت يعني مش هنبقي زي الاول، وبرضو مش وقته الكلام ده اخوك تعبان ولازم نتطمن عليه الاول وانت لسه متجوز اياً كان حياتك الزوجيه عامله ازاي انت بالنسبالي راجل متجوز..
اتنهد يوسف بضيق وقال
مااشي اللي يريحك انا قااعد هنا لحد ما اطمن علي يزن الاول، هستناااكي تطمنيني عليه..
_ما ردتش عليه رضوي ودخلت المستشفي وفي الوقت ده كانت واقفه ريم في الشبااك بتاع اوضة نيللي وشاافت يوسف وهو قااعد مع رضوي وقالت...
ريم
يزن الصاوي في المستشفي هنا
نيللي
ما هو المستشفي دي يونس الصاوي مستثمر فيها، بس انتي عرفتي منين؟
ريم بغيظ
شووفت جوزك قااعد مع خطيبته الساابقه تحت اهو وكان ماسك ايدها وبيحب فيها ولا كأن اخوه تعبان ولا انه متجوز، واحد زباله وهي بنت ما عندهاااش كرامه
اتملت عيون نيللي دموع وقالت
والله ما حد ما عندوش كرامه في الحكايه دي كلها غيري انا، هي حبيبته من الاول انا اللي دخلت بينهم واخدته منها، بس كل حاجه هترجع لطبيعتها...
_تفتكرو بقي ايه اللي هيحصل لابطال روايتنا؟
ــــــــــــــــــــــــــــــــــــــــــــــــــــــــــــــــــــــــــــــــــــــــــــــ
#بقلم_الكاتبه_رحاب_القاضي
