رواية موضوع عائلي الفصل الثالث والثلاثون 33 الجزء الثالث بقلم رحاب القاضي
#موضوع_عائلي
"بيت الهنا"
ـ الحلقه الـ 33
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
حتي وان جمعنا نصيبنا ستبقي أخطاء الماضي تفرقنا😞
°°°°°°°°°°°°°°°°°°°°°°°°°°°°°°°°°°°°°°°°°°°°
_وبعد اكتر من شهرين عدو علي ابطالنا....
_كانت أسرار راجعه من الكليه بتاعتها ومعاها رضوي اللي كانت جايه من المدرسه واول ما دخلت شقتها راحتلها الشغاله وقالت..
_في واحده جات من ربع ساعه تقريبا وعايزه حضرتك يا مدام أسرار، وقاعده في الريسبشن جوه..
أسرار
مين دي؟
_ما اعرفش انا ما شوفتهاش ابداً جات هنا..
أسرار
طيب خدي رضوي خليها تغير هدومها..
_سمعت الشغاله كلامها واخدت رضوي لاوضتها، وراحت أسرار للضيفه المجهوله واول ما شافتها كانت واقفه قدام الشبااك ومدياها ضهرها..
أسرار
مين حضرتك؟
بصتلها شرين من فوق لتحت بسخريه وقالت
انا شرين مرات سيف ابن خالة جوزك، بس حقك ما تعرفنيش ما هو ما فيش واحده تعرف عشيقة جوزها..
اتصدمت أسرار من اللي سمعته وقالت
انتي بتقولي ايه يا ست انتي، اطلعي بره بيتي..
شرين
الحق عليا اني جايه اقولك خدي بالك من جوزك اللي كل يوم في حضن واحده تانيه غيرك، الشقه دي مثلا تحبي اوصفهالك وخصوصا اوضة نومك..
أسرار بهدوء
والله فعلا البجاحه ليها ناسها جايه ومبسووطه اووي وانتي بتقولي انك كنتي مع واحد في الحرام، لا وفاكره اني هصدقك مثلا
شرين
انا عندي دليل
أسرار بحده
مش عايزاااه خليهولك ولو شوفتك هنا تاني انا هفضحك قدام العماره كلها ولا افضحك ليه انا هقول اللي انتي قولتيه ده قدام الناااس كلها مش انتي جامده وجايه تكشفي الحقيقه
استغربت شرين جراءتها وقالت
غريبه مع انه قالي انه هيتجوز قطه مغمضه..
أسرار
اخص عليه بجد ابقي قوليلو ما يكدبش عليكي تاني وبالذووق اطلعي بره بدل ما اطلعك بمنتهي قلة الادب واكيد انتي عرفاها كويس..
اخدت شرين شنطتها ووقفت جنب أسرار وقالت بخبث
ما تقوليش بقي اني جيت هنا عشان انا مش عايزااااه يزعل مني هاا
_قالت كلامها ومشيت وأسرار قعدت لوحدها ودموعها نزلت بحزن ودخلت عندها الشغاله وقالت..
_هتتغدي يا اسرار هانم عشان لو اجهزلك مع رضوي؟
أسرار
لا لا انا مش جعانه واسمعي يا نفيسه مش عايزه كمال يعرف ان حد جه تمام يا نفيسه؟
نفيسه
تحت امرك يا ست أسرار..
_وقاامت أسرار دخلت اوضتها، ورضوي راحت عندها وقالت بحزن..
رضوي
هو انتي زعلانه مني؟
ردت عليها أسرار وهي بتفك حجابها وقالت
لا يا حبيبتي وانا هزعل منك ليه؟
رضوي
طيب ليه مش هتيجي تاكلي معايا؟..
أسرار
طيب هغير هدومي وهاجي اكل عشااان خاطرك مبسوووطه كده؟
رضوي ابتسمت وقالت
ايوه يلا ما تتأخريش مستنياااكي..
طلعت رضوي وأسرار اتنهدت بضيق وقالت لنفسها
انا هنا قاعده زي الهبله والبيه مقضيها بره ماشي يا كمال وحياة امك ماااشي..
ــــــــــ #بقلم_الكاتبه_رحاب_القاضي ــــــــ
_وفي المستشفي عند تيللي كانت قاااعده علي السرير بتاعها في المستشفي وعيونها كلها دموع وقدامها باباها ومامتها وزعق فيها باباها وقال..
فتحي
ما تردي علينا هو احنا هنشحت منك الكلام..
سوزان
وطي صوتك هنتفضح في المستشفي
فتحي
هو احنا لسه هنتفضح ما خلاص الهانم شيلتنا العاااار، انطقي يا بت انتي مين ابو اللي في بطنك ده؟..
بصتله نيللي بجمود وقالت
ما اعرفش..
فتحي بحده
هو ايه اللي ما تعرفيش اقسم بالله اقتلك واشرب من دمك يا زباله..
سوزان بخوف
ابوس ايدك خلاص الناااس هتسمعنا امشي دلوقتي وانا هاخدها البيت عندي وابقي تعالي ونتكلم معاها ونعرل كل حاجه..
فتحي بص لنيللي بغضب وقال
اياامك سودا معايا انتي تقوليلي مين ابو اللي في بطنك ده وانا هسففه تراب الارض هو واللي جابه، اما انتي ليكي تربيه من اول وجديد..
دخلت في الوقت ده عندهم ريم وقالت بقلق
خير يا جماعه مالك يا نيللي يا حبيبتي..
فتحي بحده
انتي عرفتي منين انها تعبانه؟
سوزان
انا كلمتها وسألتها علي نيللي وانا جايه كنت فاكراهم مع بعض..
قعدت ريم جنب نيللي اللي حصنتها وفضلت تعيط وقالت
خليهم بمشو هما الاتنين انا ش عايزه اشوفهم..
ريم بقلق
طيب اهدي يا حبيبتي..
فتحي بضيق
سوزان تاخدبها معاكي ما تشوفش الشارع لحد ما اجيلك فاهمه
سوزان
حاضر يا فتحي امشي بقي وكفايه فضايح..
مشي فتحي وهو متعصب جدا وسوزان قالت
خليكي معاها يا ريم وانا هشووف الدكتور عشاان نمشي..
ريم
حاضر يا طنط انا قااعده معاها اهو..
طلعت سوزان وريم قالت بقلق
هو في ايه وماله اونكل فتحي متعصب كده ليه؟
نيللي ببكاء
انا حامل يا ريم شوفتي المصيبه اللي انا فيها..
ريم بصدمه
يا نهار اسوود ازاي ده حصل طيب هتعملي ايه؟
نيللي بدموع
مش هعمل حاجه لو كنت اعرف انا كنت خلصت الموضوع لوحدي من غير ما هما ياخدو بالهم من حاجه..
ريم
لييه هتعملي كده يوسف لازم يعرف مش هينفع تسكتي اكتر من كده
نيللي بدموع
اوعي تعملي كده يا ريم اوعي اصلا تجيبي سيرة يوسف خالص قدامهم، انا مش هقول حاجه وهنزل البيبي ده وخلاص كده..
ريم
وانتي ليه تتحملي النتيجه لوحدك يا نيللي هو غلط ولاوم يتحمل نتيجة غلطه دي..
نيللي
فرحه قريب اصلا وو وهو بيحبها جدا انا مش هبقي الطرف الوحش اللي هيدمر علاقتهم، هو غلط وانا كمان غلطت لما وثقت فيه ودخلته بيتي وبعدين لو عرف هيحصل ايه هيتجوزني وهجيب البيبي ده وبعدين هيعيش نفس الحياه اللي انا عايشاها دي، ده انا يبقي ما عنديش دم والله عشان اكرر نفس تجربتي تاني في ابني او بنتي، مش هينفع يا ريم الموضوع ده لازم يتقفل..
ريم بحزن
انتي حبيتي يوسف يا نيللي ومش عايزه تدمري حياته مش كده؟
ابتسمت نيللي بسخريه وقالت
مش عارفه يا ريم بقي بس هو موضوع خلصاان اصلا...
جات سوزان وقالت
يلا يا استاذه نيللي هنمشي..
نيللي
انا عايزه ارجع شقتي يا مامي
سوزان بحده
الشقه دي انتي مش هتروحيها تاني وتخرسي خالص انا ماسكه نفسي عنك بالعافيه لحد ما نروح البيت، يلا اتنيلي قدااامي..
ــــــــــ #بقلم_الكاتبه_رحاب_القاضي ــــــــ
ـ وفي النادي كانت قااعده ريناد مع يزن وجنبيهم تيا بتلعب مع الاطفال، ويزن ابتسم بهدوء وقال..
يزن
نسخه منك والله احلي حاجه ان ما فيهاش اي شبه من ابوها..
ريناد
هي احلي مني، المهم فكرت في الموضوع اللي قولتلك عليه..
يزن
موضوع ايه؟
ريناد
موضوع جوازنا يا يزن..
يزن
اااه لا يا ريناد مستحيل اعمل اللي انتي عايزاه ده
ريناد
ده الحل الوحيد يا يزن معني انك بترفض كده انت بترفض جوازنا اصلا
بصلها بضيق وقال
هو يا اتجوزك في السر يا بلاش، يبقي قدامي النور واختار الضلمه ليه واللي هنعمله ده لا عيب ولا حرام
ريناد
سيف ممكن ياخد. تيا مني..
يزن
لا تيا هتبقي مع امك
ريناد
ما احنا لو اتجوزنا في السر انا هقدر اخد تيا معايا بدل ما اسيبها مع ماما، فتره مؤقته لحد ما الموضوع يتحل..
يزن
والله انا لو روحت قولت لابوكي الكلام ده هيبقي شكلك وشكلي وحش اووي، ولا قدام اهلي هيبقي شكلي عامل ازاي وانا بقولهم معلش يا جماعه جوازي من ريناد هيبقي في السر
ريناد بحزن
خلاص يا يزن براحتك
يزن
ايوه ما هو براحتي هنتجوز اخر الاسبوع وجواز رسمي باشهار قدام النااس كلها..
ريناد بدموع
وتيا انا ما اقدرش اخليها تباات بعيد عني يا يزن..
اتنهد يزن بضيق وقال
يا ريناد مش احنا متفقين علي كل حاجه من الاول..
ريناد
ما هو لما لقيت ان خلاص الموضوع دخل في الجد. واني هسيبها مش قادره اتقبل الموضوع، تيا لو صحيت وما لقيتنيش جنبيها هتعيط ومش هتسكت هل انا هبقي مبسووطه وقتها..
يزن
طيب بصي احنا مش كنا متفقين انها هتقعد معانا يومين في الاسبوع
ريناد
ايوه وباقي الاسبوع هتبقي لوحدها عند ماما..
يزن بهدوء
لا انتي هتبقي معاها باقي الاسبوع عند مامتك ولما تيجي هاتيها معاكي
ريناد
انت بتتكلم بجد.؟
يزن
ايوه لحد ما نظبط الوضع ده هيبقي نص الاسبوع انتي وتيا عندي والنص التاني عند مامتك..
ريناد ابتسمت بسعاده ومسكت ايده وقالت
انا بموووت فيك والله..
ضحك بهدوء وقال
وانا عشان فرحتك دي مستعد اعمل ايه حاجه وو..
قبل ما يخلص كلامه جات رضوي وقالت
يلا يا ريناد انا ماشيه..
ريناد
في ايه مالك متعصبه كده ليه؟
جه يوسف وقال
بوومه اختك بوومه يا ريناد
رضوي بحده
لم نفسك انا سكتالك وماسكه نفسي لحد دلوقتي عشان احنا قدااام الناااس
يوسف
لا يا اختي ما تسكتيش ووريني هتعملي ايه
يزن
في ايه انت وهي ووطو صوتكم؟..
يوسف
خليها تقولك دي بتتلكك والله دي مش طريقة واحده داخله علي عمار..
ريناد بحده
قصدك ايه يا سي يووسف اتكلم مع اختي كويس لو سمحت..
يوسف
طيب اعرفي اللي حصل الاول وشوفي ايه اللي مزعل اختك
ريناد
في ايه يا رضوي؟..
رضوي
بصو انتو عارفين اني بحب طنط شهد اوي، بس يا جماعه شقتي انا اختار الحاجات اللي تعجبني فيها ما حدش يختارلي..
يوسف
وانا مش هعمل غير الالوان اللي قالت عليها امي يا رضوي.
يزن
لا استنو بس في سوء تفاهم اولا ماما ما اختارتش حاجه الموضوع كله كان قدامي البيه هو اللي صمم ان ماما تختار الالوان وقالها ان انتي يا رضوي اللي عايزاها تختارلكم..
رضوي بصتله بغيظ وهو قال بتوتر
مم ما انا عايز احسس ماما اني لسه ابنها وما اتخلقتش اللي تاخدني منها..
رضوي
انا مش هتكلم وهعمل الالوان اللي انا عايزاها يا يوسف ولو اتكلمت معايا في الموضوع ده انا اا..
يزن
مش هيتكلم وبصو اجلو اي مشاكل بينكم لحد ما انا وريناد نتجوز وبعد كده ان شاء الله تولعو في بعض ما حدش هيمنعكم..
يوسف
فال الله ولا فاالك يا عم وبعدين هو انا اقدر استغني عنها برضو..
رضوي ابتسمت وقالت
ولا انا كمان اقدر استغني عنك بس بطل تستفزني..
يزن
طيب عم رميو وجوليت انت وهي في شغل يا رضوي المفروض تخلصيه، من لما الواد ده دخل حياتك وشغلك بقي زي الزفت..
يوسف
لازمتك ايه انت يعني تصلح وراها وهي تغلط براحتها..
رضوي
لا لا مش هغلط انا اصلا رايحه الشغل يلا يا يوسف عشان توصلني..
يوسف
هنروح نشوف العمال في شقتنا الاول ونقولهم علي الالوان الجديده يلا بينا..
مشي يوسف هو ورضوي ويزن بصلهم بغيظ وقال
جم عكننو قعدتنا وازعجونا ومشيو..
ريناد
بس والله مشاكلهم بتضحكني وحلوه بيتخانقو ويتصالحو في نفس الدقيقه..
يزن
لا ولايقين علي بعض برغم الاختلاف الكبير اللي بينهم بس حلوين اووي مع بعض، ربنا يتمملنا وليهم بخير..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن طلعت روان من اوضتها وقالت لـ ليلي اللي كانت قااعده قدام التلفزيون..
روان
انا رايحه الجامعه يا ماما عايزه حاجه؟
ليلي
جامعة ايه اللي دلوقتي ما روحتيش ليه مع هنا الصبح؟
روان
ما هي محاضراتها الصبح انا محاضراتي الساعه 2..
ليلي
طيب شوفي عمك قالي اندهلك عشاان عايزك بس نسيت روحيلو قبل ما يجي يزعق..
روان
اكيد هيرغي معايا في حوار عبدالله وانا متأخره.
ليلي
قوليلو هو الكلام ده وسبيني اشوف المسلسل جاتكم الهم تعكرو المزاج الرايق كلكم يا عيله فقر..
_طلعت روان وراحت لشقة عز وكان الباب مفتوح فدخلت علي طول، بس اول ما دخلت شاافت عبدالله قااعد هو وعز وبيتكلمو مع بعض اتدايقت جداً وكانت لسه هتمشي بس عز قال..
عز
اهلا اهلا تعالي يا روان..
روان بضيق
انا مش فاضيه وعندي محاضرات..
عز
معلش ما جاتش من النهارده تعالي بس اتكلمي انتي وجوزك مع بعض عشان نخلص الموضوع ده
روان
هو مش جه واتكلم واتفقنا خلاص..
عبدالله بجمود
اتفقنا علي ايه وبعدين لو انا غلطت انتي كمان غلطتي وغلطك اكبر من غلطي مليون مره..
روان بحده
انت اصلا مش معترف انك غلطان فالكلام زي قلته معاك
عز
دي مش طريقة كلام انتو الاتنين، اقعدي يا روان واسمعيه لاخر مره عشان ترسو علي حل بقي ونخلص من الموضوع ده بقالكم شهرين مزهقينا معاكم..
قعدت روان جنب عز وقالت
اديني اتنيلت قعدت نعم بقي هنتكلم في ايه؟
عز
لا مع نفسكم انا هقوم اعمل شاي اعملكم معايا؟..
ما حدش رد عليه وهو قال بغيظ
ايه قلة الذوق بتاعتكم دي طيب والله ما عامل غير لنفسي..
ودخل عز المطبخ وعبدالله اتنهد بضيق وقال
اعقلي يا روان ويلا عشان نرجع بيتنا سوا
روان بسخريه
طيب اووي انت والله وفاكر ان بعد اللي قولته ليا اخر مره كنا مع بعض فيها هقبل ان يتقفل علينا باب واحد تاني، الموضوع خلص يا عبدالله انا حبيتك ايوه بس كرامتي عندي اهم من اي حاجه
عبدالله
وانا جيت وبعتذرلك اهو وبقولك انا غلطان
روان
واسفك مش مقبول مش هرجع معاك انا دلوقتي وتفتكرلي في مره اللي حصل معايا زمان وترجع تقلب عليا تاني..
عبدالله بحده
ما فيش راجل هيقبل علي نفسه اللي انا شوفته وقريته ده يا روان، واحد غيري كان فضحك انتي واهلك قدام العيلة كلها. بس انا قولت لا احنا اهل في بعض وحاولت اتحمل وخلاص اهو هقفل الموضوع خالص ونكمل سوا من اول وجديد..
روان بسخريه
بعد ايه بعد ما اخدت حقك، انا اخر حاجه كنت اتوقعها ان انت يا عبدالله تعمل فيا كده، تعاملني انا بالاسلوب الرخيص اللي عاملتني بيه ده، الموضوع انتهي خلاص ويا تطلقني بالذووق يا هرفع عليك قضيه واتطلق منك بقلة الذوق
عبدالله بغيظ
مااشي يا روان وانا جيت مره واتنين اهو وانتي زي ما انتي كأنك ما صدقتي تغلطيني وتخلعي من الجوازه اللي ما كانتش علي مزاجك من الاول، بس خدي خلاصة الكلام مش هترجعي معايا خليكي عند اهلك وطلاق مش هطلق وهنشوف مين فينا اللي هيمشي كلامه علي التاني
_قال كلامه وخرج بره الشقه وهو متعصب جدا، وطلع عز من المطبخ وهو ماسك في ايده مج الشاي وقعد جنبيها وقال بحزن..
عز
العِند مش حل يا روان، المفروض دي احلي ايام حياتكم واحلي فتره في جوازكم مقضينها نكد ومشااكل ليه بس..
روان بدموع
هو انا يعني السبب اقسم بالله انا اتحملت منه معامله زي الزفت كتير بس الانسان طاقه وانا خلاص مش قادره، وبقيت خايفه ارجع تاني اعيش نفس المعاناه معاه ويوجعني بكلامه واسلوبه ومعاملته الوحشه ليا تاني، بص يا زيزو انا شوفت معاه فترة خطوبه يمكن دي كانت احلي حاحه بينه وبينه من يوم فرحنا بقي للنهارده انا مش فاكره اي حاجه حلوه ليه خالص معايا
عز بضيق
المشكله ان اللي حصل في حياة عبدالله برضو من يوم فرحكم للنهارده مش قليل ده كفايه موت عمر يومها دي حاجه تكسر جبل مش بني ادم، ومشاكله في البلد والله وانا بكلمك عن ثقه لو المشاكل دي اللي بينكم كانت في ظروف عاديه عبدالله كان هيعرف يلم الموضوع من غير ما يخسرك عشان هو بيحبك من وانتي عيله صغيره، بس الوضع اللي هو فيه صعب وعمال يغيره ويغير في طبعه وشخصيته وربنا يستر عليه من خلف وابنه..
روان بقلق
قصدك ايه بانه بيتغير؟!
عز بحزن
نااس كتير كانو اطيب من الملايكه بس مع القسوه والصدمات اللي بيشفوها في حياتهم بيتحولو لنااس تانيه اوحش بكتير من حقيقتهم، عبدالله مشاكله خلته عصبي ومتسرع واراهنك انه لو ما رجعش لعقله في اقرب فرصه هيقع في مصيبه مع خلف وابنه لانهم مش ساهلين دول تعابين ودماغهم دماغ شياطين.
سكتت روان وبان عليها الخوف وعز قال بخبث
اييه خوفتي عليه مش كده؟
روان بتوتر
وانا اخاف عليه ليه انا مالي بيه اصلا، انا همشي بس عشان عندي محاضرات واتأخرت ولو كلمك قوله روان عند قرارها يا تطلقها يا هتخلعك..
ــــــــــ #بقلم_الكاتبه_رحاب_القاضي ــــــــ
_ وفي الكافي بتاع طارق كان واقف مع بنت حلوه جدا، وواقفين قريبين من بعض بشكل كبير ودخلت في الوقت ده هنا ومعاها روز وقالت..
هنا بغيظ
يا استاذ طارق..
بصلها طارق وابتسم وقال
ايوه يا هنا اقعدو عندكم دقيقه واحده وجاي..
_قال كلامه واتجاهل وجودها وفضل يتكلم مع البنت وهما بيشاورو علي اماكن في الكافي،وهنا وفضلت قااعد متبعاهم وهي مدايقه وقربت منها روز وقالت..
روز
هي مين دي اللي واقفه مع طارق يا هنا؟
هنا
مش عارفه يا روز..
روز
بس شكلها حلو اووي شبه الممثلين..
هنا بغيظ
اسكتي يا روز
روز
بس انتي احلي منها بس حطي مكيااج زيها والبسي زيها عشان تبقي لايقه علي طارق
هنا
ليه ان شاء الله هو انا مش لايقه علي اخوكي ولا ايه؟
روز
لا لايقه والله بس البنت الحلوه دي لايقه عليه اكتر..
هنا
طيب قوومي هنمشي يلاا..
روز
انتي مش قولتي هنيجي نقعد شويه احنا ما قعدنااش
هنا
هنبقي نيجي نقعد مره تانيه..
_ ومسكت ايد روز ومشيت فعلا، واول ما شافها طارق خرجت من الكافي ساب البنت ورااح وراها بسرعه وقال.
طارق
هنااا يا بت استني رايحين فين؟
بصتله هنا بغيظ وقالت
نعم عايز ايه؟
طارق
مشيتو ليه في حاجه زعلتكم جوه؟
هنا بنبره غاضبه
لا ما فيش بس انت شكلك مشغول ومش فاضي، رووح الحلوه اللي كنت واقف معاها واقفه اهي عند باب الكافي مستنياااك روحلها..
طارق بخبث
اااااه قوليلي كده بقي غيرانه عليا..
هنا بغيظ
وانا اغير ليه اصلا مش حلوه وبكرش بص شكلها عامل ازاي اصلا..
طارق ضحك وقال
هههههه هي فعلا بكرش ومدايقه منه جدا لانها حامل في الشهر التالت..
برقت هنا بصدمه وطارق قال بسرعه
حامل من جوزها يخربيت دماغك بلاش ام النظره دي هنشوه سمعة الست، المهم يعني دي مصممة ديكور باعتها يزن انتي عارفه شريكي بقي ومن حقه يختار الحاجات اللي هو عايزها برضو
هنا
طيب خلاص اصلا عادي
طارق
لا مش عادي وكنتي غيرانه عليا..
هنا
واغير عليك ليه من قلة الرجاله يعني
طارق بغيظ
بضهر ايدي وهنزل بيه علي وشك، انتي عبيطه يا بت حد. يقول كده
هنا كتمت ضحكتها وقالت
مم مش قصدي يعني، وبعدين قولتلي اجي هنا وعاملك مفجأه ايه بقي فين المفاجأه؟
وقف طارق جنبيها وبص للكافيه وقال
عايزك تختاري معايا اسم للكافي اسم كده يكون حلو ويعجب النااس
هنا
هو ده موضوع تجيبني عشااانه لحد هنا يا طارق
طارق
ايوه ولا ايه يا روز؟
روز
انا تعبت من الشمس تعالو ندخل جوه
طارق
لا استنو انا اصلا اختارت اسم للكافي وهي دي المفجأه..
وبعدين بص للعمال اللي واقفين قدام الكافي وقال
يلا يا رجاله شوفو شغلكم..
_ وبدأو العمال يعلقو اليافته بتاعت المحل وكان مكتوب عليها اسم "هنا"، فأبتسمت هنا وقالتله..
هنا
انت هتسميه علي اسمي..
طارق
ما هو فيش احلي من كده..
هنا
طبعا ما فيش احلي من اسمي..
طارق
طيب قولي شكرا اتفاجئي ايه رد الفعل الرخم ده..
هنا
اتفاجئت واستغربت بس حلو يعني اول مره حد يعملي مفاجأه حلوه كده
طارق
انتي تستاهلي اكتر من كده اصلا، يلا بقي ندخل جوه عشان تختاري معايا باقي الديكور بتاع الكافي
هنا بحماس
مااشي يلا بينا، يلا يا رووز..
وكانو داخلين هما التلاته وقرب طارق منها وقال بصوت واطي
مستني اسمع كلمة بحبك مثلا بعد المفاجأه دي..
هنا بتوتر
اتلممم وابعد كده خلي في مسااافه..
طارق بغيظ
هااانت كلها كام شهر وهنتجوز ومش هيبقي في مسافات ويا انا يا انتي يا هنا..
_ ضحكت بهدوء ودخلو الكافي وبدأت تختار معاه كل حاجه وهي مبسووطه جدا انه رجع زي الازل معاها وبقي يهتم.بيها اكتر من الاول كمان...
ــــــــــ #بقلم_الكاتبه_رحاب_القاضي ــــــــ
_وبالليل في بيت كمال اول ما رجع من شغله، دخل اوضته علي طول وكانت أسرار مش موجوده، فغير هدوومه وبعدين طلع دخل المطبخ لقي الشغاله واقفه بتروق فيه فقالها بجمود..
كمال
أسرار فين يا نفيسه؟
نفيسه
نايمه مع رضوي في اوضتها، تحب اعمل لحضرتك حاجه يا كمال بيه هي طلبت مني استني عشان لو حضرتك احتاجت حاجه
كمال
لا خلصي اللي بتعمليه وروحي نامي انتي..
_قال كلامه وطلع من المطبخ وهو مدايق وراااح لاوضة رضوي وحاول يدخل بس هي كانت قافله من جوه فخبط علي الباب وقال..
كمال
أسرار.. أسراااااااار..
_قااامت هي من جنب رضوي اللي كانت نايمه ووقفت ورا الباب وقالت بصوت واطي..
أسرار
عايز ايه يا كمال..
كمال
بتعملي ايه عندك تعالي يلاا..
اتنهدت بضيق وقالت
لا انا بايته هنا النهارده..
كمال بحده
انتي بتستهبلي اخلصي واطلعي يلاا..
أسرار
قولتلك مش طالعه انا هباات هنا وما تتكلمش تاني عشان بنتك نايمه لتصحي مفزووعه من صوتك ده..
_قالت كلامها وراااحت نامت جنب رضوي تاني وعيونها اتملت دموع بحزن وندم علي اختيارها لكمال من البدايه، وهو كان قااعد بره بيفكر هو زعلها في ايه عشان تتصرف معاه كده وطلعت نفيسه من المطبخ وقالتله..
نفيسه
بعد اذنك يا كمال بيه كانت في حاجه حصلت وانت مش موجود النهارده والست أسرار قالتلي ما اقولكش عليها..
كمال
حاجة ايه دي؟
نفيسه
في واحده جات والست أسرار ورضوي مش موجودين، وبرضو صممت تدخل تستناهم وبعد ما جات الست أسرار واتكلمت معاها وحالها اتغير وبقيت زعلانه وفضلت تعيط كمان وقالتلي ما اقولش لحضرتك ان في حد جه اصلا..
كمال
ما تعرفيش اللي جات دي اسمها ايه؟
نفيسه
لا والله ما اخدتش بالي بس تقرييا هي دكتوره سمعتها بتقول كده وهي بتتكلم في الموبيل..
_مسك كمال موبيله وطلع صورة شرين ووراها لنفيسه وقال...
كمال
هي دي يا نفيسه؟
نفيسه
ايوه هي دي بس والنبي ما تقول للست اسرار اني قولتلك حاجه..
_ما ردش عليها كمال وقاام وراح لاوضة رضوي وخبط جامد علي باب الاوضه وقال بحده..
كمال
افتحي يا اسرار واخرجي يلا من عندك..
أسرار بقلق
خلاص بقي يا كمال سيبني في حالي
كمال
اخلصي يا أسرار بدل ما اكسر الاوضه علي دماغك..
_بصت اسرار لرضوي اللي صحيت من صووت كمال العالي وكانت بتبصلها بخووف، فأبتسمت ليها أسرار وقال بهدوء..
أسرار
ما تخافيش يا حبيبتي ونامي وانا هشووف ابوكي عايز ايه وهاجي انام حنبك تاني..
رضوي
يعني مش هتتخانقو؟!
أسرار
لا مش هنتخانق كملي نووم يا حبيبتي يلا..
_وقاامت اسرار وطلعت ولقيت كمال واقف في وشها فبصتله من فوق لتحت بقرف وراحت دخلت اوضتهم وهو راااح وراها وقال بجديه...
كمال
قالتلك ايه شرين؟
ردت عليه ببرود وقالت
شرين مين؟
كمال
اللي جات هنا يا أسرار اتكلمي من غير لف ودوران وما تبقيش عبيطه لدرجة ان اي حد يقولك حاجه تصدقيها..
أسرار بسخريه
انا لو كنت عبيطه ما كنتش صدقتها..
كمال
طيب هي قالتلك ايه؟
أسرار
علي اللي كان بينكم..
كمال
اللي هو ايه بالظبط؟
أسرار بغيظ
انت عارف كويس هو ايه ومهما قولت خلاص انت نزلت من نظري وما فيش حاجه بينا هترجع زي الاول تاني..
كمال بهدوء
ما تكبريش الموضوع اللي كان بيني وبينها ده موضوع قديم اصلا..
أسرار
قديم ولا جديد انا مش قادره اتخيل انت ازاي عملت كده يا كمال ومع مين مرات ابن خالتك. اللي انت قبل كده قولتلي عليه انه زي اخوك، انا فهمت دلوقتي انت ليه كنت زعلان من علاقتي بعبدالله، بس عبدالله انضف واحسن منك مليوون مره انت اللي حقير وفاكر كل النااس زيك..
_اول ما خلصت كلامها رفع ايده وكان هيضربها وهي خبت وشها بأيديها بخووف، فنزل ايده واتنهد بضيق وقال..
كمال
اقسم بالله العظيم لو الكلام ده اتكرر تاني او غلطتي فيا تاني لاي سبب انتي ما تعرفيش انا ممكن اعمل فيكي ايه انتي فاهمه..
أسرار بدموع
يبقي خلي كل واحد فينا في حاله ليك عندي اخد بالي من بنتك طول ما انت غايب ده اللي انت اتجوزتني عشاانه اصلا وكفايه بقي تمثيل..
كمال
تمثيل في ايه انا من لما اتجوزتك قصرت معاكي في ايه؟
أسرار
وانا ما قصرتش معاك في حاجه بس انا ما بقتش طيقاااك خلاص ، فخلي كل واحد في حاله احسن..
كمال بجمود
يعني ايه؟
اسرار
انت فاهم قصدي كويس، انا هروح انام عند رضوي وعندك نفيسه لو عايز تتعشي هتجهزلك بس ما تطلبش مني حاجه تاني اعملهالك..
ـ قالت كلامها وسابته ومشيت وهو قفل باب الاوصه ومسك موبيله وكلم شرين اللي ردت عليه وقالت..
شرين
ياااه ده انا بقالي كتير ما شوفتش رقمك عندي، هي المدام قالتلك اني كنت عندها ولا ايه
كمال
ايوه قالتلي بس وحيااة امك لاحاسبك علي اللي عملتيه ده..
شرين بخبث
بس انت صدمتني علي فكرت طلع ذوقك بيئه اووي فلاحي شبه مراتك بالظبط..
كمال بحده
مراتي دي انضف واشرف من مليون واحده زيك واللي حصل ده هدفعك تمنه غالي اوووي، ومش محتاج اقولك انك ما تقربيش من مراتي وبيتي تاني انتي من نفسك بعد كده هتخافي تفكري فيا اصلا...
_ قال كلامه وقفل في وشها وهو بيفكر ازاي يبعدها عن حيااته تماماً، ويرجع يخلي علاقته بأسرار زي الاول..
ــــــــــ #بقلم_الكاتبه_رحاب_القاضي ــــــــ
_وتاني يوم الصبح في بيت فيروز كان قااعد زين قدام التلفزيون وطلع عز الدين من اوضة فيروز فاتنهد زين بضيق وقال..
زين
هو حضرتك هنا..
عز
امممم عندك مانع ولو عندك ما اسمعش صوتك برضو..
زين بضيق
هو انا قولت حاجه وماما فين؟
قعد عز جنبيه وقال
هتفوق وجايه تجهزلنا الفطار..
زين
لا انا طلبت فطار من بره، هو حضرتك هتقعد معانا علي طول يا بابا؟
عز
لا وانا ايه اللي هيقعدني في بيت امك انا مستني اقنعها تيجي ونقعد كلنا عندي جنب بيت عمك، ويا سلام لو انت كمان اقنعت يارا انكم تتجوزو عندنا واعملك شقه زي طارق كده ونبقي كلنا عيله في بعض..
زين بسخريه
وهو يونس الصاوي هيوافق يخلي بنته تعيش في بيت عيله وفي شقه..
عز
وانت مالك وماله المهم انت ويارا عايزين ايه واعملوه
زين
لسه بدري علي الكلام ده يا بابا، وبعدين ماما نفسها مش هتوافق تعيش معاك هناك..
عز
هتوافق انا مش عايز ابعد عن اخواتي تاني ولا عايز ابعد عنكم..
طلعت فيروز من اوضتها وقالت بتوتر
انت صحيت يا زين..
قام. زين وقالها بصوت واطي
انا مش عايز بابا يجي هنا تاني ممكن
عز
سمعتك يا ابن الجزمه وانا اجي براحتي ده بيت مراتي اللي هي امك..
زين بغيظ
ما انا ما بحبش حد غريب يبقي قاعد. مع امي..
كتمت فيروز ضحكتها وعز قال بحده
حد. غريب مين يا اهبل ده انا ابووك وجوزها، انتي بتضحكي علي ايه انتي كمان
فيروز
خلاص يا عز هو حر مع الوقت هيتعود..
زين
حتي انتي يا ماما والله انا اللي هطفش واسيبهالكم..
فيروز
لا طبعا خلاص يا عز امشي
ابتسم زين بأنتصار وعز قال بغيظ
لا والله بتخليه يشمت فيا طيب مش ماشي وقااعد. معاكم. هنا علي طول لحد ما اقنعها نرجع بيتي..
فيروز
قولتلك انا مش هسيب بيتي يا عز، ويلا خد ابنك وانزلو عشان ليلي وشهد جايين
عز
جايين ليه هنا؟
فيروز
عادي هنقعد شويه مع بعض..
عز
يلا يا زفت انت هننزل سوا هاخدك معايا كام مشوار كده..
زين
فين وبعدين انا عندي مذااكره
عز
انت مش واخد الاجازه
فيروز
ابنك. متفوق وشااطر بيذاكر طول السنه من وهو صغير
عز
معلش هنعطل مجدي يعقوب شويه النهارده وهنرووح البنك نجيب فلوس...
زين
مدام فيها فلوس يبقي هغير هدومي وجاي علي طول..
دخل زين اوضته وفيروز قعدت جنب عز وقالت
هو انت اشتغلت في ايه الفتره اللي عدت دي عشان تعمل الفلوس دي كلها
عز
مش حاجه معينه بس كنت بستثمر فلوسي مع كل رجل اعمال شويه لحد ما عملت مبلغ كبير اوووي يعيشني مرتاح طول عمري من غير ما اشتغل ولا حاجه، بس دلوقتي طبعا الوضع اختلف
فيروز
ازاي يعني؟
عز
مثلا حسن اخويا مسؤليته كبيره اووي وولاده ولادي وكلهم اهو داخلين علي جواز ولازم اساعده، والاهم بقي زين اخلص بس من جواز ولاد حسن وهبدأ اعمله مستشفي خاص انا بالفعل شغال في الورق بتاعها وانا هبقي المدير لحد ما هو يتخرج ويمسك شغله..
ابتسمت فيروز وقالت
اتغيرت اووي يا عز لو كنت بتفكر كده من زمان كانت في حاجات كتير اتغيرت
عز
ما كفايه سواد بقي يا شيخه نضفي قلبك من ناحيتي خلاص، وقومي يلا عشان تساعديني اغير هدومي
فيروز
اتلممم زين هنا وما ينفعش يشوفنا مع بعض...
عز
وفيها ايه يا وليه ما انا جوزك وهو لازم يتعود علي النظام ده، اقولك اعمليلي شاااي..
فيروز
هو انا كنت الخدامه اللي جابوها ليك اهلك ما تعمل لنفسك
قام عز من جنبيها وقال
بس اسكتي ما انا ما طفشتش زمان من قليل..
فيروز بغيظ.
طيب غور من وشي يا عز وما فيش شااي خالص بقي ولا فطار واطلع بره بيتي
عز
بيتك ده جيبااه بفلوسي هننسي ولا ايه
فيروز
اعيش واجيب بفلوسك اللي انا عايززاااه
عمزلها عز وقال بخبث
علي قلبي زي العسل..
_ودخل يغير هدومه وهي ابتسمت بهدوء، وطلع زين في الوقت ده من اوضته وقالها..
زين بغيظ
يا ست شاديه في فطار جاي طلبته..
فيروز بتوتر
مااشي يا حبيبي هدخل اعملكم شااي..
_ودخلت بسرعه المطبخ وزين بصلها بغيظ ومازال مدايق من وجود ابوه معاهم في نفس البيت..
ــــــــــ #بقلم_الكاتبه_رحاب_القاضي ــــــــ
_وعدت الاياام ورا بعضها وجه يوم فرح يزن وريناد وفي بيت كمال كان طالع من الحمام وبينشف شعره وهي لابسه فستان اسود طويل للارض شكله حلو جدا وبتظبط في حجابها وبصلها كمال بأعجاب وقال..
كمال
جبتيه امتي ده؟
أسرار بجمود
جيبته انا وروان من كام يوم، انت خلاص مش هتيجي معانا الفرح
كمال
لا عندي شغل مهم في الشركه في عميل اا..
قاطعت أسرار كلامه وقالت بضيق
ما سألتكش ايه الشغل انا بسألك جاي واا لا عشان لو مرت عمي سألتني اعرف ارد عليها..
كمال بضيق
وبعدين يا أسرار هنفضل كده انا وانتي لحد امتي؟
أسرار
انا مرتاحه كده يا كمال عبدالله جه بره جاي معانا وانا اللي قولتله يجي عشان ان شاء الله يتصالح هو وروان النهارده ويتصالح مع الاستاذ حسن..
كمال
بقيتي واخده علي بيت خالي اووي ده انتي حتي بقيتي تتكلمي مع رضوي وبتهزري معاها علي الفيس ولا كأنها الاكس بتاعتي..
أسرار
مش فارق الموضوع ده اصلا هي نفسها بقي كل كلامها علي خطيبها وبتحبه جدا، انت اللي عايش في اوهام وفاكر انك محور الكون..
جات تمشي بس هو مسك ايدها وقال
انا ما فيش حاجه شغلاني دلوقتي غيرك وباخدك علي قد عقلك لحد ما تهدي وترجعي زي الاول معايا بس لصبري حدود يا أسرار..
سحبت ايدها من ايده وقالت
وانا ده اخري ومش هقدر اتعامل معاك تاني زي الاول، لو مش عجباك طريقتي دي طلقني..
كمال ابتسم بهدوء وقال
مستحيل انا مبسووط معاكي ومرتاح جدا ومش هطلقك..
_ابتسمت بسخريه وسابته وخرجت من الاوضه وهو كان مدايق جدا من طريقتها المستفزه معاه..
ــــــــــ #بقلم_الكاتبه_رحاب_القاضي ــــــــ
_وبعد شويه في بيت الاستاذ حسن بعد. كتب الكتاب بدأ الكل ييارك ليزن وريناد اللي كانو مبسوطين جدا، وعز قال بهدوء..
عز
ايه هنقعد بقي نتفرج علي بعض..
يونس بسخريه
مش العروسه اللي قالت مش عايزه فرح..
يزن
ده كان قرارنا احنا الاتنين وكده حلو احنا هنمشي خلاص..
طارق
لا لا انا مظبط سهره حلو في الكافي بتاعنا الافتتاح كان امبارح والنهارده احنا بقي هنقضي السهره فيه
حسن
طيب خلاص روحو انتو مع بعض واسهرو انا مش هقدر اروح
ليلي
ولا انا كمان هقدر اروح واسهر..
شهد
خلاص الشباب يروحو مع بعض واحنا نقعد. هنا نشرب شاي ونمشي...
يوسف
عين العقل يا ست الكل، يلا بينا احنا بقي يا شباب...
ريناد
طيب ثانيه بس هطمن علي تيا..
ليلي
انا اطمنت عليها ما تقلقيش عليها خالص، وانتي كمان يا أسرار خلي رضوي مع روز وروفان النهارده وبكره تبقي تروح مع جدتها..
_ونزلو فعلا كلهم تحت وكانت روان هتركب مع يوسف ورضوي بس عبدالله مسك ايدها وقال..
عبدالله
تعالي معايا..
روان
سيب ايدي انا هركب مع رضوي...
أسرار
خلاص يا روان خليكي معانا..
عبدالله
بقولك ايه يا اسرار اركبي معاهم انتي وانا شويه وهجيبها واجي..
جه طارق وقال
وبعدين يا عم عبدالله مش ناقصين مشاكل
عبدالله
دي مراتي يا طارق هتكلم معاها شويه لوحدنا وهرجعها تاني، خلي أسرار معاكم بس..
طارق
خلاص تمام تعالي يا أسرار معايا انا وزين وهنا اهو..
_ومشي طارق هو واسرار وعبدالله فتحلها باب العربيه جنبيه وقال..
عبدالله
اطلعي يا روان يلا..
روان
هنتكلم في ايه ما خلاص يا عبدالله
عبدالله
لا مش خلاص الموضوع مش هيخلص علي اننا نتطلق، ومش هنتكلم في الشارع عيب يلا اركبي..
_ركبت رولن العربيه وهو راح وركب جنبيها ووقف قدام كافي هادي وقالها..
عبدالله
انزلي يلا..
روان بضيق
مش عايزه انزل وما فيش داعي نقعد جوه قول اللي عندك هنا وخلاص
عبدالله
انا بحبك يا روان وما اقدرش اطلقك واسيبك
روان بسخريه
معلش شده وتزول..
عبدالله
بلاش طريقتك دي قولتلك اني غلطت وخلاص اللي حصل حصل، وانا بقيت شاايف قدامي واحده جديده كبرتي وعقلتي وبقيتي في نظر الكل بنت ما فيش منها واولهم انا..
روان
ما هو انا عشان كبرت وعقلت زي ما انت بتقول انا ما بقتش عايزاااك..
عبدالله
يبقي دي كانت رغبتك من البدايه انك مش عايزاني ما تجبيش اللي حصل مني سبب..
روان
لو انت شايف كده خلاص انا مش مستعده اكرر معاك نفس التجربه تاني، خلاص يا عبدالله ربنا يرزقك بالاحسن مني بنت الشيخ اللي انت قولت عليه ناوي تتجوزها فااكر
عبدالله
انا مش هتجوز حد ومش هطلقك..
روان بحده
وانا مش عايزااك ولا هبقي تحت رحمة مزاجك شويه عايزني وشويه شايفني واحده رخيصه ما تلزمكش..
عبدالله
يعني ده اخر كلام عندك؟!..
روان بجمود
وما عنديش غيره يا عبدالله، ووصلني البيت لو سمحت ولا اقولك انا هنزل اخد تاكسي مش طايقه اقعد جنبك تاني..
جات تنزل بس مسك ايدها وقال بنبره غاضبه
اعلي ما في خيلك اركبيه وانا مش هطلق..
روان بعِند
هخلعك يا عبدالله..
ابتسم بخبث وقال
فكري بس تعمليها ورحمة ابويا اوريكي اياام سودا، هسيبك تهدي وترجعي يا روان واستني هوصلك بيتكم..
روان بغيظ
هروح لوحدي سيبني..
عبدالله بحده
اخرسي يا بت انتي قال تروحي لوحدك قال...
_واخد العربيه ووصلها البيت واول ما وصلو نزلت ورزعت الباب وراها وطلعت فوق وهي متعصبه جدا، واول ما دخلت لقيت باباها ومامتها قااعدين ومعاهم تيا اللي قاعده علي الارض وبتلعب..
روان
انتو ايه اللي مصحيكم..
حسن
بنت اختك صحيت ومش راضيه تنام
روان
خلاص نامو انتو وانا هفضل صاحيه معاها كده كده مش جايلي نوم..
ليلي
طارق كلمني قالي يزن وريناد قالولو ييجي ياخدها ليهم وهما ماشيين
قعدت روان معاهم وقالت
معقوله هيخلو تيا معاهم يوم فرحهم، والله يزن ده ما فيش منه
حسن
ولد محترم الخوف كله من اخوه قلبي مش مرتاحله
روان
بلاش تقول كده قدام رضوي عشان هي دلوقتي يوسف عندها الدنيا وما فيها ما بتتحملش حد يجيب سيرته بنص كلمه
ليلي
ربنا يسعدها وما ننكرش برضو انه بيحبها ومش مخليها تزعل من حاجه. احنا مش عايزين اكتر من كده
حسن
ربنا يتمملهم بخير، انتي ايه اللي جابك يا روان اصلا؟
روان بضيق
ما انا كنت مع عبدالله كان عايزنا نتكلم
ليلي
طيب واتفقتو علي ايه؟
روان
انا ما وافقتش اقعد معاه في اي مكان يدوب اتكلمنا شويه في العربيه وبعدين رجعت هنا..
حسن
طيب واتفقتو علي ايه برضو؟
روان
هو رافض موضوع الطلاق وانا هطلق يعني هطلق وده اخر قرار عندي
ليلي
هو غلطان ايوه بس اعتذر وبقاله شهور اهو بيحاول يرجعك، وبعدين الطلاق مش ساهل يا روان وانتي ما كملتيش لسه سنه متجوزه وعبدالله مش وحش اووي يعني..
حسن
خلاص يا ليلي هي حره دي حياتها وهي كبيره كفايه انها تعرف الصح فين والغلط فين احنا قولنالك رأينا انك تديه فرصه تانيه وانتي مش عايزه خلاص بقي ما فيش داعي تتقابلو كل شويه وتتكلمو في كلام مالوش لازمه، لو اتواصل معاكي تاني قوليلو الكلام مع ابويا وانا هخلص الموضوع معاه خالص عشان ما يكبرش اكتر من كده...
سكتت روان وبصت للارض بحزن وحسن قال بخبث
ايه رجعتي في كلامك ولا ايه
قامت روان وقالت
لا يا بابا ما رجعتش في حاجه انا لسه عند قراري وعايزه اتطلق، هروح انام تصبحو علي خير..
ـ قالت كلامها ودخلت اوضتها وليلي وحسن فضلو قاعدين مع تيا لحد ما جه طارق واخدها..
ــــــــــ #بقلم_الكاتبه_رحاب_القاضي ــــــــ
_وفي الوقت ده في شقة سيف كان قااعد علي السرير في اوضته وبيتفرج علي صورة كتب كتاب ريناد ويزن ونظراته ملها ندم وحسره ودخلت عنده شرين وقالت بسخريه.
شرين
لسه قااعد حزين علي حبيبة القلب..
سيف بجمود
عايزه ايه يا شرين؟
شرين
عندي شغل مهم في المستشفي واحتمال ابات هتحتاج حاجه اعملهالك قبل ما امشي..
سيف بجمود
لا كتر الف خيرك اتفضلي شوفي شغلك..
شرين
ابقي روح اقعد عند مامتك لو حابب وما تنساااش تجيب بنتك بكره..
سيف
مش هينفع هبقي اشوفها في الرؤيه اللي هتحددها المحكمه الموضوع ما بقاش في ايدي خلاص.
شرين
طيب حاول معلش انا عايزه اشوفها واقعد معاها..
_ابتسملها سيف بمجامله وهي مشيت، وبعدين قاام هو بسرعه وكلم كمال وهو بيغير هدومه وقال..
سيف
ايوه يا كمال هي لسه خارجه دلوقتي انت فين وانا هجيلك..
كمال
هبعتلك. لوكيشن تيجي عليه انا مستنيك..
سيف
ماشي وانا جاااي علي طول اهو..
_ قفل معاه سيف ونزل بسرعه ورااح لكمال اللي كان واقف بعربيته قدام فيلا كبيره ونزل سيف من الاوبر اللي كان راكبه وقال..
سيف
هي جوه مش كده؟
كمال
استني قبل ما تدخل اهدي وفكر بالعقل
سيل بعصبيه
عقل ايه مراتي جوه مع واحد وبتخوني وانت تقولي فكر بالعقل
كمال بحده
ايوه عشان دي غلطتك انت اللي زي شرين دي اخرك تتسلي بيها يومين وترميها، انما تتجوزها وتفضلها علي مراتك وبنتك وبيتك يبقي تستاهل اللي حصلك ودلوقتي تحط جزمه في بوقك وتشوف اللي حصل وتسكت وتاخد حقك منها بالهداوه، الشقه بتاعتك اللي مكتوبه بأسمها تخليها ترجعها الهدايه اللي كنت بتجيبهالها تاخدها وعربيتها اللي بفلوسك برضو تاخدها وتخليها تتنازل عن المؤخر وبعدين تطلقها..
سيف بغضب
وكرامتي اللي لعبت بيها..
كمال
هتطلقها والموضوع هيخلص ما توديش نفسك في داهيه عشان واحده زي دي، وافتكر بنتك اللي سمعتها من سمعتك بلاش تدمر مستقبلها لما تكبر وتلاقي ابوها محبوس او رد سجون..
_اتنهد سيف بضيق ورااح ناحية البيت وكان لسه هيخبط بس كمال مسك ايده وقال..
كمال
هتخبط ليه هو احنا جايين نناسبهم انا معايا المفتاح الراجل اللي جوه ده تبعي اصلا وبيلعب عليها زي ما قولتلك..
_خلص كمال كلامه وفتح الباب ودخل جوه وهو وسيف وفي الوقت ده كانت شرين قاعده جنب راجل في الخمسين من عمره، واول ما شافتهم قاامت بسرعه وهي بتظبط في هدومها وقالت بخوف وتوتر..
شرين
سس سيف انت فااهم غلط والله اا انا كنت جايه هنا عشانك انت سعيد بين هيجيبلك شغل مش كده يا سعيد بيه..
قام سعيد ووقف جنب كمال وقال
تحت امرك يا كمال بيه انا ما قربتش منها هي اللي كانت بتحاول تقربلي دلوقتي وكل حاجه اتسجلت في الكاميرات ولو عايز تتأكد اتفضل
اتصدمت شرين وسيف قال بنبره غاضبه
هاا يا دكتوره يا محترمه عندك رد علي الكلام ده، اكيد لا ما عندكيش انتي تقعدي زي الشاطره وتنفذي اللي انا اقوله وبس..
ـ قعدت شرين مكانها وبصتله بخووف وكمال ابتسم بسخريه ورااح قعد بعيد عنهم بشويه وحط رجل علي رجل وهو بيبصلها بشماته..
ــــــــــ #بقلم_الكاتبه_رحاب_القاضي ــــــــ
_وفي بيت يوونس الصاوي كان يونس قااعد في البلكونه ومشغل اللابتوب بتاعه علي فيلم "حب البنات" وبيتفرج عليه بتركيز كبير ودخلت شهد الاوضه وراحت قعدت جنبيه وقالت..
شهد
الولاد رجعو اهم يزن ومراته طلعو شقتهم ويارا ويوسف كل واحد في اوضته..
يونس
هو ابنك الخايب جايب بنت مراته تقعد معاهم ليلة دخلته
شهد
بطل تقول كلامك ده وبلاش تقول كده بالذاات قداام مراته مش عشان هو محترم ومش بيرد عليه وبيحترمك يبقي تقل منه
يونس
خلاص انتي هتعمليلي حوار وبعدين انا بتكلم عليه هو، مش هو عريس دلوقتي يعني المفروض يبقي هو ومراته لوحدهم..
شهد
دي طفله يا يونس مش هتعمل دوشه اكيد
يونس بسخريه
امم علي اساس لما هما كانو اطفال انا كنت عارف اقعد دقيقتين علي بعض، شَيل نفسه بدري بدري بالجوازه دي ابنك
شهد
طيب ممكن نخلينا في حالنا المهم انه مبسووط انت تاعب نفسك ليه
يونس
خلاص سكتت اهو ركزي معايا في الفيلم
شهد
شوفته مليون مره عايزه انام
مسك ايدها وقال
لما يخلص الفيلم مش بحب اتفرج لوحدي استني اجيبلك الحته اللي فاتت دي ما اتفرجنااش عليها كويس، بصي كده ليلي علوي رقيقه ازاي وهي بتقول عوومر..
شهد
اممم بتفكرك بمين بقي؟
يونس بتوتر
ما بتفكرنيش بحد هي حلوه بس..
شهد
بطه اختك قالتلي..
يونس
قالتلك ايه خرابة البيوت دي؟
شهد بسخريه
قالتلي ان نور الله يرحمها كان فيها شبه كبير من ليلي علوي حتي كانت رقيقه كده زيها وانت كنت بتحب ليلي علوي عشان شبه حبيبة القلب..
قفل يونس اللابتوب وقال
كرهت ليلي علوي خلاص وكرهت الفيلم كله يلا ننام..
فتحت شهد اللابتوب وقالت
لا مش هنام ولا انت كمان هتناام لما الفيلم يخلص، بحلق بقي في ليلي علوي اصلا ما بيفرقش معايا..
يونس بغيظ
النكد بيجري في دم اهلك بوومه..
ضربته بالمخده وقالت
سمعتك واهو انت اللي بومه وستين بوومه
_ضحك يونس بهدوء وهي ابتسمت بصعووبه وهي بتحاول تداري ضحكتها من منكفاتهم لبعض اللي ما بتنتهيش..
ــــــــــ #بقلم_الكاتبه_رحاب_القاضي ــــــــ
_وفي الوقت ده في شقة يزن وريناد دخل يزن لاوضة تيا وقال بهدوووء..
يزن
هي لسه صاحيه؟
ريناد
معلش شويه وهتناام..
يزن
لا عادي انا قاعد بره اصلا مش بنام دلوقتي خالص..
ريناد
ماشي خمس دقايق بس وهجيلك..
ابتسم بهدوء وقال
اوكي مستنيكي براحتك..
_قال كلامه وطلع واتفاجئ بيوووسف واقف قداامه وهو مبتسم بأتسااع وقاله.
يوسف
يا فرحة امك بيك انت لسه بالبدله
يزن بصدمه
انت بتهبب ايه هنا ودخلت ازاي؟
يوسف
دخلت بالمفتاح وجاي اطمن عليك..
يزن بحده
انت اتهبلت اول واخر مره تدخل هنا بالشكل ده
يوسف
خد بالك انت كده بتجرح كرامتي
يزن
قال وانت بتحس، يووسف انا ما بهزرش ما تجيش هنا اصلا تاني غير لو انا قولتلك تيجي
يوسف
لاا والبس منين وانا هدومي كلها عندك
يزن
قصدك هدومي اللي انت بتلبس فيها معايا، بسيطه لما تعوز حاجه ابقي كلمني قولي واجيبهالك وبعدين هبقي لما اجيب حاجه جديده هجيبلك معايا عشان اخلص
يوسف
يبقي يا زين ما عملت هسيبك بقي عشان تكمل ليلتك مين قدك يا عريس النهارده تلاقيك اسعد واحد في الدنيا مش كده؟
يزن
باظ. اليوم بعينك دي يلا يا يوسف امشي..
يوسف
طيب خد المفتاااح اهووو هي ريناد فين عشان اباركلها..
اخد منه يزن المفتااح وزقه بره الشقه وقال بحده
بره يالاااااا..
_وخلاه طلع بره الشقه وقفل الباب وخرجت في الوقت ده ريناد من اوضة تيا بعد ما نااامت وقالتله..
ريناد
هو كان في مين هنا؟
يزن
ده. يوسف بيستظرف بس هانت وهيتردله، المهم تيا ناااامت؟
ريناد
ايوه ناامت وبجد. شكرا اوي علي اوضتها دي انا ما توقعتش ابداً انك هتعملها اوضه حلوه كده في شقتك هنا..
قرب منها يزن ومسك ايدها وقال
دي شقتك انتي وبيتك انتي ولازم تيا يبقالها احلي اوضه هنا لانها جزء من حياتنا وعشان تتعود علي المكان برضو..
ابتسمت بهدوء وقالت
ربنا يخليك ليا يا حبيبي..
يزن
تعالي بقي نتفرج علي بااقي الشقه ولا اقولك بلاش الشقه كلها خليها اوضتنا بس دلوقتي..
_وقبل ما ترد عليه سمعو صوت تيا بتعيط وبتنادي علي رينااااد، فأتنهد هو بنفااااذ صبر وريناد قالت بأحراج..
ريناد
معلش والله بس هي مستغربه المكان وخايفه دقيقه واحده بس هخليها تنام واجيلك..
يزن
عادي انا هدخل اغير هدومي بقي..
_ ورجعت ريناد بسرعه لتيا وهو دخل اوضته وهو مدااايق وغير هدوومه وطلع قعد في الصاله يتفرج علي التلفزيون ومستنيها تنيم بنتها وتخرج عنده عشان يبدأو اول ليله بينهم زي ما مرتبلها...
ــــــــــ #بقلم_الكاتبه_رحاب_القاضي ــــــــ
_وفي شقة لمياااء كان قااعد سيف وهو حزين جدا، ولمياااء بتطبطب عليه وقالتله..
لمياء
احمد ربنا انك شوفتها علي حقيقتها وكمال خلاك تاخد كل حاجه منها، انت طلقتها ولا لسه؟
سيف
طلقتها طبعا.. بس هي ليه عملت كده انا قصرت معاها في ايه، ده انا مديت ايدي وسرقت عبدالله اللي هو اقرب حد ليا عشاانها، عشاان ما تبقااش محتاجه لحاجه وخسرت بنتي ومراتي واشتريتها هي
لمياء
تستاهل عارف ليه عشااان شرين دي باين من الاول انها طمااعه اتخلت عنك وانت في بداية حيااتك واتجوزت واحد اغني منك عشان فلوسه وما شافتش حبك ليها، والوحيده اللي كانت واقفه جنبك وطلعتك من الحاله الوحشه اللي كنت فيها هي ريناد واتنازلت كتير عشانك كفايه انك اتجوزتها من غير شبكه ولا مهر وكمان الشقه كانت في مكان مش كويس، وفضلت واقفه جنبك لحد ما بقيت بيه وعمرها ما طلبت منك حاجه فوق طاقتك بالعكس دي كانت بتتحمل منك معامله زي الزفت ومني انا كمان وبدعي ربنا لحد ما اموت يسامحني ويسامحك علي اللي عملناااه فيها..
سيف بندم
هي اتجوزت خلاص مش هقدر اصلح اللي بينا، بس لسه في فرصه اخلي علاقتي ببنتي كويسه وانا ماليش غيرها دلوقتي
لمياء
من غير ما تزعل خالك منك يا سيف كل حاجه بالاصول
سيف
ان شاء الله يا ماما..
ــــــــــ #بقلم_الكاتبه_رحاب_القاضي ــــــــ
_وفي بيت كمال اول ما رجع من بره رااح لاوضة رضوي بته وكالعاده كانت أسرار قافله علي نفسها بالمفتاااح، فسابها ورااح دخل اوضته ونااام وتاني يوووم الصبح صحي متأخر وقاام بسرعه وغير هدومه عشان يروح شغله واول ما خرج من اوضته لقي أسرار قااعده بتفطر فقالها بحده..
كمال
مدام صاحيه مش عارفه ان عندي شغل ما جتيش ليه تصحيني؟..
أسرار ببرود
في منبه في موبيلك وفي واحد تاني جنبك دول يصحو بلد بحالها..
قعد جنبيها وقال بغيظ
خفي طريقتك دي معايا يا أسرار وانا اتعودت عليكي انك انتي اللي تصحيني وتجهزيلي هدومي والفطار زي كل يوووم
أسرار
ما بقتش حابه امثل تاني اني الزوجه المطيعه اللي بتحب جوزها وبترضيه خلاص زهقت منه..
كمال بخبث
يعني انتي مش بتحبيني؟
أسرار
طيب ما تسأل السؤال ده لنفسك انت بتحبني ولا شايفني مجرد واحده بتقضي الغرض وخلاص؟!
مسك ايدها ورد عليها بهدوء وقال
والله العظيم بحبك وبقيت حابب حياتي معاكي اووي، ده انا بقول اليوم هيخلص امتي في الشغل عشان اجيلك واقعد معاكي انتي ورضوي..
أسرار بضيق
ابعد عني يا كمال انا مرتاحه وانا بعيد عنك...
كمال بحده
هو ايه الكلام ده انا بشحت منك ولا ايه، اتعدلي يا أسرار مش معني اني سايبك براحتك يبقي هنفضل كده علي طول، ورضوي فين مش رايحه المدرسه النهارده؟
أسرار
بايته مع مرات عمي في بيت خالك، هبقي اجيبها وانا جايه من الجامعه..
كمال بجمود
لا ما فيش طلوع من البيت انا هبقي اجيبها..
أسرار
انا عندي محاضرات مهمه يا كمال..
كمال بخبث
لما تبقي تتعدلي معايا وتسمعي الكلام وتبطلي اللي بتعمليه ده هبقي اخليكي تروحي الكليه بتاعتك وكلامي يتنفذ ما فيش طلوع من البيت غير لما انا اقولك..
_ قال كلامه وسابها ومشي وهي فضلت قااعده مدايقه من طريقته معاها....
ــــــــــ #بقلم_الكاتبه_رحاب_القاضي ــــــــ
_في شقة يزن كان نايم علي الكنبه اللي في الصاله وطلعت ريناد من اوضة تيا وقربت منه وقالت بهدووء..
ريناااد
يزن.. يزن..
فتح عينيه وقال بهدوء
صباح الخير..
ريناد بتوتر
انا اسفه والله مش عارفه ازاي نمت امبارح جنب تيا ونسيتك خالص..
قام قعد ومسك ايدها باسها بهدوء وقال
ما تتأسفيش عادي ما فيش مشكله الاياام بينا كتير انا كمان كنت تعبان من المجهود. بتاع امبارح ونمت علي طول هنا..
ريناد
ربنا يخليك ليا هروح اغير هدومي واجهزلك الفطار علي طول..
يزن
استني بس هي مش تيا نامت؟!
ريناد
ايوه نايمه جوه..
يزن بخبث
طيب نلحق بقي نقعد مع بعض شويه قبل ما تصحي وو..
طلعت تيا من اوضتها في الوقت ده وقالت وهي بتعيط
مامااااا..
قامت ريناد من جنبيه بسرعه وراحت لتيا وقالت
في ايه يا حبيبة ماما انا هنا..
يزن بغيظ
هي مش كانت نايمه؟!..
ريناد ضحكت غصب عنها وقالت
مش عارفه ليه صحيت في عادتها ما بتصحااش بدري كده..
يزن
لا ما هو يوسف رشق عينه في الجوازه فده الطبيعي، خليكي معاها وانا هشووف نفطر ايه..
ريناد بأحراج
طيب انت مش زعلان هي بس تتعود علي البيت هنا وبعد كده هتبقي كل حاجه تمام..
يزن ابتسم بهدوء ورد عليها وقال
وايه اللي يزعلني في حد يزعل من بنته، هي هتفطر حاجه معينه اعملهالها؟
ريناد
ما تتعبش نفسك انا هغير هدومي وهاجي اعمل كل حاجه خمس دقايق بس..
ــــــــــ #بقلم_الكاتبه_رحاب_القاضي ــــــــ
_وبعد شويه في شركة يونس الصاوي كانت قااعده رضوي مع يوسف في مكتبه وهو قالها بهدوء..
يوسف
بصي هو انا يدوب هتخرج وهمسك كل حاجه هنا فتشتغلي معايا احسن..
رضوي
انا شغلي مع يزن انا وهو فاهمين بعض ومجال دراستي اجي هنا اعمل ايه؟
يوسف
اللي انتي عايزااه انا اصلا ضد انك تشتغلي فلو مصممه يبقي قدامي حتي لو عايزه اعملك مكتب تقعدي عليه وما تعمليش جاجه وتاخدي اكبر مرتب ما عنديش مشكله لحد ما تزهقي وتقعدي في البيت
رضوي
نعمم اقعد في البيت؟
يوسف
قصدي يعني لما يبقي عندنا اولاد بقي وكده
رضوي
انت مش شايف ان لسه بدري علي الكلام ده يا يوسف، وبعدين انا بحب شغلي ومرتاحه فيه لما هحس نفسي تعبانه منه من نفسي هقولك مش عايزه اشتغل
يوسف بحده
انا مش عايز مراتي تشتغل وابقي انا هنا وانتي قااعده وسط رجاله هناك
رضوي
ايه اللي انت بتقوله ده وبعدين ما يزن معايا علي طول وشغاله مع اخوك
يوسف
انا قولت اللي عندي يا رضوي انا بعملك كل حاجه ترضيكي ما فيش مشكله يعني لو اتنازلتي شويه عشاااني، وبعدين انا وبيتك هنبقي اهم عندك من اي حاجه.
رضوي بحزن
يا يوسف انا شاطره جدا في شغلي وانت عارف كده كويس
يوسف
يعني انتي مصممه علي قرارك
سكتت رضوي وهو قال بحده
تمام رووحي شووفي شغلك بقي انا مش فاضي
رضوي
هو ايه ده احنا لسه بنتكلم
يوسف
بقالنا شهور بنتكلم في ام الموضوع ده، ودي اول حاجه اطلبها منك وانتي مش قادره تشتري خاطري وتسمعي كلامي، هو انتي فاكره يا رضوي عشان بحبك هفضل ديما اجي علي نفسي عشان ارضيكي انا برضو هبقي مستني منك مقابل حبي واهتمامي بيكي ده اهتمام وحب، بس انا مش شاايف حاجه من الكلام ده خالص..
رضوي بضيق
لا علي فكره انا كمان بحبك وبهتم بيك وانت عندي اهم. من اي حاجه ولو علي الشغل خلاص موافقه ما اشتغلش بس ما تزعلش انت..
ابتسم بأتسااع وقال
قولي والله..
ابتسمت بحب وقالت
والله عشان تعرف بس ان كمان بحبك وانك عندي اهم من اي حاجه..
قاام وقرب منها وهي قااعده علي الكنبه وقال
طيب ما انا عارف واهو اتأكدت بس ايه الحلاوه دي نورتي وانتي معايا من لما اتخطبنا..
رضوي بكسوف وتوتر
اوعي يا يوسف عيب احنا في المكتب..
يوسف بخبث
ما ده حلو برضو ما حدش هيزعجنا..
دخل يونس في الوقت ده وهو بيقول
انت يا حيوان في ورق ااا انت بتهبب ايه؟.
_قامت رضوي بسرعه ووشها قلب احمر بخجل ويوسف قال بغيظ...
يوسف
نعمم يا مفسد. اللحظات السعيده خير..
يونس بسخريه
انت اللي فقري..... فين ورق الصفقه الجديده اللي بقالك اسبوع شغال عليه
يوسف
ساعه بالكتير هراجعه وهيبقي عند. حضرتك
يونس
ازيك. يا رضوي عامله ايه؟
رضوي
الحمد لله يا اونكل كويسه، انا همشي بقي يا يوسف عشان اشووف الشغل..
يوسف
اوكي يا حبيبتي وما تنسيش اللي اتفقنا عليه اول ما تخلص اجازة يزن ما فيش شغل تاني
رضوي
ان شاء الله، بعد اذنك يا اونكل يونس..
يونس
اذنك معاكي يا بنتي وابقي سلميلي علي ابوكي
رضوي
الله يسلمك حاضر..
مشيت رضوي ويونس قال بشك
هو انت هتخليها تسيب شغلها ولا ايه؟
يوسف
ايوه اتفقنا انا وهي انها تقعد في البيت بعد الجواز
يونس
بس البنت شاطره في شغلها ليه تقعدها في البيت
يوسف
انا هبقي مرتاح كده وهي في البيت يا بابا..
يونس
وهي وافقت
يوسف بثقه
ما تقدرش تقولي لا
يونس بسخريه
عشاان عبيطه وانت لو بتحبها بجد ما تحرمهاش من شغلها ومن الحاجه اللي هي بتحبها وشااطره فيها، وبعدين ما هي هتبقي شغاله مع اخوك مش مع حد غريب
يوسف
بابا لو سمحت القرار ده ليا انا وليها وبلاش تقول الكلام ده قدامها برضو..
يونس
زي ما تحب خلص الورق وهاته ليا علي المكتب ولما ابعتلك تيجي لحد عندي ما تخلنيش انا اللي اجيلك
يوسف
حاضر..
ــــــــــ #بقلم_الكاتبه_رحاب_القاضي ــــــــ
_وفي بيت سوزان مامت نيللي كانت قاعده نيللي في اوضتها وماسكه موبيلها بتقلب فيه ودخل عندها فتحي وقال بحده..
فتحي
انتي كلمتي الدكتور شكري عشان تنزلي اللي في بطنك ده؟
وقفت نيللي وقالت بقلق
ايوه عشان الموضوع يخلص خالص..
فتحي بحده
الموضوع مش هيخلص انا مستني اعرف مين اللي غلطتي معاه الغلطه دي الاول وبعدين اقرر تعملي ايه..
نيللي
دي حياتي انا وانا اللي اقرر اعمل ايه وما اعملش ايه
فتحي
هو سؤال واحد وتردي عليا رد يرحني، مين ابو اللي في بطنك؟
نيللي بدموع
ما اعرفش..
_نزل بأيده علي وشها خلاها وقعت علي السرير وراها وقرب منها ومسكها من شعرها وقال بنبره غاضبه
فتحي
اقسم بالله اقتلك واخلص منك، الموضوع ده لازم يتصلح بالطريقه اللي انا عايزها، انطقي ابن مين ده؟
ردت عليه ببكاء وقالت
مش هقول واللي عايز تعمله اعمله يا بابا..
دخلت في الوقت ده سوزان وقالتله بعصبيه
ابعد عنها يا فتحي سيب بنتي..
قام فتحي وقال بحده
خليها تنطق مين ده اللي هي مش راضيه تنطق اسمه، خايفه عليه ولا خايفه منه ما تتكلم وتريحني مش كفايه العمله المهببه دي اللي هتخليني حاطط راسي في الطين لاخر عمري..
سوازن
تعالي بس سيبها دلوقتي تهدي وبعدين نتكلم معاها...
_واخدته سوزان وطلعو بره وقامت نيللي وقفلت عليها اوضتها بالمفتااح وفضلت تعيط بحزن وقلة حيله، وبره قعدت سوزان هي وفتحي وقالتله..
سوزان
ريم جايه وهنعرف منها كل حاجه..
فتحي
هي ريم تعرف اصلا؟
سوزان
اكيد نيللي مالهاش صحاب غير ريم واسرارهم مع بعض من زمان
فتحي
تمام كلميها استعجليها..
_وفعلا بعد شويه جات ريم وقعدت مع فتحي وسوزان وهي متوتره جدا وفتحي قال بجديه..
فتحي
انا عايز مصلحة بنتي يا ريم اولا هي رافضه ليه تتكلم وتقول مين اللي غلطت معاه ده، انا هصلح كل حاجه واقدر اعمل حاجات كتير الم بيها الموضوع..
سوزان
لو خايفه علي صحبتك وسمعتها يا ريم اتكلمي وقولي اللي هي مخبيااه عننا، مين اللي ضحك عليها ده وغلطت معاه
ريم بحزن
نيللي ما غلطتش اللي حصل ده غصب عنها هو اللي قرب منها من غير رضاها..
فتحي بعصبيه
هو مين اللي اتجرأ يعمل كده في بنتي انا انطقي يا ريم؟
سوازان بدموع
قولي يا ريم هو مين؟
ريم بقلق
هي رافضه تقولكم بس عشان مش عايزه فضايح وخايفه علي سمعتها
فتحي بنفااذ صبر
انطقي يا ريم مين اللي عمل كده في بنتي؟
ريم
يوسف الصاوي..
سوزان بصدمه
مش معقول ابن شهد؟!
فتحي
مش الواد ده اللي كان متقدملها عشان يتجوزها؟
سوزان
ايوه هو المهم انت ناوي تعمل ايه بقي؟
فتحي بنبره غاضبه
هسففه تراب الارض هو واللي جابه..
_تفتكرو بقي هيحصل ايه؟؟..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كان الباب بيخبط وفتحت روان ولقيت سيف وعز واقفين قدامها..
روان
نعم يا سيف عايز ايه؟
عز
بس يا روان وابوكي فين؟
روان
بابا في الشغل في حاجه ولا ايه يا زيزو..
سيف
انا عايز تيا ادخلي هاتيها من جوه يلا..
روان
ما تتكلم كويس هو انا شغاله عندك وبعدين تيا مش هنا..
جات ليلي في الوقت ده من جوه وقالت
بتكلمي مين يا روان... اهلا يا ابن لمياااء خير؟
عز
هاتي تيا لابوها يا ليلي هتقضي اليوم معاه عند لميااء ويجيبهالكم بالليل..
ليلي بقلق
هاا لا لا ما اقدرش اديهاله بعد اللي حصل..
سيف بهدوء
انا طلقت شرين يا مرات خالي وقاعد عند امي ومحتاج تيا النهارده عشاان خاطري والله هقضي معاها اليوم وبالليل هجيبهالكم والله، وانا اسف علي كل اللي حصل مني قبل كده بس بلاش تحرموني من بنتي وريناد مش موجوده فخليها معايا النهارده..
عز
عشان. خاطري انا يا ليلي هاتيها وعلي ضمانتي هيجيبها بالليل..
ليلي بقلق
مم ما هي مش هنا مع امها..
سيف
مع امها فين هي مش المفروض تبقي معاكي يا مرات خالي
ليلي
اا انا تعبت شويه بالليل تيا كانت بتعيط عليها فأخدتها معاها
سيف بحده
لو يا مرات خالي مسؤليتك كبيره ومش هتقدري تاخدي بالك من تيا فأمي فاضيه وتقدر تهتم بيها وتبقي بنتي قدام عيني مش قااعده في بيت راجل غريب
روان
ده جوز مامتها مش غريب وبعدين انت مالك
عز.
بس يا روان خلاص يا سيف انا هجيبهالك بكره..
سيف بعصبيه
لا يا خالي شكرا انا هعرف اخد بنتي بطريقتي وبالقانون..
قال كلامه ومشي وهو متعصب وليلي قالت لعز
مش تقولي الاول قبل ما تجيبه وتيجي
عز
انا فااكر تيا معاكم هنا، انا هرووح اجيبها من عند امها وهوديها لـ لمياااء وهصلح الموضوع ما تقلقوش..
_تفتكرو بقي عز هيقدر يصلح الوضع بينهم ولا لا؟
_نلتقي البارت القادم👋👋👋👋👋
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
#بقلم_الكاتبه_رحاب_القاضي
