رواية الشيخ مرجان الفصل الواحد والاربعون 41 بقلم محمد يوسف
#البارت41🖊️ Mohamed Youssef Sultan
فضلت قاعد حوالي ساعة مستني يحضروا الفلوس
علشان اخدها وامشي ولما زهقت كلمت ابو العروسة قالي
حاضر ابو العريس دبح خروف وحالف طلاق ما تمشي الا
لما تتعشي وتاخد لحمة وانت مروح
قولتله لا شكر أنا مش جعان ولا عايز لحمة حلف هو
كمان عليا واتعصب ...قولتله ماشي ممكن بقي الفلوس
قالي ثواني وطلع 7000 وقالي الباقي اسبوع بالكتير ويكون معاك
قولتله لا الراجل مش هيصبر وهيسالني أنا في الفلوس
سمعنا ابو العريس والعريس وحضروا الكلام ودفعلي
ال3000 وقالي أنه هيبقي يخدهم منه بعد اسبوع
مدبولي ومراته قاعدين زي الكلاب مستنين ياكلوا
ويخدوا لحمة وهما ماشين ..عالم عررر
وفجأة واحنا قاعدين دخل علينا العقيد غلاب ..الدنيا
اتقلبت والكل قام وقف وظهر ع وشهم علامات القلق
والخوف راجل ليه هيبة وفعلا شكله يخوف والدخلة
بتاعته بالعساكر كانت تخض
كان عنده خلفية بالموضوع معرفش مين اللي قاله
وعرفت دا لما سال ابو العريس وقاله ايه الاخبار
قاله الحمد لله ياسعادة الباشا كله تمام والواد دخل
بصلي واخد نفس من السيجارة اللي في أيده وقال ..ما
أنا اخدت بالي من الدبايح وصوت الزغاريد..الف مليون
مبروك ربنا يرزقهم بالزرية الصالحة ..مش مرجان برضو
قمت وقفت احتراما ليه مش خوف وقولتله ايوا مرجان ياباشا
هز رأسه وبصلي بصه مش مفهومة
قولت ل ابو العروسة هستاذن أنا
غلاب حط أيده ع كتفي وقالي تستأذن فين انا عايزك في موضوع
قولتله موضوع اي ياباشا
قالي هنقعد ندردش سوء مع بعض في موضوع وهسيبك تمشي
هنا انا قلقت شوية ..بس احساس أن مطرش معايا
وهينجيني من اي حاجه هو اللي كان مخليني ثابت شوية
قولتله أنا لازم اروح علشان متاخرش ع ابويا
ابتسم قدمهم وقالي هما كلمتين مش هعطلك يامرجان
اتفضل
بصيت ليهم كلهم أن حد يعارضه أو ينطق بحرف أو
يمنعه بس محدش قدر يفتح بوقه رحت وركبت معاه
العربية واخدني علي الاستراحة بتاعته
بدأت اقلق واخاف لما مظهرش مطرش وطمني وعرفني في ايه وايه حكاية غلاب دا
بص للكيس واخده مني وقالي ايه دا وفتحه وقالي كام دول
قولتله 10000 ..هز رأسه ورجعهم تاني ليا وقالي أنا
ممكن اخدهم منك واحبسك
وقبل ما اساله بتهمة اي تحبسني
بص في عيني بحدة وكمل كلامه وقالي التهم كتير
وغلاب مش هيغلب بس انا ياحبيبي هزودهملك
..بص يامرجان اللي هتطلبه بلسانك هدفعه بس تعرفلي
اخويا فين وايه اللي حصله
مش مركز معاه خالص وبدأ قلبي يدق جامد من الخوف
والرعب الليل ليل واتاخرت ومطرش مظهرش وهو اللي
قالي بمجرد ما تفكر فيا وعقلك يحاول يستحضرني
هحضر في التو واللحظة
غلاب ..انت معايا يامرجان
..اه ياباشا معاك ماله بقي اخو حضرتك
قالي ..انت اللي هتعرفلي ماله وإذا كان عايش ولا ميت
قولتله سهلة أن شاء الله بس عرفتي اي الموضوع
قالي هو كان متجوز وحده من الشرقية ومحدش من
العيلة كان موافق ع الجوازة دي نهائي وقطعنا كلنا
بسببها ومحدش فينا كلنا كان مقتنع أنه بيحبها وبيعشقها
زي ما كان بيقولنا وكنا بنقول انها اكيد سحراله أو عمله ليه عمل
...مستحيل واحد متعلم وابن ناس ومن عيلة زي بهاء
اخويا يبص ولا يناسب ولا حتي يعجب بوحدة زي دي
المهم قاطعنا كلنا وخسر الكل واخد ورثه ونصيبه من
تركة الوالد وبعدها نقل الشرقية وقعد عندها في بلدهم
واستمرت المشاكل بينهم طول فترة الجواز وخلف منهم
بنت والمشاكل بعدها زادت اكتر ..كنت أنا الوحيد اللي ع
تواصل معاه ومكنش بيحكيلي كل حاجه بالتفاصيل
بس كنت حاسس ب اخويا أنه مش مرتاح وأنه شايل
جواه كتير ..حاولت كتير معاه وعرضت كتير عليه اني
اساعده بس كان كتوم وبيرفض الكلام
فجأة رحت ليه زيارة قالتلي إنه اخد شنطة هدومه ومشي ومقلش هو رايح فين
خربت الدنيا ودورت عليه في كل مكان في بلدهم
وملوش اي اثر ولما اتهمتها ورفعت عليها قضية جابت
شهود شهدوا أنهم شافوا بهاء وهو ماشي بالشنطة
وشهدوا كمان أن مكنش في بينهم اي مشاكل ولا خلافات
قدمت طلب نقل للشرقية واتقبل ورحت مخصوص
علشان اعرف قصة حياتها وحياة أهلها وارجع اخويا أو
اعرف اي مصيره بس موصلتش لحاجه ...اشترت أهلها
كلهم بالفلوس محدش منهم بيقول غير اللي هي عايزاه
وبس في حاجه غلط مش مفهومه حاجه غامضة غريبة
حصلت.. احساسي بيقولي أنه مات ...مستحيل يكون ع
قيد الحياة وميلجأش ولا يستنجد بيا مستحيل 🥹
في حلقة مفقودة وانت اللي هتحل وتفك اللغز دا
يامرجان ..أنا مستعد ادفعلك 20..30 لا لا 50 الف
بس تعرفلي اخويا فين ولو مات..مات ازاي وجثته فين
ومين اللي موته
عمال اقول في سري ..يابن الحرام يامطرش انت فين
ما تخرجني ياعم انت من الشبكة السودة دي انا عايز
اروح ..طب اقول ايه ..دا فاكر ولا متخيل اني هعرف
مكان اخوه وانا قاعد معاه كده ..قوله ياض انك تعبان
ومحتاج ترتاح وان اليوم كان متعب واوعده انك بكره
تيجي ع الأقل يكون مطرش ظهر واعرف منه الحدوتة
قالي انت ساكت بتجمع وبتستكشف اللي حصل مش كده
قولتله لا انا الحقيقية تعبان جدا ومرهق ..اليوم كان
طويل اوي وتعبت ..بكرة هقابل حضرتك ومتقلقش
خالص واعتبر الموضوع خلصان
قولت اكيد الموضوع سهل زي اختفاء زين كده وبمجرد
ما يظهرلي مطرش هيعرفلي كل حاجه عنه وانا هبلغه واقفش ال50 الف
قالي بكرة اي مفيش بكرة يامرجان ..دلوقتي
تعرفلي ...واتعصب واتحول وانهار ...وقالي انت مش
هتمشي غير لما تعرفلي ايه اللي حصل ل اخويا ..مش
هتمشي غير لما تقولي ايه اللي حصل بظبط انت فاهم
😡 ..ايه مش مصدقني اني هدفعلك 50 الف وفتح
الخزنة وطلع منها رزم فلوس ورمها ع الأرض وقرب مني
وبحدة قال ..أن ممكن اخليك تنطق وتقولي من غير ولا
مليم يلا ..انطق ياض قولي اخويا فين
قولتله بخوف وانت ايه اللي مخليك متاكد انه مات ياباشا
قالي شقته اللي في الشرقية الوحيدة اللي لسه ب اسمه
والباقي كله اكتشفت بعد الاختفاء أنه ب اسم مراته
الأرض والعزبة حتي عربيته ب اسمها دا غير الحساب
اللي ب اسمها في البنك وهي في الأصل ابوها بيسرح في القطر وشحاتين
قولتله ملها الشقة اللي ب اسمه ياباشا
قالي كل ما ادخلها اسمع اصوات غريبة واحلم احلام
اغرب حتي صحابي قعدوا فيها قالولي نفس الكلام
قالوا إن الشقة دي ملبوسه وجبت كذا حد يقرأ ويعرفلي
اي الموضوع ومحدش منهم فادني ولا وصلني لحاجه
ومسك في هدومي جامد وقعد يرج فيا ويقول ..بس
انت هتوصلني يامرجان ..مش كده
هزت راسي من الخوف وقولتله هوصلك حاضر بس سبني ارتاح
قالي ارتاح ياحبيبي اعتبر المكان مكانك وهبعت حالا
اجبلك هدوم تغير فيها علشان تعرف تنام وترتاح
وقال للعسكري اللي واقف حراسة ع الااستراحة جهز عشا
لسيدك مرجان بسرعة ووصف للسواق بتاعه عنوان محل
ملابس ويكلمه من هناك بسرعة .. وطلب منه فعلا بيجامة وترنج
بقيت قاعد هتجنن مش عارف اعمل اي في الورطة
السودة دي ..والخوف مسيطر عليا بشكل غير طبيعي
خايف ل مطرش ميظهرش ..مش بعيد يموتني ولا
يحبسني فيها ..والتهم كتير زي ماقال وغلاب مابيغلبش
كلت بالعافيه ..رغم أن كنت جعان وهموت من
الجوع ..بس كانت اللقمة مش راضية تتبلع ..قلق وتفكير
ودمي نشف من الخوف ...وعلشان اهدي اقنع نفسي أنه
هيظهر بس مظهرش لحد ما نمت من التعب وصحيت
الصبح ع صوت العقيد غلاب وبيقولي النهار طلع ..يلا
علشان تفطر
قولت ياريت بقي يروح شغله وانا اخلع بالطريقة ولو
حكمت اسيب البلد خالص علشان ميعرفش يوصلي
بس اتصدمت لما قالي أنه اخد إجازة لحد ما موضوع اخوه دا يخلص
كمل كلامه واحنا بنفطر وقالي أنه متابع موضوع
العروسة دي دا من اول جوازهم
وكانت المخبرين بتنقله الاخبار اول ب اول وأنهم جابوا
شيوخ ومشعوذين كتير ولا حد عملهم حاجه
ولا حد منهم صدق ..الا انت خلصت الموضوع في ساعة
زمن ...امال أنا جيت لحد عندك وصممت اخدك ليه
اظن بقي كده ملكش حجه ارتحت ونمت وشبعت نوم
يلا بقي اعرفلي طريق اخويا
قولت في سري الله يلعنك انت واخوك في يوم واحد
ياأخي ..وانت فين انت كمان يامطرش ياابن الحرام
هتظهر امتي لما يموتني ولا يلبسني نصيبة ..اه يامطرش
الكلب..أنا كان مالي ومال السكة دي ..أنا ايه اللي خلاني اصدقك
قالي ..تاني هتسكت ..ايه بتستحضر روحه ولا بتعمل اي
قولتله ..حضرتك الأمور دي مش بتتحل بالسرعة
والسهولة دي ..أنا محتاج اختلي بنفسي شوية وابعد عن
هنا ...قالي انت صح ...
وشخط للسواق وقاله حضر العربية وبعدها خدني
وركبني العربية معاه وكان معانا السواق واتنين عساكر
قاعدين واحد ع يميني وواحد ع شمالي وهو راكب قدام جنب السواق
سالته احنا رايحين فين
قالي انا هخليك تختلي بنفسك وهسيبك لوحدك يامرجان
زي ما طلبت
قولتله أيوة حضرتك انت موديني ع فين
قالي هسيبك تخلتي بنفسك في شقة اخويا وعليا النعمة
ما هتخرج منها إلا وانت معرفني مكان اخويا
قولتله طب انا فيه كتب وورق مهم محتاجه في بيتنا
قولت اخده عندنا وهناك استنجد ب ابويا ولا أهل البلد ويخلصوني منه ..
قالي حاضر غالي والطلب رخيص هبعت اي حد يجبهملك
قولتله ابويا مش هيرضي يديهم حاجه وهيخرب الدنيا
ضحكت بسخرية وقالي انت لسه متعرفنيش والسواق
والعساكر ضحكوا ..اللي هو ابوك مين اللي يقلب الدنيا
دا انا افعصوا تحت جزمتي واجبهولك هو والورق والكتب
رحت الشقة ومن غبائي قعدت ابص ع الشبابيك وهو خد
باله وبحكم أنه راجل بوليس وخبرة حس اني هفكر في
الهروب ..ربطني ابن الجزمة في الكرسي وقالي هسيبك
تختلي وبعد العصر يكون الكتب والورق عندك
قولتله أنا مش عايز ورق خلاص ومتبعتش حد البيت
قالي بخبث ومكر وانا بقول كده برضو ..ما انت خلصت
موضوع العروسة من غير ولا ورقة ولا كراسة ..هسيبك
شوية مع نفسك تكون عرفتلي طريق اخويا
ومشي بالعساكر وقفل الباب من برا
كنا بالنهار ومسمعتش ولا اصوات ولا اي حاجه غريبة من
اللي قالي عليها ...مكدبش عليكم كنت بموت من الرعب
والخوف ..وبدأت أفقد الأمل في مطرش..وحاسس اني
دي نهايتي ..غلاب مش هيرحمني ..وكل اللي عملته في
الناس غلاب هيخلصوا مني تالت ومتلت 😭
المغرب غلاب جيه وجايب معاه كباب وكفته وعصير
وقعد اكل معايا بعد ما فكني وسألني اي الاخبار
مكنتش عارف ارد ولا أقوله اي والاكل وقف في زوري
جاب ماية وقالي خد اشرب
أنا مش مستعجل براحتك خالص بس زي ما قولتلك مش
هتتنقل من هنا غير لما تقولي وتعرفني حصل اي ل اخويا
وربطني تاني في الكرسي وسابني ومشي وبعد تقريبا ٣
ساعات بدأت اسمع الاصوات الغريبة واحس بحركة رجل
في الشقة وناس بتجري ورا بعض وانا مربوط حتي مش
هعرف ادفع عن نفسي لو حصلي حاجه ...الخوف والقلق
والرعب لوحدهم كانوا كفاية أنهم يخلصوا عليا ..أنا عملت
حمام ع نفسي من كتر الخوف وانا عمال اصرخ وانده ع
غلاب ومطرش والدساسه وأبكي
لحد ما ظهرلي مطرش بصورة علاء وقالي انت ايه اللي
جابك هنا ..أنا سيبك معاك الفلوس ونروح ..ايه اللي حصل
قولتله مطرش ..علاء ..فكني وخرجني من هنا
قالي اهدا واستغربت أن الصوت اختفي نهائي والإضاءة اشتغلت لوحدها
سرح مطرش وعينه غربت لثواني وقالي اهدا مفيش
حاجه متقلقش ..قولتلك أنا معاك اطمن ..الموضوع بسيط
قولتله بسيط اي ..الراجل دا هياذيني لو معرفتش طريق اخوه
قالي ممكن تنام وترتاح
قولتله انام وارتاح اي ..أنا من امبارح وانا في العذاب
دا ..وبصراخ كملت وقولت ..انت ازاي تعمل فيا كده
قالي حاول بس تغفل حتي لو دقايق بالظبط وهو
هيظهرلك بنفسه وهيعرفك كل حاجه ..اسمع كلامي
قولتله هو مين اللي هيظهرلي
قالي بهاء ...أنا معاك ومش هسيبك ..معاك ومش
هسيبك ...ناااام يامرجان .......نام يامرجان ....ناااااااام
أنا بالفعل غفلت ونمت ازاي معرفش بس عيني فعلا
غفلت وبمجرد ما روحت في النوم ظهرلي بهاء ..هو هو
نفس الشخص اللي صورته كانت في الشقة
ظهرلي بترنج ابيض ومليان بقع دم وفي جرح كبير في
رأسه ورقابته ..جرح عميق وحوالينه دم ناشف وقالي
بعد كل اللي عملته علشانها 🥹تعمل فيا كده ..دا انا
عمري ما قصرت معها في حاجه وكنت بحبها اكتر من
نفسي 🥹 وصرخ وهو بيبكي بحرقه وقالي أنا مستهلش منها كده
#البارت_القادم..(سر اختفاء بهاء )
#يتبع 😘
