رواية شبه قاتل الفصل الخامس
( وليد) ما صدق إنه ح يكون في حل لى مشكلة زي دي عشان كدا طوالي قال:
- أي حاجة بعملا، أتصل بى منو
( جوان) قالت:
- إنت لحدي هسة في نظر الجميع ( سامبو) الشرس اللي مابرحم، ولحدي ما تثبت ( مارينا) عكس دا نكون نحنا إستغلينا الموقف صاح، لازم نعمل كدا وإلا نهايتنا ح تكون بشعة
( وليد) خايف يطقطق في أصابعيه:
- طيب ح نستغل الموقف كيف؟
( جوان) شالتها الهاشمية زي مابقولوا.. كانت ماسكة سماعة التلفون ضغطت عليها شديد:
- ح أطربقها فوق روسينهم كلهم، ح أنتقَم من المافيا ومن ( مارينا) ومن ( إدواردو) ومنك إنت كمان
( وليد) نطط عيونه:
- مني أنا؟
( جوان) يادوب وِعت وعرفت إنه جلطت في الكلام.. إتنحنحت خايفة:
- أنا قلت منك؟ لا ماقصدي، قصدي منهم
( وليد) بقى يفكر في نفسه:
[ ليه ( جوان) بتكرهم كلهم؟ و الورّطا أصلا" مع ناس زي ديل شنو؟ يارب قصتك شنو يا ( جوان) ]
( جوان) بقت تهز السماعة الفي يدها و تقول لى ( وليد) :
- أها يا ( سامبو)، قرارك النهائى؟ أعمل إتصال ولا لأ؟ وهل ح تزعل مني لو رجعت ليك الذاكرة وعرفت إنه أنا السبب في تدمير قلعتك؟
( وليد) رد سريع:
- مابزعل، أعملي أي حاجة أنا في عرضك، المهم أمرقينا من هنا
( جوان) هزت راسها يعني تمام.. إتصلت بى رقم و وقفت مسااافة حتى رد صوت:
- إنت متصل على ( العمليات الخاصة) عشان تنفيذ ( الخطة ب)، لو كان إتصالك عن طريق الخطأ رجاءا" أقفل الخط، ولو كان إتصالك مقصود، رجاءا" زودنا ب كود تفعيل الخطة.
( جوان) ردت سريع:
- بى كابيتال، سبعة و تسعين، صفر خمسة و تلاتين، متين و عشرين، إس سمول، إسلاش، صفر تسعة تمانية
صاحب الصوت من سمع الكود من ( جوان) بقى يكورك بى طول حسه:
- يلا يلا يلا، (الخطة ب) قيد التنفيذ
وسمعته يكورك لى واحد ( رو)، ( رو)، تعال كلم بسرعة.. بعد شوية سمعت ( جوان) واحد نفسه طالع و نازل من شدة وقع المفاجأة من تنفيذ ( الخطة ب) فجأة كدا بدون مؤشرات ملموسة.. بس الكود ال قالته ( جوان) ما بعرفه غير إتنين بس.. ( سامبو) و ( إدواردو).. و بما أنه ( إدواردو) مافي.. فأكيد ( سامبو) هو الأمر بى كدا.. و أكيد مافي واحد بقدر يناقش ( زعيم المافيا) ليه تم طلب تنفيذ ( الخطة ب).. بس كل المفهوم بالنسبة لى قادة المجموعات الكبيرة و المؤثرة في العصابة إنه بتم اللجوء للخطة دي في حالة يكون في ( خيانة).. خيانة ضد واحد من الزعيمين.
( رو) مسك السماعة:
- ألو؟
( جوان) ردت مبسوطة:
- ( رو)؟
- أيوا، الحاصل شنو؟ ( سامبو) بخير؟
- لحدي هسة بس، ( مارينا) فقدت عقلها و مصممة تكتل ( سامبو)، قالت عاوزة تبقى ( الزعيمة) لحدي ما يرجع ( إدواردو) عشان ( سامبو) ما مؤهل حاليا"، شكله كدا إتعرض لتعذيب شديد لما إتقبض عليه آخر مرة و فقد الذاكرة، بتين يا ( رو) بتحكم ( المافيا) مرا؟
( رو) زعل:
- دي **** خاينة، أنا ما ح أنسى فضل ( سامبو) علي لما أنقذني من ( إدواردو) الكان خلااااص قررب يكتلني، وكله بى سبب ******** دي.
- لازم تتحرك سريع يا ( رو) لأنه ( مارينا) ح تكلم رجالها وهم كتيرين شديد، هي ما ح تتوقع تنفيذ ( الخطة ب) عشان كدا هجومكم ح يربكهم شوية لحدي ما تتنفذ الخطة بالكامل.
- هسة ( سامبو) معاك؟
- معاااي يسمع في الكلام، بس ( رو) شوف لينا طريقة أول نهرب بيها قبل ما تنفذوا هجومكم عشان بِت الحرام دي ختانا في راسها
- ح تجيكم مروحية هسة بعد ما أنهي المكالمة معاك، إنتي و ( سامبو) أجروا طوالى السطوح عشان الحرس الفي السطوح ح يأخروكم بلأسئلة التقليدية، بعد ما يعرفوا سبب مغادرتكم بالمروحية شنو، ح يخلوكم تمشوا، و حتى لو ماخلوكم ما تخافي، ( الطيّار) فاهم ح يساعدكم، يلا يا ( جوان) أجروا سريع، بدينا تنفيذ الخطة.
( جوان) كوركت:
- دقيقة دقيقة ما تقفل
- في حاجة تاني؟
- أيوا، لو لا سمح الله ماقدرتوا تنفذوا الخطة، عارف وين مكان ( زر التفجير الذاتي)؟
- ( جوان)، كلنا عارفين في زِر بفجر القلعة و بنسفها نسف، وعارفين الوحيد ال عارف مكانه هو ( سامبو) بس، و عملوا لو ح تسقط ( المافيا) في يوم من الأيام، عشان مافي شرطة ولا جيش ولا أي عصابة تانية تستفيد من المعدات و الأسلحة و الدهب و المجوهرات و القروش المخزنة في القلعة تحت الأرض، تفتكري زِر بالخطورة دي ح يكون عارفه أي واحد؟ الزِر دا معناهو ( نهاية المافيا).
بس جا الرد صادم من (جوان) :
- أنا عارفة مكانه.
( رو) إنصدم.. ( جوان) كملت :
- كلمني ( سامبو) بى مكانه قبل كدا، كان سكران لط، أنا قلت يمكن لو عرفت مكانه و الأمور ما مشت تمام تطربقها عليهم، لأنه إنتو يا إما تنجحوا في خطتكم، ولا ح يقطعوكم حِتت و إنت أدرى الناس بيهم
- أكيد ح نحتاج ليهو يا ( جوان) لأنه نحن عارفين ما ح نفوز عليهم في النهاية، مافي مقارنة بينا و بينهم، هم زايدين علينا في أي شي، بس نحن عشان خاطر ( سامبو) مستعدين نضحي بى أرواحنا
- عارفة يا ( رو)، و بتمنى ليكم حظ موفق
- طيب، الزِر مكانه وين
- شفت التمثال ال في الساحة؟
- أكيد
- بس، الزِر هو نفسه عينه الشمال
( رو) فتح خشمه مندهش:
- يا بن المجرمة 👈 [ قاصد ( سامبو) طبعا"].. ( رو) كمل:
- زِر خطير زي دا مافي زول ح يتوقع إنه موجود قدام الناس في مكان واضح ظاااهر
( جوان) قالت:
- شفت ( سامبو) خطير كيف
( رو) قال:
- يلا يا ( جوان) إتحركي بسرعة نحن شايفين من كاميرات المراقبة الهليكوبتر ح تنزل على السطح خلاص
- خلاص تمام، و شكرا" ليك كتييير يا ( رو)
( جوان) ختت السماعة.. مسكت ( وليد) من يده:
- يلا سريع، ومهما حصل ما تقيف، أجري بس
( وليد) الكلام ما عجبه لأنه حس الشغلانة ما ح تكون جري و بس.
_____________________________________________
( مارينا) كانت لسة قاعدة في الصالة مغمضة عيونها.. بس فجأة فتحت عيونها مندهشة.. الصوت السامعاهو دا فعلا" حاصل ولا بتهيأ ليها؟ بس الرد جاها سريع.. جو إتنين جاريين لى ( مارينا).. و قبل ما يتكلموا ( مارينا) سألت واحد منهم:
- في شنو يا ( ديف)، دا شنو صوت الرصاص دا؟
( ديف) رد:
- دا ( رو)، شكله كدا فقد عقله، هو و رجاله بهاجموا في الناس من طرف، الناس كلها بقت تضرب نار، ماعارفة المعاها من ال ضدها، كل واحد بكتل في أخوهو
( مارينا) صرخت:
- وإنت واقف تتفرج؟
- طبعا" لأ، بس كلهم رجالنا، عاوزين نعرف سبب المشكلة شنو و نحلها
- طول عمرك غبي، ( رو) بقتل في رجالنا من طرف و إنت عاوز تعرف السبب؟
قامت على حيلها و كملت:
- رسل إشارة لى كل الوحدات و أولها ( الدفاع الجوي)، خليهم يمسحوا المتمردين مسح
( ديف) ما إتحرك من مكانه.. واقف بعاين ليها مستغرب.. ( مارينا) كوركت فيهو تاني:
- واقف مالك
( ديف) إتردد.. قال:
- دفاع جوي عشان حبة متمردين؟ كدا ح يموتوا كل الرجال و يمكن ( سامبو) ما....
طاخ.. ( ديف) جا داقي الواطي و الدم جاري من فتحة في راسه.. ( مارينا) نفخت الدخان الطالع من ماسورة مسدسها.. فتحت خزنة المسدس لقتها فاضية.. كانت آخر طلقة و ختتا في راس ( ديف).. في اللحظة ديك جات ( جوان) جارية من غرفتها ماسكة ( وليد) من يده جاريين طالعين السلم ال بودي السطوح.. و جروا بى سرعة أكتر لما شافوا العملتو ( مارينا).. ( مارينا) الدم طلع ليها في راسها لما شافت ( جوان) و ( سامبو) عاوزين يهربوا.. كوركت في المجند الواقف لسة مخلوع بعاين في رئيسه ( ديف) ال كتلته ( مارينا) بى دم بارد:
- جيب مسدسك سريع
المجند أداها المسدس يرجف.. ( مارينا) نهرتو :
- سمعت القلتو؟
- أيوا أيوا سمعت
- طيب لسة واقف بتعمل في شنو؟ أمشي سريع طلع الوحدت كلها الساحة، ماعاوزة لي واحد من رجال ( رو) أمه تعرفه، قطعوهم حِتت
المجند جرى جري شديد خايف تجيهو رصاصة برضه في نص راسه.
( مارينا) ماسكة المسدس في يدها نطت السلالم درجتين درجتين جارية ورا ( جوان) و تكلم في نفسها:
- لحدي ما تجاوبي على الإسئلة الروتينية من الحرس يابِت الحرام بكون وصلتك، وساعتها ما ح أرحم أمك.
( مارينا) وصلت السطح شافت ( جوان) تتكلم مع الحرس بى عصبية شديدة و ( وليد) مدنقر خاتي يديهو على ركبتيه و يلهث من التعب.. الحراس طبعا" بعاينو ليهو مستغربين.. مفروض هو على درجة عالية من التدريب.. ومفروض حبة سلالم زي دي ما تأثر عليهو.. ( جوان) البنت اللي ما محترفة ما تعبت.. بتعب هو؟
المهم.. ( مارينا) وصلت السطح ماسكة مسدسها في يدها.. الحراس لما شافوها مطلعة مسدسها طوالي مسكوا مدافعهم الرساشة في وضعية الإستعداد لما سمعوا ( مارينا) بتقول لى ( جوان) بى شماتة:
- على وين يا حلوة؟
